| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༡༦. ཨེཀདྷམྨཔཱལི༹
16. Ekadhammapāḷi
༡. པཋམཝགྒོ
1. Paṭhamavaggo
༢༩༦. ‘‘ཨེཀདྷམྨོ , བྷིཀྑཝེ, བྷཱཝིཏོ བཧུལཱིཀཏོ ཨེཀནྟནིབྦིདཱཡ ཝིརཱགཱཡ ནིརོདྷཱཡ ཨུཔསམཱཡ ཨབྷིཉྙཱཡ སམྦོདྷཱཡ ནིབྦཱནཱཡ སཾཝཏྟཏི། ཀཏམོ ཨེཀདྷམྨོ? བུདྡྷཱནུསྶཏི། ཨཡཾ ཁོ, བྷིཀྑཝེ, ཨེཀདྷམྨོ བྷཱཝིཏོ བཧུལཱིཀཏོ ཨེཀནྟནིབྦིདཱཡ ཝིརཱགཱཡ ནིརོདྷཱཡ ཨུཔསམཱཡ ཨབྷིཉྙཱཡ སམྦོདྷཱཡ ནིབྦཱནཱཡ སཾཝཏྟཏཱི’’ཏི།
296. ‘‘Ekadhammo , bhikkhave, bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattati. Katamo ekadhammo? Buddhānussati. Ayaṃ kho, bhikkhave, ekadhammo bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattatī’’ti.
༢༩༧. ‘‘ཨེཀདྷམྨོ, བྷིཀྑཝེ, བྷཱཝིཏོ བཧུལཱིཀཏོ ཨེཀནྟནིབྦིདཱཡ ཝིརཱགཱཡ ནིརོདྷཱཡ ཨུཔསམཱཡ ཨབྷིཉྙཱཡ སམྦོདྷཱཡ ནིབྦཱནཱཡ སཾཝཏྟཏི། ཀཏམོ ཨེཀདྷམྨོ? དྷམྨཱནུསྶཏི…པེ॰… སངྒྷཱནུསྶཏི… སཱིལཱནུསྶཏི… ཙཱགཱནུསྶཏི… དེཝཏཱནུསྶཏི… ཨཱནཱཔཱནསྶཏི… མརཎསྶཏི… ཀཱཡགཏཱསཏི… ཨུཔསམཱནུསྶཏི། ཨཡཾ ཁོ, བྷིཀྑཝེ, ཨེཀདྷམྨོ བྷཱཝིཏོ བཧུལཱིཀཏོ ཨེཀནྟནིབྦིདཱཡ ཝིརཱགཱཡ ནིརོདྷཱཡ ཨུཔསམཱཡ ཨབྷིཉྙཱཡ སམྦོདྷཱཡ ནིབྦཱནཱཡ སཾཝཏྟཏཱི’’ཏི།
297. ‘‘Ekadhammo, bhikkhave, bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattati. Katamo ekadhammo? Dhammānussati…pe… saṅghānussati… sīlānussati… cāgānussati… devatānussati… ānāpānassati… maraṇassati… kāyagatāsati… upasamānussati. Ayaṃ kho, bhikkhave, ekadhammo bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattatī’’ti.
ཝགྒོ པཋམོ།
Vaggo paṭhamo.
