| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১৬. একধম্মপাল়ি
16. Ekadhammapāḷi
১. পঠমৰগ্গো
1. Paṭhamavaggo
২৯৬. ‘‘একধম্মো , ভিক্খৰে, ভাৰিতো বহুলীকতো একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্ততি। কতমো একধম্মো? বুদ্ধানুস্সতি। অযং খো, ভিক্খৰে, একধম্মো ভাৰিতো বহুলীকতো একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্ততী’’তি।
296. ‘‘Ekadhammo , bhikkhave, bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattati. Katamo ekadhammo? Buddhānussati. Ayaṃ kho, bhikkhave, ekadhammo bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattatī’’ti.
২৯৭. ‘‘একধম্মো, ভিক্খৰে, ভাৰিতো বহুলীকতো একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্ততি। কতমো একধম্মো? ধম্মানুস্সতি…পে॰… সঙ্ঘানুস্সতি… সীলানুস্সতি… চাগানুস্সতি… দেৰতানুস্সতি… আনাপানস্সতি… মরণস্সতি… কাযগতাসতি… উপসমানুস্সতি। অযং খো, ভিক্খৰে, একধম্মো ভাৰিতো বহুলীকতো একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্ততী’’তি।
297. ‘‘Ekadhammo, bhikkhave, bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattati. Katamo ekadhammo? Dhammānussati…pe… saṅghānussati… sīlānussati… cāgānussati… devatānussati… ānāpānassati… maraṇassati… kāyagatāsati… upasamānussati. Ayaṃ kho, bhikkhave, ekadhammo bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattatī’’ti.
ৰগ্গো পঠমো।
Vaggo paṭhamo.
২. দুতিযৰগ্গো
2. Dutiyavaggo
২৯৮. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা অকুসলা ধম্মা উপ্পজ্জন্তি উপ্পন্না ৰা অকুসলা ধম্মা ভিয্যোভাৰায ৰেপুল্লায সংৰত্তন্তি যথযিদং, ভিক্খৰে, মিচ্ছাদিট্ঠি। মিচ্ছাদিট্ঠিকস্স, ভিক্খৰে, অনুপ্পন্না চেৰ অকুসলা ধম্মা উপ্পজ্জন্তি উপ্পন্না চ অকুসলা ধম্মা ভিয্যোভাৰায ৰেপুল্লায সংৰত্তন্তী’’তি।
298. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā uppajjanti uppannā vā akusalā dhammā bhiyyobhāvāya vepullāya saṃvattanti yathayidaṃ, bhikkhave, micchādiṭṭhi. Micchādiṭṭhikassa, bhikkhave, anuppannā ceva akusalā dhammā uppajjanti uppannā ca akusalā dhammā bhiyyobhāvāya vepullāya saṃvattantī’’ti.
২৯৯. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা কুসলা ধম্মা উপ্পজ্জন্তি উপ্পন্না ৰা কুসলা ধম্মা ভিয্যোভাৰায ৰেপুল্লায সংৰত্তন্তি যথযিদং , ভিক্খৰে, সম্মাদিট্ঠি। সম্মাদিট্ঠিকস্স , ভিক্খৰে, অনুপ্পন্না চেৰ কুসলা ধম্মা উপ্পজ্জন্তি উপ্পন্না চ কুসলা ধম্মা ভিয্যোভাৰায ৰেপুল্লায সংৰত্তন্তী’’তি।
299. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā kusalā dhammā uppajjanti uppannā vā kusalā dhammā bhiyyobhāvāya vepullāya saṃvattanti yathayidaṃ , bhikkhave, sammādiṭṭhi. Sammādiṭṭhikassa , bhikkhave, anuppannā ceva kusalā dhammā uppajjanti uppannā ca kusalā dhammā bhiyyobhāvāya vepullāya saṃvattantī’’ti.
৩০০. ‘‘নাহং , ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা কুসলা ধম্মা নুপ্পজ্জন্তি উপ্পন্না ৰা কুসলা ধম্মা পরিহাযন্তি যথযিদং , ভিক্খৰে, মিচ্ছাদিট্ঠি। মিচ্ছাদিট্ঠিকস্স, ভিক্খৰে, অনুপ্পন্না চেৰ কুসলা ধম্মা নুপ্পজ্জন্তি উপ্পন্না চ কুসলা ধম্মা পরিহাযন্তী’’তি।
300. ‘‘Nāhaṃ , bhikkhave, aññaṃ ekadhammampi samanupassāmi yena anuppannā vā kusalā dhammā nuppajjanti uppannā vā kusalā dhammā parihāyanti yathayidaṃ , bhikkhave, micchādiṭṭhi. Micchādiṭṭhikassa, bhikkhave, anuppannā ceva kusalā dhammā nuppajjanti uppannā ca kusalā dhammā parihāyantī’’ti.
৩০১. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা অকুসলা ধম্মা নুপ্পজ্জন্তি উপ্পন্না ৰা অকুসলা ধম্মা পরিহাযন্তি যথযিদং, ভিক্খৰে, সম্মাদিট্ঠি। সম্মাদিট্ঠিকস্স, ভিক্খৰে, অনুপ্পন্না চেৰ অকুসলা ধম্মা নুপ্পজ্জন্তি উপ্পন্না চ অকুসলা ধম্মা পরিহাযন্তী’’তি।
301. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā nuppajjanti uppannā vā akusalā dhammā parihāyanti yathayidaṃ, bhikkhave, sammādiṭṭhi. Sammādiṭṭhikassa, bhikkhave, anuppannā ceva akusalā dhammā nuppajjanti uppannā ca akusalā dhammā parihāyantī’’ti.
