| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. ஏகபீ³ஜீஸுத்தவண்ணனா
4. Ekabījīsuttavaṇṇanā
494. சதுத்தே² ததோ முது³தரேஹீதி விபஸ்ஸனதோ நிஸ்ஸக்கங் வேதி³தப்³ப³ங். ஸமத்தானி ஹி பஞ்சிந்த்³ரியானி அரஹத்தமக்³க³ஸ்ஸ விபஸ்ஸனிந்த்³ரியானி நாம ஹொந்தி, ததோ முது³தரானி அந்தராபரினிப்³பா³யிஸ்ஸ விபஸ்ஸனிந்த்³ரியானி, ததோ முது³தரானி உபஹச்சபரினிப்³பா³யிஸ்ஸ, ததோ முது³தரானி அஸங்கா²ரபரினிப்³பா³யிஸ்ஸ, ததோ முது³தரானி ஸஸங்கா²ரபரினிப்³பா³யிஸ்ஸ, ததோ முது³தரானி உத்³த⁴ங்ஸோதஅகனிட்ட²கா³மிஸ்ஸ விபஸ்ஸனிந்த்³ரியானி நாம. இதா⁴பி புரிமனயேனேவ அரஹத்தமக்³கே³ ட²த்வா பஞ்ச நிஸ்ஸக்கானி நீஹரிதப்³பா³னி.
494. Catutthe tato mudutarehīti vipassanato nissakkaṃ veditabbaṃ. Samattāni hi pañcindriyāni arahattamaggassa vipassanindriyāni nāma honti, tato mudutarāni antarāparinibbāyissa vipassanindriyāni, tato mudutarāni upahaccaparinibbāyissa, tato mudutarāni asaṅkhāraparinibbāyissa, tato mudutarāni sasaṅkhāraparinibbāyissa, tato mudutarāni uddhaṃsotaakaniṭṭhagāmissa vipassanindriyāni nāma. Idhāpi purimanayeneva arahattamagge ṭhatvā pañca nissakkāni nīharitabbāni.
யதா² பன புரிமனயே ஸகதா³கா³மிமக்³கே³ ட²த்வா தீணி நிஸ்ஸக்கானி, ஏவமித⁴ பஞ்ச நீஹரிதப்³பா³னி. ஸகதா³கா³மிமக்³க³ஸ்ஸ ஹி விபஸ்ஸனிந்த்³ரியேஹி முது³தரானி ஸோதாபத்திமக்³க³ஸ்ஸ விபஸ்ஸனிந்த்³ரியானி, ஸோதாபத்திமக்³க³ஸ்ஸ ச தேஹி விபஸ்ஸனிந்த்³ரியேஹி முது³தரானி ஏகபீ³ஜிஆதீ³னங் மக்³க³ஸ்ஸ விபஸ்ஸனிந்த்³ரியானி.
Yathā pana purimanaye sakadāgāmimagge ṭhatvā tīṇi nissakkāni, evamidha pañca nīharitabbāni. Sakadāgāmimaggassa hi vipassanindriyehi mudutarāni sotāpattimaggassa vipassanindriyāni, sotāpattimaggassa ca tehi vipassanindriyehi mudutarāni ekabījiādīnaṃ maggassa vipassanindriyāni.
எத்த² ச ஏகபீ³ஜீதிஆதீ³ஸு யோ ஸோதாபன்னோ ஹுத்வா ஏகமேவ அத்தபா⁴வங் ஜனெத்வா அரஹத்தங் பாபுணாதி, அயங் ஏகபீ³ஜீ நாம. யதா²ஹ ‘‘கதமோ ச புக்³க³லோ ஏகபீ³ஜீ, இதே⁴கச்சோ புக்³க³லோ திண்ணங் ஸங்யோஜனானங் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயணோ, ஸோ ஏகஞ்ஞேவ மானுஸகங் ப⁴வங் ஸந்தா⁴வித்வா ஸங்ஸரித்வா து³க்க²ஸ்ஸந்தங் கரோதி. அயங் வுச்சதி புக்³க³லோ ஏகபீ³ஜீ’’தி (பு॰ ப॰ 33).
Ettha ca ekabījītiādīsu yo sotāpanno hutvā ekameva attabhāvaṃ janetvā arahattaṃ pāpuṇāti, ayaṃ ekabījī nāma. Yathāha ‘‘katamo ca puggalo ekabījī, idhekacco puggalo tiṇṇaṃ saṃyojanānaṃ parikkhayā sotāpanno hoti avinipātadhammo niyato sambodhiparāyaṇo, so ekaññeva mānusakaṃ bhavaṃ sandhāvitvā saṃsaritvā dukkhassantaṃ karoti. Ayaṃ vuccati puggalo ekabījī’’ti (pu. pa. 33).
