| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
16. එකධම්‌මපාළි
16. Ekadhammapāḷi
1. පඨමවග්‌ගො
1. Paṭhamavaggo
296. ‘‘එකධම්‌මො , භික්‌ඛවෙ, භාවිතො බහුලීකතො එකන්‌තනිබ්‌බිදාය විරාගාය නිරොධාය උපසමාය අභිඤ්‌ඤාය සම්‌බොධාය නිබ්‌බානාය සංවත්‌තති. කතමො එකධම්‌මො? බුද්‌ධානුස්‌සති. අයං ඛො, භික්‌ඛවෙ, එකධම්‌මො භාවිතො බහුලීකතො එකන්‌තනිබ්‌බිදාය විරාගාය නිරොධාය උපසමාය අභිඤ්‌ඤාය සම්‌බොධාය නිබ්‌බානාය සංවත්‌තතී’’ති.
296. ‘‘Ekadhammo , bhikkhave, bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattati. Katamo ekadhammo? Buddhānussati. Ayaṃ kho, bhikkhave, ekadhammo bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattatī’’ti.
297. ‘‘එකධම්‌මො, භික්‌ඛවෙ, භාවිතො බහුලීකතො එකන්‌තනිබ්‌බිදාය විරාගාය නිරොධාය උපසමාය අභිඤ්‌ඤාය සම්‌බොධාය නිබ්‌බානාය සංවත්‌තති. කතමො එකධම්‌මො? ධම්‌මානුස්‌සති…පෙ.… සඞ්‌ඝානුස්‌සති… සීලානුස්‌සති… චාගානුස්‌සති… දෙවතානුස්‌සති… ආනාපානස්‌සති… මරණස්‌සති… කායගතාසති… උපසමානුස්‌සති. අයං ඛො, භික්‌ඛවෙ, එකධම්‌මො භාවිතො බහුලීකතො එකන්‌තනිබ්‌බිදාය විරාගාය නිරොධාය උපසමාය අභිඤ්‌ඤාය සම්‌බොධාය නිබ්‌බානාය සංවත්‌තතී’’ති.
297. ‘‘Ekadhammo, bhikkhave, bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattati. Katamo ekadhammo? Dhammānussati…pe… saṅghānussati… sīlānussati… cāgānussati… devatānussati… ānāpānassati… maraṇassati… kāyagatāsati… upasamānussati. Ayaṃ kho, bhikkhave, ekadhammo bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattatī’’ti.
වග්‌ගො පඨමො.
Vaggo paṭhamo.
2. දුතියවග්‌ගො
2. Dutiyavaggo
298. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යෙන අනුප්‌පන්‌නා වා අකුසලා ධම්‌මා උප්‌පජ්‌ජන්‌ති උප්‌පන්‌නා වා අකුසලා ධම්‌මා භිය්‍යොභාවාය වෙපුල්‌ලාය සංවත්‌තන්‌ති යථයිදං, භික්‌ඛවෙ, මිච්‌ඡාදිට්‌ඨි. මිච්‌ඡාදිට්‌ඨිකස්‌ස, භික්‌ඛවෙ, අනුප්‌පන්‌නා චෙව අකුසලා ධම්‌මා උප්‌පජ්‌ජන්‌ති උප්‌පන්‌නා ච අකුසලා ධම්‌මා භිය්‍යොභාවාය වෙපුල්‌ලාය සංවත්‌තන්‌තී’’ති.
298. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā uppajjanti uppannā vā akusalā dhammā bhiyyobhāvāya vepullāya saṃvattanti yathayidaṃ, bhikkhave, micchādiṭṭhi. Micchādiṭṭhikassa, bhikkhave, anuppannā ceva akusalā dhammā uppajjanti uppannā ca akusalā dhammā bhiyyobhāvāya vepullāya saṃvattantī’’ti.
299. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යෙන අනුප්‌පන්‌නා වා කුසලා ධම්‌මා උප්‌පජ්‌ජන්‌ති උප්‌පන්‌නා වා කුසලා ධම්‌මා භිය්‍යොභාවාය වෙපුල්‌ලාය සංවත්‌තන්‌ති යථයිදං , භික්‌ඛවෙ, සම්‌මාදිට්‌ඨි. සම්‌මාදිට්‌ඨිකස්‌ස , භික්‌ඛවෙ, අනුප්‌පන්‌නා චෙව කුසලා ධම්‌මා උප්‌පජ්‌ජන්‌ති උප්‌පන්‌නා ච කුසලා ධම්‌මා භිය්‍යොභාවාය වෙපුල්‌ලාය සංවත්‌තන්‌තී’’ති.
299. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā kusalā dhammā uppajjanti uppannā vā kusalā dhammā bhiyyobhāvāya vepullāya saṃvattanti yathayidaṃ , bhikkhave, sammādiṭṭhi. Sammādiṭṭhikassa , bhikkhave, anuppannā ceva kusalā dhammā uppajjanti uppannā ca kusalā dhammā bhiyyobhāvāya vepullāya saṃvattantī’’ti.
300. ‘‘නාහං , භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යෙන අනුප්‌පන්‌නා වා කුසලා ධම්‌මා නුප්‌පජ්‌ජන්‌ති උප්‌පන්‌නා වා කුසලා ධම්‌මා පරිහායන්‌ති යථයිදං , භික්‌ඛවෙ, මිච්‌ඡාදිට්‌ඨි. මිච්‌ඡාදිට්‌ඨිකස්‌ස, භික්‌ඛවෙ, අනුප්‌පන්‌නා චෙව කුසලා ධම්‌මා නුප්‌පජ්‌ජන්‌ති උප්‌පන්‌නා ච කුසලා ධම්‌මා පරිහායන්‌තී’’ති.
300. ‘‘Nāhaṃ , bhikkhave, aññaṃ ekadhammampi samanupassāmi yena anuppannā vā kusalā dhammā nuppajjanti uppannā vā kusalā dhammā parihāyanti yathayidaṃ , bhikkhave, micchādiṭṭhi. Micchādiṭṭhikassa, bhikkhave, anuppannā ceva kusalā dhammā nuppajjanti uppannā ca kusalā dhammā parihāyantī’’ti.
301. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යෙන අනුප්‌පන්‌නා වා අකුසලා ධම්‌මා නුප්‌පජ්‌ජන්‌ති උප්‌පන්‌නා වා අකුසලා ධම්‌මා පරිහායන්‌ති යථයිදං, භික්‌ඛවෙ, සම්‌මාදිට්‌ඨි. සම්‌මාදිට්‌ඨිකස්‌ස, භික්‌ඛවෙ, අනුප්‌පන්‌නා චෙව අකුසලා ධම්‌මා නුප්‌පජ්‌ජන්‌ති උප්‌පන්‌නා ච අකුසලා ධම්‌මා පරිහායන්‌තී’’ති.
301. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā nuppajjanti uppannā vā akusalā dhammā parihāyanti yathayidaṃ, bhikkhave, sammādiṭṭhi. Sammādiṭṭhikassa, bhikkhave, anuppannā ceva akusalā dhammā nuppajjanti uppannā ca akusalā dhammā parihāyantī’’ti.
302. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යෙන අනුප්‌පන්‌නා වා මිච්‌ඡාදිට්‌ඨි උප්‌පජ්‌ජති උප්‌පන්‌නා වා මිච්‌ඡාදිට්‌ඨි පවඩ්‌ඪති යථයිදං, භික්‌ඛවෙ, අයොනිසොමනසිකාරො. අයොනිසො, භික්‌ඛවෙ, මනසි කරොතො අනුප්‌පන්‌නා චෙව මිච්‌ඡාදිට්‌ඨි උප්‌පජ්‌ජති උප්‌පන්‌නා ච මිච්‌ඡාදිට්‌ඨි පවඩ්‌ඪතී’’ති.
302. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā micchādiṭṭhi uppajjati uppannā vā micchādiṭṭhi pavaḍḍhati yathayidaṃ, bhikkhave, ayonisomanasikāro. Ayoniso, bhikkhave, manasi karoto anuppannā ceva micchādiṭṭhi uppajjati uppannā ca micchādiṭṭhi pavaḍḍhatī’’ti.
303. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යෙන අනුප්‌පන්‌නා වා සම්‌මාදිට්‌ඨි උප්‌පජ්‌ජති උප්‌පන්‌නා වා සම්‌මාදිට්‌ඨි පවඩ්‌ඪති යථයිදං, භික්‌ඛවෙ, යොනිසොමනසිකාරො. යොනිසො, භික්‌ඛවෙ, මනසි කරොතො අනුප්‌පන්‌නා චෙව සම්‌මාදිට්‌ඨි උප්‌පජ්‌ජති උප්‌පන්‌නා ච සම්‌මාදිට්‌ඨි පවඩ්‌ඪතී’’ති.
303. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā sammādiṭṭhi uppajjati uppannā vā sammādiṭṭhi pavaḍḍhati yathayidaṃ, bhikkhave, yonisomanasikāro. Yoniso, bhikkhave, manasi karoto anuppannā ceva sammādiṭṭhi uppajjati uppannā ca sammādiṭṭhi pavaḍḍhatī’’ti.
304. ‘‘නාහං , භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යෙන 1 සත්‌තා කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජන්‌ති යථයිදං, භික්‌ඛවෙ, මිච්‌ඡාදිට්‌ඨි. මිච්‌ඡාදිට්‌ඨියා, භික්‌ඛවෙ, සමන්‌නාගතා සත්‌තා කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජන්‌තී’’ති.
304. ‘‘Nāhaṃ , bhikkhave, aññaṃ ekadhammampi samanupassāmi yena 2 sattā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjanti yathayidaṃ, bhikkhave, micchādiṭṭhi. Micchādiṭṭhiyā, bhikkhave, samannāgatā sattā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjantī’’ti.
305. ‘‘නාහං , භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යෙන සත්‌තා කායස්‌ස භෙදා පරං මරණා සුගතිං සග්‌ගං ලොකං උපපජ්‌ජන්‌ති යථයිදං, භික්‌ඛවෙ, සම්‌මාදිට්‌ඨි. සම්‌මාදිට්‌ඨියා, භික්‌ඛවෙ, සමන්‌නාගතා සත්‌තා කායස්‌ස භෙදා පරං මරණා සුගතිං සග්‌ගං ලොකං උපපජ්‌ජන්‌තී’’ති.
305. ‘‘Nāhaṃ , bhikkhave, aññaṃ ekadhammampi samanupassāmi yena sattā kāyassa bhedā paraṃ maraṇā sugatiṃ saggaṃ lokaṃ upapajjanti yathayidaṃ, bhikkhave, sammādiṭṭhi. Sammādiṭṭhiyā, bhikkhave, samannāgatā sattā kāyassa bhedā paraṃ maraṇā sugatiṃ saggaṃ lokaṃ upapajjantī’’ti.
306. ‘‘මිච්‌ඡාදිට්‌ඨිකස්‌ස, භික්‌ඛවෙ, පුරිසපුග්‌ගලස්‌ස යඤ්‌චෙව කායකම්‌මං යථාදිට්‌ඨි සමත්‌තං සමාදින්‌නං යඤ්‌ච වචීකම්‌මං…පෙ.… යඤ්‌ච මනොකම්‌මං යථාදිට්‌ඨි සමත්‌තං සමාදින්‌නං යා ච චෙතනා යා ච පත්‌ථනා යො ච පණිධි යෙ ච සඞ්‌ඛාරා සබ්‌බෙ තෙ ධම්‌මා අනිට්‌ඨාය අකන්‌තාය අමනාපාය අහිතාය දුක්‌ඛාය සංවත්‌තන්‌ති. තං කිස්‌ස හෙතු? දිට්‌ඨි හිස්‌ස 3, භික්‌ඛවෙ, පාපිකා. සෙය්‍යථාපි, භික්‌ඛවෙ , නිම්‌බබීජං වා කොසාතකිබීජං වා තිත්‌තකලාබුබීජං වා අල්‌ලාය පථවියා 4 නික්‌ඛිත්‌තං යඤ්‌චෙව පථවිරසං උපාදියති යඤ්‌ච ආපොරසං උපාදියති සබ්‌බං තං තිත්‌තකත්‌තාය කටුකත්‌තාය අසාතත්‌තාය සංවත්‌තති. තං කිස්‌ස හෙතු? බීජං හිස්‌ස 5, භික්‌ඛවෙ, පාපකං. එවමෙවං ඛො, භික්‌ඛවෙ, මිච්‌ඡාදිට්‌ඨිකස්‌ස පුරිසපුග්‌ගලස්‌ස යඤ්‌චෙව කායකම්‌මං යථාදිට්‌ඨි සමත්‌තං සමාදින්‌නං යඤ්‌ච වචීකම්‌මං…පෙ.… යඤ්‌ච මනොකම්‌මං යථාදිට්‌ඨි සමත්‌තං සමාදින්‌නං යා ච චෙතනා යා ච පත්‌ථනා යො ච පණිධි යෙ ච සඞ්‌ඛාරා සබ්‌බෙ තෙ ධම්‌මා අනිට්‌ඨාය අකන්‌තාය අමනාපාය අහිතාය දුක්‌ඛාය සංවත්‌තන්‌ති. තං කිස්‌ස හෙතු? දිට්‌ඨි හිස්‌ස, භික්‌ඛවෙ, පාපිකා’’ති.
