| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၅. ဒ္ဝိန္နံ လောကုပ္ပန္နာနံ သမကဘာဝပဉ္ဟော
5. Dvinnaṃ lokuppannānaṃ samakabhāvapañho
၅. ရာဇာ အာဟ ‘‘ဘန္တေ နာဂသေန, ယော ဣဓ ကာလင္ကတော ဗ္ရဟ္မလောကေ ဥပ္ပဇ္ဇေယ္ယ, ယော စ ဣဓ ကာလင္ကတော ကသ္မီရေ ဥပ္ပဇ္ဇေယ္ယ, ကော စိရတရံ ကော သီဃတရ’’န္တိ? ‘‘သမကံ, မဟာရာဇာ’’တိ။
5. Rājā āha ‘‘bhante nāgasena, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, ko cirataraṃ ko sīghatara’’nti? ‘‘Samakaṃ, mahārājā’’ti.
‘‘ဩပမ္မံ ကရောဟီ’’တိ။ ‘‘ကုဟိံ ပန, မဟာရာဇ, တဝ ဇာတနဂရ’’န္တိ? ‘‘အတ္ထိ, ဘန္တေ, ကလသိဂာမော နာမ, တတ္ထာဟံ ဇာတော’’တိ။ ‘‘ကီဝ ဒူရော, မဟာရာဇ, ဣတော ကလသိဂာမော ဟောတီ’’တိ။ ‘‘ဒ္ဝိမတ္တာနိ, ဘန္တေ, ယောဇနသတာနီ’’တိ။ ‘‘ကီဝ ဒူရံ, မဟာရာဇ, ဣတော ကသ္မီရံ ဟောတီ’’တိ? ‘‘ဒ္ဝာဒသ, ဘန္တေ, ယောဇနာနီ’’တိ။ ‘‘ဣင္ဃ, တ္ဝံ မဟာရာဇ, ကလသိဂာမံ စိန္တေဟီ’’တိ။ ‘‘စိန္တိတော, ဘန္တေ’’တိ။ ‘‘ဣင္ဃ, တ္ဝံ မဟာရာဇ, ကသ္မီရံ စိန္တေဟီ’’တိ။ ‘‘စိန္တိတံ ဘန္တေ’’တိ။ ‘‘ကတမံ နု ခော, မဟာရာဇ, စိရေန စိန္တိတံ, ကတမံ သီဃတရ’’န္တိ? ‘‘သမကံ ဘန္တေ’’တိ။ ‘‘ဧဝမေဝ ခော, မဟာရာဇ, ယော ဣဓ ကာလင္ကတော ဗ္ရဟ္မလောကေ ဥပ္ပဇ္ဇေယ္ယ, ယော စ ဣဓ ကာလင္ကတော ကသ္မီရေ ဥပ္ပဇ္ဇေယ္ယ, သမကံ ယေဝ ဥပ္ပဇ္ဇန္တီ’’တိ။
‘‘Opammaṃ karohī’’ti. ‘‘Kuhiṃ pana, mahārāja, tava jātanagara’’nti? ‘‘Atthi, bhante, kalasigāmo nāma, tatthāhaṃ jāto’’ti. ‘‘Kīva dūro, mahārāja, ito kalasigāmo hotī’’ti. ‘‘Dvimattāni, bhante, yojanasatānī’’ti. ‘‘Kīva dūraṃ, mahārāja, ito kasmīraṃ hotī’’ti? ‘‘Dvādasa, bhante, yojanānī’’ti. ‘‘Iṅgha, tvaṃ mahārāja, kalasigāmaṃ cintehī’’ti. ‘‘Cintito, bhante’’ti. ‘‘Iṅgha, tvaṃ mahārāja, kasmīraṃ cintehī’’ti. ‘‘Cintitaṃ bhante’’ti. ‘‘Katamaṃ nu kho, mahārāja, cirena cintitaṃ, katamaṃ sīghatara’’nti? ‘‘Samakaṃ bhante’’ti. ‘‘Evameva kho, mahārāja, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, samakaṃ yeva uppajjantī’’ti.
‘‘ဘိယ္ယော ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ဒ္ဝေ သကုဏာ အာကာသေန ဂစ္ဆေယ္ယုံ , တေသု ဧကော ဥစ္စေ ရုက္ခေ နိသီဒေယ္ယ, ဧကော နီစေ ရုက္ခေ နိသီဒေယ္ယ, တေသံ သမကံ ပတိဋ္ဌိတာနံ ကတမသ္သ ဆာယာ ပဌမတရံ ပထဝိယံ ပတိဋ္ဌဟေယ္ယ, ကတမသ္သ ဆာယာ စိရေန ပထဝိယံ ပတိဋ္ဌဟေယ္ယာ’’တိ? ‘‘သမကံ, ဘန္တေ’’တိ။ ‘‘ဧဝမေဝ ခော, မဟာရာဇ, ယော ဣဓ ကာလင္ကတော ဗ္ရဟ္မလောကေ ဥပ္ပဇ္ဇေယ္ယ, ယော စ ဣဓ ကာလင္ကတော ကသ္မီရေ ဥပ္ပဇ္ဇေယ္ယ, သမကံ ယေဝ ဥပ္ပဇ္ဇန္တီ’’တိ။
‘‘Bhiyyo opammaṃ karohī’’ti. ‘‘Taṃ kiṃ maññasi, mahārāja, dve sakuṇā ākāsena gaccheyyuṃ , tesu eko ucce rukkhe nisīdeyya, eko nīce rukkhe nisīdeyya, tesaṃ samakaṃ patiṭṭhitānaṃ katamassa chāyā paṭhamataraṃ pathaviyaṃ patiṭṭhaheyya, katamassa chāyā cirena pathaviyaṃ patiṭṭhaheyyā’’ti? ‘‘Samakaṃ, bhante’’ti. ‘‘Evameva kho, mahārāja, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, samakaṃ yeva uppajjantī’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ဒ္ဝိန္နံ လောကုပ္ပန္နာနံ သမကဘာဝပဉ္ဟော ပဉ္စမော။
Dvinnaṃ lokuppannānaṃ samakabhāvapañho pañcamo.
