| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
५. द्विन्नं लोकुप्पन्नानं समकभावपञ्हो
5. Dvinnaṃ lokuppannānaṃ samakabhāvapañho
५. राजा आह ‘‘भन्ते नागसेन, यो इध कालङ्कतो ब्रह्मलोके उप्पज्जेय्य, यो च इध कालङ्कतो कस्मीरे उप्पज्जेय्य, को चिरतरं को सीघतर’’न्ति? ‘‘समकं, महाराजा’’ति।
5. Rājā āha ‘‘bhante nāgasena, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, ko cirataraṃ ko sīghatara’’nti? ‘‘Samakaṃ, mahārājā’’ti.
‘‘ओपम्मं करोही’’ति। ‘‘कुहिं पन, महाराज, तव जातनगर’’न्ति? ‘‘अत्थि, भन्ते, कलसिगामो नाम, तत्थाहं जातो’’ति। ‘‘कीव दूरो, महाराज, इतो कलसिगामो होती’’ति। ‘‘द्विमत्तानि, भन्ते, योजनसतानी’’ति। ‘‘कीव दूरं, महाराज, इतो कस्मीरं होती’’ति? ‘‘द्वादस, भन्ते, योजनानी’’ति। ‘‘इङ्घ, त्वं महाराज, कलसिगामं चिन्तेही’’ति। ‘‘चिन्तितो, भन्ते’’ति। ‘‘इङ्घ, त्वं महाराज, कस्मीरं चिन्तेही’’ति। ‘‘चिन्तितं भन्ते’’ति। ‘‘कतमं नु खो, महाराज, चिरेन चिन्तितं, कतमं सीघतर’’न्ति? ‘‘समकं भन्ते’’ति। ‘‘एवमेव खो, महाराज, यो इध कालङ्कतो ब्रह्मलोके उप्पज्जेय्य, यो च इध कालङ्कतो कस्मीरे उप्पज्जेय्य, समकं येव उप्पज्जन्ती’’ति।
‘‘Opammaṃ karohī’’ti. ‘‘Kuhiṃ pana, mahārāja, tava jātanagara’’nti? ‘‘Atthi, bhante, kalasigāmo nāma, tatthāhaṃ jāto’’ti. ‘‘Kīva dūro, mahārāja, ito kalasigāmo hotī’’ti. ‘‘Dvimattāni, bhante, yojanasatānī’’ti. ‘‘Kīva dūraṃ, mahārāja, ito kasmīraṃ hotī’’ti? ‘‘Dvādasa, bhante, yojanānī’’ti. ‘‘Iṅgha, tvaṃ mahārāja, kalasigāmaṃ cintehī’’ti. ‘‘Cintito, bhante’’ti. ‘‘Iṅgha, tvaṃ mahārāja, kasmīraṃ cintehī’’ti. ‘‘Cintitaṃ bhante’’ti. ‘‘Katamaṃ nu kho, mahārāja, cirena cintitaṃ, katamaṃ sīghatara’’nti? ‘‘Samakaṃ bhante’’ti. ‘‘Evameva kho, mahārāja, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, samakaṃ yeva uppajjantī’’ti.
‘‘भिय्यो ओपम्मं करोही’’ति। ‘‘तं किं मञ्ञसि, महाराज, द्वे सकुणा आकासेन गच्छेय्युं , तेसु एको उच्चे रुक्खे निसीदेय्य, एको नीचे रुक्खे निसीदेय्य, तेसं समकं पतिट्ठितानं कतमस्स छाया पठमतरं पथवियं पतिट्ठहेय्य, कतमस्स छाया चिरेन पथवियं पतिट्ठहेय्या’’ति? ‘‘समकं, भन्ते’’ति। ‘‘एवमेव खो, महाराज, यो इध कालङ्कतो ब्रह्मलोके उप्पज्जेय्य, यो च इध कालङ्कतो कस्मीरे उप्पज्जेय्य, समकं येव उप्पज्जन्ती’’ति।
‘‘Bhiyyo opammaṃ karohī’’ti. ‘‘Taṃ kiṃ maññasi, mahārāja, dve sakuṇā ākāsena gaccheyyuṃ , tesu eko ucce rukkhe nisīdeyya, eko nīce rukkhe nisīdeyya, tesaṃ samakaṃ patiṭṭhitānaṃ katamassa chāyā paṭhamataraṃ pathaviyaṃ patiṭṭhaheyya, katamassa chāyā cirena pathaviyaṃ patiṭṭhaheyyā’’ti? ‘‘Samakaṃ, bhante’’ti. ‘‘Evameva kho, mahārāja, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, samakaṃ yeva uppajjantī’’ti.
‘‘कल्लोसि, भन्ते नागसेना’’ति।
‘‘Kallosi, bhante nāgasenā’’ti.
द्विन्नं लोकुप्पन्नानं समकभावपञ्हो पञ्चमो।
Dvinnaṃ lokuppannānaṃ samakabhāvapañho pañcamo.