306. ‘‘Micchādiṭṭhikassa, bhikkhave, purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa 6, bhikkhave, pāpikā. Seyyathāpi, bhikkhave , nimbabījaṃ vā kosātakibījaṃ vā tittakalābubījaṃ vā allāya pathaviyā 7 nikkhittaṃ yañceva pathavirasaṃ upādiyati yañca āporasaṃ upādiyati sabbaṃ taṃ tittakattāya kaṭukattāya asātattāya saṃvattati. Taṃ kissa hetu? Bījaṃ hissa 8, bhikkhave, pāpakaṃ. Evamevaṃ kho, bhikkhave, micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa, bhikkhave, pāpikā’’ti.
307. ‘‘සම්‌මාදිට්‌ඨිකස්‌ස, භික්‌ඛවෙ, පුරිසපුග්‌ගලස්‌ස යඤ්‌චෙව කායකම්‌මං යථාදිට්‌ඨි සමත්‌තං සමාදින්‌නං යඤ්‌ච වචීකම්‌මං…පෙ.… යඤ්‌ච මනොකම්‌මං යථාදිට්‌ඨි සමත්‌තං සමාදින්‌නං යා ච චෙතනා යා ච පත්‌ථනා යො ච පණිධි යෙ ච සඞ්‌ඛාරා සබ්‌බෙ තෙ ධම්‌මා ඉට්‌ඨාය කන්‌තාය මනාපාය හිතාය සුඛාය සංවත්‌තන්‌ති. තං කිස්‌ස හෙතු? දිට්‌ඨි හිස්‌ස, භික්‌ඛවෙ, භද්‌දිකා. සෙය්‍යථාපි, භික්‌ඛවෙ, උච්‌ඡුබීජං වා සාලිබීජං වා මුද්‌දිකාබීජං වා අල්‌ලාය පථවියා නික්‌ඛිත්‌තං යඤ්‌චෙව පථවිරසං උපාදියති යඤ්‌ච ආපොරසං උපාදියති සබ්‌බං තං මධුරත්‌තාය සාතත්‌තාය අසෙචනකත්‌තාය සංවත්‌තති. තං කිස්‌ස හෙතු? බීජං හිස්‌ස, භික්‌ඛවෙ, භද්‌දකං. එවමෙවං ඛො, භික්‌ඛවෙ, සම්‌මාදිට්‌ඨිකස්‌ස පුරිසපුග්‌ගලස්‌ස යඤ්‌චෙව කායකම්‌මං යථාදිට්‌ඨි සමත්‌තං සමාදින්‌නං යඤ්‌ච වචීකම්‌මං…පෙ.… යඤ්‌ච මනොකම්‌මං යථාදිට්‌ඨි සමත්‌තං සමාදින්‌නං යා ච චෙතනා යා ච පත්‌ථනා යො ච පණිධි යෙ ච සඞ්‌ඛාරා සබ්‌බෙ තෙ ධම්‌මා ඉට්‌ඨාය කන්‌තාය මනාපාය හිතාය සුඛාය සංවත්‌තන්‌ති. තං කිස්‌ස හෙතු? දිට්‌ඨි හිස්‌ස, භික්‌ඛවෙ, භද්‌දිකා’’ති.
307. ‘‘Sammādiṭṭhikassa, bhikkhave, purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā. Seyyathāpi, bhikkhave, ucchubījaṃ vā sālibījaṃ vā muddikābījaṃ vā allāya pathaviyā nikkhittaṃ yañceva pathavirasaṃ upādiyati yañca āporasaṃ upādiyati sabbaṃ taṃ madhurattāya sātattāya asecanakattāya saṃvattati. Taṃ kissa hetu? Bījaṃ hissa, bhikkhave, bhaddakaṃ. Evamevaṃ kho, bhikkhave, sammādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā’’ti.
වග්‌ගො දුතියො.
Vaggo dutiyo.
3. තතියවග්‌ගො
3. Tatiyavaggo
308. ‘‘එකපුග්‌ගලො , භික්‌ඛවෙ, ලොකෙ උප්‌පජ්‌ජමානො උප්‌පජ්‌ජති බහුජනඅහිතාය බහුජනඅසුඛාය, බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං. කතමො එකපුග්‌ගලො? මිච්‌ඡාදිට්‌ඨිකො හොති විපරීතදස්‌සනො. සො බහුජනං සද්‌ධම්‌මා වුට්‌ඨාපෙත්‌වා අසද්‌ධම්‌මෙ පතිට්‌ඨාපෙති. අයං ඛො, භික්‌ඛවෙ, එකපුග්‌ගලො ලොකෙ උප්‌පජ්‌ජමානො උප්‌පජ්‌ජති බහුජනඅහිතාය බහුජනඅසුඛාය, බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සාන’’න්‌ති.