৩০২. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা মিচ্ছাদিট্ঠি উপ্পজ্জতি উপ্পন্না ৰা মিচ্ছাদিট্ঠি পৰড্ঢতি যথযিদং, ভিক্খৰে, অযোনিসোমনসিকারো। অযোনিসো, ভিক্খৰে, মনসি করোতো অনুপ্পন্না চেৰ মিচ্ছাদিট্ঠি উপ্পজ্জতি উপ্পন্না চ মিচ্ছাদিট্ঠি পৰড্ঢতী’’তি।
302. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā micchādiṭṭhi uppajjati uppannā vā micchādiṭṭhi pavaḍḍhati yathayidaṃ, bhikkhave, ayonisomanasikāro. Ayoniso, bhikkhave, manasi karoto anuppannā ceva micchādiṭṭhi uppajjati uppannā ca micchādiṭṭhi pavaḍḍhatī’’ti.
৩০৩. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যেন অনুপ্পন্না ৰা সম্মাদিট্ঠি উপ্পজ্জতি উপ্পন্না ৰা সম্মাদিট্ঠি পৰড্ঢতি যথযিদং, ভিক্খৰে, যোনিসোমনসিকারো। যোনিসো, ভিক্খৰে, মনসি করোতো অনুপ্পন্না চেৰ সম্মাদিট্ঠি উপ্পজ্জতি উপ্পন্না চ সম্মাদিট্ঠি পৰড্ঢতী’’তি।
303. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā sammādiṭṭhi uppajjati uppannā vā sammādiṭṭhi pavaḍḍhati yathayidaṃ, bhikkhave, yonisomanasikāro. Yoniso, bhikkhave, manasi karoto anuppannā ceva sammādiṭṭhi uppajjati uppannā ca sammādiṭṭhi pavaḍḍhatī’’ti.
৩০৪. ‘‘নাহং , ভিক্খৰে, অঞ্ঞং একধম্মম্পি সমনুপস্সামি যেন 1 সত্তা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জন্তি যথযিদং, ভিক্খৰে, মিচ্ছাদিট্ঠি। মিচ্ছাদিট্ঠিযা, ভিক্খৰে, সমন্নাগতা সত্তা কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জন্তী’’তি।
304. ‘‘Nāhaṃ , bhikkhave, aññaṃ ekadhammampi samanupassāmi yena 2 sattā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjanti yathayidaṃ, bhikkhave, micchādiṭṭhi. Micchādiṭṭhiyā, bhikkhave, samannāgatā sattā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjantī’’ti.
৩০৫. ‘‘নাহং , ভিক্খৰে, অঞ্ঞং একধম্মম্পি সমনুপস্সামি যেন সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি যথযিদং, ভিক্খৰে, সম্মাদিট্ঠি। সম্মাদিট্ঠিযা, ভিক্খৰে, সমন্নাগতা সত্তা কাযস্স ভেদা পরং মরণা সুগতিং সগ্গং লোকং উপপজ্জন্তী’’তি।
305. ‘‘Nāhaṃ , bhikkhave, aññaṃ ekadhammampi samanupassāmi yena sattā kāyassa bhedā paraṃ maraṇā sugatiṃ saggaṃ lokaṃ upapajjanti yathayidaṃ, bhikkhave, sammādiṭṭhi. Sammādiṭṭhiyā, bhikkhave, samannāgatā sattā kāyassa bhedā paraṃ maraṇā sugatiṃ saggaṃ lokaṃ upapajjantī’’ti.
৩০৬. ‘‘মিচ্ছাদিট্ঠিকস্স, ভিক্খৰে, পুরিসপুগ্গলস্স যঞ্চেৰ কাযকম্মং যথাদিট্ঠি সমত্তং সমাদিন্নং যঞ্চ ৰচীকম্মং…পে॰… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খারা সব্বে তে ধম্মা অনিট্ঠায অকন্তায অমনাপায অহিতায দুক্খায সংৰত্তন্তি। তং কিস্স হেতু? দিট্ঠি হিস্স 3, ভিক্খৰে, পাপিকা। সেয্যথাপি, ভিক্খৰে , নিম্ববীজং ৰা কোসাতকিবীজং ৰা তিত্তকলাবুবীজং ৰা অল্লায পথৰিযা 4 নিক্খিত্তং যঞ্চেৰ পথৰিরসং উপাদিযতি যঞ্চ আপোরসং উপাদিযতি সব্বং তং তিত্তকত্তায কটুকত্তায অসাতত্তায সংৰত্ততি। তং কিস্স হেতু? বীজং হিস্স 5, ভিক্খৰে, পাপকং। এৰমেৰং খো, ভিক্খৰে, মিচ্ছাদিট্ঠিকস্স পুরিসপুগ্গলস্স যঞ্চেৰ কাযকম্মং যথাদিট্ঠি সমত্তং সমাদিন্নং যঞ্চ ৰচীকম্মং…পে॰… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খারা সব্বে তে ধম্মা অনিট্ঠায অকন্তায অমনাপায অহিতায দুক্খায সংৰত্তন্তি। তং কিস্স হেতু? দিট্ঠি হিস্স, ভিক্খৰে, পাপিকা’’তি।
306. ‘‘Micchādiṭṭhikassa, bhikkhave, purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa 6, bhikkhave, pāpikā. Seyyathāpi, bhikkhave , nimbabījaṃ vā kosātakibījaṃ vā tittakalābubījaṃ vā allāya pathaviyā 7 nikkhittaṃ yañceva pathavirasaṃ upādiyati yañca āporasaṃ upādiyati sabbaṃ taṃ tittakattāya kaṭukattāya asātattāya saṃvattati. Taṃ kissa hetu? Bījaṃ hissa 8, bhikkhave, pāpakaṃ. Evamevaṃ kho, bhikkhave, micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa, bhikkhave, pāpikā’’ti.