༢. དུཏིཡཝགྒོ
2. Dutiyavaggo
༢༩༨. ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡེན ཨནུཔྤནྣཱ ཝཱ ཨཀུསལཱ དྷམྨཱ ཨུཔྤཛྫནྟི ཨུཔྤནྣཱ ཝཱ ཨཀུསལཱ དྷམྨཱ བྷིཡྻོབྷཱཝཱཡ ཝེཔུལླཱཡ སཾཝཏྟནྟི ཡཐཡིདཾ, བྷིཀྑཝེ, མིཙྪཱདིཊྛི། མིཙྪཱདིཊྛིཀསྶ, བྷིཀྑཝེ, ཨནུཔྤནྣཱ ཙེཝ ཨཀུསལཱ དྷམྨཱ ཨུཔྤཛྫནྟི ཨུཔྤནྣཱ ཙ ཨཀུསལཱ དྷམྨཱ བྷིཡྻོབྷཱཝཱཡ ཝེཔུལླཱཡ སཾཝཏྟནྟཱི’’ཏི།
298. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā uppajjanti uppannā vā akusalā dhammā bhiyyobhāvāya vepullāya saṃvattanti yathayidaṃ, bhikkhave, micchādiṭṭhi. Micchādiṭṭhikassa, bhikkhave, anuppannā ceva akusalā dhammā uppajjanti uppannā ca akusalā dhammā bhiyyobhāvāya vepullāya saṃvattantī’’ti.
༢༩༩. ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡེན ཨནུཔྤནྣཱ ཝཱ ཀུསལཱ དྷམྨཱ ཨུཔྤཛྫནྟི ཨུཔྤནྣཱ ཝཱ ཀུསལཱ དྷམྨཱ བྷིཡྻོབྷཱཝཱཡ ཝེཔུལླཱཡ སཾཝཏྟནྟི ཡཐཡིདཾ , བྷིཀྑཝེ, སམྨཱདིཊྛི། སམྨཱདིཊྛིཀསྶ , བྷིཀྑཝེ, ཨནུཔྤནྣཱ ཙེཝ ཀུསལཱ དྷམྨཱ ཨུཔྤཛྫནྟི ཨུཔྤནྣཱ ཙ ཀུསལཱ དྷམྨཱ བྷིཡྻོབྷཱཝཱཡ ཝེཔུལླཱཡ སཾཝཏྟནྟཱི’’ཏི།
299. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā kusalā dhammā uppajjanti uppannā vā kusalā dhammā bhiyyobhāvāya vepullāya saṃvattanti yathayidaṃ , bhikkhave, sammādiṭṭhi. Sammādiṭṭhikassa , bhikkhave, anuppannā ceva kusalā dhammā uppajjanti uppannā ca kusalā dhammā bhiyyobhāvāya vepullāya saṃvattantī’’ti.
༣༠༠. ‘‘ནཱཧཾ , བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡེན ཨནུཔྤནྣཱ ཝཱ ཀུསལཱ དྷམྨཱ ནུཔྤཛྫནྟི ཨུཔྤནྣཱ ཝཱ ཀུསལཱ དྷམྨཱ པརིཧཱཡནྟི ཡཐཡིདཾ , བྷིཀྑཝེ, མིཙྪཱདིཊྛི། མིཙྪཱདིཊྛིཀསྶ, བྷིཀྑཝེ, ཨནུཔྤནྣཱ ཙེཝ ཀུསལཱ དྷམྨཱ ནུཔྤཛྫནྟི ཨུཔྤནྣཱ ཙ ཀུསལཱ དྷམྨཱ པརིཧཱཡནྟཱི’’ཏི།
300. ‘‘Nāhaṃ , bhikkhave, aññaṃ ekadhammampi samanupassāmi yena anuppannā vā kusalā dhammā nuppajjanti uppannā vā kusalā dhammā parihāyanti yathayidaṃ , bhikkhave, micchādiṭṭhi. Micchādiṭṭhikassa, bhikkhave, anuppannā ceva kusalā dhammā nuppajjanti uppannā ca kusalā dhammā parihāyantī’’ti.
