| Library / Tipiṭaka / តិបិដក • Tipiṭaka / បរិវារបាឡិ • Parivārapāḷi |
១១. ឯកាទសកវារោ
11. Ekādasakavāro
៣៣១. ឯកាទ បុគ្គលា អនុបសម្បន្នា ន ឧបសម្បាទេតព្ពា, ឧបសម្បន្នា នាសេតព្ពា។ ឯកាទស បាទុកា អកប្បិយា។ ឯកាទស បត្តា អកប្បិយា។ ឯកាទស ចីវរានិ អកប្បិយានិ។ ឯកាទស យាវតតិយកា។ ភិក្ខុនីនំ ឯកាទស អន្តរាយិកា ធម្មា បុច្ឆិតព្ពា។ ឯកាទស ចីវរានិ អធិដ្ឋាតព្ពានិ។ ឯកាទស ចីវរានិ ន វិកប្បេតព្ពានិ។ ឯកាទសេ អរុណុគ្គមនេ និស្សគ្គិយំ ហោតិ។ ឯកាទស គណ្ឋិកា កប្បិយា។ ឯកាទស វិធា 1 កប្បិយា។ ឯកាទស បថវី អកប្បិយា។ ឯកាទស បថវី កប្បិយា។ ឯកាទស និស្សយបដិប្បស្សទ្ធិយោ។ ឯកាទស បុគ្គលា អវន្ទិយា។ ឯកាទស បរមានិ។ ឯកាទស វរានិ យាចិំសុ។ ឯកាទស សីមាទោសា។ អក្កោសកបរិភាសកេ បុគ្គលេ ឯកាទសាទីនវា បាដិកង្ខា។ 2 មេត្តាយ ចេតោវិមុត្តិយា អាសេវិតាយ ភាវិតាយ ពហុលីកតាយ យានីកតាយ វត្ថុកតាយ អនុដ្ឋិតាយ បរិចិតាយ សុសមារទ្ធាយ ឯកាទសានិសំសា បាដិកង្ខា ។ សុខំ សុបតិ, សុខំ បដិពុជ្ឈតិ, ន បាបកំ សុបិនំ បស្សតិ, មនុស្សានំ បិយោ ហោតិ, អមនុស្សានំ បិយោ ហោតិ, ទេវតា រក្ខន្តិ, នាស្ស អគ្គិ វា វិសំ វា សត្ថំ វា កមតិ, តុវដ្ដំ ចិត្តំ សមាធិយតិ, មុខវណ្ណោ វិប្បសីទតិ, អសម្មូឡ្ហោ កាលង្ករោតិ, ឧត្តរិ អប្បដិវិជ្ឈន្តោ ព្រហ្មលោកូបគោ ហោតិ – មេត្តាយ ចេតោវិមុត្តិយា អាសេវិតាយ ភាវិតាយ ពហុលីកតាយ យានីកតាយ វត្ថុកតាយ អនុដ្ឋិតាយ បរិចិតាយ សុសមារទ្ធាយ ឥមេ ឯកាទសានិសំសា បាដិកង្ខាតិ។
331. Ekāda puggalā anupasampannā na upasampādetabbā, upasampannā nāsetabbā. Ekādasa pādukā akappiyā. Ekādasa pattā akappiyā. Ekādasa cīvarāni akappiyāni. Ekādasa yāvatatiyakā. Bhikkhunīnaṃ ekādasa antarāyikā dhammā pucchitabbā. Ekādasa cīvarāni adhiṭṭhātabbāni. Ekādasa cīvarāni na vikappetabbāni. Ekādase aruṇuggamane nissaggiyaṃ hoti. Ekādasa gaṇṭhikā kappiyā. Ekādasa vidhā 3 kappiyā. Ekādasa pathavī akappiyā. Ekādasa pathavī kappiyā. Ekādasa nissayapaṭippassaddhiyo. Ekādasa puggalā avandiyā. Ekādasa paramāni. Ekādasa varāni yāciṃsu. Ekādasa sīmādosā. Akkosakaparibhāsake puggale ekādasādīnavā pāṭikaṅkhā. 4 Mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṃsā pāṭikaṅkhā . Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hoti, devatā rakkhanti, nāssa aggi vā visaṃ vā satthaṃ vā kamati, tuvaṭṭaṃ cittaṃ samādhiyati, mukhavaṇṇo vippasīdati, asammūḷho kālaṅkaroti, uttari appaṭivijjhanto brahmalokūpago hoti – mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ime ekādasānisaṃsā pāṭikaṅkhāti.
ឯកាទសកំ និដ្ឋិតំ។
Ekādasakaṃ niṭṭhitaṃ.
តស្សុទ្ទានំ –
Tassuddānaṃ –
នាសេតព្ពា បាទុកា ច, បត្តា ច ចីវរានិ ច;
Nāsetabbā pādukā ca, pattā ca cīvarāni ca;
តតិយា បុច្ឆិតព្ពា ច, អធិដ្ឋានវិកប្បនា។
Tatiyā pucchitabbā ca, adhiṭṭhānavikappanā.
អរុណា គណ្ឋិកា វិធា, អកប្បិយា ច កប្បិយំ;
Aruṇā gaṇṭhikā vidhā, akappiyā ca kappiyaṃ;
និស្សយាវន្ទិយា ចេវ, បរមានិ វរានិ ច;
Nissayāvandiyā ceva, paramāni varāni ca;
សីមាទោសា ច អក្កោសា, មេត្តាយេកាទសា កតាតិ។
Sīmādosā ca akkosā, mettāyekādasā katāti.
ឯកុត្តរិកនយោ។
Ekuttarikanayo.
តស្សុទ្ទានំ –
Tassuddānaṃ –
ឯកកា ច ទុកា ចេវ, តិកា ច ចតុបញ្ចកា;
Ekakā ca dukā ceva, tikā ca catupañcakā;
ឆសត្តដ្ឋនវកា ច, ទស ឯកាទសានិ ច។
Chasattaṭṭhanavakā ca, dasa ekādasāni ca.
ហិតាយ សព្ពសត្តានំ, ញាតធម្មេន តាទិនា;
Hitāya sabbasattānaṃ, ñātadhammena tādinā;
ឯកុត្តរិកា វិមលា, មហាវីរេន ទេសិតាតិ។
Ekuttarikā vimalā, mahāvīrena desitāti.
ឯកុត្តរិកនយោ និដ្ឋិតោ។
Ekuttarikanayo niṭṭhito.
Footnotes:
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / ឯកាទសកវារវណ្ណនា • Ekādasakavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ឯកាទសកវារវណ្ណនា • Ekādasakavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ឯកាទសកវារវណ្ណនា • Ekādasakavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ឯកុត្តរិកនយោ ឯកាទសកវារវណ្ណនា • Ekuttarikanayo ekādasakavāravaṇṇanā
