| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
ஏகாத³ஸகவாரவண்ணனா
Ekādasakavāravaṇṇanā
331. ஏகாத³ஸகேஸு – ஏகாத³ஸாதி பண்ட³காத³யோ ஏகாத³ஸ. ஏகாத³ஸ பாது³காதி த³ஸ ரதனமயா, ஏகா கட்ட²பாது³கா. திணபாது³கமுஞ்ஜபாது³கபப்³ப³ஜபாது³காத³யோ பன கட்ட²பாது³கஸங்க³ஹமேவ க³ச்ச²ந்தி. ஏகாத³ஸ பத்தாதி தம்ப³லோஹமயேன வா தா³ருமயேன வா ஸத்³தி⁴ங் த³ஸ ரதனமயா. ஏகாத³ஸ சீவரானீதி ஸப்³ப³னீலகாதீ³னி ஏகாத³ஸ. யாவததியகாதி உக்கி²த்தானுவத்திகா பி⁴க்கு²னீ, ஸங்கா⁴தி³ஸேஸா அட்ட², அரிட்டோ², சண்ட³காளீதி. ஏகாத³ஸ அந்தராயிகா நாம ‘‘நஸி அனிமித்தா’’தி ஆத³யோ. ஏகாத³ஸ சீவரானி அதி⁴ட்டா²தப்³பா³னீதி திசீவரங், வஸ்ஸிகஸாடிகா, நிஸீத³னங், பச்சத்த²ரணங், கண்டு³ப்படிச்சா²தி³, முக²புஞ்ச²னசோளங், பரிக்கா²ரசோளங், உத³கஸாடிகா, ஸங்கச்சிகாதி. ந விகப்பேதப்³பா³னீதி ஏதானேவ அதி⁴ட்டி²தகாலதோ பட்டா²ய ந விகப்பேதப்³பா³னி. க³ண்டி²கா ச விதா⁴ ச ஸுத்தமயேன ஸத்³தி⁴ங் ஏகாத³ஸ ஹொந்தி, தே ஸப்³பே³ கு²த்³த³கக்க²ந்த⁴கே நித்³தி³ட்டா². பத²வியோ பத²விஸிக்கா²பதே³ நித்³தி³ட்டா². நிஸ்ஸயபடிபஸ்ஸத்³தி⁴யோ உபஜ்ஜா²யம்ஹா பஞ்ச, ஆசரியம்ஹா ச²; ஏவங் ஏகாத³ஸ. அவந்தி³யபுக்³க³லா நக்³கே³ன ஸத்³தி⁴ங் ஏகாத³ஸ, தே ஸப்³பே³ ஸேனாஸனக்க²ந்த⁴கே நித்³தி³ட்டா² . ஏகாத³ஸ பரமானி புப்³பே³ வுத்தேஸு சுத்³த³ஸஸு ஏகாத³ஸகவஸேன யோஜெத்வா வேதி³தப்³பா³னி. ஏகாத³ஸ வரானீதி மஹாபஜாபதியா யாசிதவரேன ஸத்³தி⁴ங் புப்³பே³ வுத்தானி த³ஸ. ஏகாத³ஸ ஸீமாதோ³ஸாதி ‘‘அதிகு²த்³த³கங் ஸீமங் ஸம்மன்னந்தீ’’திஆதி³னா நயேன கம்மவக்³கே³ ஆக³மிஸ்ஸந்தி.
