| Library / Tipiṭaka / ತಿಪಿಟಕ • Tipiṭaka / ಪರಿವಾರಪಾಳಿ • Parivārapāḷi |
೧೧. ಏಕಾದಸಕವಾರೋ
11. Ekādasakavāro
೩೩೧. ಏಕಾದ ಪುಗ್ಗಲಾ ಅನುಪಸಮ್ಪನ್ನಾ ನ ಉಪಸಮ್ಪಾದೇತಬ್ಬಾ, ಉಪಸಮ್ಪನ್ನಾ ನಾಸೇತಬ್ಬಾ। ಏಕಾದಸ ಪಾದುಕಾ ಅಕಪ್ಪಿಯಾ। ಏಕಾದಸ ಪತ್ತಾ ಅಕಪ್ಪಿಯಾ। ಏಕಾದಸ ಚೀವರಾನಿ ಅಕಪ್ಪಿಯಾನಿ। ಏಕಾದಸ ಯಾವತತಿಯಕಾ। ಭಿಕ್ಖುನೀನಂ ಏಕಾದಸ ಅನ್ತರಾಯಿಕಾ ಧಮ್ಮಾ ಪುಚ್ಛಿತಬ್ಬಾ। ಏಕಾದಸ ಚೀವರಾನಿ ಅಧಿಟ್ಠಾತಬ್ಬಾನಿ। ಏಕಾದಸ ಚೀವರಾನಿ ನ ವಿಕಪ್ಪೇತಬ್ಬಾನಿ। ಏಕಾದಸೇ ಅರುಣುಗ್ಗಮನೇ ನಿಸ್ಸಗ್ಗಿಯಂ ಹೋತಿ। ಏಕಾದಸ ಗಣ್ಠಿಕಾ ಕಪ್ಪಿಯಾ। ಏಕಾದಸ ವಿಧಾ 1 ಕಪ್ಪಿಯಾ। ಏಕಾದಸ ಪಥವೀ ಅಕಪ್ಪಿಯಾ। ಏಕಾದಸ ಪಥವೀ ಕಪ್ಪಿಯಾ। ಏಕಾದಸ ನಿಸ್ಸಯಪಟಿಪ್ಪಸ್ಸದ್ಧಿಯೋ। ಏಕಾದಸ ಪುಗ್ಗಲಾ ಅವನ್ದಿಯಾ। ಏಕಾದಸ ಪರಮಾನಿ। ಏಕಾದಸ ವರಾನಿ ಯಾಚಿಂಸು। ಏಕಾದಸ ಸೀಮಾದೋಸಾ। ಅಕ್ಕೋಸಕಪರಿಭಾಸಕೇ ಪುಗ್ಗಲೇ ಏಕಾದಸಾದೀನವಾ ಪಾಟಿಕಙ್ಖಾ। 2 ಮೇತ್ತಾಯ ಚೇತೋವಿಮುತ್ತಿಯಾ ಆಸೇವಿತಾಯ ಭಾವಿತಾಯ ಬಹುಲೀಕತಾಯ ಯಾನೀಕತಾಯ ವತ್ಥುಕತಾಯ ಅನುಟ್ಠಿತಾಯ ಪರಿಚಿತಾಯ ಸುಸಮಾರದ್ಧಾಯ ಏಕಾದಸಾನಿಸಂಸಾ ಪಾಟಿಕಙ್ಖಾ । ಸುಖಂ ಸುಪತಿ, ಸುಖಂ ಪಟಿಬುಜ್ಝತಿ, ನ ಪಾಪಕಂ ಸುಪಿನಂ ಪಸ್ಸತಿ, ಮನುಸ್ಸಾನಂ ಪಿಯೋ ಹೋತಿ, ಅಮನುಸ್ಸಾನಂ ಪಿಯೋ ಹೋತಿ, ದೇವತಾ ರಕ್ಖನ್ತಿ, ನಾಸ್ಸ ಅಗ್ಗಿ ವಾ ವಿಸಂ ವಾ ಸತ್ಥಂ ವಾ ಕಮತಿ, ತುವಟ್ಟಂ ಚಿತ್ತಂ ಸಮಾಧಿಯತಿ, ಮುಖವಣ್ಣೋ ವಿಪ್ಪಸೀದತಿ, ಅಸಮ್ಮೂಳ್ಹೋ ಕಾಲಙ್ಕರೋತಿ, ಉತ್ತರಿ ಅಪ್ಪಟಿವಿಜ್ಝನ್ತೋ ಬ್ರಹ್ಮಲೋಕೂಪಗೋ ಹೋತಿ – ಮೇತ್ತಾಯ ಚೇತೋವಿಮುತ್ತಿಯಾ ಆಸೇವಿತಾಯ ಭಾವಿತಾಯ ಬಹುಲೀಕತಾಯ ಯಾನೀಕತಾಯ ವತ್ಥುಕತಾಯ ಅನುಟ್ಠಿತಾಯ ಪರಿಚಿತಾಯ ಸುಸಮಾರದ್ಧಾಯ ಇಮೇ ಏಕಾದಸಾನಿಸಂಸಾ ಪಾಟಿಕಙ್ಖಾತಿ।
331. Ekāda puggalā anupasampannā na upasampādetabbā, upasampannā nāsetabbā. Ekādasa pādukā akappiyā. Ekādasa pattā akappiyā. Ekādasa cīvarāni akappiyāni. Ekādasa yāvatatiyakā. Bhikkhunīnaṃ ekādasa antarāyikā dhammā pucchitabbā. Ekādasa cīvarāni adhiṭṭhātabbāni. Ekādasa cīvarāni na vikappetabbāni. Ekādase aruṇuggamane nissaggiyaṃ hoti. Ekādasa gaṇṭhikā kappiyā. Ekādasa vidhā 3 kappiyā. Ekādasa pathavī akappiyā. Ekādasa pathavī kappiyā. Ekādasa nissayapaṭippassaddhiyo. Ekādasa puggalā avandiyā. Ekādasa paramāni. Ekādasa varāni yāciṃsu. Ekādasa sīmādosā. Akkosakaparibhāsake puggale ekādasādīnavā pāṭikaṅkhā. 