| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
ஏகாத³ஸமசித்தங்
Ekādasamacittaṃ
422. ஏகாத³ஸமங் ச²ஸு ஆரம்மணேஸு வேத³னாவஸேன மஜ்ஜ²த்தஸ்ஸ கங்கா²பவத்திகாலே உப்பஜ்ஜதி. தஸ்ஸ ஸமயவவத்தா²னே விசிகிச்சா²ஸம்பயுத்தந்தி பத³ங் அபுப்³ப³ங். தஸ்ஸத்தோ² – விசிகிச்சா²ய ஸம்பயுத்தந்தி விசிகிச்சா²ஸம்பயுத்தங். த⁴ம்முத்³தே³ஸே ‘விசிகிச்சா² ஹோதீ’தி பத³மேவ விஸேஸோ. தத்த² விக³தா சிகிச்சா²தி விசிகிச்சா². ஸபா⁴வங் வா விசினந்தோ ஏதாய கிச்ச²தி கிலமதீதி விசிகிச்சா². ஸா ஸங்ஸயலக்க²ணா, கம்பனரஸா, அனிச்ச²யபச்சுபட்டா²னா அனேகங்ஸகா³ஹபச்சுபட்டா²னா வா, அயோனிஸோமனஸிகாரபத³ட்டா²னா. படிபத்திஅந்தராயகராதி த³ட்ட²ப்³பா³.
422. Ekādasamaṃ chasu ārammaṇesu vedanāvasena majjhattassa kaṅkhāpavattikāle uppajjati. Tassa samayavavatthāne vicikicchāsampayuttanti padaṃ apubbaṃ. Tassattho – vicikicchāya sampayuttanti vicikicchāsampayuttaṃ. Dhammuddese ‘vicikicchā hotī’ti padameva viseso. Tattha vigatā cikicchāti vicikicchā. Sabhāvaṃ vā vicinanto etāya kicchati kilamatīti vicikicchā. Sā saṃsayalakkhaṇā, kampanarasā, anicchayapaccupaṭṭhānā anekaṃsagāhapaccupaṭṭhānā vā, ayonisomanasikārapadaṭṭhānā. Paṭipattiantarāyakarāti daṭṭhabbā.
இத⁴ பத³படிபாடியா தேவீஸதி பதா³னி ஹொந்தி. அக்³க³ஹிதக்³க³ஹணேன சுத்³த³ஸ. தேஸங் வஸேன ஸவிப⁴த்திகாவிப⁴த்திகராஸிவினிச்ச²யோ வேதி³தப்³போ³. மனஸிகாரோ உத்³த⁴ச்சந்தி த்³வேயேவ யேவாபனகா.
Idha padapaṭipāṭiyā tevīsati padāni honti. Aggahitaggahaṇena cuddasa. Tesaṃ vasena savibhattikāvibhattikarāsivinicchayo veditabbo. Manasikāro uddhaccanti dveyeva yevāpanakā.
424. நித்³தே³ஸவாரஸ்ஸ சித்தஸ்ஸேகக்³க³தானித்³தே³ஸே யஸ்மா இத³ங் து³ப்³ப³லங் சித்தங் பவத்திட்டி²திமத்தகமேவெத்த² ஹோதி, தஸ்மா ‘ஸண்டி²தீ’திஆதீ³னி அவத்வா சித்தஸ்ஸ ‘டி²தீ’தி ஏகமேவ பத³ங் வுத்தங். தேனேவ ச காரணேன உத்³தே³ஸவாரேபி ‘ஸமாதி⁴ந்த்³ரிய’ந்திஆதி³ ந வுத்தங்.
424. Niddesavārassa cittassekaggatāniddese yasmā idaṃ dubbalaṃ cittaṃ pavattiṭṭhitimattakamevettha hoti, tasmā ‘saṇṭhitī’tiādīni avatvā cittassa ‘ṭhitī’ti ekameva padaṃ vuttaṃ. Teneva ca kāraṇena uddesavārepi ‘samādhindriya’ntiādi na vuttaṃ.