༣༠༡. ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡེན ཨནུཔྤནྣཱ ཝཱ ཨཀུསལཱ དྷམྨཱ ནུཔྤཛྫནྟི ཨུཔྤནྣཱ ཝཱ ཨཀུསལཱ དྷམྨཱ པརིཧཱཡནྟི ཡཐཡིདཾ, བྷིཀྑཝེ, སམྨཱདིཊྛི། སམྨཱདིཊྛིཀསྶ, བྷིཀྑཝེ, ཨནུཔྤནྣཱ ཙེཝ ཨཀུསལཱ དྷམྨཱ ནུཔྤཛྫནྟི ཨུཔྤནྣཱ ཙ ཨཀུསལཱ དྷམྨཱ པརིཧཱཡནྟཱི’’ཏི།
301. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā nuppajjanti uppannā vā akusalā dhammā parihāyanti yathayidaṃ, bhikkhave, sammādiṭṭhi. Sammādiṭṭhikassa, bhikkhave, anuppannā ceva akusalā dhammā nuppajjanti uppannā ca akusalā dhammā parihāyantī’’ti.
༣༠༢. ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡེན ཨནུཔྤནྣཱ ཝཱ མིཙྪཱདིཊྛི ཨུཔྤཛྫཏི ཨུཔྤནྣཱ ཝཱ མིཙྪཱདིཊྛི པཝཌྜྷཏི ཡཐཡིདཾ, བྷིཀྑཝེ, ཨཡོནིསོམནསིཀཱརོ། ཨཡོནིསོ, བྷིཀྑཝེ, མནསི ཀརོཏོ ཨནུཔྤནྣཱ ཙེཝ མིཙྪཱདིཊྛི ཨུཔྤཛྫཏི ཨུཔྤནྣཱ ཙ མིཙྪཱདིཊྛི པཝཌྜྷཏཱི’’ཏི།
302. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā micchādiṭṭhi uppajjati uppannā vā micchādiṭṭhi pavaḍḍhati yathayidaṃ, bhikkhave, ayonisomanasikāro. Ayoniso, bhikkhave, manasi karoto anuppannā ceva micchādiṭṭhi uppajjati uppannā ca micchādiṭṭhi pavaḍḍhatī’’ti.
༣༠༣. ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡེན ཨནུཔྤནྣཱ ཝཱ སམྨཱདིཊྛི ཨུཔྤཛྫཏི ཨུཔྤནྣཱ ཝཱ སམྨཱདིཊྛི པཝཌྜྷཏི ཡཐཡིདཾ, བྷིཀྑཝེ, ཡོནིསོམནསིཀཱརོ། ཡོནིསོ, བྷིཀྑཝེ, མནསི ཀརོཏོ ཨནུཔྤནྣཱ ཙེཝ སམྨཱདིཊྛི ཨུཔྤཛྫཏི ཨུཔྤནྣཱ ཙ སམྨཱདིཊྛི པཝཌྜྷཏཱི’’ཏི།
303. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā sammādiṭṭhi uppajjati uppannā vā sammādiṭṭhi pavaḍḍhati yathayidaṃ, bhikkhave, yonisomanasikāro. Yoniso, bhikkhave, manasi karoto anuppannā ceva sammādiṭṭhi uppajjati uppannā ca sammādiṭṭhi pavaḍḍhatī’’ti.
༣༠༤. ‘‘ནཱཧཾ , བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡེན 1 སཏྟཱ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫནྟི ཡཐཡིདཾ, བྷིཀྑཝེ, མིཙྪཱདིཊྛི། མིཙྪཱདིཊྛིཡཱ, བྷིཀྑཝེ, སམནྣཱགཏཱ སཏྟཱ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫནྟཱི’’ཏི།
304. ‘‘Nāhaṃ , bhikkhave, aññaṃ ekadhammampi samanupassāmi yena 2 sattā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjanti yathayidaṃ, bhikkhave, micchādiṭṭhi. Micchādiṭṭhiyā, bhikkhave, samannāgatā sattā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjantī’’ti.