৩০৭. ‘‘সম্মাদিট্ঠিকস্স, ভিক্খৰে, পুরিসপুগ্গলস্স যঞ্চেৰ কাযকম্মং যথাদিট্ঠি সমত্তং সমাদিন্নং যঞ্চ ৰচীকম্মং…পে॰… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খারা সব্বে তে ধম্মা ইট্ঠায কন্তায মনাপায হিতায সুখায সংৰত্তন্তি। তং কিস্স হেতু? দিট্ঠি হিস্স, ভিক্খৰে, ভদ্দিকা। সেয্যথাপি, ভিক্খৰে, উচ্ছুবীজং ৰা সালিবীজং ৰা মুদ্দিকাবীজং ৰা অল্লায পথৰিযা নিক্খিত্তং যঞ্চেৰ পথৰিরসং উপাদিযতি যঞ্চ আপোরসং উপাদিযতি সব্বং তং মধুরত্তায সাতত্তায অসেচনকত্তায সংৰত্ততি। তং কিস্স হেতু? বীজং হিস্স, ভিক্খৰে, ভদ্দকং। এৰমেৰং খো, ভিক্খৰে, সম্মাদিট্ঠিকস্স পুরিসপুগ্গলস্স যঞ্চেৰ কাযকম্মং যথাদিট্ঠি সমত্তং সমাদিন্নং যঞ্চ ৰচীকম্মং…পে॰… যঞ্চ মনোকম্মং যথাদিট্ঠি সমত্তং সমাদিন্নং যা চ চেতনা যা চ পত্থনা যো চ পণিধি যে চ সঙ্খারা সব্বে তে ধম্মা ইট্ঠায কন্তায মনাপায হিতায সুখায সংৰত্তন্তি। তং কিস্স হেতু? দিট্ঠি হিস্স, ভিক্খৰে, ভদ্দিকা’’তি।
307. ‘‘Sammādiṭṭhikassa, bhikkhave, purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā. Seyyathāpi, bhikkhave, ucchubījaṃ vā sālibījaṃ vā muddikābījaṃ vā allāya pathaviyā nikkhittaṃ yañceva pathavirasaṃ upādiyati yañca āporasaṃ upādiyati sabbaṃ taṃ madhurattāya sātattāya asecanakattāya saṃvattati. Taṃ kissa hetu? Bījaṃ hissa, bhikkhave, bhaddakaṃ. Evamevaṃ kho, bhikkhave, sammādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā’’ti.
ৰগ্গো দুতিযো।
Vaggo dutiyo.
৩. ততিযৰগ্গো
3. Tatiyavaggo
৩০৮. ‘‘একপুগ্গলো , ভিক্খৰে, লোকে উপ্পজ্জমানো উপ্পজ্জতি বহুজনঅহিতায বহুজনঅসুখায, বহুনো জনস্স অনত্থায অহিতায দুক্খায দেৰমনুস্সানং। কতমো একপুগ্গলো? মিচ্ছাদিট্ঠিকো হোতি ৰিপরীতদস্সনো। সো বহুজনং সদ্ধম্মা ৰুট্ঠাপেত্ৰা অসদ্ধম্মে পতিট্ঠাপেতি। অযং খো, ভিক্খৰে, একপুগ্গলো লোকে উপ্পজ্জমানো উপ্পজ্জতি বহুজনঅহিতায বহুজনঅসুখায, বহুনো জনস্স অনত্থায অহিতায দুক্খায দেৰমনুস্সান’’ন্তি।
308. ‘‘Ekapuggalo , bhikkhave, loke uppajjamāno uppajjati bahujanaahitāya bahujanaasukhāya, bahuno janassa anatthāya ahitāya dukkhāya devamanussānaṃ. Katamo ekapuggalo? Micchādiṭṭhiko hoti viparītadassano. So bahujanaṃ saddhammā vuṭṭhāpetvā asaddhamme patiṭṭhāpeti. Ayaṃ kho, bhikkhave, ekapuggalo loke uppajjamāno uppajjati bahujanaahitāya bahujanaasukhāya, bahuno janassa anatthāya ahitāya dukkhāya devamanussāna’’nti.
