| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
7. ஏகச்சங்அத்தீ²திகதா²
7. Ekaccaṃatthītikathā
1. அதீதாதி³ஏகச்சகதா²வண்ணனா
1. Atītādiekaccakathāvaṇṇanā
299. யே கதூபசிதா குஸலாகுஸலா த⁴ம்மா விபாகதா³னாய அகதோகாஸா, கதோகாஸா ச யே ‘‘ஓகாஸகதுப்பன்னா’’தி வுச்சந்தி. யே ச விப்பகதவிபாகா, தே ஸப்³பே³பி ‘‘அவிபக்கவிபாகா’’தி வேதி³தப்³பா³. தேஸங் விபாகதா³னஸாமத்தி²யங் அனபக³தந்தி அதி⁴ப்பாயேன பரவாதீ³ அத்தி²தங் இச்ச²தி. யே பன பரவாதீ³ ஸப்³பே³ன ஸப்³ப³ங் விபக்கவிபாகா குஸலாகுஸலா த⁴ம்மா, தேஸங் அபக³தந்தி நத்தி²தங் இச்ச²தி. தேனாஹ ‘‘அத்தீ²தி ஏகச்சங் அத்தி² ஏகச்சங் நத்தீ²’’திஆதி³. ஏவங் இச்ச²ந்தஸ்ஸ பன பரவாதி³னோ யதா² அவிபாகேஸுபி ஏகச்சங் நத்தீ²தி ஆபஜ்ஜதி, ஏவங் விபக்கவிபாகேஸு அவிபக்கவிபாகேஸு ச ஆபஜ்ஜதேவாதி த³ஸ்ஸேதுங் ‘‘அவிபக்கவிபாகா த⁴ம்மா ஏகச்சே’’திஆதி³னா பாளி பவத்தா. தேன வுத்தங் ‘‘திண்ணங் ராஸீனங் வஸேனா’’திஆதி³. வோஹாரவஸேனாதி ப²லஸ்ஸ அனுபரமவோஹாரவஸேன, ஹேதுகிச்சங் பன அனுபரதங் அனுபச்சி²ன்னங் அத்தீ²தி லத்³தி⁴யங் டி²தத்தா சோதே³தப்³போ³வ. அவிச்சே²த³வஸேன பவத்தமானஞ்ஹி ப²லஸ்ஸ பப³ந்த⁴வோஹாரங் பரவாதீ³ வோஹாரதோ அத்தீ²தி இச்ச²தி, ஹேது பனஸ்ஸ கம்மங் பரமத்த²தோ ச கம்மூபசயவாதி³பா⁴வதோ பத்திஅப்பத்திஸபா⁴வதாத³யோ விய சித்தவிப்பயுத்தோ கம்மூபசயோ நாம ஏகோ ஸங்கா²ரத⁴ம்மோ அவிபன்னோ, ஸோபி தஸ்ஸேவ வேவசனந்தி பரவாதீ³. யங் ஸந்தா⁴யாஹ –
299. Ye katūpacitā kusalākusalā dhammā vipākadānāya akatokāsā, katokāsā ca ye ‘‘okāsakatuppannā’’ti vuccanti. Ye ca vippakatavipākā, te sabbepi ‘‘avipakkavipākā’’ti veditabbā. Tesaṃ vipākadānasāmatthiyaṃ anapagatanti adhippāyena paravādī atthitaṃ icchati. Ye pana paravādī sabbena sabbaṃ vipakkavipākā kusalākusalā dhammā, tesaṃ apagatanti natthitaṃ icchati. Tenāha ‘‘atthīti ekaccaṃ atthi ekaccaṃ natthī’’tiādi. Evaṃ icchantassa pana paravādino yathā avipākesupi ekaccaṃ natthīti āpajjati, evaṃ vipakkavipākesu avipakkavipākesu ca āpajjatevāti dassetuṃ ‘‘avipakkavipākā dhammā ekacce’’tiādinā pāḷi pavattā. Tena vuttaṃ ‘‘tiṇṇaṃ rāsīnaṃ vasenā’’tiādi. Vohāravasenāti phalassa anuparamavohāravasena, hetukiccaṃ pana anuparataṃ anupacchinnaṃ atthīti laddhiyaṃ ṭhitattā codetabbova. Avicchedavasena pavattamānañhi phalassa pabandhavohāraṃ paravādī vohārato atthīti icchati, hetu panassa kammaṃ paramatthato ca kammūpacayavādibhāvato pattiappattisabhāvatādayo viya cittavippayutto kammūpacayo nāma eko saṅkhāradhammo avipanno, sopi tasseva vevacananti paravādī. Yaṃ sandhāyāha –
‘‘நப்பசயந்தி கம்மானி, அபி கப்பஸஹஸ்ஸதோ;
‘‘Nappacayanti kammāni, api kappasahassato;
பத்வா பச்சயஸாமக்³கி³ங், காலே பச்சந்தி பாணின’’ந்தி.
Patvā paccayasāmaggiṃ, kāle paccanti pāṇina’’nti.
யஞ்ச ஸந்தா⁴ய பரதோ பரிபோ⁴க³மயபுஞ்ஞகதா²ய ‘‘பரிபோ⁴க³மயங் பன சித்தவிப்பயுத்தங் உப்பஜ்ஜதீதி லத்³தி⁴யா படிஜானாதீ’’தி வக்க²தி.
Yañca sandhāya parato paribhogamayapuññakathāya ‘‘paribhogamayaṃ pana cittavippayuttaṃ uppajjatīti laddhiyā paṭijānātī’’ti vakkhati.
ஏகச்சங்அத்தீ²திகதா²வண்ணனா நிட்டி²தா.
Ekaccaṃatthītikathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / 7. ஏகச்சங் அத்தீ²திகதா² • 7. Ekaccaṃ atthītikathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 7. ஏகச்சங்அத்தீ²திகதா² • 7. Ekaccaṃatthītikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 7. ஏகச்சங்அத்தீ²திகதா² • 7. Ekaccaṃatthītikathā
