| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၁၁. ဧကာဒသကဝာရော
11. Ekādasakavāro
၃၃၁. ဧကာဒ ပုဂ္ဂလာ အနုပသမ္ပန္နာ န ဥပသမ္ပာဒေတဗ္ဗာ, ဥပသမ္ပန္နာ နာသေတဗ္ဗာ။ ဧကာဒသ ပာဒုကာ အကပ္ပိယာ။ ဧကာဒသ ပတ္တာ အကပ္ပိယာ။ ဧကာဒသ စီဝရာနိ အကပ္ပိယာနိ။ ဧကာဒသ ယာဝတတိယကာ။ ဘိက္ခုနီနံ ဧကာဒသ အန္တရာယိကာ ဓမ္မာ ပုစ္ဆိတဗ္ဗာ။ ဧကာဒသ စီဝရာနိ အဓိဋ္ဌာတဗ္ဗာနိ။ ဧကာဒသ စီဝရာနိ န ဝိကပ္ပေတဗ္ဗာနိ။ ဧကာဒသေ အရုဏုဂ္ဂမနေ နိသ္သဂ္ဂိယံ ဟောတိ။ ဧကာဒသ ဂဏ္ဌိကာ ကပ္ပိယာ။ ဧကာဒသ ဝိဓာ 1 ကပ္ပိယာ။ ဧကာဒသ ပထဝီ အကပ္ပိယာ။ ဧကာဒသ ပထဝီ ကပ္ပိယာ။ ဧကာဒသ နိသ္သယပဋိပ္ပသ္သဒ္ဓိယော။ ဧကာဒသ ပုဂ္ဂလာ အဝန္ဒိယာ။ ဧကာဒသ ပရမာနိ။ ဧကာဒသ ဝရာနိ ယာစိံသု။ ဧကာဒသ သီမာဒောသာ။ အက္ကောသကပရိဘာသကေ ပုဂ္ဂလေ ဧကာဒသာဒီနဝာ ပာဋိကင္ခာ။ 2 မေတ္တာယ စေတောဝိမုတ္တိယာ အာသေဝိတာယ ဘာဝိတာယ ဗဟုလီကတာယ ယာနီကတာယ ဝတ္ထုကတာယ အနုဋ္ဌိတာယ ပရိစိတာယ သုသမာရဒ္ဓာယ ဧကာဒသာနိသံသာ ပာဋိကင္ခာ ။ သုခံ သုပတိ, သုခံ ပဋိဗုဇ္ဈတိ, န ပာပကံ သုပိနံ ပသ္သတိ, မနုသ္သာနံ ပိယော ဟောတိ, အမနုသ္သာနံ ပိယော ဟောတိ, ဒေဝတာ ရက္ခန္တိ, နာသ္သ အဂ္ဂိ ဝာ ဝိသံ ဝာ သတ္ထံ ဝာ ကမတိ, တုဝဋ္ဋံ စိတ္တံ သမာဓိယတိ, မုခဝဏ္ဏော ဝိပ္ပသီဒတိ, အသမ္မူဠ္ဟော ကာလင္ကရောတိ, ဥတ္တရိ အပ္ပဋိဝိဇ္ဈန္တော ဗ္ရဟ္မလောကူပဂော ဟောတိ – မေတ္တာယ စေတောဝိမုတ္တိယာ အာသေဝိတာယ ဘာဝိတာယ ဗဟုလီကတာယ ယာနီကတာယ ဝတ္ထုကတာယ အနုဋ္ဌိတာယ ပရိစိတာယ သုသမာရဒ္ဓာယ ဣမေ ဧကာဒသာနိသံသာ ပာဋိကင္ခာတိ။
331. Ekāda puggalā anupasampannā na upasampādetabbā, upasampannā nāsetabbā. Ekādasa pādukā akappiyā. Ekādasa pattā akappiyā. Ekādasa cīvarāni akappiyāni. Ekādasa yāvatatiyakā. Bhikkhunīnaṃ ekādasa antarāyikā dhammā pucchitabbā. Ekādasa cīvarāni adhiṭṭhātabbāni. Ekādasa cīvarāni na vikappetabbāni. Ekādase aruṇuggamane nissaggiyaṃ hoti. Ekādasa gaṇṭhikā kappiyā. Ekādasa vidhā 3 kappiyā. Ekādasa pathavī akappiyā. Ekādasa pathavī kappiyā. Ekādasa nissayapaṭippassaddhiyo. Ekādasa puggalā avandiyā. Ekādasa paramāni. Ekādasa varāni yāciṃsu. Ekādasa sīmādosā. Akkosakaparibhāsake puggale ekādasādīnavā pāṭikaṅkhā. 