| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
১১. একাদসমসিক্খাপদং
11. Ekādasamasikkhāpadaṃ
৭৮৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন থুল্লনন্দা ভিক্খুনী বহুস্সুতা হোতি ভাণিকা ৰিসারদা পট্টা ধম্মিং কথং কাতুং। অথ খো রাজা পসেনদি কোসলো সীতকালে মহগ্ঘং কম্বলং পারুপিত্ৰা যেন থুল্লনন্দা ভিক্খুনী তেনুপসঙ্কমি; উপসঙ্কমিত্ৰা থুল্লনন্দং ভিক্খুনিং অভিৰাদেত্ৰা একমন্তং নিসীদি। একমন্তং নিসিন্নং খো রাজানং পসেনদিং কোসলং থুল্লনন্দা ভিক্খুনী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো রাজা পসেনদি কোসলো থুল্লনন্দায ভিক্খুনিযা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো থুল্লনন্দং ভিক্খুনিং এতদৰোচ – ‘‘ৰদেয্যাসি, অয্যে, যেন অত্থো’’তি? ‘‘সচে মে ত্ৰং, মহারাজ, দাতুকামোসি, ইমং কম্বলং দেহী’’তি। অথ খো রাজা পসেনদি কোসলো থুল্লনন্দায ভিক্খুনিযা কম্বলং দত্ৰা উট্ঠাযাসনা থুল্লনন্দং ভিক্খুনিং অভিৰাদেত্ৰা পদক্খিণং কত্ৰা পক্কামি। মনুস্সা উজ্ঝাযন্তি খিয্যন্তি ৰিপাচেন্তি – ‘‘মহিচ্ছা ইমা ভিক্খুনিযো অসন্তুট্ঠা। কথঞ্হি নাম রাজানং কম্বলং ৰিঞ্ঞাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা রাজানং কম্বলং ৰিঞ্ঞাপেস্সতী’’তি…পে॰… সচ্চং কির, ভিক্খৰে, থুল্লনন্দা ভিক্খুনী রাজানং কম্বলং ৰিঞ্ঞাপেতীতি 1? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, থুল্লনন্দা ভিক্খুনী রাজানং কম্বলং ৰিঞ্ঞাপেস্সতি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
783. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī bahussutā hoti bhāṇikā visāradā paṭṭā dhammiṃ kathaṃ kātuṃ. Atha kho rājā pasenadi kosalo sītakāle mahagghaṃ kambalaṃ pārupitvā yena thullanandā bhikkhunī tenupasaṅkami; upasaṅkamitvā thullanandaṃ bhikkhuniṃ abhivādetvā ekamantaṃ nisīdi. Ekamantaṃ nisinnaṃ kho rājānaṃ pasenadiṃ kosalaṃ thullanandā bhikkhunī dhammiyā kathāya sandassesi samādapesi samuttejesi sampahaṃsesi. Atha kho rājā pasenadi kosalo thullanandāya bhikkhuniyā dhammiyā kathāya sandassito samādapito samuttejito sampahaṃsito thullanandaṃ bhikkhuniṃ etadavoca – ‘‘vadeyyāsi, ayye, yena attho’’ti? ‘‘Sace me tvaṃ, mahārāja, dātukāmosi, imaṃ kambalaṃ dehī’’ti. Atha kho rājā pasenadi kosalo thullanandāya bhikkhuniyā kambalaṃ datvā uṭṭhāyāsanā thullanandaṃ bhikkhuniṃ abhivādetvā padakkhiṇaṃ katvā pakkāmi. Manussā ujjhāyanti khiyyanti vipācenti – ‘‘mahicchā imā bhikkhuniyo asantuṭṭhā. Kathañhi nāma rājānaṃ kambalaṃ viññāpessantī’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā rājānaṃ kambalaṃ viññāpessatī’’ti…pe… saccaṃ kira, bhikkhave, thullanandā bhikkhunī rājānaṃ kambalaṃ viññāpetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī rājānaṃ kambalaṃ viññāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৭৮৪. ‘‘গরুপাৰুরণং 3 পন ভিক্খুনিযা চেতাপেন্তিযা চতুক্কংসপরমং চেতাপেতব্বং। ততো চে উত্তরি চেতাপেয্য, নিস্সগ্গিযং পাচিত্তিয’’ন্তি।
784.‘‘Garupāvuraṇaṃ 4 pana bhikkhuniyā cetāpentiyā catukkaṃsaparamaṃ cetāpetabbaṃ. Tato ce uttari cetāpeyya, nissaggiyaṃ pācittiya’’nti.
৭৮৫. গরুপাৰুরণং নাম যং কিঞ্চি সীতকালে পাৰুরণং।
785.Garupāvuraṇaṃ nāma yaṃ kiñci sītakāle pāvuraṇaṃ.
