| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
১১. একাদসকৰারো
11. Ekādasakavāro
৩৩১. একাদ পুগ্গলা অনুপসম্পন্না ন উপসম্পাদেতব্বা, উপসম্পন্না নাসেতব্বা। একাদস পাদুকা অকপ্পিযা। একাদস পত্তা অকপ্পিযা। একাদস চীৰরানি অকপ্পিযানি। একাদস যাৰততিযকা। ভিক্খুনীনং একাদস অন্তরাযিকা ধম্মা পুচ্ছিতব্বা। একাদস চীৰরানি অধিট্ঠাতব্বানি। একাদস চীৰরানি ন ৰিকপ্পেতব্বানি। একাদসে অরুণুগ্গমনে নিস্সগ্গিযং হোতি। একাদস গণ্ঠিকা কপ্পিযা। একাদস ৰিধা 1 কপ্পিযা। একাদস পথৰী অকপ্পিযা। একাদস পথৰী কপ্পিযা। একাদস নিস্সযপটিপ্পস্সদ্ধিযো। একাদস পুগ্গলা অৰন্দিযা। একাদস পরমানি। একাদস ৰরানি যাচিংসু। একাদস সীমাদোসা। অক্কোসকপরিভাসকে পুগ্গলে একাদসাদীনৰা পাটিকঙ্খা। 2 মেত্তায চেতোৰিমুত্তিযা আসেৰিতায ভাৰিতায বহুলীকতায যানীকতায ৰত্থুকতায অনুট্ঠিতায পরিচিতায সুসমারদ্ধায একাদসানিসংসা পাটিকঙ্খা । সুখং সুপতি, সুখং পটিবুজ্ঝতি, ন পাপকং সুপিনং পস্সতি, মনুস্সানং পিযো হোতি, অমনুস্সানং পিযো হোতি, দেৰতা রক্খন্তি, নাস্স অগ্গি ৰা ৰিসং ৰা সত্থং ৰা কমতি, তুৰট্টং চিত্তং সমাধিযতি, মুখৰণ্ণো ৰিপ্পসীদতি, অসম্মূল়্হো কালঙ্করোতি, উত্তরি অপ্পটিৰিজ্ঝন্তো ব্রহ্মলোকূপগো হোতি – মেত্তায চেতোৰিমুত্তিযা আসেৰিতায ভাৰিতায বহুলীকতায যানীকতায ৰত্থুকতায অনুট্ঠিতায পরিচিতায সুসমারদ্ধায ইমে একাদসানিসংসা পাটিকঙ্খাতি।
331. Ekāda puggalā anupasampannā na upasampādetabbā, upasampannā nāsetabbā. Ekādasa pādukā akappiyā. Ekādasa pattā akappiyā. Ekādasa cīvarāni akappiyāni. Ekādasa yāvatatiyakā. Bhikkhunīnaṃ ekādasa antarāyikā dhammā pucchitabbā. Ekādasa cīvarāni adhiṭṭhātabbāni. Ekādasa cīvarāni na vikappetabbāni. Ekādase aruṇuggamane nissaggiyaṃ hoti. Ekādasa gaṇṭhikā kappiyā. Ekādasa vidhā 3 kappiyā. Ekādasa pathavī akappiyā. Ekādasa pathavī kappiyā. Ekādasa nissayapaṭippassaddhiyo. Ekādasa puggalā avandiyā. Ekādasa paramāni. Ekādasa varāni yāciṃsu. Ekādasa sīmādosā. Akkosakaparibhāsake puggale ekādasādīnavā pāṭikaṅkhā. 4 Mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṃsā pāṭikaṅkhā . Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hoti, devatā rakkhanti, nāssa aggi vā visaṃ vā satthaṃ vā kamati, tuvaṭṭaṃ cittaṃ samādhiyati, mukhavaṇṇo vippasīdati, asammūḷho kālaṅkaroti, uttari appaṭivijjhanto brahmalokūpago hoti – mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ime ekādasānisaṃsā pāṭikaṅkhāti.
একাদসকং নিট্ঠিতং।
Ekādasakaṃ niṭṭhitaṃ.
তস্সুদ্দানং –
Tassuddānaṃ –
নাসেতব্বা পাদুকা চ, পত্তা চ চীৰরানি চ।
Nāsetabbā pādukā ca, pattā ca cīvarāni ca;
ততিযা পুচ্ছিতব্বা চ, অধিট্ঠানৰিকপ্পনা॥
Tatiyā pucchitabbā ca, adhiṭṭhānavikappanā.
অরুণা গণ্ঠিকা ৰিধা, অকপ্পিযা চ কপ্পিযং।
Aruṇā gaṇṭhikā vidhā, akappiyā ca kappiyaṃ;
নিস্সযাৰন্দিযা চেৰ, পরমানি ৰরানি চ।
Nissayāvandiyā ceva, paramāni varāni ca;
সীমাদোসা চ অক্কোসা, মেত্তাযেকাদসা কতাতি॥
Sīmādosā ca akkosā, mettāyekādasā katāti.
একুত্তরিকনযো।
Ekuttarikanayo.
তস্সুদ্দানং –
Tassuddānaṃ –
এককা চ দুকা চেৰ, তিকা চ চতুপঞ্চকা।
Ekakā ca dukā ceva, tikā ca catupañcakā;
ছসত্তট্ঠনৰকা চ, দস একাদসানি চ॥
Chasattaṭṭhanavakā ca, dasa ekādasāni ca.
হিতায সব্বসত্তানং, ঞাতধম্মেন তাদিনা।
Hitāya sabbasattānaṃ, ñātadhammena tādinā;
একুত্তরিকা ৰিমলা, মহাৰীরেন দেসিতাতি॥
Ekuttarikā vimalā, mahāvīrena desitāti.
একুত্তরিকনযো নিট্ঠিতো।
Ekuttarikanayo niṭṭhito.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / একাদসকৰারৰণ্ণনা • Ekādasakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / একাদসকৰারৰণ্ণনা • Ekādasakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / একাদসকৰারৰণ্ণনা • Ekādasakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / একুত্তরিকনযো একাদসকৰারৰণ্ণনা • Ekuttarikanayo ekādasakavāravaṇṇanā