༣༠༥. ‘‘ནཱཧཾ , བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡེན སཏྟཱ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫནྟི ཡཐཡིདཾ, བྷིཀྑཝེ, སམྨཱདིཊྛི། སམྨཱདིཊྛིཡཱ, བྷིཀྑཝེ, སམནྣཱགཏཱ སཏྟཱ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫནྟཱི’’ཏི།
305. ‘‘Nāhaṃ , bhikkhave, aññaṃ ekadhammampi samanupassāmi yena sattā kāyassa bhedā paraṃ maraṇā sugatiṃ saggaṃ lokaṃ upapajjanti yathayidaṃ, bhikkhave, sammādiṭṭhi. Sammādiṭṭhiyā, bhikkhave, samannāgatā sattā kāyassa bhedā paraṃ maraṇā sugatiṃ saggaṃ lokaṃ upapajjantī’’ti.
༣༠༦. ‘‘མིཙྪཱདིཊྛིཀསྶ, བྷིཀྑཝེ, པུརིསཔུགྒལསྶ ཡཉྩེཝ ཀཱཡཀམྨཾ ཡཐཱདིཊྛི སམཏྟཾ སམཱདིནྣཾ ཡཉྩ ཝཙཱིཀམྨཾ…པེ॰… ཡཉྩ མནོཀམྨཾ ཡཐཱདིཊྛི སམཏྟཾ སམཱདིནྣཾ ཡཱ ཙ ཙེཏནཱ ཡཱ ཙ པཏྠནཱ ཡོ ཙ པཎིདྷི ཡེ ཙ སངྑཱརཱ སབྦེ ཏེ དྷམྨཱ ཨནིཊྛཱཡ ཨཀནྟཱཡ ཨམནཱཔཱཡ ཨཧིཏཱཡ དུཀྑཱཡ སཾཝཏྟནྟི། ཏཾ ཀིསྶ ཧེཏུ? དིཊྛི ཧིསྶ 3, བྷིཀྑཝེ, པཱཔིཀཱ། སེཡྻཐཱཔི, བྷིཀྑཝེ , ནིམྦབཱིཛཾ ཝཱ ཀོསཱཏཀིབཱིཛཾ ཝཱ ཏིཏྟཀལཱབུབཱིཛཾ ཝཱ ཨལླཱཡ པཐཝིཡཱ 4 ནིཀྑིཏྟཾ ཡཉྩེཝ པཐཝིརསཾ ཨུཔཱདིཡཏི ཡཉྩ ཨཱཔོརསཾ ཨུཔཱདིཡཏི སབྦཾ ཏཾ ཏིཏྟཀཏྟཱཡ ཀཊུཀཏྟཱཡ ཨསཱཏཏྟཱཡ སཾཝཏྟཏི། ཏཾ ཀིསྶ ཧེཏུ? བཱིཛཾ ཧིསྶ 5, བྷིཀྑཝེ, པཱཔཀཾ། ཨེཝམེཝཾ ཁོ, བྷིཀྑཝེ, མིཙྪཱདིཊྛིཀསྶ པུརིསཔུགྒལསྶ ཡཉྩེཝ ཀཱཡཀམྨཾ ཡཐཱདིཊྛི སམཏྟཾ སམཱདིནྣཾ ཡཉྩ ཝཙཱིཀམྨཾ…པེ॰… ཡཉྩ མནོཀམྨཾ ཡཐཱདིཊྛི སམཏྟཾ སམཱདིནྣཾ ཡཱ ཙ ཙེཏནཱ ཡཱ ཙ པཏྠནཱ ཡོ ཙ པཎིདྷི ཡེ ཙ སངྑཱརཱ སབྦེ ཏེ དྷམྨཱ ཨནིཊྛཱཡ ཨཀནྟཱཡ ཨམནཱཔཱཡ ཨཧིཏཱཡ དུཀྑཱཡ སཾཝཏྟནྟི། ཏཾ ཀིསྶ ཧེཏུ? དིཊྛི ཧིསྶ, བྷིཀྑཝེ, པཱཔིཀཱ’’ཏི།
306. ‘‘Micchādiṭṭhikassa, bhikkhave, purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa 6, bhikkhave, pāpikā. Seyyathāpi, bhikkhave , nimbabījaṃ vā kosātakibījaṃ vā tittakalābubījaṃ vā allāya pathaviyā 7 nikkhittaṃ yañceva pathavirasaṃ upādiyati yañca āporasaṃ upādiyati sabbaṃ taṃ tittakattāya kaṭukattāya asātattāya saṃvattati. Taṃ kissa hetu? Bījaṃ hissa 8, bhikkhave, pāpakaṃ. Evamevaṃ kho, bhikkhave, micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa, bhikkhave, pāpikā’’ti.