৩০৯. ‘‘একপুগ্গলো, ভিক্খৰে, লোকে উপ্পজ্জমানো উপ্পজ্জতি বহুজনহিতায বহুজনসুখায, বহুনো জনস্স অত্থায হিতায সুখায দেৰমনুস্সানং। কতমো একপুগ্গলো? সম্মাদিট্ঠিকো হোতি অৰিপরীতদস্সনো। সো বহুজনং অসদ্ধম্মা ৰুট্ঠাপেত্ৰা সদ্ধম্মে পতিট্ঠাপেতি। অযং খো, ভিক্খৰে, একপুগ্গলো লোকে উপপজ্জমানো উপ্পজ্জতি বহুজনহিতায বহুজনসুখায, বহুনো জনস্স অত্থায হিতায সুখায দেৰমনুস্সান’’ন্তি।
309. ‘‘Ekapuggalo, bhikkhave, loke uppajjamāno uppajjati bahujanahitāya bahujanasukhāya, bahuno janassa atthāya hitāya sukhāya devamanussānaṃ. Katamo ekapuggalo? Sammādiṭṭhiko hoti aviparītadassano. So bahujanaṃ asaddhammā vuṭṭhāpetvā saddhamme patiṭṭhāpeti. Ayaṃ kho, bhikkhave, ekapuggalo loke upapajjamāno uppajjati bahujanahitāya bahujanasukhāya, bahuno janassa atthāya hitāya sukhāya devamanussāna’’nti.
৩১০. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যং এৰং মহাসাৰজ্জং যথযিদং, ভিক্খৰে, মিচ্ছাদিট্ঠি। মিচ্ছাদিট্ঠিপরমানি, ভিক্খৰে, মহাসাৰজ্জানী’’তি 9।
310. ‘‘Nāhaṃ, bhikkhave, aññaṃ ekadhammampi samanupassāmi yaṃ evaṃ mahāsāvajjaṃ yathayidaṃ, bhikkhave, micchādiṭṭhi. Micchādiṭṭhiparamāni, bhikkhave, mahāsāvajjānī’’ti 10.
৩১১. ‘‘নাহং, ভিক্খৰে, অঞ্ঞং একপুগ্গলম্পি সমনুপস্সামি যো এৰং বহুজনঅহিতায পটিপন্নো বহুজনঅসুখায, বহুনো জনস্স অনত্থায অহিতায দুক্খায দেৰমনুস্সানং যথযিদং, ভিক্খৰে, মক্খলি মোঘপুরিসো। সেয্যথাপি, ভিক্খৰে, নদীমুখে খিপ্পং 11 উড্ডেয্য 12 বহূনং মচ্ছানং অহিতায দুক্খায অনযায ব্যসনায; এৰমেৰং খো, ভিক্খৰে , মক্খলি মোঘপুরিসো মনুস্সখিপ্পং মঞ্ঞে লোকে উপ্পন্নো বহূনং সত্তানং অহিতায দুক্খায অনযায ব্যসনাযা’’তি।
311. ‘‘Nāhaṃ, bhikkhave, aññaṃ ekapuggalampi samanupassāmi yo evaṃ bahujanaahitāya paṭipanno bahujanaasukhāya, bahuno janassa anatthāya ahitāya dukkhāya devamanussānaṃ yathayidaṃ, bhikkhave, makkhali moghapuriso. Seyyathāpi, bhikkhave, nadīmukhe khippaṃ 13 uḍḍeyya 14 bahūnaṃ macchānaṃ ahitāya dukkhāya anayāya byasanāya; evamevaṃ kho, bhikkhave , makkhali moghapuriso manussakhippaṃ maññe loke uppanno bahūnaṃ sattānaṃ ahitāya dukkhāya anayāya byasanāyā’’ti.
৩১২. ‘‘দুরক্খাতে , ভিক্খৰে, ধম্মৰিনযে যো চ সমাদপেতি 15 যঞ্চ সমাদপেতি যো চ সমাদপিতো তথত্তায পটিপজ্জতি সব্বে তে বহুং অপুঞ্ঞং পসৰন্তি। তং কিস্স হেতু? দুরক্খাতত্তা, ভিক্খৰে, ধম্মস্সা’’তি।
312. ‘‘Durakkhāte , bhikkhave, dhammavinaye yo ca samādapeti 16 yañca samādapeti yo ca samādapito tathattāya paṭipajjati sabbe te bahuṃ apuññaṃ pasavanti. Taṃ kissa hetu? Durakkhātattā, bhikkhave, dhammassā’’ti.
৩১৩. ‘‘স্ৰাক্খাতে , ভিক্খৰে, ধম্মৰিনযে যো চ সমাদপেতি যঞ্চ সমাদপেতি যো চ সমাদপিতো তথত্তায পটিপজ্জতি সব্বে তে বহুং পুঞ্ঞং পসৰন্তি। তং কিস্স হেতু? স্ৰাক্খাতত্তা, ভিক্খৰে, ধম্মস্সা’’তি।
313. ‘‘Svākkhāte , bhikkhave, dhammavinaye yo ca samādapeti yañca samādapeti yo ca samādapito tathattāya paṭipajjati sabbe te bahuṃ puññaṃ pasavanti. Taṃ kissa hetu? Svākkhātattā, bhikkhave, dhammassā’’ti.
৩১৪. ‘‘দুরক্খাতে, ভিক্খৰে, ধম্মৰিনযে দাযকেন মত্তা জানিতব্বা, নো পটিগ্গাহকেন। তং কিস্স হেতু? দুরক্খাতত্তা, ভিক্খৰে, ধম্মস্সা’’তি।
314. ‘‘Durakkhāte, bhikkhave, dhammavinaye dāyakena mattā jānitabbā, no paṭiggāhakena. Taṃ kissa hetu? Durakkhātattā, bhikkhave, dhammassā’’ti.