4 Mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṃsā pāṭikaṅkhā . Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hoti, devatā rakkhanti, nāssa aggi vā visaṃ vā satthaṃ vā kamati, tuvaṭṭaṃ cittaṃ samādhiyati, mukhavaṇṇo vippasīdati, asammūḷho kālaṅkaroti, uttari appaṭivijjhanto brahmalokūpago hoti – mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ime ekādasānisaṃsā pāṭikaṅkhāti.
ဧကာဒသကံ နိဋ္ဌိတံ။
Ekādasakaṃ niṭṭhitaṃ.
တသ္သုဒ္ဒာနံ –
Tassuddānaṃ –
နာသေတဗ္ဗာ ပာဒုကာ စ၊ ပတ္တာ စ စီဝရာနိ စ။
Nāsetabbā pādukā ca, pattā ca cīvarāni ca;
တတိယာ ပုစ္ဆိတဗ္ဗာ စ၊ အဓိဋ္ဌာနဝိကပ္ပနာ။
Tatiyā pucchitabbā ca, adhiṭṭhānavikappanā.
အရုဏာ ဂဏ္ဌိကာ ဝိဓာ၊ အကပ္ပိယာ စ ကပ္ပိယံ။
Aruṇā gaṇṭhikā vidhā, akappiyā ca kappiyaṃ;
နိသ္သယာဝန္ဒိယာ စေဝ၊ ပရမာနိ ဝရာနိ စ။
Nissayāvandiyā ceva, paramāni varāni ca;
သီမာဒောသာ စ အက္ကောသာ၊ မေတ္တာယေကာဒသာ ကတာတိ။
Sīmādosā ca akkosā, mettāyekādasā katāti.
ဧကုတ္တရိကနယော။
Ekuttarikanayo.
တသ္သုဒ္ဒာနံ –
Tassuddānaṃ –
ဧကကာ စ ဒုကာ စေဝ၊ တိကာ စ စတုပဉ္စကာ။
Ekakā ca dukā ceva, tikā ca catupañcakā;
ဆသတ္တဋ္ဌနဝကာ စ၊ ဒသ ဧကာဒသာနိ စ။
Chasattaṭṭhanavakā ca, dasa ekādasāni ca.
ဟိတာယ သဗ္ဗသတ္တာနံ၊ ဉာတဓမ္မေန တာဒိနာ။
Hitāya sabbasattānaṃ, ñātadhammena tādinā;
ဧကုတ္တရိကာ ဝိမလာ၊ မဟာဝီရေန ဒေသိတာတိ။
Ekuttarikā vimalā, mahāvīrena desitāti.
ဧကုတ္တရိကနယော နိဋ္ဌိတော။
Ekuttarikanayo niṭṭhito.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / ဧကာဒသကဝာရဝဏ္ဏနာ • Ekādasakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဧကာဒသကဝာရဝဏ္ဏနာ • Ekādasakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဧကာဒသကဝာရဝဏ္ဏနာ • Ekādasakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ဧကုတ္တရိကနယော ဧကာဒသကဝာရဝဏ္ဏနာ • Ekuttarikanayo ekādasakavāravaṇṇanā
