| Library / Tipiṭaka / තිපිටක • Tipiṭaka / පඤ්‌චපකරණ-අනුටීකා • Pañcapakaraṇa-anuṭīkā |
11. එකාදසමනයො සඞ්‌ගහිතෙනසම්‌පයුත්‌තවිප්‌පයුත්‌තපදවණ්‌ණනා
11. Ekādasamanayo saṅgahitenasampayuttavippayuttapadavaṇṇanā
409. තෙති සඞ්‌ඛාරක්‌ඛන්‌ධධම්‌මා. සෙසෙහීති අවසිට්‌ඨෙහි වෙදනාසඤ්‌ඤාවිඤ්‌ඤාණක්‌ඛන්‌ධෙහි. ‘‘එතෙන සහ සම්‌බන්‌ධො’’ති ඉමිනා පදානං සම්‌බන්‌ධදස්‌සනමුඛෙන ‘‘සමුදයසච්‌චෙන යෙ ධම්‌මා සම්‌පයුත්‌තා’’ති පාළියා අත්‌ථවිවරණං පාකටතරං කත්‌වා කෙහිචීතිපදස්‌සත්‌ථං කාතුං ‘‘කෙහිචීති එතස්‌ස පනා’’තිආදිමාහ. අත්‌ථං දස්‌සෙතුං ආහාති සම්‌බන්‌ධො. විසෙසෙත්‌වාති එත්‌ථ තෙසං ධම්‌මානං තණ්‌හාවජ්‌ජානං සඞ්‌ඛාරක්‌ඛන්‌ධධම්‌මායතනධම්‌මධාතුපරියාපන්‌නතාකිත්‌තනං විසෙසනං දට්‌ඨබ්‌බං, යතො තෙ සමුදයසච්‌චෙන ඛන්‌ධාදිසඞ්‌ගහෙන සඞ්‌ගහිතාති වුත්‌තා. සයං අත්‌තනා සම්‌පයුත්‌තො න හොතීති වුත්‌තං ‘‘අත්‌තවජ්‌ජෙහී’’ති. තෙන වුත්‌තං ‘‘චිත්‌තං න වත්‌තබ්‌බං චිත්‌තෙන සම්‌පයුත්‌තන්‌තිපි, චිත්‌තෙන විප්‌පයුත්‌තන්‌තිපී’’ති. සම්‌පයොගාරහෙහීති විසෙසනං සුඛුමරූපං නිබ්‌බානන්‌ති ද්‌වෙ සන්‌ධාය කතං, න තණ්‌හාදිකෙ.
409. Teti saṅkhārakkhandhadhammā. Sesehīti avasiṭṭhehi vedanāsaññāviññāṇakkhandhehi. ‘‘Etena saha sambandho’’ti iminā padānaṃ sambandhadassanamukhena ‘‘samudayasaccena ye dhammā sampayuttā’’ti pāḷiyā atthavivaraṇaṃ pākaṭataraṃ katvā kehicītipadassatthaṃ kātuṃ ‘‘kehicīti etassa panā’’tiādimāha. Atthaṃ dassetuṃ āhāti sambandho. Visesetvāti ettha tesaṃ dhammānaṃ taṇhāvajjānaṃ saṅkhārakkhandhadhammāyatanadhammadhātupariyāpannatākittanaṃ visesanaṃ daṭṭhabbaṃ, yato te samudayasaccena khandhādisaṅgahena saṅgahitāti vuttā. Sayaṃ attanā sampayutto na hotīti vuttaṃ ‘‘attavajjehī’’ti. Tena vuttaṃ ‘‘cittaṃ na vattabbaṃ cittena sampayuttantipi, cittena vippayuttantipī’’ti. Sampayogārahehīti visesanaṃ sukhumarūpaṃ nibbānanti dve sandhāya kataṃ, na taṇhādike.
එකාදසමනයසඞ්‌ගහිතෙනසම්‌පයුත්‌තවිප්‌පයුත්‌තපදවණ්‌ණනා නිට්‌ඨිතා.
Ekādasamanayasaṅgahitenasampayuttavippayuttapadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / ධාතුකථාපාළි • Dhātukathāpāḷi / 11. සඞ්‌ගහිතෙනසම්‌පයුත්‌තවිප්‌පයුත්‌තපදනිද්‌දෙසො • 11. Saṅgahitenasampayuttavippayuttapadaniddeso
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 11. එකාදසමනයො සඞ්‌ගහිතෙනසම්‌පයුත්‌තවිප්‌පයුත්‌තපදවණ්‌ණනා • 11. Ekādasamanayo saṅgahitenasampayuttavippayuttapadavaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 11. එකාදසමනයො සඞ්‌ගහිතෙනසම්‌පයුත්‌තවිප්‌පයුත්‌තපදවණ්‌ණනා • 11. Ekādasamanayo saṅgahitenasampayuttavippayuttapadavaṇṇanā
