| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༡༡. ཨེཀཱདསཀཝཱརོ
11. Ekādasakavāro
༣༣༡. ཨེཀཱད པུགྒལཱ ཨནུཔསམྤནྣཱ ན ཨུཔསམྤཱདེཏབྦཱ, ཨུཔསམྤནྣཱ ནཱསེཏབྦཱ། ཨེཀཱདས པཱདུཀཱ ཨཀཔྤིཡཱ། ཨེཀཱདས པཏྟཱ ཨཀཔྤིཡཱ། ཨེཀཱདས ཙཱིཝརཱནི ཨཀཔྤིཡཱནི། ཨེཀཱདས ཡཱཝཏཏིཡཀཱ། བྷིཀྑུནཱིནཾ ཨེཀཱདས ཨནྟརཱཡིཀཱ དྷམྨཱ པུཙྪིཏབྦཱ། ཨེཀཱདས ཙཱིཝརཱནི ཨདྷིཊྛཱཏབྦཱནི། ཨེཀཱདས ཙཱིཝརཱནི ན ཝིཀཔྤེཏབྦཱནི། ཨེཀཱདསེ ཨརུཎུགྒམནེ ནིསྶགྒིཡཾ ཧོཏི། ཨེཀཱདས གཎྛིཀཱ ཀཔྤིཡཱ། ཨེཀཱདས ཝིདྷཱ 1 ཀཔྤིཡཱ། ཨེཀཱདས པཐཝཱི ཨཀཔྤིཡཱ། ཨེཀཱདས པཐཝཱི ཀཔྤིཡཱ། ཨེཀཱདས ནིསྶཡཔཊིཔྤསྶདྡྷིཡོ། ཨེཀཱདས པུགྒལཱ ཨཝནྡིཡཱ། ཨེཀཱདས པརམཱནི། ཨེཀཱདས ཝརཱནི ཡཱཙིཾསུ། ཨེཀཱདས སཱིམཱདོསཱ། ཨཀྐོསཀཔརིབྷཱསཀེ པུགྒལེ ཨེཀཱདསཱདཱིནཝཱ པཱཊིཀངྑཱ། 2 མེཏྟཱཡ ཙེཏོཝིམུཏྟིཡཱ ཨཱསེཝིཏཱཡ བྷཱཝིཏཱཡ བཧུལཱིཀཏཱཡ ཡཱནཱིཀཏཱཡ ཝཏྠུཀཏཱཡ ཨནུཊྛིཏཱཡ པརིཙིཏཱཡ སུསམཱརདྡྷཱཡ ཨེཀཱདསཱནིསཾསཱ པཱཊིཀངྑཱ ། སུཁཾ སུཔཏི, སུཁཾ པཊིབུཛ྄ཛྷཏི, ན པཱཔཀཾ སུཔིནཾ པསྶཏི, མནུསྶཱནཾ པིཡོ ཧོཏི, ཨམནུསྶཱནཾ པིཡོ ཧོཏི, དེཝཏཱ རཀྑནྟི, ནཱསྶ ཨགྒི ཝཱ ཝིསཾ ཝཱ སཏྠཾ ཝཱ ཀམཏི, ཏུཝཊྚཾ ཙིཏྟཾ སམཱདྷིཡཏི, མུཁཝཎྞོ ཝིཔྤསཱིདཏི, ཨསམྨཱུལ༹ྷོ ཀཱལངྐརོཏི, ཨུཏྟརི ཨཔྤཊིཝིཛ྄ཛྷནྟོ བྲཧྨལོཀཱུཔགོ ཧོཏི – མེཏྟཱཡ ཙེཏོཝིམུཏྟིཡཱ ཨཱསེཝིཏཱཡ བྷཱཝིཏཱཡ བཧུལཱིཀཏཱཡ ཡཱནཱིཀཏཱཡ ཝཏྠུཀཏཱཡ ཨནུཊྛིཏཱཡ པརིཙིཏཱཡ སུསམཱརདྡྷཱཡ ཨིམེ ཨེཀཱདསཱནིསཾསཱ པཱཊིཀངྑཱཏི།
331. Ekāda puggalā anupasampannā na upasampādetabbā, upasampannā nāsetabbā. Ekādasa pādukā akappiyā. Ekādasa pattā akappiyā. Ekādasa cīvarāni akappiyāni. Ekādasa yāvatatiyakā. Bhikkhunīnaṃ ekādasa antarāyikā dhammā pucchitabbā. Ekādasa cīvarāni adhiṭṭhātabbāni. Ekādasa cīvarāni na vikappetabbāni. Ekādase aruṇuggamane nissaggiyaṃ hoti. Ekādasa gaṇṭhikā kappiyā. Ekādasa vidhā 3 kappiyā. Ekādasa pathavī akappiyā. Ekādasa pathavī kappiyā. Ekādasa nissayapaṭippassaddhiyo. Ekādasa puggalā avandiyā. Ekādasa paramāni. Ekādasa varāni yāciṃsu. Ekādasa sīmādosā. Akkosakaparibhāsake puggale ekādasādīnavā pāṭikaṅkhā. 