৩১৫. ‘‘স্ৰাক্খাতে, ভিক্খৰে, ধম্মৰিনযে পটিগ্গাহকেন মত্তা জানিতব্বা, নো দাযকেন। তং কিস্স হেতু? স্ৰাক্খাতত্তা, ভিক্খৰে, ধম্মস্সা’’তি।
315. ‘‘Svākkhāte, bhikkhave, dhammavinaye paṭiggāhakena mattā jānitabbā, no dāyakena. Taṃ kissa hetu? Svākkhātattā, bhikkhave, dhammassā’’ti.
৩১৬. ‘‘দুরক্খাতে, ভিক্খৰে, ধম্মৰিনযে যো আরদ্ধৰীরিযো সো দুক্খং ৰিহরতি। তং কিস্স হেতু? দুরক্খাতত্তা, ভিক্খৰে, ধম্মস্সা’’তি।
316. ‘‘Durakkhāte, bhikkhave, dhammavinaye yo āraddhavīriyo so dukkhaṃ viharati. Taṃ kissa hetu? Durakkhātattā, bhikkhave, dhammassā’’ti.
৩১৭. ‘‘স্ৰাক্খাতে, ভিক্খৰে, ধম্মৰিনযে যো কুসীতো সো দুক্খং ৰিহরতি। তং কিস্স হেতু? স্ৰাক্খাতত্তা, ভিক্খৰে, ধম্মস্সা’’তি।
317. ‘‘Svākkhāte, bhikkhave, dhammavinaye yo kusīto so dukkhaṃ viharati. Taṃ kissa hetu? Svākkhātattā, bhikkhave, dhammassā’’ti.
৩১৮. ‘‘দুরক্খাতে, ভিক্খৰে, ধম্মৰিনযে যো কুসীতো সো সুখং ৰিহরতি । তং কিস্স হেতু? দুরক্খাতত্তা, ভিক্খৰে, ধম্মস্সা’’তি।
318. ‘‘Durakkhāte, bhikkhave, dhammavinaye yo kusīto so sukhaṃ viharati . Taṃ kissa hetu? Durakkhātattā, bhikkhave, dhammassā’’ti.
৩১৯. ‘‘স্ৰাক্খাতে, ভিক্খৰে, ধম্মৰিনযে যো আরদ্ধৰীরিযো সো সুখং ৰিহরতি। তং কিস্স হেতু? স্ৰাক্খাতত্তা, ভিক্খৰে, ধম্মস্সা’’তি।
319. ‘‘Svākkhāte, bhikkhave, dhammavinaye yo āraddhavīriyo so sukhaṃ viharati. Taṃ kissa hetu? Svākkhātattā, bhikkhave, dhammassā’’ti.
৩২০. ‘‘সেয্যথাপি , ভিক্খৰে, অপ্পমত্তকোপি গূথো দুগ্গন্ধো হোতি; এৰমেৰং খো অহং, ভিক্খৰে, অপ্পমত্তকম্পি ভৰং ন ৰণ্ণেমি, অন্তমসো অচ্ছরাসঙ্ঘাতমত্তম্পি’’।
320. ‘‘Seyyathāpi , bhikkhave, appamattakopi gūtho duggandho hoti; evamevaṃ kho ahaṃ, bhikkhave, appamattakampi bhavaṃ na vaṇṇemi, antamaso accharāsaṅghātamattampi’’.
৩২১. ‘‘সেয্যথাপি, ভিক্খৰে, অপ্পমত্তকম্পি মুত্তং দুগ্গন্ধং হোতি… অপ্পমত্তকোপি খেল়ো দুগ্গন্ধো হোতি… অপ্পমত্তকোপি পুব্বো দুগ্গন্ধো হোতি… অপ্পমত্তকম্পি লোহিতং দুগ্গন্ধং হোতি; এৰমেৰং খো অহং, ভিক্খৰে, অপ্পমত্তকম্পি ভৰং ন ৰণ্ণেমি, অন্তমসো অচ্ছরাসঙ্ঘাতমত্তম্পি’’।
321. ‘‘Seyyathāpi, bhikkhave, appamattakampi muttaṃ duggandhaṃ hoti… appamattakopi kheḷo duggandho hoti… appamattakopi pubbo duggandho hoti… appamattakampi lohitaṃ duggandhaṃ hoti; evamevaṃ kho ahaṃ, bhikkhave, appamattakampi bhavaṃ na vaṇṇemi, antamaso accharāsaṅghātamattampi’’.
ৰগ্গো ততিযো।
Vaggo tatiyo.
৪. চতুত্থৰগ্গো
4. Catutthavaggo
৩২২. ‘‘সেয্যথাপি , ভিক্খৰে, অপ্পমত্তকং ইমস্মিং জম্বুদীপে আরামরামণেয্যকং ৰনরামণেয্যকং ভূমিরামণেয্যকং পোক্খরণিরামণেয্যকং; অথ খো এতদেৰ বহুতরং যদিদং উক্কূলৰিকূলং নদীৰিদুগ্গং খাণুকণ্টকট্ঠানং 17 পব্বতৰিসমং; এৰমেৰং খো, ভিক্খৰে, অপ্পকা তে সত্তা যে থলজা, অথ খো এতেৰ সত্তা বহুতরা যে ওদকা’’।
322. ‘‘Seyyathāpi , bhikkhave, appamattakaṃ imasmiṃ jambudīpe ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇirāmaṇeyyakaṃ; atha kho etadeva bahutaraṃ yadidaṃ ukkūlavikūlaṃ nadīviduggaṃ khāṇukaṇṭakaṭṭhānaṃ 18 pabbatavisamaṃ; evamevaṃ kho, bhikkhave, appakā te sattā ye thalajā, atha kho eteva sattā bahutarā ye odakā’’.