চেতাপেন্তিযাতি ৰিঞ্ঞাপেন্তিযা।
Cetāpentiyāti viññāpentiyā.
চতুক্কংসপরমং চেতাপেতব্বন্তি সোল়সকহাপণগ্ঘনকং চেতাপেতব্বং।
Catukkaṃsaparamaṃcetāpetabbanti soḷasakahāpaṇagghanakaṃ cetāpetabbaṃ.
ততো চে উত্তরি চেতাপেয্যাতি ততুত্তরি ৰিঞ্ঞাপেতি, পযোগে দুক্কটং। পটিলাভেন নিস্সগ্গিযং হোতি। নিস্সজ্জিতব্বং সঙ্ঘস্স ৰা গণস্স ৰা একভিক্খুনিযা ৰা। এৰঞ্চ পন, ভিক্খৰে, নিস্সজ্জিতব্বং…পে॰… ‘‘ইদং মে, অয্যে, গরুপাৰুরণং অতিরেকচতুক্কংসপরমং চেতাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি…পে॰… দদেয্যাতি…পে॰… দদেয্যুন্তি…পে॰… অয্যায দম্মীতি।
Tato ce uttari cetāpeyyāti tatuttari viññāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… ‘‘idaṃ me, ayye, garupāvuraṇaṃ atirekacatukkaṃsaparamaṃ cetāpitaṃ nissaggiyaṃ, imāhaṃ saṅghassa nissajjāmī’’ti…pe… dadeyyāti…pe… dadeyyunti…pe… ayyāya dammīti.
৭৮৬. অতিরেকচতুক্কংসে অতিরেকসঞ্ঞা চেতাপেতি, নিস্সগ্গিযং পাচিত্তিযং। অতিরেকচতুক্কংসে ৰেমতিকা চেতাপেতি, নিস্সগ্গিযং পাচিত্তিযং । অতিরেকচতুক্কংসে ঊনকসঞ্ঞা চেতাপেতি, নিস্সগ্গিযং পাচিত্তিযং।
786. Atirekacatukkaṃse atirekasaññā cetāpeti, nissaggiyaṃ pācittiyaṃ. Atirekacatukkaṃse vematikā cetāpeti, nissaggiyaṃ pācittiyaṃ . Atirekacatukkaṃse ūnakasaññā cetāpeti, nissaggiyaṃ pācittiyaṃ.
ঊনকচতুক্কংসে অতিরেকসঞ্ঞা, আপত্তি দুক্কটস্স। ঊনকচতুক্কংসে ৰেমতিকা, আপত্তি দুক্কটস্স। ঊনকচতুক্কংসে ঊনকসঞ্ঞা, অনাপত্তি।
Ūnakacatukkaṃse atirekasaññā, āpatti dukkaṭassa. Ūnakacatukkaṃse vematikā, āpatti dukkaṭassa. Ūnakacatukkaṃse ūnakasaññā, anāpatti.
৭৮৭. অনাপত্তি চতুক্কংসপরমং চেতাপেতি, ঊনকচতুক্কংসপরমং চেতাপেতি, ঞাতকানং, পৰারিতানং, অঞ্ঞস্সত্থায, অত্তনো ধনেন, মহগ্ঘং চেতাপেতুকামস্স অপ্পগ্ঘং চেতাপেতি, উম্মত্তিকায, আদিকম্মিকাযাতি।
787. Anāpatti catukkaṃsaparamaṃ cetāpeti, ūnakacatukkaṃsaparamaṃ cetāpeti, ñātakānaṃ, pavāritānaṃ, aññassatthāya, attano dhanena, mahagghaṃ cetāpetukāmassa appagghaṃ cetāpeti, ummattikāya, ādikammikāyāti.
একাদসমসিক্খাপদং নিট্ঠিতং।
Ekādasamasikkhāpadaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / একাদসমনিস্সগ্গিযপাচিত্তিযসিক্খাপদৰণ্ণনা • Ekādasamanissaggiyapācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৩. নিস্সগ্গিযকণ্ডং (ভিক্খুনীৰিভঙ্গৰণ্ণনা) • 3. Nissaggiyakaṇḍaṃ (bhikkhunīvibhaṅgavaṇṇanā)
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১১. একাদসমনিস্সগ্গিযপাচিত্তিযসিক্খাপদৰণ্ণনা • 11. Ekādasamanissaggiyapācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. দুতিযনিস্সগ্গিযাদিপাচিত্তিযসিক্খাপদৰণ্ণনা • 2. Dutiyanissaggiyādipācittiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১১. একাদসমনিস্সগ্গিযপাচিত্তিযসিক্খাপদং • 11. Ekādasamanissaggiyapācittiyasikkhāpadaṃ