331. Ekādasakesu – ekādasāti paṇḍakādayo ekādasa. Ekādasa pādukāti dasa ratanamayā, ekā kaṭṭhapādukā. Tiṇapādukamuñjapādukapabbajapādukādayo pana kaṭṭhapādukasaṅgahameva gacchanti. Ekādasa pattāti tambalohamayena vā dārumayena vā saddhiṃ dasa ratanamayā. Ekādasa cīvarānīti sabbanīlakādīni ekādasa. Yāvatatiyakāti ukkhittānuvattikā bhikkhunī, saṅghādisesā aṭṭha, ariṭṭho, caṇḍakāḷīti. Ekādasa antarāyikā nāma ‘‘nasi animittā’’ti ādayo. Ekādasacīvarāni adhiṭṭhātabbānīti ticīvaraṃ, vassikasāṭikā, nisīdanaṃ, paccattharaṇaṃ, kaṇḍuppaṭicchādi, mukhapuñchanacoḷaṃ, parikkhāracoḷaṃ, udakasāṭikā, saṅkaccikāti. Na vikappetabbānīti etāneva adhiṭṭhitakālato paṭṭhāya na vikappetabbāni. Gaṇṭhikā ca vidhā ca suttamayena saddhiṃ ekādasa honti, te sabbe khuddakakkhandhake niddiṭṭhā. Pathaviyo pathavisikkhāpade niddiṭṭhā. Nissayapaṭipassaddhiyo upajjhāyamhā pañca, ācariyamhā cha; evaṃ ekādasa. Avandiyapuggalā naggena saddhiṃ ekādasa, te sabbe senāsanakkhandhake niddiṭṭhā . Ekādasa paramāni pubbe vuttesu cuddasasu ekādasakavasena yojetvā veditabbāni. Ekādasa varānīti mahāpajāpatiyā yācitavarena saddhiṃ pubbe vuttāni dasa. Ekādasa sīmādosāti ‘‘atikhuddakaṃ sīmaṃ sammannantī’’tiādinā nayena kammavagge āgamissanti.
அக்கோஸகபரிபா⁴ஸகே புக்³க³லே ஏகாத³ஸாதீ³னவா நாம ‘‘யோ ஸோ, பி⁴க்க²வே, பி⁴க்கு² அக்கோஸகோ பரிபா⁴ஸகோ அரியூபவாதீ³, ஸப்³ரஹ்மசாரீனங் அட்டா²னமேதங் அனவகாஸோ யங் ஸோ ஏகாத³ஸன்னங் ப்³யஸனானங் அஞ்ஞதரங் ப்³யஸனங் ந நிக³ச்செ²ய்ய. கதமேஸங் ஏகாத³ஸன்னங்? அனதி⁴க³தங் நாதி⁴க³ச்ச²தி, அதி⁴க³தா பரிஹாயதி, ஸத்³த⁴ம்மஸ்ஸ ந வோதா³யந்தி, ஸத்³த⁴ம்மேஸு வா அதி⁴மானிகோ ஹோதி, அனபி⁴ரதோ வா ப்³ரஹ்மசரியங் சரதி, அஞ்ஞதரங் வா ஸங்கிலிட்ட²ங் ஆபத்திங் ஆபஜ்ஜதி, ஸிக்க²ங் வா பச்சக்கா²ய ஹீனாயாவத்ததி, கா³ள்ஹங் வா ரோகா³தங்கங் பு²ஸதி, உம்மாத³ங் வா பாபுணாதி சித்தக்கே²பங் வா, ஸம்மூள்ஹோ காலங் கரோதி, காயஸ்ஸ பே⁴தா³ பரம்மரணா அபாயங் து³க்³க³திங் வினிபாதங் நிரயங் உபபஜ்ஜதீ’’தி (அ॰ நி॰ 11.6). எத்த² ச ஸத்³த⁴ம்மோதி பு³த்³த⁴வசனங் அதி⁴ப்பேதங்.
Akkosakaparibhāsake puggale ekādasādīnavā nāma ‘‘yo so, bhikkhave, bhikkhu akkosako paribhāsako ariyūpavādī, sabrahmacārīnaṃ aṭṭhānametaṃ anavakāso yaṃ so ekādasannaṃ byasanānaṃ aññataraṃ byasanaṃ na nigaccheyya. Katamesaṃ ekādasannaṃ? Anadhigataṃ nādhigacchati, adhigatā parihāyati, saddhammassa na vodāyanti, saddhammesu vā adhimāniko hoti, anabhirato vā brahmacariyaṃ carati, aññataraṃ vā saṃkiliṭṭhaṃ āpattiṃ āpajjati, sikkhaṃ vā paccakkhāya hīnāyāvattati, gāḷhaṃ vā rogātaṅkaṃ phusati, ummādaṃ vā pāpuṇāti cittakkhepaṃ vā, sammūḷho kālaṃ karoti, kāyassa bhedā parammaraṇā apāyaṃ duggatiṃ vinipātaṃ nirayaṃ upapajjatī’’ti (a. ni. 11.6). Ettha ca saddhammoti buddhavacanaṃ adhippetaṃ.
