| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā |
11. එකාදසමසික්‌ඛාපදවණ්‌ණනා
11. Ekādasamasikkhāpadavaṇṇanā
1167-8. එකාදසමෙ – පාරිවාසිකඡන්‌දදානෙනාති පාරිවාසියෙන ඡන්‌දදානෙන. තත්‌ථ චතුබ්‌බිධං පාරිවාසියං – පරිසපාරිවාසියං , රත්‌තිපාරිවාසියං, ඡන්‌දපාරිවාසියං, අජ්‌ඣාසයපාරිවාසියන්‌ති. තත්‌ථ පරිසපාරිවාසියං නාම භික්‌ඛූ කෙනචිදෙව කරණීයෙන සන්‌නිපතිතා හොන්‌ති, අථ මෙඝො වා උට්‌ඨාති, උස්‌සාරණා වා කරියති, මනුස්‌සා වා අජ්‌ඣොත්‌ථරන්‌තා ආගච්‌ඡන්‌ති, භික්‌ඛූ ‘‘අනොකාසා මයං අඤ්‌ඤත්‍ර ගච්‌ඡාමා’’ති ඡන්‌දං අවිස්‌සජ්‌ජෙත්‌වාව උට්‌ඨහන්‌ති. ඉදං පරිසපාරිවාසියං. කිඤ්‌චාපි පරිසපාරිවාසියං, ඡන්‌දස්‌ස පන අවිස්‌සට්‌ඨත්‌තා කම්‌මං කාතුං වට්‌ටති.
1167-8. Ekādasame – pārivāsikachandadānenāti pārivāsiyena chandadānena. Tattha catubbidhaṃ pārivāsiyaṃ – parisapārivāsiyaṃ , rattipārivāsiyaṃ, chandapārivāsiyaṃ, ajjhāsayapārivāsiyanti. Tattha parisapārivāsiyaṃ nāma bhikkhū kenacideva karaṇīyena sannipatitā honti, atha megho vā uṭṭhāti, ussāraṇā vā kariyati, manussā vā ajjhottharantā āgacchanti, bhikkhū ‘‘anokāsā mayaṃ aññatra gacchāmā’’ti chandaṃ avissajjetvāva uṭṭhahanti. Idaṃ parisapārivāsiyaṃ. Kiñcāpi parisapārivāsiyaṃ, chandassa pana avissaṭṭhattā kammaṃ kātuṃ vaṭṭati.
පුන භික්‌ඛූ ‘‘උපොසථාදීනි කරිස්‌සාමා’’ති රත්‌තිං සන්‌නිපතිත්‌වා ‘‘යාව සබ්‌බෙ සන්‌නිපතන්‌ති, තාව ධම්‌මං සුණිස්‌සාමා’’ති එකං අජ්‌ඣෙසන්‌ති, තස්‌මිං ධම්‌මකථං කථෙන්‌තෙයෙව අරුණො උග්‌ගච්‌ඡති. සචෙ ‘‘චාතුද්‌දසිකං උපොසථං කරිස්‌සාමා’’ති නිසින්‌නා ‘‘පන්‌නරසො’’ති කාතුං වට්‌ටති. සචෙ පන්‌නරසිකං කාතුං නිසින්‌නා පාටිපදෙ අනුපොසථෙ උපොසථං කාතුං න වට්‌ටති, අඤ්‌ඤං පන සඞ්‌ඝකිච්‌චං කාතුං වට්‌ටති. ඉදං රත්‌තිපාරිවාසියං නාම.
Puna bhikkhū ‘‘uposathādīni karissāmā’’ti rattiṃ sannipatitvā ‘‘yāva sabbe sannipatanti, tāva dhammaṃ suṇissāmā’’ti ekaṃ ajjhesanti, tasmiṃ dhammakathaṃ kathenteyeva aruṇo uggacchati. Sace ‘‘cātuddasikaṃ uposathaṃ karissāmā’’ti nisinnā ‘‘pannaraso’’ti kātuṃ vaṭṭati. Sace pannarasikaṃ kātuṃ nisinnā pāṭipade anuposathe uposathaṃ kātuṃ na vaṭṭati, aññaṃ pana saṅghakiccaṃ kātuṃ vaṭṭati. Idaṃ rattipārivāsiyaṃ nāma.