৩২৩. … এৰমেৰং খো, ভিক্খৰে, অপ্পকা তে সত্তা যে মনুস্সেসু পচ্চাজাযন্তি; অথ খো এতেৰ সত্তা বহুতরা যে অঞ্ঞত্র মনুস্সেহি পচ্চাজাযন্তি।
323. … Evamevaṃ kho, bhikkhave, appakā te sattā ye manussesu paccājāyanti; atha kho eteva sattā bahutarā ye aññatra manussehi paccājāyanti.
… এৰমেৰং খো, ভিক্খৰে, অপ্পকা তে সত্তা যে মজ্ঝিমেসু জনপদেসু পচ্চাজাযন্তি; অথ খো এতেৰ সত্তা বহুতরা যে পচ্চন্তিমেসু জনপদেসু পচ্চাজাযন্তি অৰিঞ্ঞাতারেসু মিলক্খেসু 19।
… Evamevaṃ kho, bhikkhave, appakā te sattā ye majjhimesu janapadesu paccājāyanti; atha kho eteva sattā bahutarā ye paccantimesu janapadesu paccājāyanti aviññātāresu milakkhesu 20.
৩২৪. … এৰমেৰং খো, ভিক্খৰে, অপ্পকা তে সত্তা যে পঞ্ঞৰন্তো অজল়া অনেল়মূগা পটিবলা সুভাসিতদুব্ভাসিতস্স অত্থমঞ্ঞাতুং; অথ খো এতেৰ সত্তা বহুতরা যে দুপ্পঞ্ঞা জল়া এল়মূগা ন পটিবলা সুভাসিতদুব্ভাসিতস্স অত্থমঞ্ঞাতুং।
324. … Evamevaṃ kho, bhikkhave, appakā te sattā ye paññavanto ajaḷā aneḷamūgā paṭibalā subhāsitadubbhāsitassa atthamaññātuṃ; atha kho eteva sattā bahutarā ye duppaññā jaḷā eḷamūgā na paṭibalā subhāsitadubbhāsitassa atthamaññātuṃ.
৩২৫. … এৰমেৰং খো, ভিক্খৰে, অপ্পকা তে সত্তা যে অরিযেন পঞ্ঞাচক্খুনা সমন্নাগতা; অথ খো এতেৰ সত্তা বহুতরা যে অৰিজ্জাগতা সম্মূল়্হা।
325. … Evamevaṃ kho, bhikkhave, appakā te sattā ye ariyena paññācakkhunā samannāgatā; atha kho eteva sattā bahutarā ye avijjāgatā sammūḷhā.
৩২৬. … এৰমেৰং খো, ভিক্খৰে, অপ্পকা তে সত্তা যে লভন্তি তথাগতং দস্সনায; অথ খো এতেৰ সত্তা বহুতরা যে ন লভন্তি তথাগতং দস্সনায।
326. … Evamevaṃ kho, bhikkhave, appakā te sattā ye labhanti tathāgataṃ dassanāya; atha kho eteva sattā bahutarā ye na labhanti tathāgataṃ dassanāya.
৩২৭. … এৰমেৰং খো, ভিক্খৰে, অপ্পকা তে সত্তা যে লভন্তি তথাগতপ্পৰেদিতং ধম্মৰিনযং সৰনায; অথ খো এতেৰ সত্তা বহুতরা যে ন লভন্তি তথাগতপ্পৰেদিতং ধম্মৰিনযং সৰনায।
327. … Evamevaṃ kho, bhikkhave, appakā te sattā ye labhanti tathāgatappaveditaṃ dhammavinayaṃ savanāya; atha kho eteva sattā bahutarā ye na labhanti tathāgatappaveditaṃ dhammavinayaṃ savanāya.
৩২৮. … এৰমেৰং খো, ভিক্খৰে, অপ্পকা তে সত্তা যে সুত্ৰা ধম্মং ধারেন্তি; অথ খো এতেৰ সত্তা বহুতরা যে সুত্ৰা ধম্মং ন ধারেন্তি।
328. … Evamevaṃ kho, bhikkhave, appakā te sattā ye sutvā dhammaṃ dhārenti; atha kho eteva sattā bahutarā ye sutvā dhammaṃ na dhārenti.
৩২৯. … এৰমেৰং খো, ভিক্খৰে, অপ্পকা তে সত্তা যে ধাতানং 21 ধম্মানং অত্থং উপপরিক্খন্তি; অথ খো এতেৰ সত্তা বহুতরা যে ধাতানং ধম্মানং অত্থং ন উপপরিক্খন্তি।
329. … Evamevaṃ kho, bhikkhave, appakā te sattā ye dhātānaṃ 22 dhammānaṃ atthaṃ upaparikkhanti; atha kho eteva sattā bahutarā ye dhātānaṃ dhammānaṃ atthaṃ na upaparikkhanti.
৩৩০. … এৰমেৰং খো, ভিক্খৰে, অপ্পকা তে সত্তা যে অত্থমঞ্ঞায ধম্মমঞ্ঞায ধম্মানুধম্মং পটিপজ্জন্তি; অথ খো এতেৰ সত্তা বহুতরা যে অত্থমঞ্ঞায ধম্মমঞ্ঞায ধম্মানুধম্মং ন পটিপজ্জন্তি।
330. … Evamevaṃ kho, bhikkhave, appakā te sattā ye atthamaññāya dhammamaññāya dhammānudhammaṃ paṭipajjanti; atha kho eteva sattā bahutarā ye atthamaññāya dhammamaññāya dhammānudhammaṃ na paṭipajjanti.