308. ‘‘Ekapuggalo , bhikkhave, loke uppajjamāno uppajjati bahujanaahitāya bahujanaasukhāya, bahuno janassa anatthāya ahitāya dukkhāya devamanussānaṃ. Katamo ekapuggalo? Micchādiṭṭhiko hoti viparītadassano. So bahujanaṃ saddhammā vuṭṭhāpetvā asaddhamme patiṭṭhāpeti. Ayaṃ kho, bhikkhave, ekapuggalo loke uppajjamāno uppajjati bahujanaahitāya bahujanaasukhāya, bahuno janassa anatthāya ahitāya dukkhāya devamanussāna’’nti.
309. ‘‘එකපුග්‌ගලො, භික්‌ඛවෙ, ලොකෙ උප්‌පජ්‌ජමානො උප්‌පජ්‌ජති බහුජනහිතාය බහුජනසුඛාය, බහුනො ජනස්‌ස අත්‌ථාය හිතාය සුඛාය දෙවමනුස්‌සානං. කතමො එකපුග්‌ගලො? සම්‌මාදිට්‌ඨිකො හොති අවිපරීතදස්‌සනො. සො බහුජනං අසද්‌ධම්‌මා වුට්‌ඨාපෙත්‌වා සද්‌ධම්‌මෙ පතිට්‌ඨාපෙති. අයං ඛො, භික්‌ඛවෙ, එකපුග්‌ගලො ලොකෙ උපපජ්‌ජමානො උප්‌පජ්‌ජති බහුජනහිතාය බහුජනසුඛාය, බහුනො ජනස්‌ස අත්‌ථාය හිතාය සුඛාය දෙවමනුස්‌සාන’’න්‌ති.
309. ‘‘Ekapuggalo, bhikkhave, loke uppajjamāno uppajjati bahujanahitāya bahujanasukhāya, bahuno janassa atthāya hitāya sukhāya devamanussānaṃ. Katamo ekapuggalo? Sammādiṭṭhiko hoti aviparītadassano. So bahujanaṃ asaddhammā vuṭṭhāpetvā saddhamme patiṭṭhāpeti. Ayaṃ kho, bhikkhave, ekapuggalo loke upapajjamāno uppajjati bahujanahitāya bahujanasukhāya, bahuno janassa atthāya hitāya sukhāya devamanussāna’’nti.
310. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යං එවං මහාසාවජ්‌ජං යථයිදං, භික්‌ඛවෙ, මිච්‌ඡාදිට්‌ඨි. මිච්‌ඡාදිට්‌ඨිපරමානි, භික්‌ඛවෙ, මහාසාවජ්‌ජානී’’ති 9.
310. ‘‘Nāhaṃ, bhikkhave, aññaṃ ekadhammampi samanupassāmi yaṃ evaṃ mahāsāvajjaṃ yathayidaṃ, bhikkhave, micchādiṭṭhi. Micchādiṭṭhiparamāni, bhikkhave, mahāsāvajjānī’’ti 10.
311. ‘‘නාහං, භික්‌ඛවෙ, අඤ්‌ඤං එකපුග්‌ගලම්‌පි සමනුපස්‌සාමි යො එවං බහුජනඅහිතාය පටිපන්‌නො බහුජනඅසුඛාය, බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං යථයිදං, භික්‌ඛවෙ, මක්‌ඛලි මොඝපුරිසො. සෙය්‍යථාපි, භික්‌ඛවෙ, නදීමුඛෙ ඛිප්‌පං 11 උඩ්‌ඩෙය්‍ය 12 බහූනං මච්‌ඡානං අහිතාය දුක්‌ඛාය අනයාය බ්‍යසනාය; එවමෙවං ඛො, භික්‌ඛවෙ , මක්‌ඛලි මොඝපුරිසො මනුස්‌සඛිප්‌පං මඤ්‌ඤෙ ලොකෙ උප්‌පන්‌නො බහූනං සත්‌තානං අහිතාය දුක්‌ඛාය අනයාය බ්‍යසනායා’’ති.
311. ‘‘Nāhaṃ, bhikkhave, aññaṃ ekapuggalampi samanupassāmi yo evaṃ bahujanaahitāya paṭipanno bahujanaasukhāya, bahuno janassa anatthāya ahitāya dukkhāya devamanussānaṃ yathayidaṃ, bhikkhave, makkhali moghapuriso. Seyyathāpi, bhikkhave, nadīmukhe khippaṃ 13 uḍḍeyya 14 bahūnaṃ macchānaṃ ahitāya dukkhāya anayāya byasanāya; evamevaṃ kho, bhikkhave , makkhali moghapuriso manussakhippaṃ maññe loke uppanno bahūnaṃ sattānaṃ ahitāya dukkhāya anayāya byasanāyā’’ti.
312. ‘‘දුරක්‌ඛාතෙ , භික්‌ඛවෙ, ධම්‌මවිනයෙ යො ච සමාදපෙති 15 යඤ්‌ච සමාදපෙති යො ච සමාදපිතො තථත්‌තාය පටිපජ්‌ජති සබ්‌බෙ තෙ බහුං අපුඤ්‌ඤං පසවන්‌ති. තං කිස්‌ස හෙතු? දුරක්‌ඛාතත්‌තා, භික්‌ඛවෙ, ධම්‌මස්‌සා’’ති.
312. ‘‘Durakkhāte , bhikkhave, dhammavinaye yo ca samādapeti 16 yañca samādapeti yo ca samādapito tathattāya paṭipajjati sabbe te bahuṃ apuññaṃ pasavanti. Taṃ kissa hetu? Durakkhātattā, bhikkhave, dhammassā’’ti.
313. ‘‘ස්‌වාක්‌ඛාතෙ , භික්‌ඛවෙ, ධම්‌මවිනයෙ යො ච සමාදපෙති යඤ්‌ච සමාදපෙති යො ච සමාදපිතො තථත්‌තාය පටිපජ්‌ජති සබ්‌බෙ තෙ බහුං පුඤ්‌ඤං පසවන්‌ති. තං කිස්‌ස හෙතු? ස්‌වාක්‌ඛාතත්‌තා, භික්‌ඛවෙ, ධම්‌මස්‌සා’’ති.