யோ பன த்³வே தயோ ப⁴வே ஸங்ஸரித்வா து³க்க²ஸ்ஸந்தங் கரோதி, அயங் கோலங்கோலோ நாம. யதா²ஹ ‘‘கதமோ ச புக்³க³லோ கோலங்கோலோ. இதே⁴கச்சோ புக்³க³லோ திண்ணங் ஸங்யோஜனானங் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயணோ, ஸோ த்³வே வா தீணி வா குலானி ஸந்தா⁴வித்வா ஸங்ஸரித்வா து³க்க²ஸ்ஸந்தங் கரோதி. அயங் வுச்சதி புக்³க³லோ கோலங்கோலோ’’தி (பு॰ ப॰ 32). தத்த² குலானீதி ப⁴வா வேதி³தப்³பா³. ‘‘த்³வே வா தீணி வா’’தி இத³ங் தே³ஸனாமத்தமேவ, யாவ ச²ட்ட²ப⁴வா ஸங்ஸரந்தோ பன கோலங்கோலோவ ஹோதி.
Yo pana dve tayo bhave saṃsaritvā dukkhassantaṃ karoti, ayaṃ kolaṃkolo nāma. Yathāha ‘‘katamo ca puggalo kolaṃkolo. Idhekacco puggalo tiṇṇaṃ saṃyojanānaṃ parikkhayā sotāpanno hoti avinipātadhammo niyato sambodhiparāyaṇo, so dve vā tīṇi vā kulāni sandhāvitvā saṃsaritvā dukkhassantaṃ karoti. Ayaṃ vuccati puggalo kolaṃkolo’’ti (pu. pa. 32). Tattha kulānīti bhavā veditabbā. ‘‘Dve vā tīṇi vā’’ti idaṃ desanāmattameva, yāva chaṭṭhabhavā saṃsaranto pana kolaṃkolova hoti.
யஸ்ஸ ஸத்தக்க²த்துங் பரமா உபபத்தி, அட்ட²மங் ப⁴வங் நாதி³யதி, அயங் ஸத்தக்க²த்துபரமோ நாம. யதா²ஹ ‘‘கதமோ ச புக்³க³லோ ஸத்தக்க²த்துபரமோ. இதே⁴கச்சோ புக்³க³லோ திண்ணங் ஸங்யோஜனானங் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயணோ, ஸோ ஸத்தக்க²த்துங் தே³வே ச மனுஸ்ஸே ச ஸந்தா⁴வித்வா ஸங்ஸரித்வா து³க்க²ஸ்ஸந்தங் கரோதி, அயங் வுச்சதி புக்³க³லோ ஸத்தக்க²த்துபரமோ’’தி (பு॰ ப॰ 31).
Yassa sattakkhattuṃ paramā upapatti, aṭṭhamaṃ bhavaṃ nādiyati, ayaṃ sattakkhattuparamo nāma. Yathāha ‘‘katamo ca puggalo sattakkhattuparamo. Idhekacco puggalo tiṇṇaṃ saṃyojanānaṃ parikkhayā sotāpanno hoti avinipātadhammo niyato sambodhiparāyaṇo, so sattakkhattuṃ deve ca manusse ca sandhāvitvā saṃsaritvā dukkhassantaṃ karoti, ayaṃ vuccati puggalo sattakkhattuparamo’’ti (pu. pa. 31).
ப⁴க³வதா க³ஹிதனாமவஸேனேவ சேதானி தேஸங் நாமானி. ‘‘எத்தகஞ்ஹி டா²னங் க³தோ ஏகபீ³ஜீ நாம ஹோதி, எத்தகங் கோலங்கோலோ, எத்தகங் ஸத்தக்க²த்துபரமோ’’தி ப⁴க³வதா ஏதேஸங் நாமங் க³ஹிதங். நியமதோ பன ‘‘அயங் ஏகபீ³ஜீ, அயங் கோலங்கோலோ, அயங் ஸத்தக்க²த்துபரமோ’’தி நத்தி².