༣༠༧. ‘‘སམྨཱདིཊྛིཀསྶ, བྷིཀྑཝེ, པུརིསཔུགྒལསྶ ཡཉྩེཝ ཀཱཡཀམྨཾ ཡཐཱདིཊྛི སམཏྟཾ སམཱདིནྣཾ ཡཉྩ ཝཙཱིཀམྨཾ…པེ॰… ཡཉྩ མནོཀམྨཾ ཡཐཱདིཊྛི སམཏྟཾ སམཱདིནྣཾ ཡཱ ཙ ཙེཏནཱ ཡཱ ཙ པཏྠནཱ ཡོ ཙ པཎིདྷི ཡེ ཙ སངྑཱརཱ སབྦེ ཏེ དྷམྨཱ ཨིཊྛཱཡ ཀནྟཱཡ མནཱཔཱཡ ཧིཏཱཡ སུཁཱཡ སཾཝཏྟནྟི། ཏཾ ཀིསྶ ཧེཏུ? དིཊྛི ཧིསྶ, བྷིཀྑཝེ, བྷདྡིཀཱ། སེཡྻཐཱཔི, བྷིཀྑཝེ, ཨུཙྪུབཱིཛཾ ཝཱ སཱལིབཱིཛཾ ཝཱ མུདྡིཀཱབཱིཛཾ ཝཱ ཨལླཱཡ པཐཝིཡཱ ནིཀྑིཏྟཾ ཡཉྩེཝ པཐཝིརསཾ ཨུཔཱདིཡཏི ཡཉྩ ཨཱཔོརསཾ ཨུཔཱདིཡཏི སབྦཾ ཏཾ མདྷུརཏྟཱཡ སཱཏཏྟཱཡ ཨསེཙནཀཏྟཱཡ སཾཝཏྟཏི། ཏཾ ཀིསྶ ཧེཏུ? བཱིཛཾ ཧིསྶ, བྷིཀྑཝེ, བྷདྡཀཾ། ཨེཝམེཝཾ ཁོ, བྷིཀྑཝེ, སམྨཱདིཊྛིཀསྶ པུརིསཔུགྒལསྶ ཡཉྩེཝ ཀཱཡཀམྨཾ ཡཐཱདིཊྛི སམཏྟཾ སམཱདིནྣཾ ཡཉྩ ཝཙཱིཀམྨཾ…པེ॰… ཡཉྩ མནོཀམྨཾ ཡཐཱདིཊྛི སམཏྟཾ སམཱདིནྣཾ ཡཱ ཙ ཙེཏནཱ ཡཱ ཙ པཏྠནཱ ཡོ ཙ པཎིདྷི ཡེ ཙ སངྑཱརཱ སབྦེ ཏེ དྷམྨཱ ཨིཊྛཱཡ ཀནྟཱཡ མནཱཔཱཡ ཧིཏཱཡ སུཁཱཡ སཾཝཏྟནྟི། ཏཾ ཀིསྶ ཧེཏུ? དིཊྛི ཧིསྶ, བྷིཀྑཝེ, བྷདྡིཀཱ’’ཏི།
307. ‘‘Sammādiṭṭhikassa, bhikkhave, purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā. Seyyathāpi, bhikkhave, ucchubījaṃ vā sālibījaṃ vā muddikābījaṃ vā allāya pathaviyā nikkhittaṃ yañceva pathavirasaṃ upādiyati yañca āporasaṃ upādiyati sabbaṃ taṃ madhurattāya sātattāya asecanakattāya saṃvattati. Taṃ kissa hetu? Bījaṃ hissa, bhikkhave, bhaddakaṃ. Evamevaṃ kho, bhikkhave, sammādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā’’ti.
