| Library / Tipiṭaka / तिपिटक • Tipiṭaka / परिवारपाळि • Parivārapāḷi |
११. एकादसकवारो
11. Ekādasakavāro
३३१. एकाद पुग्गला अनुपसम्पन्ना न उपसम्पादेतब्बा, उपसम्पन्ना नासेतब्बा। एकादस पादुका अकप्पिया। एकादस पत्ता अकप्पिया। एकादस चीवरानि अकप्पियानि। एकादस यावततियका। भिक्खुनीनं एकादस अन्तरायिका धम्मा पुच्छितब्बा। एकादस चीवरानि अधिट्ठातब्बानि। एकादस चीवरानि न विकप्पेतब्बानि। एकादसे अरुणुग्गमने निस्सग्गियं होति। एकादस गण्ठिका कप्पिया। एकादस विधा 1 कप्पिया। एकादस पथवी अकप्पिया। एकादस पथवी कप्पिया। एकादस निस्सयपटिप्पस्सद्धियो। एकादस पुग्गला अवन्दिया। एकादस परमानि। एकादस वरानि याचिंसु। एकादस सीमादोसा। अक्कोसकपरिभासके पुग्गले एकादसादीनवा पाटिकङ्खा। 2 मेत्ताय चेतोविमुत्तिया आसेविताय भाविताय बहुलीकताय यानीकताय वत्थुकताय अनुट्ठिताय परिचिताय सुसमारद्धाय एकादसानिसंसा पाटिकङ्खा । सुखं सुपति, सुखं पटिबुज्झति, न पापकं सुपिनं पस्सति, मनुस्सानं पियो होति, अमनुस्सानं पियो होति, देवता रक्खन्ति, नास्स अग्गि वा विसं वा सत्थं वा कमति, तुवट्टं चित्तं समाधियति, मुखवण्णो विप्पसीदति, असम्मूळ्हो कालङ्करोति, उत्तरि अप्पटिविज्झन्तो ब्रह्मलोकूपगो होति – मेत्ताय चेतोविमुत्तिया आसेविताय भाविताय बहुलीकताय यानीकताय वत्थुकताय अनुट्ठिताय परिचिताय सुसमारद्धाय इमे एकादसानिसंसा पाटिकङ्खाति।
331. Ekāda puggalā anupasampannā na upasampādetabbā, upasampannā nāsetabbā. Ekādasa pādukā akappiyā. Ekādasa pattā akappiyā. Ekādasa cīvarāni akappiyāni. Ekādasa yāvatatiyakā. Bhikkhunīnaṃ ekādasa antarāyikā dhammā pucchitabbā. Ekādasa cīvarāni adhiṭṭhātabbāni. Ekādasa cīvarāni na vikappetabbāni. Ekādase aruṇuggamane nissaggiyaṃ hoti. Ekādasa gaṇṭhikā kappiyā. Ekādasa vidhā 3 kappiyā. Ekādasa pathavī akappiyā. Ekādasa pathavī kappiyā. Ekādasa nissayapaṭippassaddhiyo. Ekādasa puggalā avandiyā. Ekādasa paramāni. Ekādasa varāni yāciṃsu. Ekādasa sīmādosā. Akkosakaparibhāsake puggale ekādasādīnavā pāṭikaṅkhā. 4 Mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṃsā pāṭikaṅkhā . Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hoti, devatā rakkhanti, nāssa aggi vā visaṃ vā satthaṃ vā kamati, tuvaṭṭaṃ cittaṃ samādhiyati, mukhavaṇṇo vippasīdati, asammūḷho kālaṅkaroti, uttari appaṭivijjhanto brahmalokūpago hoti – mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ime ekādasānisaṃsā pāṭikaṅkhāti.
एकादसकं निट्ठितं।
Ekādasakaṃ niṭṭhitaṃ.
तस्सुद्दानं –
Tassuddānaṃ –
नासेतब्बा पादुका च, पत्ता च चीवरानि च।
Nāsetabbā pādukā ca, pattā ca cīvarāni ca;
ततिया पुच्छितब्बा च, अधिट्ठानविकप्पना॥
Tatiyā pucchitabbā ca, adhiṭṭhānavikappanā.
अरुणा गण्ठिका विधा, अकप्पिया च कप्पियं।
Aruṇā gaṇṭhikā vidhā, akappiyā ca kappiyaṃ;
निस्सयावन्दिया चेव, परमानि वरानि च।
Nissayāvandiyā ceva, paramāni varāni ca;
सीमादोसा च अक्कोसा, मेत्तायेकादसा कताति॥
Sīmādosā ca akkosā, mettāyekādasā katāti.
एकुत्तरिकनयो।
Ekuttarikanayo.
तस्सुद्दानं –
Tassuddānaṃ –
एकका च दुका चेव, तिका च चतुपञ्चका।
Ekakā ca dukā ceva, tikā ca catupañcakā;
छसत्तट्ठनवका च, दस एकादसानि च॥
Chasattaṭṭhanavakā ca, dasa ekādasāni ca.
हिताय सब्बसत्तानं, ञातधम्मेन तादिना।
Hitāya sabbasattānaṃ, ñātadhammena tādinā;
एकुत्तरिका विमला, महावीरेन देसिताति॥
Ekuttarikā vimalā, mahāvīrena desitāti.
एकुत्तरिकनयो निट्ठितो।
Ekuttarikanayo niṭṭhito.
Footnotes:
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / एकादसकवारवण्णना • Ekādasakavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / एकादसकवारवण्णना • Ekādasakavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / एकादसकवारवण्णना • Ekādasakavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / एकुत्तरिकनयो एकादसकवारवण्णना • Ekuttarikanayo ekādasakavāravaṇṇanā