ஆஸேவிதாயாதி ஆதி³தோ பட்டா²ய ஸேவிதாய. பா⁴விதாயாதி நிப்பா²தி³தாய வட்³டி⁴தாய
Āsevitāyāti ādito paṭṭhāya sevitāya. Bhāvitāyāti nipphāditāya vaḍḍhitāya
வா. ப³ஹுலீகதாயாதி புனப்புனங் கதாய. யானீகதாயாதி ஸுயுத்தயானஸதி³ஸாய கதாய. வத்து²கதாயாதி யதா² பதிட்டா² ஹோதி; ஏவங் கதாய. அனுட்டி²தாயாதி அனு அனு பவத்திதாய; நிச்சாதி⁴ட்டி²தாயாதி அத்தோ². பரிசிதாயாதி ஸமந்ததோ சிதாய; ஸப்³ப³தி³ஸாஸு சிதாய ஆசிதாய பா⁴விதாய அபி⁴வட்³டி⁴தாயாதி அத்தோ². ஸுஸமாரத்³தா⁴யாதி ஸுட்டு² ஸமாரத்³தா⁴ய; வஸீபா⁴வங் உபனீதாயாதி அத்தோ². ந பாபகங் ஸுபினந்தி பாபகமேவ ந பஸ்ஸதி, ப⁴த்³ரகங் பன வுட்³டி⁴காரணபூ⁴தங் பஸ்ஸதி. தே³வதா ரக்க²ந்தீதி ஆரக்க²தே³வதா த⁴ம்மிகங் ரக்க²ங் பச்சுபட்டா²பெந்தி. துவடங் சித்தங் ஸமாதி⁴யதீதி கி²ப்பங் சித்தங் ஸமாதி⁴யதி. உத்தரி அப்படிவிஜ்ஜ²ந்தோதி மெத்தாஜா²னதோ உத்தரிங் அரஹத்தங் அஸச்சி²கரொந்தோ ஸேகோ² வா புது²ஜ்ஜனோ வா ஹுத்வா காலங் கரொந்தோ ப்³ரஹ்மலோகூபகோ³ ஹோதி. ஸேஸங் ஸப்³ப³த்த² உத்தானமேவாதி.
Vā. Bahulīkatāyāti punappunaṃ katāya. Yānīkatāyāti suyuttayānasadisāya katāya. Vatthukatāyāti yathā patiṭṭhā hoti; evaṃ katāya. Anuṭṭhitāyāti anu anu pavattitāya; niccādhiṭṭhitāyāti attho. Paricitāyāti samantato citāya; sabbadisāsu citāya ācitāya bhāvitāya abhivaḍḍhitāyāti attho. Susamāraddhāyāti suṭṭhu samāraddhāya; vasībhāvaṃ upanītāyāti attho. Na pāpakaṃ supinanti pāpakameva na passati, bhadrakaṃ pana vuḍḍhikāraṇabhūtaṃ passati. Devatā rakkhantīti ārakkhadevatā dhammikaṃ rakkhaṃ paccupaṭṭhāpenti. Tuvaṭaṃ cittaṃ samādhiyatīti khippaṃ cittaṃ samādhiyati. Uttari appaṭivijjhantoti mettājhānato uttariṃ arahattaṃ asacchikaronto sekho vā puthujjano vā hutvā kālaṃ karonto brahmalokūpago hoti. Sesaṃ sabbattha uttānamevāti.
ஏகாத³ஸகவாரவண்ணனா பரியோஸானா
Ekādasakavāravaṇṇanā pariyosānā
ஏகுத்தரிகவண்ணனா நிட்டி²தா.
Ekuttarikavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 11. ஏகாத³ஸகவாரோ • 11. Ekādasakavāro
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஏகாத³ஸகவாரவண்ணனா • Ekādasakavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஏகாத³ஸகவாரவண்ணனா • Ekādasakavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஏகுத்தரிகனயோ ஏகாத³ஸகவாரவண்ணனா • Ekuttarikanayo ekādasakavāravaṇṇanā