ཝགྒོ དུཏིཡོ།
Vaggo dutiyo.
༣. ཏཏིཡཝགྒོ
3. Tatiyavaggo
༣༠༨. ‘‘ཨེཀཔུགྒལོ , བྷིཀྑཝེ, ལོཀེ ཨུཔྤཛྫམཱནོ ཨུཔྤཛྫཏི བཧུཛནཨཧིཏཱཡ བཧུཛནཨསུཁཱཡ, བཧུནོ ཛནསྶ ཨནཏྠཱཡ ཨཧིཏཱཡ དུཀྑཱཡ དེཝམནུསྶཱནཾ། ཀཏམོ ཨེཀཔུགྒལོ? མིཙྪཱདིཊྛིཀོ ཧོཏི ཝིཔརཱིཏདསྶནོ། སོ བཧུཛནཾ སདྡྷམྨཱ ཝུཊྛཱཔེཏྭཱ ཨསདྡྷམྨེ པཏིཊྛཱཔེཏི། ཨཡཾ ཁོ, བྷིཀྑཝེ, ཨེཀཔུགྒལོ ལོཀེ ཨུཔྤཛྫམཱནོ ཨུཔྤཛྫཏི བཧུཛནཨཧིཏཱཡ བཧུཛནཨསུཁཱཡ, བཧུནོ ཛནསྶ ཨནཏྠཱཡ ཨཧིཏཱཡ དུཀྑཱཡ དེཝམནུསྶཱན’’ནྟི།
308. ‘‘Ekapuggalo , bhikkhave, loke uppajjamāno uppajjati bahujanaahitāya bahujanaasukhāya, bahuno janassa anatthāya ahitāya dukkhāya devamanussānaṃ. Katamo ekapuggalo? Micchādiṭṭhiko hoti viparītadassano. So bahujanaṃ saddhammā vuṭṭhāpetvā asaddhamme patiṭṭhāpeti. Ayaṃ kho, bhikkhave, ekapuggalo loke uppajjamāno uppajjati bahujanaahitāya bahujanaasukhāya, bahuno janassa anatthāya ahitāya dukkhāya devamanussāna’’nti.
༣༠༩. ‘‘ཨེཀཔུགྒལོ, བྷིཀྑཝེ, ལོཀེ ཨུཔྤཛྫམཱནོ ཨུཔྤཛྫཏི བཧུཛནཧིཏཱཡ བཧུཛནསུཁཱཡ, བཧུནོ ཛནསྶ ཨཏྠཱཡ ཧིཏཱཡ སུཁཱཡ དེཝམནུསྶཱནཾ། ཀཏམོ ཨེཀཔུགྒལོ? སམྨཱདིཊྛིཀོ ཧོཏི ཨཝིཔརཱིཏདསྶནོ། སོ བཧུཛནཾ ཨསདྡྷམྨཱ ཝུཊྛཱཔེཏྭཱ སདྡྷམྨེ པཏིཊྛཱཔེཏི། ཨཡཾ ཁོ, བྷིཀྑཝེ, ཨེཀཔུགྒལོ ལོཀེ ཨུཔཔཛྫམཱནོ ཨུཔྤཛྫཏི བཧུཛནཧིཏཱཡ བཧུཛནསུཁཱཡ, བཧུནོ ཛནསྶ ཨཏྠཱཡ ཧིཏཱཡ སུཁཱཡ དེཝམནུསྶཱན’’ནྟི།
309. ‘‘Ekapuggalo, bhikkhave, loke uppajjamāno uppajjati bahujanahitāya bahujanasukhāya, bahuno janassa atthāya hitāya sukhāya devamanussānaṃ. Katamo ekapuggalo? Sammādiṭṭhiko hoti aviparītadassano. So bahujanaṃ asaddhammā vuṭṭhāpetvā saddhamme patiṭṭhāpeti. Ayaṃ kho, bhikkhave, ekapuggalo loke upapajjamāno uppajjati bahujanahitāya bahujanasukhāya, bahuno janassa atthāya hitāya sukhāya devamanussāna’’nti.