Bhagavatā gahitanāmavaseneva cetāni tesaṃ nāmāni. ‘‘Ettakañhi ṭhānaṃ gato ekabījī nāma hoti, ettakaṃ kolaṃkolo, ettakaṃ sattakkhattuparamo’’ti bhagavatā etesaṃ nāmaṃ gahitaṃ. Niyamato pana ‘‘ayaṃ ekabījī, ayaṃ kolaṃkolo, ayaṃ sattakkhattuparamo’’ti natthi.
கோ பன நேஸங் ஏதங் பபே⁴த³ங் நியமேதீதி? கேசி பன தே²ரா ‘‘புப்³ப³ஹேது நியமேதீ’’தி வத³ந்தி, கேசி ‘‘பட²மமக்³கோ³’’, கேசி ‘‘உபரிம தயோ மக்³கா³’’, கேசி ‘‘திண்ணங் மக்³கா³னங் விபஸ்ஸனா’’தி. தத்த² ‘‘புப்³ப³ஹேது நியமேதீ’’தி வாதே³ பட²மமக்³க³ஸ்ஸ உபனிஸ்ஸயோ கதோ நாம ஹோதி, உபரி தயோ மக்³கா³ அனுபனிஸ்ஸயா உப்பன்னாதி வசனங் ஆபஜ்ஜதி. ‘‘பட²மமக்³கோ³ நியமேதீ’’தி வாதே³ உபரி திண்ணங் மக்³கா³னங் நிரத்த²கதா ஆபஜ்ஜதி. ‘‘உபரி தயோ மக்³கா³ நியமெந்தீ’’தி வாதே³ பட²மமக்³கே³ அனுப்பன்னேவ உபரி தயோ மக்³கா³ உப்பன்னாதி ஆபஜ்ஜதி. ‘‘திண்ணங் மக்³கா³னங் விபஸ்ஸனா நியமேதீ’’தி வாதோ³ பன யுஜ்ஜதி. ஸசே ஹி உபரி திண்ணங் மக்³கா³னங் விபஸ்ஸனா ப³லவதீ ஹோதி, ஏகபீ³ஜீ நாம ஹோதி, ததோ மந்த³தராய கோலங்கோலோ, ததோ மந்த³தராய ஸத்தக்க²த்துபரமோதி.
Ko pana nesaṃ etaṃ pabhedaṃ niyametīti? Keci pana therā ‘‘pubbahetu niyametī’’ti vadanti, keci ‘‘paṭhamamaggo’’, keci ‘‘uparima tayo maggā’’, keci ‘‘tiṇṇaṃ maggānaṃ vipassanā’’ti. Tattha ‘‘pubbahetu niyametī’’ti vāde paṭhamamaggassa upanissayo kato nāma hoti, upari tayo maggā anupanissayā uppannāti vacanaṃ āpajjati. ‘‘Paṭhamamaggo niyametī’’ti vāde upari tiṇṇaṃ maggānaṃ niratthakatā āpajjati. ‘‘Upari tayo maggā niyamentī’’ti vāde paṭhamamagge anuppanneva upari tayo maggā uppannāti āpajjati. ‘‘Tiṇṇaṃ maggānaṃ vipassanā niyametī’’ti vādo pana yujjati. Sace hi upari tiṇṇaṃ maggānaṃ vipassanā balavatī hoti, ekabījī nāma hoti, tato mandatarāya kolaṃkolo, tato mandatarāya sattakkhattuparamoti.
ஏகச்சோ ஹி ஸோதாபன்னோ வட்டஜ்ஜா²ஸயோ ஹோதி வட்டாபி⁴ரதோ புனப்புனங் வட்டஸ்மிங்யேவ விசரதி ஸந்தி³ஸ்ஸதி. அனாத²பிண்டி³கோ ஸெட்டி², விஸாகா² உபாஸிகா, சூளரத²மஹாரதா² தே³வபுத்தா, அனேகவண்ணோ தே³வபுத்தோ, ஸக்கோ தே³வராஜா, நாக³த³த்தோ தே³வபுத்தோதி இமே ஹி எத்தகா ஜனா வட்டஜ்ஜா²ஸயா வட்டாபி⁴ரதா ஆதி³தோ பட்டா²ய ச² தே³வலோகே ஸோதெ⁴த்வா அகனிட்டே² ட²த்வா பரினிப்³பா³யிஸ்ஸந்தி , இமே இத⁴ ந க³ஹிதா. ந கேவலஞ்சிமே, யோபி மனுஸ்ஸேஸுயேவ ஸத்தக்க²த்துங் ஸங்ஸரித்வா அரஹத்தங் பாபுணாதி, யோபி தே³வலோகே நிப்³ப³த்தோ தே³வேஸுயேவ ஸத்தக்க²த்துங் அபராபரங் ஸங்ஸரித்வா அரஹத்தங் பாபுணாதி, இமேபி இத⁴ ந க³ஹிதா. காலேன தே³வே, காலேன மனுஸ்ஸே ஸங்ஸரித்வா பன அரஹத்தங் பாபுணந்தோவ இத⁴ க³ஹிதோ. தஸ்மா ஸத்தக்க²த்துபரமோதி இத³ங் இத⁴ட்ட²கவோகிண்ணஸுக்க²விபஸ்ஸகஸ்ஸ நாமங் கதி²தந்தி வேதி³தப்³ப³ங்.