313. ‘‘Svākkhāte , bhikkhave, dhammavinaye yo ca samādapeti yañca samādapeti yo ca samādapito tathattāya paṭipajjati sabbe te bahuṃ puññaṃ pasavanti. Taṃ kissa hetu? Svākkhātattā, bhikkhave, dhammassā’’ti.
314. ‘‘දුරක්‌ඛාතෙ, භික්‌ඛවෙ, ධම්‌මවිනයෙ දායකෙන මත්‌තා ජානිතබ්‌බා, නො පටිග්‌ගාහකෙන. තං කිස්‌ස හෙතු? දුරක්‌ඛාතත්‌තා, භික්‌ඛවෙ, ධම්‌මස්‌සා’’ති.
314. ‘‘Durakkhāte, bhikkhave, dhammavinaye dāyakena mattā jānitabbā, no paṭiggāhakena. Taṃ kissa hetu? Durakkhātattā, bhikkhave, dhammassā’’ti.
315. ‘‘ස්‌වාක්‌ඛාතෙ, භික්‌ඛවෙ, ධම්‌මවිනයෙ පටිග්‌ගාහකෙන මත්‌තා ජානිතබ්‌බා, නො දායකෙන. තං කිස්‌ස හෙතු? ස්‌වාක්‌ඛාතත්‌තා, භික්‌ඛවෙ, ධම්‌මස්‌සා’’ති.
315. ‘‘Svākkhāte, bhikkhave, dhammavinaye paṭiggāhakena mattā jānitabbā, no dāyakena. Taṃ kissa hetu? Svākkhātattā, bhikkhave, dhammassā’’ti.
316. ‘‘දුරක්‌ඛාතෙ, භික්‌ඛවෙ, ධම්‌මවිනයෙ යො ආරද්‌ධවීරියො සො දුක්‌ඛං විහරති. තං කිස්‌ස හෙතු? දුරක්‌ඛාතත්‌තා, භික්‌ඛවෙ, ධම්‌මස්‌සා’’ති.
316. ‘‘Durakkhāte, bhikkhave, dhammavinaye yo āraddhavīriyo so dukkhaṃ viharati. Taṃ kissa hetu? Durakkhātattā, bhikkhave, dhammassā’’ti.
317. ‘‘ස්‌වාක්‌ඛාතෙ, භික්‌ඛවෙ, ධම්‌මවිනයෙ යො කුසීතො සො දුක්‌ඛං විහරති. තං කිස්‌ස හෙතු? ස්‌වාක්‌ඛාතත්‌තා, භික්‌ඛවෙ, ධම්‌මස්‌සා’’ති.
317. ‘‘Svākkhāte, bhikkhave, dhammavinaye yo kusīto so dukkhaṃ viharati. Taṃ kissa hetu? Svākkhātattā, bhikkhave, dhammassā’’ti.
318. ‘‘දුරක්‌ඛාතෙ, භික්‌ඛවෙ, ධම්‌මවිනයෙ යො කුසීතො සො සුඛං විහරති . තං කිස්‌ස හෙතු? දුරක්‌ඛාතත්‌තා, භික්‌ඛවෙ, ධම්‌මස්‌සා’’ති.
318. ‘‘Durakkhāte, bhikkhave, dhammavinaye yo kusīto so sukhaṃ viharati . Taṃ kissa hetu? Durakkhātattā, bhikkhave, dhammassā’’ti.
319. ‘‘ස්‌වාක්‌ඛාතෙ, භික්‌ඛවෙ, ධම්‌මවිනයෙ යො ආරද්‌ධවීරියො සො සුඛං විහරති. තං කිස්‌ස හෙතු? ස්‌වාක්‌ඛාතත්‌තා, භික්‌ඛවෙ, ධම්‌මස්‌සා’’ති.
319. ‘‘Svākkhāte, bhikkhave, dhammavinaye yo āraddhavīriyo so sukhaṃ viharati. Taṃ kissa hetu? Svākkhātattā, bhikkhave, dhammassā’’ti.
320. ‘‘සෙය්‍යථාපි , භික්‌ඛවෙ, අප්‌පමත්‌තකොපි ගූථො දුග්‌ගන්‌ධො හොති; එවමෙවං ඛො අහං, භික්‌ඛවෙ, අප්‌පමත්‌තකම්‌පි භවං න වණ්‌ණෙමි, අන්‌තමසො අච්‌ඡරාසඞ්‌ඝාතමත්‌තම්‌පි’’.
320. ‘‘Seyyathāpi , bhikkhave, appamattakopi gūtho duggandho hoti; evamevaṃ kho ahaṃ, bhikkhave, appamattakampi bhavaṃ na vaṇṇemi, antamaso accharāsaṅghātamattampi’’.
321. ‘‘සෙය්‍යථාපි, භික්‌ඛවෙ, අප්‌පමත්‌තකම්‌පි මුත්‌තං දුග්‌ගන්‌ධං හොති… අප්‌පමත්‌තකොපි ඛෙළො දුග්‌ගන්‌ධො හොති… අප්‌පමත්‌තකොපි පුබ්‌බො දුග්‌ගන්‌ධො හොති… අප්‌පමත්‌තකම්‌පි ලොහිතං දුග්‌ගන්‌ධං හොති; එවමෙවං ඛො අහං, භික්‌ඛවෙ, අප්‌පමත්‌තකම්‌පි භවං න වණ්‌ණෙමි, අන්‌තමසො අච්‌ඡරාසඞ්‌ඝාතමත්‌තම්‌පි’’.
321. ‘‘Seyyathāpi, bhikkhave, appamattakampi muttaṃ duggandhaṃ hoti… appamattakopi kheḷo duggandho hoti… appamattakopi pubbo duggandho hoti… appamattakampi lohitaṃ duggandhaṃ hoti; evamevaṃ kho ahaṃ, bhikkhave, appamattakampi bhavaṃ na vaṇṇemi, antamaso accharāsaṅghātamattampi’’.
වග්‌ගො තතියො.
Vaggo tatiyo.