༣༡༠. ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡཾ ཨེཝཾ མཧཱསཱཝཛྫཾ ཡཐཡིདཾ, བྷིཀྑཝེ, མིཙྪཱདིཊྛི། མིཙྪཱདིཊྛིཔརམཱནི, བྷིཀྑཝེ, མཧཱསཱཝཛྫཱནཱི’’ཏི 9།
310. ‘‘Nāhaṃ, bhikkhave, aññaṃ ekadhammampi samanupassāmi yaṃ evaṃ mahāsāvajjaṃ yathayidaṃ, bhikkhave, micchādiṭṭhi. Micchādiṭṭhiparamāni, bhikkhave, mahāsāvajjānī’’ti 10.
༣༡༡. ‘‘ནཱཧཾ, བྷིཀྑཝེ, ཨཉྙཾ ཨེཀཔུགྒལམྤི སམནུཔསྶཱམི ཡོ ཨེཝཾ བཧུཛནཨཧིཏཱཡ པཊིཔནྣོ བཧུཛནཨསུཁཱཡ, བཧུནོ ཛནསྶ ཨནཏྠཱཡ ཨཧིཏཱཡ དུཀྑཱཡ དེཝམནུསྶཱནཾ ཡཐཡིདཾ, བྷིཀྑཝེ, མཀྑལི མོགྷཔུརིསོ། སེཡྻཐཱཔི, བྷིཀྑཝེ, ནདཱིམུཁེ ཁིཔྤཾ 11 ཨུཌྜེཡྻ 12 བཧཱུནཾ མཙྪཱནཾ ཨཧིཏཱཡ དུཀྑཱཡ ཨནཡཱཡ བྱསནཱཡ; ཨེཝམེཝཾ ཁོ, བྷིཀྑཝེ , མཀྑལི མོགྷཔུརིསོ མནུསྶཁིཔྤཾ མཉྙེ ལོཀེ ཨུཔྤནྣོ བཧཱུནཾ སཏྟཱནཾ ཨཧིཏཱཡ དུཀྑཱཡ ཨནཡཱཡ བྱསནཱཡཱ’’ཏི།
311. ‘‘Nāhaṃ, bhikkhave, aññaṃ ekapuggalampi samanupassāmi yo evaṃ bahujanaahitāya paṭipanno bahujanaasukhāya, bahuno janassa anatthāya ahitāya dukkhāya devamanussānaṃ yathayidaṃ, bhikkhave, makkhali moghapuriso. Seyyathāpi, bhikkhave, nadīmukhe khippaṃ 13 uḍḍeyya 14 bahūnaṃ macchānaṃ ahitāya dukkhāya anayāya byasanāya; evamevaṃ kho, bhikkhave , makkhali moghapuriso manussakhippaṃ maññe loke uppanno bahūnaṃ sattānaṃ ahitāya dukkhāya anayāya byasanāyā’’ti.
༣༡༢. ‘‘དུརཀྑཱཏེ , བྷིཀྑཝེ, དྷམྨཝིནཡེ ཡོ ཙ སམཱདཔེཏི 15 ཡཉྩ སམཱདཔེཏི ཡོ ཙ སམཱདཔིཏོ ཏཐཏྟཱཡ པཊིཔཛྫཏི སབྦེ ཏེ བཧུཾ ཨཔུཉྙཾ པསཝནྟི། ཏཾ ཀིསྶ ཧེཏུ? དུརཀྑཱཏཏྟཱ, བྷིཀྑཝེ, དྷམྨསྶཱ’’ཏི།
312. ‘‘Durakkhāte , bhikkhave, dhammavinaye yo ca samādapeti 16 yañca samādapeti yo ca samādapito tathattāya paṭipajjati sabbe te bahuṃ apuññaṃ pasavanti. Taṃ kissa hetu? Durakkhātattā, bhikkhave, dhammassā’’ti.
