| Library / Tipiṭaka / তিপিটক • Tipiṭaka / পঞ্চপকরণ-অনুটীকা • Pañcapakaraṇa-anuṭīkā |
৭. একচ্চংঅত্থীতিকথা
7. Ekaccaṃatthītikathā
১. অতীতাদিএকচ্চকথাৰণ্ণনা
1. Atītādiekaccakathāvaṇṇanā
২৯৯. যে কতূপচিতা কুসলাকুসলা ধম্মা ৰিপাকদানায অকতোকাসা, কতোকাসা চ যে ‘‘ওকাসকতুপ্পন্না’’তি ৰুচ্চন্তি। যে চ ৰিপ্পকতৰিপাকা, তে সব্বেপি ‘‘অৰিপক্কৰিপাকা’’তি ৰেদিতব্বা। তেসং ৰিপাকদানসামত্থিযং অনপগতন্তি অধিপ্পাযেন পরৰাদী অত্থিতং ইচ্ছতি। যে পন পরৰাদী সব্বেন সব্বং ৰিপক্কৰিপাকা কুসলাকুসলা ধম্মা, তেসং অপগতন্তি নত্থিতং ইচ্ছতি। তেনাহ ‘‘অত্থীতি একচ্চং অত্থি একচ্চং নত্থী’’তিআদি। এৰং ইচ্ছন্তস্স পন পরৰাদিনো যথা অৰিপাকেসুপি একচ্চং নত্থীতি আপজ্জতি, এৰং ৰিপক্কৰিপাকেসু অৰিপক্কৰিপাকেসু চ আপজ্জতেৰাতি দস্সেতুং ‘‘অৰিপক্কৰিপাকা ধম্মা একচ্চে’’তিআদিনা পাল়ি পৰত্তা। তেন ৰুত্তং ‘‘তিণ্ণং রাসীনং ৰসেনা’’তিআদি। ৰোহারৰসেনাতি ফলস্স অনুপরমৰোহারৰসেন, হেতুকিচ্চং পন অনুপরতং অনুপচ্ছিন্নং অত্থীতি লদ্ধিযং ঠিতত্তা চোদেতব্বোৰ। অৰিচ্ছেদৰসেন পৰত্তমানঞ্হি ফলস্স পবন্ধৰোহারং পরৰাদী ৰোহারতো অত্থীতি ইচ্ছতি, হেতু পনস্স কম্মং পরমত্থতো চ কম্মূপচযৰাদিভাৰতো পত্তিঅপ্পত্তিসভাৰতাদযো ৰিয চিত্তৰিপ্পযুত্তো কম্মূপচযো নাম একো সঙ্খারধম্মো অৰিপন্নো, সোপি তস্সেৰ ৰেৰচনন্তি পরৰাদী। যং সন্ধাযাহ –
299. Ye katūpacitā kusalākusalā dhammā vipākadānāya akatokāsā, katokāsā ca ye ‘‘okāsakatuppannā’’ti vuccanti. Ye ca vippakatavipākā, te sabbepi ‘‘avipakkavipākā’’ti veditabbā. Tesaṃ vipākadānasāmatthiyaṃ anapagatanti adhippāyena paravādī atthitaṃ icchati. Ye pana paravādī sabbena sabbaṃ vipakkavipākā kusalākusalā dhammā, tesaṃ apagatanti natthitaṃ icchati. Tenāha ‘‘atthīti ekaccaṃ atthi ekaccaṃ natthī’’tiādi. Evaṃ icchantassa pana paravādino yathā avipākesupi ekaccaṃ natthīti āpajjati, evaṃ vipakkavipākesu avipakkavipākesu ca āpajjatevāti dassetuṃ ‘‘avipakkavipākā dhammā ekacce’’tiādinā pāḷi pavattā. Tena vuttaṃ ‘‘tiṇṇaṃ rāsīnaṃ vasenā’’tiādi. Vohāravasenāti phalassa anuparamavohāravasena, hetukiccaṃ pana anuparataṃ anupacchinnaṃ atthīti laddhiyaṃ ṭhitattā codetabbova. Avicchedavasena pavattamānañhi phalassa pabandhavohāraṃ paravādī vohārato atthīti icchati, hetu panassa kammaṃ paramatthato ca kammūpacayavādibhāvato pattiappattisabhāvatādayo viya cittavippayutto kammūpacayo nāma eko saṅkhāradhammo avipanno, sopi tasseva vevacananti paravādī. Yaṃ sandhāyāha –
‘‘নপ্পচযন্তি কম্মানি, অপি কপ্পসহস্সতো।
‘‘Nappacayanti kammāni, api kappasahassato;
পত্ৰা পচ্চযসামগ্গিং, কালে পচ্চন্তি পাণিন’’ন্তি॥
Patvā paccayasāmaggiṃ, kāle paccanti pāṇina’’nti.
যঞ্চ সন্ধায পরতো পরিভোগমযপুঞ্ঞকথায ‘‘পরিভোগমযং পন চিত্তৰিপ্পযুত্তং উপ্পজ্জতীতি লদ্ধিযা পটিজানাতী’’তি ৰক্খতি।
Yañca sandhāya parato paribhogamayapuññakathāya ‘‘paribhogamayaṃ pana cittavippayuttaṃ uppajjatīti laddhiyā paṭijānātī’’ti vakkhati.
একচ্চংঅত্থীতিকথাৰণ্ণনা নিট্ঠিতা।
Ekaccaṃatthītikathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / ৭. একচ্চং অত্থীতিকথা • 7. Ekaccaṃ atthītikathā
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৭. একচ্চংঅত্থীতিকথা • 7. Ekaccaṃatthītikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৭. একচ্চংঅত্থীতিকথা • 7. Ekaccaṃatthītikathā