425. விசிகிச்சா²னித்³தே³ஸே கங்க²னவஸேன கங்கா². கங்கா²ய ஆயனாதி கங்கா²யனா. புரிமகங்கா² ஹி உத்தரகங்க²ங் ஆனேதி நாம. ஆகாரவஸேன வா ஏதங் வுத்தங். கங்கா²ஸமங்கி³சித்தங் கங்கா²ய ஆயிதத்தா கங்கா²யிதங் நாம. தஸ்ஸ பா⁴வோ கங்கா²யிதத்தங். விமதீதி நமதி. விசிகிச்சா² வுத்தத்தா² ஏவ. கம்பனட்டே²ன த்³விதா⁴ ஏளயதீதி த்³வெள்ஹகங். படிபத்தினிவாரணேன த்³விதா⁴பதோ² வியாதி த்³வேதா⁴பதோ². ‘நிச்சங் நு கோ² இத³ங், அனிச்சங் நு கோ²’திஆதி³பவத்தியா ஏகஸ்மிங் ஆகாரே ஸண்டா²துங் அஸமத்த²தாய ஸமந்ததோ ஸேதீதி ஸங்ஸயோ. ஏகங்ஸங் க³ஹேதுங் அஸமத்த²தாய ந ஏகங்ஸக்³கா³ஹோதி அனேகங்ஸக்³கா³ஹோ . நிச்சே²துங் அஸக்கொந்தீ ஆரம்மணதோ ஓஸக்கதீதி ஆஸப்பனா. ஓகா³ஹிதுங் அஸக்கொந்தீ பரிஸமந்ததோ ஸப்பதீதி பரிஸப்பனா. பரியோகா³ஹிதுங் அஸமத்த²தாய அபரியோகா³ஹனா. நிச்ச²யவஸேன ஆரம்மணே பவத்திதுங் அஸமத்த²தாய த²ம்பி⁴தத்தங்; சித்தஸ்ஸ த²த்³த⁴பா⁴வோதி அத்தோ². விசிகிச்சா² ஹி உப்பஜ்ஜித்வா சித்தங் த²த்³த⁴ங் கரோதி. யஸ்மா பனேஸா உப்பஜ்ஜமானா ஆரம்மணங் க³ஹெத்வா மனங் விலிக²ந்தீ விய, தஸ்மா மனோவிலேகோ²தி வுத்தா. ஸேஸங் ஸப்³ப³த்த² உத்தானத்த²மேவ.
425. Vicikicchāniddese kaṅkhanavasena kaṅkhā. Kaṅkhāya āyanāti kaṅkhāyanā. Purimakaṅkhā hi uttarakaṅkhaṃ āneti nāma. Ākāravasena vā etaṃ vuttaṃ. Kaṅkhāsamaṅgicittaṃ kaṅkhāya āyitattā kaṅkhāyitaṃ nāma. Tassa bhāvo kaṅkhāyitattaṃ. Vimatīti namati. Vicikicchā vuttatthā eva. Kampanaṭṭhena dvidhā eḷayatīti dveḷhakaṃ. Paṭipattinivāraṇena dvidhāpatho viyāti dvedhāpatho. ‘Niccaṃ nu kho idaṃ, aniccaṃ nu kho’tiādipavattiyā ekasmiṃ ākāre saṇṭhātuṃ asamatthatāya samantato setīti saṃsayo. Ekaṃsaṃ gahetuṃ asamatthatāya na ekaṃsaggāhoti anekaṃsaggāho. Nicchetuṃ asakkontī ārammaṇato osakkatīti āsappanā. Ogāhituṃ asakkontī parisamantato sappatīti parisappanā. Pariyogāhituṃ asamatthatāya apariyogāhanā. Nicchayavasena ārammaṇe pavattituṃ asamatthatāya thambhitattaṃ; cittassa thaddhabhāvoti attho. Vicikicchā hi uppajjitvā cittaṃ thaddhaṃ karoti. Yasmā panesā uppajjamānā ārammaṇaṃ gahetvā manaṃ vilikhantī viya, tasmā manovilekhoti vuttā. Sesaṃ sabbattha uttānatthameva.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / த்³வாத³ஸ அகுஸலானி • Dvādasa akusalāni
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / ஏகாத³ஸமசித்தவண்ணனா • Ekādasamacittavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / ஏகாத³ஸமசித்தவண்ணனா • Ekādasamacittavaṇṇanā