පුන භික්‌ඛූ ‘‘කිඤ්‌චිදෙව අබ්‌භානාදිසඞ්‌ඝකම්‌මං කරිස්‌සාමා’’ති නිසින්‌නා හොන්‌ති, තත්‍රෙකො නක්‌ඛත්‌තපාඨකො භික්‌ඛු එවං වදති – ‘‘අජ්‌ජ නක්‌ඛත්‌තං දාරුණං, මා ඉමං කම්‌මං කරොථා’’ති. තෙ තස්‌ස වචනෙන ඡන්‌දං විස්‌සජ්‌ජෙත්‌වා තත්‌ථෙව නිසින්‌නා හොන්‌ති. අථඤ්‌ඤො ආගන්‌ත්‌වා ‘‘නක්‌ඛත්‌තං පටිමානෙන්‌තං අත්‌ථො බාලං උපච්‌චගා’’ති (ජා. 1.1.49) වත්‌වා ‘‘කිං නක්‌ඛත්‌තෙන කරොථා’’ති වදති. ඉදං ඡන්‌දපාරිවාසියඤ්‌චෙව අජ්‌ඣාසයපාරිවාසියඤ්‌ච. එතස්‌මිං පාරිවාසියෙ පුන ඡන්‌දපාරිසුද්‌ධිං අනානෙත්‌වා කම්‌මං කාතුං න වට්‌ටති.
Puna bhikkhū ‘‘kiñcideva abbhānādisaṅghakammaṃ karissāmā’’ti nisinnā honti, tatreko nakkhattapāṭhako bhikkhu evaṃ vadati – ‘‘ajja nakkhattaṃ dāruṇaṃ, mā imaṃ kammaṃ karothā’’ti. Te tassa vacanena chandaṃ vissajjetvā tattheva nisinnā honti. Athañño āgantvā ‘‘nakkhattaṃ paṭimānentaṃ attho bālaṃ upaccagā’’ti (jā. 1.1.49) vatvā ‘‘kiṃ nakkhattena karothā’’ti vadati. Idaṃ chandapārivāsiyañceva ajjhāsayapārivāsiyañca. Etasmiṃ pārivāsiye puna chandapārisuddhiṃ anānetvā kammaṃ kātuṃ na vaṭṭati.
වුට්‌ඨිතාය පරිසායාති ඡන්‌දං විස්‌සජ්‌ජෙත්‌වා කායෙන වා වාචාය වා ඡන්‌දවිස්‌සජ්‌ජනමත්‌තෙනෙව වා උට්‌ඨිතාය පරිසාය.
Vuṭṭhitāya parisāyāti chandaṃ vissajjetvā kāyena vā vācāya vā chandavissajjanamatteneva vā uṭṭhitāya parisāya.
1169. අනාපත්‌ති අවුට්‌ඨිතාය පරිසායාති ඡන්‌දං අවිස්‌සජ්‌ජෙත්‌වා අවුට්‌ඨිතාය අනාපත්‌ති. සෙසං උත්‌තානමෙව. තිසමුට්‌ඨානං – කිරියං, සඤ්‌ඤාවිමොක්‌ඛං, සචිත්‌තකං, පණ්‌ණත්‌තිවජ්‌ජං , කායකම්‌මං, වචීකම්‌මං, තිචිත්‌තං, තිවෙදනන්‌ති.
1169.Anāpatti avuṭṭhitāya parisāyāti chandaṃ avissajjetvā avuṭṭhitāya anāpatti. Sesaṃ uttānameva. Tisamuṭṭhānaṃ – kiriyaṃ, saññāvimokkhaṃ, sacittakaṃ, paṇṇattivajjaṃ , kāyakammaṃ, vacīkammaṃ, ticittaṃ, tivedananti.
එකාදසමසික්‌ඛාපදං.
Ekādasamasikkhāpadaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / භික්‌ඛුනීවිභඞ්‌ග • Bhikkhunīvibhaṅga / 11. එකාදසමසික්‌ඛාපදං • 11. Ekādasamasikkhāpadaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 2. දුතියාදිසික්‌ඛාපදවණ්‌ණනා • 2. Dutiyādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමාදිසික්‌ඛාපදවණ්‌ණනා • 1. Paṭhamādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 11. එකාදසමසික්‌ඛාපදං • 11. Ekādasamasikkhāpadaṃ
