| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
5. ද්‌වින්‌නං ලොකුප්‌පන්‌නානං සමකභාවපඤ්‌හො
5. Dvinnaṃ lokuppannānaṃ samakabhāvapañho
5. රාජා ආහ ‘‘භන්‌තෙ නාගසෙන, යො ඉධ කාලඞ්‌කතො බ්‍රහ්‌මලොකෙ උප්‌පජ්‌ජෙය්‍ය, යො ච ඉධ කාලඞ්‌කතො කස්‌මීරෙ උප්‌පජ්‌ජෙය්‍ය, කො චිරතරං කො සීඝතර’’න්‌ති? ‘‘සමකං, මහාරාජා’’ති.
5. Rājā āha ‘‘bhante nāgasena, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, ko cirataraṃ ko sīghatara’’nti? ‘‘Samakaṃ, mahārājā’’ti.
‘‘ඔපම්‌මං කරොහී’’ති. ‘‘කුහිං පන, මහාරාජ, තව ජාතනගර’’න්‌ති? ‘‘අත්‌ථි, භන්‌තෙ, කලසිගාමො නාම, තත්‌ථාහං ජාතො’’ති. ‘‘කීව දූරො, මහාරාජ, ඉතො කලසිගාමො හොතී’’ති. ‘‘ද්‌විමත්‌තානි, භන්‌තෙ, යොජනසතානී’’ති. ‘‘කීව දූරං, මහාරාජ, ඉතො කස්‌මීරං හොතී’’ති? ‘‘ද්‌වාදස, භන්‌තෙ, යොජනානී’’ති. ‘‘ඉඞ්‌ඝ, ත්‌වං මහාරාජ, කලසිගාමං චින්‌තෙහී’’ති. ‘‘චින්‌තිතො, භන්‌තෙ’’ති. ‘‘ඉඞ්‌ඝ, ත්‌වං මහාරාජ, කස්‌මීරං චින්‌තෙහී’’ති. ‘‘චින්‌තිතං භන්‌තෙ’’ති. ‘‘කතමං නු ඛො, මහාරාජ, චිරෙන චින්‌තිතං, කතමං සීඝතර’’න්‌ති? ‘‘සමකං භන්‌තෙ’’ති. ‘‘එවමෙව ඛො, මහාරාජ, යො ඉධ කාලඞ්‌කතො බ්‍රහ්‌මලොකෙ උප්‌පජ්‌ජෙය්‍ය, යො ච ඉධ කාලඞ්‌කතො කස්‌මීරෙ උප්‌පජ්‌ජෙය්‍ය, සමකං යෙව උප්‌පජ්‌ජන්‌තී’’ති.
‘‘Opammaṃ karohī’’ti. ‘‘Kuhiṃ pana, mahārāja, tava jātanagara’’nti? ‘‘Atthi, bhante, kalasigāmo nāma, tatthāhaṃ jāto’’ti. ‘‘Kīva dūro, mahārāja, ito kalasigāmo hotī’’ti. ‘‘Dvimattāni, bhante, yojanasatānī’’ti. ‘‘Kīva dūraṃ, mahārāja, ito kasmīraṃ hotī’’ti? ‘‘Dvādasa, bhante, yojanānī’’ti. ‘‘Iṅgha, tvaṃ mahārāja, kalasigāmaṃ cintehī’’ti. ‘‘Cintito, bhante’’ti. ‘‘Iṅgha, tvaṃ mahārāja, kasmīraṃ cintehī’’ti. ‘‘Cintitaṃ bhante’’ti. ‘‘Katamaṃ nu kho, mahārāja, cirena cintitaṃ, katamaṃ sīghatara’’nti? ‘‘Samakaṃ bhante’’ti. ‘‘Evameva kho, mahārāja, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, samakaṃ yeva uppajjantī’’ti.
‘‘භිය්‍යො ඔපම්‌මං කරොහී’’ති. ‘‘තං කිං මඤ්‌ඤසි, මහාරාජ, ද්‌වෙ සකුණා ආකාසෙන ගච්‌ඡෙය්‍යුං , තෙසු එකො උච්‌චෙ රුක්‌ඛෙ නිසීදෙය්‍ය, එකො නීචෙ රුක්‌ඛෙ නිසීදෙය්‍ය, තෙසං සමකං පතිට්‌ඨිතානං කතමස්‌ස ඡායා පඨමතරං පථවියං පතිට්‌ඨහෙය්‍ය, කතමස්‌ස ඡායා චිරෙන පථවියං පතිට්‌ඨහෙය්‍යා’’ති? ‘‘සමකං, භන්‌තෙ’’ති. ‘‘එවමෙව ඛො, මහාරාජ, යො ඉධ කාලඞ්‌කතො බ්‍රහ්‌මලොකෙ උප්‌පජ්‌ජෙය්‍ය, යො ච ඉධ කාලඞ්‌කතො කස්‌මීරෙ උප්‌පජ්‌ජෙය්‍ය, සමකං යෙව උප්‌පජ්‌ජන්‌තී’’ති.
‘‘Bhiyyo opammaṃ karohī’’ti. ‘‘Taṃ kiṃ maññasi, mahārāja, dve sakuṇā ākāsena gaccheyyuṃ , tesu eko ucce rukkhe nisīdeyya, eko nīce rukkhe nisīdeyya, tesaṃ samakaṃ patiṭṭhitānaṃ katamassa chāyā paṭhamataraṃ pathaviyaṃ patiṭṭhaheyya, katamassa chāyā cirena pathaviyaṃ patiṭṭhaheyyā’’ti? ‘‘Samakaṃ, bhante’’ti. ‘‘Evameva kho, mahārāja, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, samakaṃ yeva uppajjantī’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
ද්‌වින්‌නං ලොකුප්‌පන්‌නානං සමකභාවපඤ්‌හො පඤ්‌චමො.
Dvinnaṃ lokuppannānaṃ samakabhāvapañho pañcamo.
