| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༥. དྭིནྣཾ ལོཀུཔྤནྣཱནཾ སམཀབྷཱཝཔཉྷོ
5. Dvinnaṃ lokuppannānaṃ samakabhāvapañho
༥. རཱཛཱ ཨཱཧ ‘‘བྷནྟེ ནཱགསེན, ཡོ ཨིདྷ ཀཱལངྐཏོ བྲཧྨལོཀེ ཨུཔྤཛྫེཡྻ, ཡོ ཙ ཨིདྷ ཀཱལངྐཏོ ཀསྨཱིརེ ཨུཔྤཛྫེཡྻ, ཀོ ཙིརཏརཾ ཀོ སཱིགྷཏར’’ནྟི? ‘‘སམཀཾ, མཧཱརཱཛཱ’’ཏི།
5. Rājā āha ‘‘bhante nāgasena, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, ko cirataraṃ ko sīghatara’’nti? ‘‘Samakaṃ, mahārājā’’ti.
‘‘ཨོཔམྨཾ ཀརོཧཱི’’ཏི། ‘‘ཀུཧིཾ པན, མཧཱརཱཛ, ཏཝ ཛཱཏནགར’’ནྟི? ‘‘ཨཏྠི, བྷནྟེ, ཀལསིགཱམོ ནཱམ, ཏཏྠཱཧཾ ཛཱཏོ’’ཏི། ‘‘ཀཱིཝ དཱུརོ, མཧཱརཱཛ, ཨིཏོ ཀལསིགཱམོ ཧོཏཱི’’ཏི། ‘‘དྭིམཏྟཱནི, བྷནྟེ, ཡོཛནསཏཱནཱི’’ཏི། ‘‘ཀཱིཝ དཱུརཾ, མཧཱརཱཛ, ཨིཏོ ཀསྨཱིརཾ ཧོཏཱི’’ཏི? ‘‘དྭཱདས, བྷནྟེ, ཡོཛནཱནཱི’’ཏི། ‘‘ཨིངྒྷ, ཏྭཾ མཧཱརཱཛ, ཀལསིགཱམཾ ཙིནྟེཧཱི’’ཏི། ‘‘ཙིནྟིཏོ, བྷནྟེ’’ཏི། ‘‘ཨིངྒྷ, ཏྭཾ མཧཱརཱཛ, ཀསྨཱིརཾ ཙིནྟེཧཱི’’ཏི། ‘‘ཙིནྟིཏཾ བྷནྟེ’’ཏི། ‘‘ཀཏམཾ ནུ ཁོ, མཧཱརཱཛ, ཙིརེན ཙིནྟིཏཾ, ཀཏམཾ སཱིགྷཏར’’ནྟི? ‘‘སམཀཾ བྷནྟེ’’ཏི། ‘‘ཨེཝམེཝ ཁོ, མཧཱརཱཛ, ཡོ ཨིདྷ ཀཱལངྐཏོ བྲཧྨལོཀེ ཨུཔྤཛྫེཡྻ, ཡོ ཙ ཨིདྷ ཀཱལངྐཏོ ཀསྨཱིརེ ཨུཔྤཛྫེཡྻ, སམཀཾ ཡེཝ ཨུཔྤཛྫནྟཱི’’ཏི།
‘‘Opammaṃ karohī’’ti. ‘‘Kuhiṃ pana, mahārāja, tava jātanagara’’nti? ‘‘Atthi, bhante, kalasigāmo nāma, tatthāhaṃ jāto’’ti. ‘‘Kīva dūro, mahārāja, ito kalasigāmo hotī’’ti. ‘‘Dvimattāni, bhante, yojanasatānī’’ti. ‘‘Kīva dūraṃ, mahārāja, ito kasmīraṃ hotī’’ti? ‘‘Dvādasa, bhante, yojanānī’’ti. ‘‘Iṅgha, tvaṃ mahārāja, kalasigāmaṃ cintehī’’ti. ‘‘Cintito, bhante’’ti. ‘‘Iṅgha, tvaṃ mahārāja, kasmīraṃ cintehī’’ti. ‘‘Cintitaṃ bhante’’ti. ‘‘Katamaṃ nu kho, mahārāja, cirena cintitaṃ, katamaṃ sīghatara’’nti? ‘‘Samakaṃ bhante’’ti. ‘‘Evameva kho, mahārāja, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, samakaṃ yeva uppajjantī’’ti.
‘‘བྷིཡྻོ ཨོཔམྨཾ ཀརོཧཱི’’ཏི། ‘‘ཏཾ ཀིཾ མཉྙསི, མཧཱརཱཛ, དྭེ སཀུཎཱ ཨཱཀཱསེན གཙྪེཡྻུཾ , ཏེསུ ཨེཀོ ཨུཙྩེ རུཀྑེ ནིསཱིདེཡྻ, ཨེཀོ ནཱིཙེ རུཀྑེ ནིསཱིདེཡྻ, ཏེསཾ སམཀཾ པཏིཊྛིཏཱནཾ ཀཏམསྶ ཚཱཡཱ པཋམཏརཾ པཐཝིཡཾ པཏིཊྛཧེཡྻ, ཀཏམསྶ ཚཱཡཱ ཙིརེན པཐཝིཡཾ པཏིཊྛཧེཡྻཱ’’ཏི? ‘‘སམཀཾ, བྷནྟེ’’ཏི། ‘‘ཨེཝམེཝ ཁོ, མཧཱརཱཛ, ཡོ ཨིདྷ ཀཱལངྐཏོ བྲཧྨལོཀེ ཨུཔྤཛྫེཡྻ, ཡོ ཙ ཨིདྷ ཀཱལངྐཏོ ཀསྨཱིརེ ཨུཔྤཛྫེཡྻ, སམཀཾ ཡེཝ ཨུཔྤཛྫནྟཱི’’ཏི།
‘‘Bhiyyo opammaṃ karohī’’ti. ‘‘Taṃ kiṃ maññasi, mahārāja, dve sakuṇā ākāsena gaccheyyuṃ , tesu eko ucce rukkhe nisīdeyya, eko nīce rukkhe nisīdeyya, tesaṃ samakaṃ patiṭṭhitānaṃ katamassa chāyā paṭhamataraṃ pathaviyaṃ patiṭṭhaheyya, katamassa chāyā cirena pathaviyaṃ patiṭṭhaheyyā’’ti? ‘‘Samakaṃ, bhante’’ti. ‘‘Evameva kho, mahārāja, yo idha kālaṅkato brahmaloke uppajjeyya, yo ca idha kālaṅkato kasmīre uppajjeyya, samakaṃ yeva uppajjantī’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
དྭིནྣཾ ལོཀུཔྤནྣཱནཾ སམཀབྷཱཝཔཉྷོ པཉྩམོ།
Dvinnaṃ lokuppannānaṃ samakabhāvapañho pañcamo.