Ekacco hi sotāpanno vaṭṭajjhāsayo hoti vaṭṭābhirato punappunaṃ vaṭṭasmiṃyeva vicarati sandissati. Anāthapiṇḍiko seṭṭhi, visākhā upāsikā, cūḷarathamahārathā devaputtā, anekavaṇṇo devaputto, sakko devarājā, nāgadatto devaputtoti ime hi ettakā janā vaṭṭajjhāsayā vaṭṭābhiratā ādito paṭṭhāya cha devaloke sodhetvā akaniṭṭhe ṭhatvā parinibbāyissanti , ime idha na gahitā. Na kevalañcime, yopi manussesuyeva sattakkhattuṃ saṃsaritvā arahattaṃ pāpuṇāti, yopi devaloke nibbatto devesuyeva sattakkhattuṃ aparāparaṃ saṃsaritvā arahattaṃ pāpuṇāti, imepi idha na gahitā. Kālena deve, kālena manusse saṃsaritvā pana arahattaṃ pāpuṇantova idha gahito. Tasmā sattakkhattuparamoti idaṃ idhaṭṭhakavokiṇṇasukkhavipassakassa nāmaṃ kathitanti veditabbaṃ.
த⁴ம்மானுஸாரீ ஸத்³தா⁴னுஸாரீதி எத்த² பன இமஸ்மிங் ஸாஸனே லோகுத்தரத⁴ம்மங் நிப்³ப³த்தெந்தஸ்ஸ த்³வே து⁴ரானி, த்³வே ஸீஸானி, த்³வே அபி⁴னிவேஸா – ஸத்³தா⁴து⁴ரங், பஞ்ஞாது⁴ரங் , ஸத்³தா⁴ஸீஸங், பஞ்ஞாஸீஸங், ஸத்³தா⁴பி⁴னிவேஸோ, பஞ்ஞாபி⁴னிவேஸோதி. தத்த² யோ பி⁴க்கு² ‘‘ஸசே ஸத்³தா⁴ய ஸக்கா நிப்³ப³த்தேதுங், நிப்³ப³த்தெஸ்ஸாமி லோகுத்தரமக்³க³’’ந்தி ஸத்³த⁴ங் து⁴ரங் கத்வா ஸோதாபத்திமக்³க³ங் நிப்³ப³த்தேதி, ஸோ மக்³க³க்க²ணே ஸத்³தா⁴னுஸாரீ நாம ஹோதி. ப²லக்க²ணே பன ஸத்³தா⁴விமுத்தோ நாம ஹுத்வா ஏகபீ³ஜீ கோலங்கோலோ ஸத்தக்க²த்துபரமோதி திவிதோ⁴ ஹோதி. தத்த² ஏகேகோ து³க்கா²படிபதா³தி³வஸேன சதுப்³பி³த⁴பா⁴வங் ஆபஜ்ஜதீதி ஸத்³தா⁴து⁴ரேன த்³வாத³ஸ ஜனா ஹொந்தி.
Dhammānusārī saddhānusārīti ettha pana imasmiṃ sāsane lokuttaradhammaṃ nibbattentassa dve dhurāni, dve sīsāni, dve abhinivesā – saddhādhuraṃ, paññādhuraṃ , saddhāsīsaṃ, paññāsīsaṃ, saddhābhiniveso, paññābhinivesoti. Tattha yo bhikkhu ‘‘sace saddhāya sakkā nibbattetuṃ, nibbattessāmi lokuttaramagga’’nti saddhaṃ dhuraṃ katvā sotāpattimaggaṃ nibbatteti, so maggakkhaṇe saddhānusārī nāma hoti. Phalakkhaṇe pana saddhāvimutto nāma hutvā ekabījī kolaṃkolo sattakkhattuparamoti tividho hoti. Tattha ekeko dukkhāpaṭipadādivasena catubbidhabhāvaṃ āpajjatīti saddhādhurena dvādasa janā honti.
