| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
11. එකාදසකවාරො
11. Ekādasakavāro
331. එකාද පුග්‌ගලා අනුපසම්‌පන්‌නා න උපසම්‌පාදෙතබ්‌බා, උපසම්‌පන්‌නා නාසෙතබ්‌බා. එකාදස පාදුකා අකප්‌පියා. එකාදස පත්‌තා අකප්‌පියා. එකාදස චීවරානි අකප්‌පියානි. එකාදස යාවතතියකා. භික්‌ඛුනීනං එකාදස අන්‌තරායිකා ධම්‌මා පුච්‌ඡිතබ්‌බා. එකාදස චීවරානි අධිට්‌ඨාතබ්‌බානි. එකාදස චීවරානි න විකප්‌පෙතබ්‌බානි. එකාදසෙ අරුණුග්‌ගමනෙ නිස්‌සග්‌ගියං හොති. එකාදස ගණ්‌ඨිකා කප්‌පියා. එකාදස විධා 1 කප්‌පියා. එකාදස පථවී අකප්‌පියා. එකාදස පථවී කප්‌පියා. එකාදස නිස්‌සයපටිප්‌පස්‌සද්‌ධියො. එකාදස පුග්‌ගලා අවන්‌දියා. එකාදස පරමානි. එකාදස වරානි යාචිංසු. එකාදස සීමාදොසා. අක්‌කොසකපරිභාසකෙ පුග්‌ගලෙ එකාදසාදීනවා පාටිකඞ්‌ඛා. 2 මෙත්‌තාය චෙතොවිමුත්‌තියා ආසෙවිතාය භාවිතාය බහුලීකතාය යානීකතාය වත්‌ථුකතාය අනුට්‌ඨිතාය පරිචිතාය සුසමාරද්‌ධාය එකාදසානිසංසා පාටිකඞ්‌ඛා . සුඛං සුපති, සුඛං පටිබුජ්‌ඣති, න පාපකං සුපිනං පස්‌සති, මනුස්‌සානං පියො හොති, අමනුස්‌සානං පියො හොති, දෙවතා රක්‌ඛන්‌ති, නාස්‌ස අග්‌ගි වා විසං වා සත්‌ථං වා කමති, තුවට්‌ටං චිත්‌තං සමාධියති, මුඛවණ්‌ණො විප්‌පසීදති, අසම්‌මූළ්‌හො කාලඞ්‌කරොති, උත්‌තරි අප්‌පටිවිජ්‌ඣන්‌තො බ්‍රහ්‌මලොකූපගො හොති – මෙත්‌තාය චෙතොවිමුත්‌තියා ආසෙවිතාය භාවිතාය බහුලීකතාය යානීකතාය වත්‌ථුකතාය අනුට්‌ඨිතාය පරිචිතාය සුසමාරද්‌ධාය ඉමෙ එකාදසානිසංසා පාටිකඞ්‌ඛාති.
331. Ekāda puggalā anupasampannā na upasampādetabbā, upasampannā nāsetabbā. Ekādasa pādukā akappiyā. Ekādasa pattā akappiyā. Ekādasa cīvarāni akappiyāni. Ekādasa yāvatatiyakā. Bhikkhunīnaṃ ekādasa antarāyikā dhammā pucchitabbā. Ekādasa cīvarāni adhiṭṭhātabbāni. Ekādasa cīvarāni na vikappetabbāni. Ekādase aruṇuggamane nissaggiyaṃ hoti. Ekādasa gaṇṭhikā kappiyā. Ekādasa vidhā 3 kappiyā. Ekādasa pathavī akappiyā. Ekādasa pathavī kappiyā. Ekādasa nissayapaṭippassaddhiyo. Ekādasa puggalā avandiyā. Ekādasa paramāni. Ekādasa varāni yāciṃsu. Ekādasa sīmādosā. Akkosakaparibhāsake puggale ekādasādīnavā pāṭikaṅkhā. 4 Mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṃsā pāṭikaṅkhā . Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hoti, devatā rakkhanti, nāssa aggi vā visaṃ vā satthaṃ vā kamati, tuvaṭṭaṃ cittaṃ samādhiyati, mukhavaṇṇo vippasīdati, asammūḷho kālaṅkaroti, uttari appaṭivijjhanto brahmalokūpago hoti – mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ime ekādasānisaṃsā pāṭikaṅkhāti.
එකාදසකං නිට්‌ඨිතං.
Ekādasakaṃ niṭṭhitaṃ.
තස්‌සුද්‌දානං –
Tassuddānaṃ –
නාසෙතබ්‌බා පාදුකා ච, පත්‌තා ච චීවරානි ච;
Nāsetabbā pādukā ca, pattā ca cīvarāni ca;
තතියා පුච්‌ඡිතබ්‌බා ච, අධිට්‌ඨානවිකප්‌පනා.
Tatiyā pucchitabbā ca, adhiṭṭhānavikappanā.
අරුණා ගණ්‌ඨිකා විධා, අකප්‌පියා ච කප්‌පියං;
Aruṇā gaṇṭhikā vidhā, akappiyā ca kappiyaṃ;
නිස්‌සයාවන්‌දියා චෙව, පරමානි වරානි ච;
Nissayāvandiyā ceva, paramāni varāni ca;
සීමාදොසා ච අක්‌කොසා, මෙත්‌තායෙකාදසා කතාති.
Sīmādosā ca akkosā, mettāyekādasā katāti.
එකුත්‌තරිකනයො.
Ekuttarikanayo.
තස්‌සුද්‌දානං –
Tassuddānaṃ –
එකකා ච දුකා චෙව, තිකා ච චතුපඤ්‌චකා;
Ekakā ca dukā ceva, tikā ca catupañcakā;
ඡසත්‌තට්‌ඨනවකා ච, දස එකාදසානි ච.
Chasattaṭṭhanavakā ca, dasa ekādasāni ca.
හිතාය සබ්‌බසත්‌තානං, ඤාතධම්‌මෙන තාදිනා;
Hitāya sabbasattānaṃ, ñātadhammena tādinā;
එකුත්‌තරිකා විමලා, මහාවීරෙන දෙසිතාති.
Ekuttarikā vimalā, mahāvīrena desitāti.
එකුත්‌තරිකනයො නිට්‌ඨිතො.
Ekuttarikanayo niṭṭhito.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / එකාදසකවාරවණ්‌ණනා • Ekādasakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / එකාදසකවාරවණ්‌ණනා • Ekādasakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / එකාදසකවාරවණ්‌ණනා • Ekādasakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / එකුත්‌තරිකනයො එකාදසකවාරවණ්‌ණනා • Ekuttarikanayo ekādasakavāravaṇṇanā