৩৩১. … এৰমেৰং খো, ভিক্খৰে, অপ্পকা তে সত্তা যে সংৰেজনিযেসু ঠানেসু সংৰিজ্জন্তি; অথ খো এতেৰ সত্তা বহুতরা যে সংৰেজনিযেসু ঠানেসু ন সংৰিজ্জন্তি।
331. … Evamevaṃ kho, bhikkhave, appakā te sattā ye saṃvejaniyesu ṭhānesu saṃvijjanti; atha kho eteva sattā bahutarā ye saṃvejaniyesu ṭhānesu na saṃvijjanti.
৩৩২. … এৰমেৰং খো, ভিক্খৰে, অপ্পকা তে সত্তা যে সংৰিগ্গা যোনিসো পদহন্তি; অথ খো এতেৰ সত্তা বহুতরা যে সংৰিগ্গা যোনিসো ন পদহন্তি।
332. … Evamevaṃ kho, bhikkhave, appakā te sattā ye saṃviggā yoniso padahanti; atha kho eteva sattā bahutarā ye saṃviggā yoniso na padahanti.
৩৩৪. … এৰমেৰং খো, ভিক্খৰে, অপ্পকা তে সত্তা যে অন্নগ্গরসগ্গানং লাভিনো; অথ খো এতেৰ সত্তা বহুতরা যে অন্নগ্গরসগ্গানং ন লাভিনো, উঞ্ছেন কপালাভতেন যাপেন্তি।
334. … Evamevaṃ kho, bhikkhave, appakā te sattā ye annaggarasaggānaṃ lābhino; atha kho eteva sattā bahutarā ye annaggarasaggānaṃ na lābhino, uñchena kapālābhatena yāpenti.
৩৩৫. … এৰমেৰং খো, ভিক্খৰে, অপ্পকা তে সত্তা যে অত্থরসস্স ধম্মরসস্স ৰিমুত্তিরসস্স লাভিনো; অথ খো এতেৰ সত্তা বহুতরা যে অত্থরসস্স ধম্মরসস্স ৰিমুত্তিরসস্স ন লাভিনো। তস্মাতিহ, ভিক্খৰে , এৰং সিক্খিতব্বং – অত্থরসস্স ধম্মরসস্স ৰিমুত্তিরসস্স লাভিনো ভৰিস্সামাতি। এৰঞ্হি ৰো, ভিক্খৰে, সিক্খিতব্বন্তি।
335. … Evamevaṃ kho, bhikkhave, appakā te sattā ye attharasassa dhammarasassa vimuttirasassa lābhino; atha kho eteva sattā bahutarā ye attharasassa dhammarasassa vimuttirasassa na lābhino. Tasmātiha, bhikkhave , evaṃ sikkhitabbaṃ – attharasassa dhammarasassa vimuttirasassa lābhino bhavissāmāti. Evañhi vo, bhikkhave, sikkhitabbanti.
৩৩৬-৩৩৮. ‘‘সেয্যথাপি , ভিক্খৰে, অপ্পমত্তকং ইমস্মিং জম্বুদীপে আরামরামণেয্যকং ৰনরামণেয্যকং ভূমিরামণেয্যকং পোক্খরণিরামণেয্যকং; অথ খো এতদেৰ বহুতরং যদিদং উক্কূলৰিকূলং নদীৰিদুগ্গং খাণুকণ্টকট্ঠানং পব্বতৰিসমং। এৰমেৰং খো, ভিক্খৰে, অপ্পকা তে সত্তা যে মনুস্সা চুতা মনুস্সেসু পচ্চাজাযন্তি, অথ খো এতেৰ সত্তা বহুতরা যে মনুস্সা চুতা নিরযে পচ্চাজাযন্তি…পে॰… তিরচ্ছানযোনিযা পচ্চাজাযন্তি…পে॰… পেত্তিৰিসযে পচ্চাজাযন্তি’’।
336-338. ‘‘Seyyathāpi , bhikkhave, appamattakaṃ imasmiṃ jambudīpe ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇirāmaṇeyyakaṃ; atha kho etadeva bahutaraṃ yadidaṃ ukkūlavikūlaṃ nadīviduggaṃ khāṇukaṇṭakaṭṭhānaṃ pabbatavisamaṃ. Evamevaṃ kho, bhikkhave, appakā te sattā ye manussā cutā manussesu paccājāyanti, atha kho eteva sattā bahutarā ye manussā cutā niraye paccājāyanti…pe… tiracchānayoniyā paccājāyanti…pe… pettivisaye paccājāyanti’’.
৩৩৯-৩৪১. … এৰমেৰং খো, ভিক্খৰে, অপ্পকা তে সত্তা যে মনুস্সা চুতা দেৰেসু পচ্চাজাযন্তি; অথ খো এতেৰ সত্তা বহুতরা যে মনুস্সা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি।
339-341. … Evamevaṃ kho, bhikkhave, appakā te sattā ye manussā cutā devesu paccājāyanti; atha kho eteva sattā bahutarā ye manussā cutā niraye paccājāyanti… tiracchānayoniyā paccājāyanti… pettivisaye paccājāyanti.