4. චතුත්‌ථවග්‌ගො
4. Catutthavaggo
322. ‘‘සෙය්‍යථාපි , භික්‌ඛවෙ, අප්‌පමත්‌තකං ඉමස්‌මිං ජම්‌බුදීපෙ ආරාමරාමණෙය්‍යකං වනරාමණෙය්‍යකං භූමිරාමණෙය්‍යකං පොක්‌ඛරණිරාමණෙය්‍යකං; අථ ඛො එතදෙව බහුතරං යදිදං උක්‌කූලවිකූලං නදීවිදුග්‌ගං ඛාණුකණ්‌ටකට්‌ඨානං 17 පබ්‌බතවිසමං; එවමෙවං ඛො, භික්‌ඛවෙ, අප්‌පකා තෙ සත්‌තා යෙ ථලජා, අථ ඛො එතෙව සත්‌තා බහුතරා යෙ ඔදකා’’.
322. ‘‘Seyyathāpi , bhikkhave, appamattakaṃ imasmiṃ jambudīpe ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇirāmaṇeyyakaṃ; atha kho etadeva bahutaraṃ yadidaṃ ukkūlavikūlaṃ nadīviduggaṃ khāṇukaṇṭakaṭṭhānaṃ 18 pabbatavisamaṃ; evamevaṃ kho, bhikkhave, appakā te sattā ye thalajā, atha kho eteva sattā bahutarā ye odakā’’.
323. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ මනුස්‌සෙසු පච්‌චාජායන්‌ති; අථ ඛො එතෙව සත්‌තා බහුතරා යෙ අඤ්‌ඤත්‍ර මනුස්‌සෙහි පච්‌චාජායන්‌ති.
323. … Evamevaṃ kho, bhikkhave, appakā te sattā ye manussesu paccājāyanti; atha kho eteva sattā bahutarā ye aññatra manussehi paccājāyanti.
… එවමෙවං ඛො, භික්‌ඛවෙ, අප්‌පකා තෙ සත්‌තා යෙ මජ්‌ඣිමෙසු ජනපදෙසු පච්‌චාජායන්‌ති; අථ ඛො එතෙව සත්‌තා බහුතරා යෙ පච්‌චන්‌තිමෙසු ජනපදෙසු පච්‌චාජායන්‌ති අවිඤ්‌ඤාතාරෙසු මිලක්‌ඛෙසු 19.
… Evamevaṃ kho, bhikkhave, appakā te sattā ye majjhimesu janapadesu paccājāyanti; atha kho eteva sattā bahutarā ye paccantimesu janapadesu paccājāyanti aviññātāresu milakkhesu 20.
324. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ පඤ්‌ඤවන්‌තො අජළා අනෙළමූගා පටිබලා සුභාසිතදුබ්‌භාසිතස්‌ස අත්‌ථමඤ්‌ඤාතුං; අථ ඛො එතෙව සත්‌තා බහුතරා යෙ දුප්‌පඤ්‌ඤා ජළා එළමූගා න පටිබලා සුභාසිතදුබ්‌භාසිතස්‌ස අත්‌ථමඤ්‌ඤාතුං.
324. … Evamevaṃ kho, bhikkhave, appakā te sattā ye paññavanto ajaḷā aneḷamūgā paṭibalā subhāsitadubbhāsitassa atthamaññātuṃ; atha kho eteva sattā bahutarā ye duppaññā jaḷā eḷamūgā na paṭibalā subhāsitadubbhāsitassa atthamaññātuṃ.
325. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ අරියෙන පඤ්‌ඤාචක්‌ඛුනා සමන්‌නාගතා; අථ ඛො එතෙව සත්‌තා බහුතරා යෙ අවිජ්‌ජාගතා සම්‌මූළ්‌හා.
325. … Evamevaṃ kho, bhikkhave, appakā te sattā ye ariyena paññācakkhunā samannāgatā; atha kho eteva sattā bahutarā ye avijjāgatā sammūḷhā.
326. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ ලභන්‌ති තථාගතං දස්‌සනාය; අථ ඛො එතෙව සත්‌තා බහුතරා යෙ න ලභන්‌ති තථාගතං දස්‌සනාය.
326. … Evamevaṃ kho, bhikkhave, appakā te sattā ye labhanti tathāgataṃ dassanāya; atha kho eteva sattā bahutarā ye na labhanti tathāgataṃ dassanāya.
327. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ ලභන්‌ති තථාගතප්‌පවෙදිතං ධම්‌මවිනයං සවනාය; අථ ඛො එතෙව සත්‌තා බහුතරා යෙ න ලභන්‌ති තථාගතප්‌පවෙදිතං ධම්‌මවිනයං සවනාය.
327. … Evamevaṃ kho, bhikkhave, appakā te sattā ye labhanti tathāgatappaveditaṃ dhammavinayaṃ savanāya; atha kho eteva sattā bahutarā ye na labhanti tathāgatappaveditaṃ dhammavinayaṃ savanāya.
328. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ සුත්‌වා ධම්‌මං ධාරෙන්‌ති; අථ ඛො එතෙව සත්‌තා බහුතරා යෙ සුත්‌වා ධම්‌මං න ධාරෙන්‌ති.
328. … Evamevaṃ kho, bhikkhave, appakā te sattā ye sutvā dhammaṃ dhārenti; atha kho eteva sattā bahutarā ye sutvā dhammaṃ na dhārenti.
329. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ ධාතානං 21 ධම්‌මානං අත්‌ථං උපපරික්‌ඛන්‌ති; අථ ඛො එතෙව සත්‌තා බහුතරා යෙ ධාතානං ධම්‌මානං අත්‌ථං න උපපරික්‌ඛන්‌ති.
329. … Evamevaṃ kho, bhikkhave, appakā te sattā ye dhātānaṃ 22 dhammānaṃ atthaṃ upaparikkhanti; atha kho eteva sattā bahutarā ye dhātānaṃ dhammānaṃ atthaṃ na upaparikkhanti.
330. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ අත්‌ථමඤ්‌ඤාය ධම්‌මමඤ්‌ඤාය ධම්‌මානුධම්‌මං පටිපජ්‌ජන්‌ති; අථ ඛො එතෙව සත්‌තා බහුතරා යෙ අත්‌ථමඤ්‌ඤාය ධම්‌මමඤ්‌ඤාය ධම්‌මානුධම්‌මං න පටිපජ්‌ජන්‌ති.