4 Mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṃsā pāṭikaṅkhā . Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hoti, devatā rakkhanti, nāssa aggi vā visaṃ vā satthaṃ vā kamati, tuvaṭṭaṃ cittaṃ samādhiyati, mukhavaṇṇo vippasīdati, asammūḷho kālaṅkaroti, uttari appaṭivijjhanto brahmalokūpago hoti – mettāya cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ime ekādasānisaṃsā pāṭikaṅkhāti.
ཨེཀཱདསཀཾ ནིཊྛིཏཾ།
Ekādasakaṃ niṭṭhitaṃ.
ཏསྶུདྡཱནཾ –
Tassuddānaṃ –
ནཱསེཏབྦཱ པཱདུཀཱ ཙ, པཏྟཱ ཙ ཙཱིཝརཱནི ཙ།
Nāsetabbā pādukā ca, pattā ca cīvarāni ca;
ཏཏིཡཱ པུཙྪིཏབྦཱ ཙ, ཨདྷིཊྛཱནཝིཀཔྤནཱ༎
Tatiyā pucchitabbā ca, adhiṭṭhānavikappanā.
ཨརུཎཱ གཎྛིཀཱ ཝིདྷཱ, ཨཀཔྤིཡཱ ཙ ཀཔྤིཡཾ།
Aruṇā gaṇṭhikā vidhā, akappiyā ca kappiyaṃ;
ནིསྶཡཱཝནྡིཡཱ ཙེཝ, པརམཱནི ཝརཱནི ཙ།
Nissayāvandiyā ceva, paramāni varāni ca;
སཱིམཱདོསཱ ཙ ཨཀྐོསཱ, མེཏྟཱཡེཀཱདསཱ ཀཏཱཏི༎
Sīmādosā ca akkosā, mettāyekādasā katāti.
ཨེཀུཏྟརིཀནཡོ།
Ekuttarikanayo.
ཏསྶུདྡཱནཾ –
Tassuddānaṃ –
ཨེཀཀཱ ཙ དུཀཱ ཙེཝ, ཏིཀཱ ཙ ཙཏུཔཉྩཀཱ།
Ekakā ca dukā ceva, tikā ca catupañcakā;
ཚསཏྟཊྛནཝཀཱ ཙ, དས ཨེཀཱདསཱནི ཙ༎
Chasattaṭṭhanavakā ca, dasa ekādasāni ca.
ཧིཏཱཡ སབྦསཏྟཱནཾ, ཉཱཏདྷམྨེན ཏཱདིནཱ།
Hitāya sabbasattānaṃ, ñātadhammena tādinā;
ཨེཀུཏྟརིཀཱ ཝིམལཱ, མཧཱཝཱིརེན དེསིཏཱཏི༎
Ekuttarikā vimalā, mahāvīrena desitāti.
ཨེཀུཏྟརིཀནཡོ ནིཊྛིཏོ།
Ekuttarikanayo niṭṭhito.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / ཨེཀཱདསཀཝཱརཝཎྞནཱ • Ekādasakavāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨེཀཱདསཀཝཱརཝཎྞནཱ • Ekādasakavāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨེཀཱདསཀཝཱརཝཎྞནཱ • Ekādasakavāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཨེཀུཏྟརིཀནཡོ ཨེཀཱདསཀཝཱརཝཎྞནཱ • Ekuttarikanayo ekādasakavāravaṇṇanā