৩৪২-৩৪৪. … এৰমেৰং খো, ভিক্খৰে, অপ্পকা তে সত্তা যে দেৰা চুতা দেৰেসু পচ্চাজাযন্তি; অথ খো এতেৰ সত্তা বহুতরা যে দেৰা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি।
342-344. … Evamevaṃ kho, bhikkhave, appakā te sattā ye devā cutā devesu paccājāyanti; atha kho eteva sattā bahutarā ye devā cutā niraye paccājāyanti… tiracchānayoniyā paccājāyanti… pettivisaye paccājāyanti.
৩৪৫-৩৪৭. … এৰমেৰং খো, ভিক্খৰে, অপ্পকা তে সত্তা যে দেৰা চুতা মনুস্সেসু পচ্চাজাযন্তি; অথ খো এতেৰ সত্তা বহুতরা যে দেৰা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি।
345-347. … Evamevaṃ kho, bhikkhave, appakā te sattā ye devā cutā manussesu paccājāyanti; atha kho eteva sattā bahutarā ye devā cutā niraye paccājāyanti… tiracchānayoniyā paccājāyanti… pettivisaye paccājāyanti.
৩৪৮-৩৫০. … এৰমেৰং খো, ভিক্খৰে, অপ্পকা তে সত্তা যে নিরযা চুতা মনুস্সেসু পচ্চাজাযন্তি; অথ খো এতেৰ সত্তা বহুতরা যে নিরযা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি।
348-350. … Evamevaṃ kho, bhikkhave, appakā te sattā ye nirayā cutā manussesu paccājāyanti; atha kho eteva sattā bahutarā ye nirayā cutā niraye paccājāyanti… tiracchānayoniyā paccājāyanti… pettivisaye paccājāyanti.
৩৫১-৩৫৩. … এৰমেৰং খো, ভিক্খৰে, অপ্পকা তে সত্তা যে নিরযা চুতা দেৰেসু পচ্চাজাযন্তি; অথ খো এতেৰ সত্তা বহুতরা যে নিরযা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি।
351-353. … Evamevaṃ kho, bhikkhave, appakā te sattā ye nirayā cutā devesu paccājāyanti; atha kho eteva sattā bahutarā ye nirayā cutā niraye paccājāyanti… tiracchānayoniyā paccājāyanti… pettivisaye paccājāyanti.
৩৫৪-৩৫৬. … এৰমেৰং খো, ভিক্খৰে, অপ্পকা তে সত্তা যে তিরচ্ছানযোনিযা চুতা মনুস্সেসু পচ্চাজাযন্তি; অথ খো এতেৰ সত্তা বহুতরা যে তিরচ্ছানযোনিযা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি।
354-356. … Evamevaṃ kho, bhikkhave, appakā te sattā ye tiracchānayoniyā cutā manussesu paccājāyanti; atha kho eteva sattā bahutarā ye tiracchānayoniyā cutā niraye paccājāyanti… tiracchānayoniyā paccājāyanti… pettivisaye paccājāyanti.
৩৫৭-৩৫৯. … এৰমেৰং খো, ভিক্খৰে, অপ্পকা তে সত্তা যে তিরচ্ছানযোনিযা চুতা দেৰেসু পচ্চাজাযন্তি; অথ খো এতেৰ সত্তা বহুতরা যে তিরচ্ছানযোনিযা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি।
357-359. … Evamevaṃ kho, bhikkhave, appakā te sattā ye tiracchānayoniyā cutā devesu paccājāyanti; atha kho eteva sattā bahutarā ye tiracchānayoniyā cutā niraye paccājāyanti… tiracchānayoniyā paccājāyanti… pettivisaye paccājāyanti.
৩৬০-৩৬২. … এৰমেৰং খো, ভিক্খৰে, অপ্পকা তে সত্তা যে পেত্তিৰিসযা চুতা মনুস্সেসু পচ্চাজাযন্তি; অথ খো এতেৰ সত্তা বহুতরা যে পেত্তিৰিসযা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি।
360-362. … Evamevaṃ kho, bhikkhave, appakā te sattā ye pettivisayā cutā manussesu paccājāyanti; atha kho eteva sattā bahutarā ye pettivisayā cutā niraye paccājāyanti… tiracchānayoniyā paccājāyanti… pettivisaye paccājāyanti.
৩৬৩-৩৬৫. … এৰমেৰং খো, ভিক্খৰে, অপ্পকা তে সত্তা যে পেত্তিৰিসযা চুতা দেৰেসু পচ্চাজাযন্তি ; অথ খো এতেৰ সত্তা বহুতরা যে পেত্তিৰিসযা চুতা নিরযে পচ্চাজাযন্তি… তিরচ্ছানযোনিযা পচ্চাজাযন্তি… পেত্তিৰিসযে পচ্চাজাযন্তি।
363-365. … Evamevaṃ kho, bhikkhave, appakā te sattā ye pettivisayā cutā devesu paccājāyanti ; atha kho eteva sattā bahutarā ye pettivisayā cutā niraye paccājāyanti… tiracchānayoniyā paccājāyanti… pettivisaye paccājāyanti.
ৰগ্গো চতুত্থো।
Vaggo catuttho.
জম্বুদীপপেয্যালো নিট্ঠিতো।
Jambudīpapeyyālo niṭṭhito.
একধম্মপাল়ি সোল়সমো।
Ekadhammapāḷi soḷasamo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১৬. একধম্মপাল়ি • 16. Ekadhammapāḷi
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১৬. একধম্মপাল়ি • 16. Ekadhammapāḷi