330. … Evamevaṃ kho, bhikkhave, appakā te sattā ye atthamaññāya dhammamaññāya dhammānudhammaṃ paṭipajjanti; atha kho eteva sattā bahutarā ye atthamaññāya dhammamaññāya dhammānudhammaṃ na paṭipajjanti.
331. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ සංවෙජනියෙසු ඨානෙසු සංවිජ්‌ජන්‌ති; අථ ඛො එතෙව සත්‌තා බහුතරා යෙ සංවෙජනියෙසු ඨානෙසු න සංවිජ්‌ජන්‌ති.
331. … Evamevaṃ kho, bhikkhave, appakā te sattā ye saṃvejaniyesu ṭhānesu saṃvijjanti; atha kho eteva sattā bahutarā ye saṃvejaniyesu ṭhānesu na saṃvijjanti.
332. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ සංවිග්‌ගා යොනිසො පදහන්‌ති; අථ ඛො එතෙව සත්‌තා බහුතරා යෙ සංවිග්‌ගා යොනිසො න පදහන්‌ති.
332. … Evamevaṃ kho, bhikkhave, appakā te sattā ye saṃviggā yoniso padahanti; atha kho eteva sattā bahutarā ye saṃviggā yoniso na padahanti.
334. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ අන්‌නග්‌ගරසග්‌ගානං ලාභිනො; අථ ඛො එතෙව සත්‌තා බහුතරා යෙ අන්‌නග්‌ගරසග්‌ගානං න ලාභිනො, උඤ්‌ඡෙන කපාලාභතෙන යාපෙන්‌ති.
334. … Evamevaṃ kho, bhikkhave, appakā te sattā ye annaggarasaggānaṃ lābhino; atha kho eteva sattā bahutarā ye annaggarasaggānaṃ na lābhino, uñchena kapālābhatena yāpenti.
335. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ අත්‌ථරසස්‌ස ධම්‌මරසස්‌ස විමුත්‌තිරසස්‌ස ලාභිනො; අථ ඛො එතෙව සත්‌තා බහුතරා යෙ අත්‌ථරසස්‌ස ධම්‌මරසස්‌ස විමුත්‌තිරසස්‌ස න ලාභිනො. තස්‌මාතිහ, භික්‌ඛවෙ , එවං සික්‌ඛිතබ්‌බං – අත්‌ථරසස්‌ස ධම්‌මරසස්‌ස විමුත්‌තිරසස්‌ස ලාභිනො භවිස්‌සාමාති. එවඤ්‌හි වො, භික්‌ඛවෙ, සික්‌ඛිතබ්‌බන්‌ති.
335. … Evamevaṃ kho, bhikkhave, appakā te sattā ye attharasassa dhammarasassa vimuttirasassa lābhino; atha kho eteva sattā bahutarā ye attharasassa dhammarasassa vimuttirasassa na lābhino. Tasmātiha, bhikkhave , evaṃ sikkhitabbaṃ – attharasassa dhammarasassa vimuttirasassa lābhino bhavissāmāti. Evañhi vo, bhikkhave, sikkhitabbanti.
336-338. ‘‘සෙය්‍යථාපි , භික්‌ඛවෙ, අප්‌පමත්‌තකං ඉමස්‌මිං ජම්‌බුදීපෙ ආරාමරාමණෙය්‍යකං වනරාමණෙය්‍යකං භූමිරාමණෙය්‍යකං පොක්‌ඛරණිරාමණෙය්‍යකං; අථ ඛො එතදෙව බහුතරං යදිදං උක්‌කූලවිකූලං නදීවිදුග්‌ගං ඛාණුකණ්‌ටකට්‌ඨානං පබ්‌බතවිසමං. එවමෙවං ඛො, භික්‌ඛවෙ, අප්‌පකා තෙ සත්‌තා යෙ මනුස්‌සා චුතා මනුස්‌සෙසු පච්‌චාජායන්‌ති, අථ ඛො එතෙව සත්‌තා බහුතරා යෙ මනුස්‌සා චුතා නිරයෙ පච්‌චාජායන්‌ති…පෙ.… තිරච්‌ඡානයොනියා පච්‌චාජායන්‌ති…පෙ.… පෙත්‌තිවිසයෙ පච්‌චාජායන්‌ති’’.
336-338. ‘‘Seyyathāpi , bhikkhave, appamattakaṃ imasmiṃ jambudīpe ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇirāmaṇeyyakaṃ; atha kho etadeva bahutaraṃ yadidaṃ ukkūlavikūlaṃ nadīviduggaṃ khāṇukaṇṭakaṭṭhānaṃ pabbatavisamaṃ. Evamevaṃ kho, bhikkhave, appakā te sattā ye manussā cutā manussesu paccājāyanti, atha kho eteva sattā bahutarā ye manussā cutā niraye paccājāyanti…pe… tiracchānayoniyā paccājāyanti…pe… pettivisaye paccājāyanti’’.
339-341. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ මනුස්‌සා චුතා දෙවෙසු පච්‌චාජායන්‌ති; අථ ඛො එතෙව සත්‌තා බහුතරා යෙ මනුස්‌සා චුතා නිරයෙ පච්‌චාජායන්‌ති… තිරච්‌ඡානයොනියා පච්‌චාජායන්‌ති… පෙත්‌තිවිසයෙ පච්‌චාජායන්‌ති.
339-341. … Evamevaṃ kho, bhikkhave, appakā te sattā ye manussā cutā devesu paccājāyanti; atha kho eteva sattā bahutarā ye manussā cutā niraye paccājāyanti… tiracchānayoniyā paccājāyanti… pettivisaye paccājāyanti.
342-344. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ දෙවා චුතා දෙවෙසු පච්‌චාජායන්‌ති; අථ ඛො එතෙව සත්‌තා බහුතරා යෙ දෙවා චුතා නිරයෙ පච්‌චාජායන්‌ති… තිරච්‌ඡානයොනියා පච්‌චාජායන්‌ති… පෙත්‌තිවිසයෙ පච්‌චාජායන්‌ති.