4 Mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṃsā pāṭikaṅkhā . Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hoti, devatā rakkhanti, nāssa aggi vā visaṃ vā satthaṃ vā kamati, tuvaṭṭaṃ cittaṃ samādhiyati, mukhavaṇṇo vippasīdati, asammūḷho kālaṅkaroti, uttari appaṭivijjhanto brahmalokūpago hoti – mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ime ekādasānisaṃsā pāṭikaṅkhāti.
ಏಕಾದಸಕಂ ನಿಟ್ಠಿತಂ।
Ekādasakaṃ niṭṭhitaṃ.
ತಸ್ಸುದ್ದಾನಂ –
Tassuddānaṃ –
ನಾಸೇತಬ್ಬಾ ಪಾದುಕಾ ಚ, ಪತ್ತಾ ಚ ಚೀವರಾನಿ ಚ।
Nāsetabbā pādukā ca, pattā ca cīvarāni ca;
ತತಿಯಾ ಪುಚ್ಛಿತಬ್ಬಾ ಚ, ಅಧಿಟ್ಠಾನವಿಕಪ್ಪನಾ॥
Tatiyā pucchitabbā ca, adhiṭṭhānavikappanā.
ಅರುಣಾ ಗಣ್ಠಿಕಾ ವಿಧಾ, ಅಕಪ್ಪಿಯಾ ಚ ಕಪ್ಪಿಯಂ।
Aruṇā gaṇṭhikā vidhā, akappiyā ca kappiyaṃ;
ನಿಸ್ಸಯಾವನ್ದಿಯಾ ಚೇವ, ಪರಮಾನಿ ವರಾನಿ ಚ।
Nissayāvandiyā ceva, paramāni varāni ca;
ಸೀಮಾದೋಸಾ ಚ ಅಕ್ಕೋಸಾ, ಮೇತ್ತಾಯೇಕಾದಸಾ ಕತಾತಿ॥
Sīmādosā ca akkosā, mettāyekādasā katāti.
ಏಕುತ್ತರಿಕನಯೋ।
Ekuttarikanayo.
ತಸ್ಸುದ್ದಾನಂ –
Tassuddānaṃ –
ಏಕಕಾ ಚ ದುಕಾ ಚೇವ, ತಿಕಾ ಚ ಚತುಪಞ್ಚಕಾ।
Ekakā ca dukā ceva, tikā ca catupañcakā;
ಛಸತ್ತಟ್ಠನವಕಾ ಚ, ದಸ ಏಕಾದಸಾನಿ ಚ॥
Chasattaṭṭhanavakā ca, dasa ekādasāni ca.
ಹಿತಾಯ ಸಬ್ಬಸತ್ತಾನಂ, ಞಾತಧಮ್ಮೇನ ತಾದಿನಾ।
Hitāya sabbasattānaṃ, ñātadhammena tādinā;
ಏಕುತ್ತರಿಕಾ ವಿಮಲಾ, ಮಹಾವೀರೇನ ದೇಸಿತಾತಿ॥
Ekuttarikā vimalā, mahāvīrena desitāti.
ಏಕುತ್ತರಿಕನಯೋ ನಿಟ್ಠಿತೋ।
Ekuttarikanayo niṭṭhito.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / ಏಕಾದಸಕವಾರವಣ್ಣನಾ • Ekādasakavāravaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಏಕಾದಸಕವಾರವಣ್ಣನಾ • Ekādasakavāravaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಏಕಾದಸಕವಾರವಣ್ಣನಾ • Ekādasakavāravaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಏಕುತ್ತರಿಕನಯೋ ಏಕಾದಸಕವಾರವಣ್ಣನಾ • Ekuttarikanayo ekādasakavāravaṇṇanā
