| Library / Tipiṭaka / ติปิฎก • Tipiṭaka / ปริวารปาฬิ • Parivārapāḷi |
๑๑. เอกาทสกวาโร
11. Ekādasakavāro
๓๓๑. เอกาท ปุคฺคลา อนุปสมฺปนฺนา น อุปสมฺปาเทตพฺพา, อุปสมฺปนฺนา นาเสตพฺพาฯ เอกาทส ปาทุกา อกปฺปิยาฯ เอกาทส ปตฺตา อกปฺปิยาฯ เอกาทส จีวรานิ อกปฺปิยานิฯ เอกาทส ยาวตติยกาฯ ภิกฺขุนีนํ เอกาทส อนฺตรายิกา ธมฺมา ปุจฺฉิตพฺพาฯ เอกาทส จีวรานิ อธิฎฺฐาตพฺพานิฯ เอกาทส จีวรานิ น วิกเปฺปตพฺพานิฯ เอกาทเส อรุณุคฺคมเน นิสฺสคฺคิยํ โหติฯ เอกาทส คณฺฐิกา กปฺปิยาฯ เอกาทส วิธา 1 กปฺปิยาฯ เอกาทส ปถวี อกปฺปิยาฯ เอกาทส ปถวี กปฺปิยาฯ เอกาทส นิสฺสยปฎิปฺปสฺสทฺธิโยฯ เอกาทส ปุคฺคลา อวนฺทิยาฯ เอกาทส ปรมานิฯ เอกาทส วรานิ ยาจิํสุฯ เอกาทส สีมาโทสาฯ อโกฺกสกปริภาสเก ปุคฺคเล เอกาทสาทีนวา ปาฎิกงฺขาฯ 2 เมตฺตาย เจโตวิมุตฺติยา อาเสวิตาย ภาวิตาย พหุลีกตาย ยานีกตาย วตฺถุกตาย อนุฎฺฐิตาย ปริจิตาย สุสมารทฺธาย เอกาทสานิสํสา ปาฎิกงฺขา ฯ สุขํ สุปติ, สุขํ ปฎิพุชฺฌติ, น ปาปกํ สุปินํ ปสฺสติ, มนุสฺสานํ ปิโย โหติ, อมนุสฺสานํ ปิโย โหติ, เทวตา รกฺขนฺติ, นาสฺส อคฺคิ วา วิสํ วา สตฺถํ วา กมติ, ตุวฎฺฎํ จิตฺตํ สมาธิยติ, มุขวโณฺณ วิปฺปสีทติ, อสมฺมูโฬฺห กาลงฺกโรติ, อุตฺตริ อปฺปฎิวิชฺฌโนฺต พฺรหฺมโลกูปโค โหติ – เมตฺตาย เจโตวิมุตฺติยา อาเสวิตาย ภาวิตาย พหุลีกตาย ยานีกตาย วตฺถุกตาย อนุฎฺฐิตาย ปริจิตาย สุสมารทฺธาย อิเม เอกาทสานิสํสา ปาฎิกงฺขาติฯ
331. Ekāda puggalā anupasampannā na upasampādetabbā, upasampannā nāsetabbā. Ekādasa pādukā akappiyā. Ekādasa pattā akappiyā. Ekādasa cīvarāni akappiyāni. Ekādasa yāvatatiyakā. Bhikkhunīnaṃ ekādasa antarāyikā dhammā pucchitabbā. Ekādasa cīvarāni adhiṭṭhātabbāni. Ekādasa cīvarāni na vikappetabbāni. Ekādase aruṇuggamane nissaggiyaṃ hoti. Ekādasa gaṇṭhikā kappiyā. Ekādasa vidhā 3 kappiyā. Ekādasa pathavī akappiyā. Ekādasa pathavī kappiyā. Ekādasa nissayapaṭippassaddhiyo. Ekādasa puggalā avandiyā. Ekādasa paramāni. Ekādasa varāni yāciṃsu. Ekādasa sīmādosā. Akkosakaparibhāsake puggale ekādasādīnavā pāṭikaṅkhā. 4 Mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṃsā pāṭikaṅkhā . Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hoti, devatā rakkhanti, nāssa aggi vā visaṃ vā satthaṃ vā kamati, tuvaṭṭaṃ cittaṃ samādhiyati, mukhavaṇṇo vippasīdati, asammūḷho kālaṅkaroti, uttari appaṭivijjhanto brahmalokūpago hoti – mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ime ekādasānisaṃsā pāṭikaṅkhāti.
เอกาทสกํ นิฎฺฐิตํฯ
Ekādasakaṃ niṭṭhitaṃ.
ตสฺสุทฺทานํ –
Tassuddānaṃ –
นาเสตพฺพา ปาทุกา จ, ปตฺตา จ จีวรานิ จ;
Nāsetabbā pādukā ca, pattā ca cīvarāni ca;
ตติยา ปุจฺฉิตพฺพา จ, อธิฎฺฐานวิกปฺปนาฯ
Tatiyā pucchitabbā ca, adhiṭṭhānavikappanā.
อรุณา คณฺฐิกา วิธา, อกปฺปิยา จ กปฺปิยํ;
Aruṇā gaṇṭhikā vidhā, akappiyā ca kappiyaṃ;
นิสฺสยาวนฺทิยา เจว, ปรมานิ วรานิ จ;
Nissayāvandiyā ceva, paramāni varāni ca;
สีมาโทสา จ อโกฺกสา, เมตฺตาเยกาทสา กตาติฯ
Sīmādosā ca akkosā, mettāyekādasā katāti.
เอกุตฺตริกนโยฯ
Ekuttarikanayo.
ตสฺสุทฺทานํ –
Tassuddānaṃ –
เอกกา จ ทุกา เจว, ติกา จ จตุปญฺจกา;
Ekakā ca dukā ceva, tikā ca catupañcakā;
ฉสตฺตฎฺฐนวกา จ, ทส เอกาทสานิ จฯ
Chasattaṭṭhanavakā ca, dasa ekādasāni ca.
หิตาย สพฺพสตฺตานํ, ญาตธเมฺมน ตาทินา;
Hitāya sabbasattānaṃ, ñātadhammena tādinā;
เอกุตฺตริกา วิมลา, มหาวีเรน เทสิตาติฯ
Ekuttarikā vimalā, mahāvīrena desitāti.
เอกุตฺตริกนโย นิฎฺฐิโตฯ
Ekuttarikanayo niṭṭhito.
Footnotes:
Related texts:
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / ปริวาร-อฎฺฐกถา • Parivāra-aṭṭhakathā / เอกาทสกวารวณฺณนา • Ekādasakavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / เอกาทสกวารวณฺณนา • Ekādasakavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / เอกาทสกวารวณฺณนา • Ekādasakavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / เอกุตฺตริกนโย เอกาทสกวารวณฺณนา • Ekuttarikanayo ekādasakavāravaṇṇanā