யோ பன ‘‘ஸசே பஞ்ஞாய ஸக்கா நிப்³ப³த்தேதுங், நிப்³ப³த்தெஸ்ஸாமி லோகுத்தரமக்³க³’’ந்தி பஞ்ஞங் து⁴ரங் கத்வா ஸோதாபத்திமக்³க³ங் நிப்³ப³த்தேதி, ஸோ மக்³க³க்க²ணே த⁴ம்மானுஸாரீ நாம ஹோதி. ப²லக்க²ணே பன பஞ்ஞாவிமுத்தோ நாம ஹுத்வா ஏகபீ³ஜிஆதி³பே⁴தே³ன த்³வாத³ஸபே⁴தோ³வ ஹோதி. ஏவங் த்³வே மக்³க³ட்டா² ப²லக்க²ணே சதுவீஸதி ஸோதாபன்னா ஹொந்தீதி.
Yo pana ‘‘sace paññāya sakkā nibbattetuṃ, nibbattessāmi lokuttaramagga’’nti paññaṃ dhuraṃ katvā sotāpattimaggaṃ nibbatteti, so maggakkhaṇe dhammānusārī nāma hoti. Phalakkhaṇe pana paññāvimutto nāma hutvā ekabījiādibhedena dvādasabhedova hoti. Evaṃ dve maggaṭṭhā phalakkhaṇe catuvīsati sotāpannā hontīti.
திபிடகதிஸ்ஸத்தே²ரோ கிர ‘‘தீணி பிடகானி ஸோதெ⁴ஸ்ஸாமீ’’தி பரதீரங் க³தோ. தங் ஏகோ குடும்பி³கோ சதூஹி பச்சயேஹி உபட்டா²ஸி, தே²ரோ ஆக³மனகாலே ‘‘க³ச்சா²மி உபாஸகா’’தி ஆஹ. ‘‘கஹங் ப⁴ந்தே’’தி? ‘‘அம்ஹாகங் ஆசரியுபஜ்ஜா²யானங் ஸந்திக’’ந்தி. ‘‘ந ஸக்கா, ப⁴ந்தே, மயா க³ந்துங், ப⁴த்³த³ந்தங் பன நிஸ்ஸாய மயா ஸாஸனஸ்ஸ கு³ணோ ஞாதோ, தும்ஹாகங் பரம்முகா² கீதி³ஸங் பி⁴க்கு²ங் உபஸங்கமாமீ’’தி? அத² நங் தே²ரோ ஆஹ – ‘‘யோ பி⁴க்கு² சதுவீஸதி ஸோதாபன்னே த்³வாத³ஸ ஸகதா³கா³மீ அட்ட²சத்தாலீஸ அனாகா³மீ த்³வாத³ஸ அரஹந்தே த³ஸ்ஸெத்வா த⁴ம்மகத²ங் கதே²துங் ஸக்கோதி, ஏவரூபங் பி⁴க்கு²ங் உபட்டா²துங் வட்டதீ’’தி. இமஸ்மிங் ஸுத்தே விபஸ்ஸனா கதி²தாதி.
Tipiṭakatissatthero kira ‘‘tīṇi piṭakāni sodhessāmī’’ti paratīraṃ gato. Taṃ eko kuṭumbiko catūhi paccayehi upaṭṭhāsi, thero āgamanakāle ‘‘gacchāmi upāsakā’’ti āha. ‘‘Kahaṃ bhante’’ti? ‘‘Amhākaṃ ācariyupajjhāyānaṃ santika’’nti. ‘‘Na sakkā, bhante, mayā gantuṃ, bhaddantaṃ pana nissāya mayā sāsanassa guṇo ñāto, tumhākaṃ parammukhā kīdisaṃ bhikkhuṃ upasaṅkamāmī’’ti? Atha naṃ thero āha – ‘‘yo bhikkhu catuvīsati sotāpanne dvādasa sakadāgāmī aṭṭhacattālīsa anāgāmī dvādasa arahante dassetvā dhammakathaṃ kathetuṃ sakkoti, evarūpaṃ bhikkhuṃ upaṭṭhātuṃ vaṭṭatī’’ti. Imasmiṃ sutte vipassanā kathitāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. ஏகபீ³ஜீஸுத்தங் • 4. Ekabījīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. ஏகபீ³ஜிஸுத்தவண்ணனா • 4. Ekabījisuttavaṇṇanā