342-344. … Evamevaṃ kho, bhikkhave, appakā te sattā ye devā cutā devesu paccājāyanti; atha kho eteva sattā bahutarā ye devā cutā niraye paccājāyanti… tiracchānayoniyā paccājāyanti… pettivisaye paccājāyanti.
345-347. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ දෙවා චුතා මනුස්‌සෙසු පච්‌චාජායන්‌ති; අථ ඛො එතෙව සත්‌තා බහුතරා යෙ දෙවා චුතා නිරයෙ පච්‌චාජායන්‌ති… තිරච්‌ඡානයොනියා පච්‌චාජායන්‌ති… පෙත්‌තිවිසයෙ පච්‌චාජායන්‌ති.
345-347. … Evamevaṃ kho, bhikkhave, appakā te sattā ye devā cutā manussesu paccājāyanti; atha kho eteva sattā bahutarā ye devā cutā niraye paccājāyanti… tiracchānayoniyā paccājāyanti… pettivisaye paccājāyanti.
348-350. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ නිරයා චුතා මනුස්‌සෙසු පච්‌චාජායන්‌ති; අථ ඛො එතෙව සත්‌තා බහුතරා යෙ නිරයා චුතා නිරයෙ පච්‌චාජායන්‌ති… තිරච්‌ඡානයොනියා පච්‌චාජායන්‌ති… පෙත්‌තිවිසයෙ පච්‌චාජායන්‌ති.
348-350. … Evamevaṃ kho, bhikkhave, appakā te sattā ye nirayā cutā manussesu paccājāyanti; atha kho eteva sattā bahutarā ye nirayā cutā niraye paccājāyanti… tiracchānayoniyā paccājāyanti… pettivisaye paccājāyanti.
351-353. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ නිරයා චුතා දෙවෙසු පච්‌චාජායන්‌ති; අථ ඛො එතෙව සත්‌තා බහුතරා යෙ නිරයා චුතා නිරයෙ පච්‌චාජායන්‌ති… තිරච්‌ඡානයොනියා පච්‌චාජායන්‌ති… පෙත්‌තිවිසයෙ පච්‌චාජායන්‌ති.
351-353. … Evamevaṃ kho, bhikkhave, appakā te sattā ye nirayā cutā devesu paccājāyanti; atha kho eteva sattā bahutarā ye nirayā cutā niraye paccājāyanti… tiracchānayoniyā paccājāyanti… pettivisaye paccājāyanti.
354-356. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ තිරච්‌ඡානයොනියා චුතා මනුස්‌සෙසු පච්‌චාජායන්‌ති; අථ ඛො එතෙව සත්‌තා බහුතරා යෙ තිරච්‌ඡානයොනියා චුතා නිරයෙ පච්‌චාජායන්‌ති… තිරච්‌ඡානයොනියා පච්‌චාජායන්‌ති… පෙත්‌තිවිසයෙ පච්‌චාජායන්‌ති.
354-356. … Evamevaṃ kho, bhikkhave, appakā te sattā ye tiracchānayoniyā cutā manussesu paccājāyanti; atha kho eteva sattā bahutarā ye tiracchānayoniyā cutā niraye paccājāyanti… tiracchānayoniyā paccājāyanti… pettivisaye paccājāyanti.
357-359. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ තිරච්‌ඡානයොනියා චුතා දෙවෙසු පච්‌චාජායන්‌ති; අථ ඛො එතෙව සත්‌තා බහුතරා යෙ තිරච්‌ඡානයොනියා චුතා නිරයෙ පච්‌චාජායන්‌ති… තිරච්‌ඡානයොනියා පච්‌චාජායන්‌ති… පෙත්‌තිවිසයෙ පච්‌චාජායන්‌ති.
357-359. … Evamevaṃ kho, bhikkhave, appakā te sattā ye tiracchānayoniyā cutā devesu paccājāyanti; atha kho eteva sattā bahutarā ye tiracchānayoniyā cutā niraye paccājāyanti… tiracchānayoniyā paccājāyanti… pettivisaye paccājāyanti.
360-362. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ පෙත්‌තිවිසයා චුතා මනුස්‌සෙසු පච්‌චාජායන්‌ති; අථ ඛො එතෙව සත්‌තා බහුතරා යෙ පෙත්‌තිවිසයා චුතා නිරයෙ පච්‌චාජායන්‌ති… තිරච්‌ඡානයොනියා පච්‌චාජායන්‌ති… පෙත්‌තිවිසයෙ පච්‌චාජායන්‌ති.
360-362. … Evamevaṃ kho, bhikkhave, appakā te sattā ye pettivisayā cutā manussesu paccājāyanti; atha kho eteva sattā bahutarā ye pettivisayā cutā niraye paccājāyanti… tiracchānayoniyā paccājāyanti… pettivisaye paccājāyanti.
363-365. … එවමෙවං ඛො, භික්‌ඛවෙ, අප්‌පකා තෙ සත්‌තා යෙ පෙත්‌තිවිසයා චුතා දෙවෙසු පච්‌චාජායන්‌ති ; අථ ඛො එතෙව සත්‌තා බහුතරා යෙ පෙත්‌තිවිසයා චුතා නිරයෙ පච්‌චාජායන්‌ති… තිරච්‌ඡානයොනියා පච්‌චාජායන්‌ති… පෙත්‌තිවිසයෙ පච්‌චාජායන්‌ති.
363-365. … Evamevaṃ kho, bhikkhave, appakā te sattā ye pettivisayā cutā devesu paccājāyanti ; atha kho eteva sattā bahutarā ye pettivisayā cutā niraye paccājāyanti… tiracchānayoniyā paccājāyanti… pettivisaye paccājāyanti.
වග්‌ගො චතුත්‌ථො.
Vaggo catuttho.
ජම්‌බුදීපපෙය්‍යාලො නිට්‌ඨිතො.
Jambudīpapeyyālo niṭṭhito.
එකධම්‌මපාළි සොළසමො.
Ekadhammapāḷi soḷasamo.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 16. එකධම්‌මපාළි • 16. Ekadhammapāḷi
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 16. එකධම්‌මපාළි • 16. Ekadhammapāḷi
