| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
5. த்³வின்னங் லோகுப்பன்னானங் ஸமகபா⁴வபஞ்ஹோ
5. Dvinnaṃ lokuppannānaṃ samakabhāvapañho
5. ராஜா ஆஹ ‘‘ப⁴ந்தே நாக³ஸேன, யோ இத⁴ காலங்கதோ ப்³ரஹ்மலோகே உப்பஜ்ஜெய்ய, யோ ச இத⁴ காலங்கதோ கஸ்மீரே உப்பஜ்ஜெய்ய, கோ சிரதரங் கோ ஸீக⁴தர’’ந்தி? ‘‘ஸமகங், மஹாராஜா’’தி.
5. Rājā āha ‘‘bhante nāgasena, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, ko cirataraṃ ko sīghatara’’nti? ‘‘Samakaṃ, mahārājā’’ti.
‘‘ஓபம்மங் கரோஹீ’’தி. ‘‘குஹிங் பன, மஹாராஜ, தவ ஜாதனக³ர’’ந்தி? ‘‘அத்தி², ப⁴ந்தே, கலஸிகா³மோ நாம, தத்தா²ஹங் ஜாதோ’’தி. ‘‘கீவ தூ³ரோ, மஹாராஜ, இதோ கலஸிகா³மோ ஹோதீ’’தி. ‘‘த்³விமத்தானி, ப⁴ந்தே, யோஜனஸதானீ’’தி. ‘‘கீவ தூ³ரங், மஹாராஜ, இதோ கஸ்மீரங் ஹோதீ’’தி? ‘‘த்³வாத³ஸ, ப⁴ந்தே, யோஜனானீ’’தி. ‘‘இங்க⁴, த்வங் மஹாராஜ, கலஸிகா³மங் சிந்தேஹீ’’தி. ‘‘சிந்திதோ, ப⁴ந்தே’’தி. ‘‘இங்க⁴, த்வங் மஹாராஜ, கஸ்மீரங் சிந்தேஹீ’’தி. ‘‘சிந்திதங் ப⁴ந்தே’’தி. ‘‘கதமங் நு கோ², மஹாராஜ, சிரேன சிந்திதங், கதமங் ஸீக⁴தர’’ந்தி? ‘‘ஸமகங் ப⁴ந்தே’’தி. ‘‘ஏவமேவ கோ², மஹாராஜ, யோ இத⁴ காலங்கதோ ப்³ரஹ்மலோகே உப்பஜ்ஜெய்ய, யோ ச இத⁴ காலங்கதோ கஸ்மீரே உப்பஜ்ஜெய்ய, ஸமகங் யேவ உப்பஜ்ஜந்தீ’’தி.
‘‘Opammaṃ karohī’’ti. ‘‘Kuhiṃ pana, mahārāja, tava jātanagara’’nti? ‘‘Atthi, bhante, kalasigāmo nāma, tatthāhaṃ jāto’’ti. ‘‘Kīva dūro, mahārāja, ito kalasigāmo hotī’’ti. ‘‘Dvimattāni, bhante, yojanasatānī’’ti. ‘‘Kīva dūraṃ, mahārāja, ito kasmīraṃ hotī’’ti? ‘‘Dvādasa, bhante, yojanānī’’ti. ‘‘Iṅgha, tvaṃ mahārāja, kalasigāmaṃ cintehī’’ti. ‘‘Cintito, bhante’’ti. ‘‘Iṅgha, tvaṃ mahārāja, kasmīraṃ cintehī’’ti. ‘‘Cintitaṃ bhante’’ti. ‘‘Katamaṃ nu kho, mahārāja, cirena cintitaṃ, katamaṃ sīghatara’’nti? ‘‘Samakaṃ bhante’’ti. ‘‘Evameva kho, mahārāja, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, samakaṃ yeva uppajjantī’’ti.
‘‘பி⁴ய்யோ ஓபம்மங் கரோஹீ’’தி. ‘‘தங் கிங் மஞ்ஞஸி, மஹாராஜ, த்³வே ஸகுணா ஆகாஸேன க³ச்செ²ய்யுங் , தேஸு ஏகோ உச்சே ருக்கே² நிஸீதெ³ய்ய, ஏகோ நீசே ருக்கே² நிஸீதெ³ய்ய, தேஸங் ஸமகங் பதிட்டி²தானங் கதமஸ்ஸ சா²யா பட²மதரங் பத²வியங் பதிட்ட²ஹெய்ய, கதமஸ்ஸ சா²யா சிரேன பத²வியங் பதிட்ட²ஹெய்யா’’தி? ‘‘ஸமகங், ப⁴ந்தே’’தி. ‘‘ஏவமேவ கோ², மஹாராஜ, யோ இத⁴ காலங்கதோ ப்³ரஹ்மலோகே உப்பஜ்ஜெய்ய, யோ ச இத⁴ காலங்கதோ கஸ்மீரே உப்பஜ்ஜெய்ய, ஸமகங் யேவ உப்பஜ்ஜந்தீ’’தி.
‘‘Bhiyyo opammaṃ karohī’’ti. ‘‘Taṃ kiṃ maññasi, mahārāja, dve sakuṇā ākāsena gaccheyyuṃ , tesu eko ucce rukkhe nisīdeyya, eko nīce rukkhe nisīdeyya, tesaṃ samakaṃ patiṭṭhitānaṃ katamassa chāyā paṭhamataraṃ pathaviyaṃ patiṭṭhaheyya, katamassa chāyā cirena pathaviyaṃ patiṭṭhaheyyā’’ti? ‘‘Samakaṃ, bhante’’ti. ‘‘Evameva kho, mahārāja, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, samakaṃ yeva uppajjantī’’ti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
த்³வின்னங் லோகுப்பன்னானங் ஸமகபா⁴வபஞ்ஹோ பஞ்சமோ.
Dvinnaṃ lokuppannānaṃ samakabhāvapañho pañcamo.