༣༡༣. ‘‘སྭཱཀྑཱཏེ , བྷིཀྑཝེ, དྷམྨཝིནཡེ ཡོ ཙ སམཱདཔེཏི ཡཉྩ སམཱདཔེཏི ཡོ ཙ སམཱདཔིཏོ ཏཐཏྟཱཡ པཊིཔཛྫཏི སབྦེ ཏེ བཧུཾ པུཉྙཾ པསཝནྟི། ཏཾ ཀིསྶ ཧེཏུ? སྭཱཀྑཱཏཏྟཱ, བྷིཀྑཝེ, དྷམྨསྶཱ’’ཏི།
313. ‘‘Svākkhāte , bhikkhave, dhammavinaye yo ca samādapeti yañca samādapeti yo ca samādapito tathattāya paṭipajjati sabbe te bahuṃ puññaṃ pasavanti. Taṃ kissa hetu? Svākkhātattā, bhikkhave, dhammassā’’ti.
༣༡༤. ‘‘དུརཀྑཱཏེ, བྷིཀྑཝེ, དྷམྨཝིནཡེ དཱཡཀེན མཏྟཱ ཛཱནིཏབྦཱ, ནོ པཊིགྒཱཧཀེན། ཏཾ ཀིསྶ ཧེཏུ? དུརཀྑཱཏཏྟཱ, བྷིཀྑཝེ, དྷམྨསྶཱ’’ཏི།
314. ‘‘Durakkhāte, bhikkhave, dhammavinaye dāyakena mattā jānitabbā, no paṭiggāhakena. Taṃ kissa hetu? Durakkhātattā, bhikkhave, dhammassā’’ti.
༣༡༥. ‘‘སྭཱཀྑཱཏེ, བྷིཀྑཝེ, དྷམྨཝིནཡེ པཊིགྒཱཧཀེན མཏྟཱ ཛཱནིཏབྦཱ, ནོ དཱཡཀེན། ཏཾ ཀིསྶ ཧེཏུ? སྭཱཀྑཱཏཏྟཱ, བྷིཀྑཝེ, དྷམྨསྶཱ’’ཏི།
315. ‘‘Svākkhāte, bhikkhave, dhammavinaye paṭiggāhakena mattā jānitabbā, no dāyakena. Taṃ kissa hetu? Svākkhātattā, bhikkhave, dhammassā’’ti.
༣༡༦. ‘‘དུརཀྑཱཏེ, བྷིཀྑཝེ, དྷམྨཝིནཡེ ཡོ ཨཱརདྡྷཝཱིརིཡོ སོ དུཀྑཾ ཝིཧརཏི། ཏཾ ཀིསྶ ཧེཏུ? དུརཀྑཱཏཏྟཱ, བྷིཀྑཝེ, དྷམྨསྶཱ’’ཏི།
316. ‘‘Durakkhāte, bhikkhave, dhammavinaye yo āraddhavīriyo so dukkhaṃ viharati. Taṃ kissa hetu? Durakkhātattā, bhikkhave, dhammassā’’ti.
༣༡༧. ‘‘སྭཱཀྑཱཏེ, བྷིཀྑཝེ, དྷམྨཝིནཡེ ཡོ ཀུསཱིཏོ སོ དུཀྑཾ ཝིཧརཏི། ཏཾ ཀིསྶ ཧེཏུ? སྭཱཀྑཱཏཏྟཱ, བྷིཀྑཝེ, དྷམྨསྶཱ’’ཏི།
317. ‘‘Svākkhāte, bhikkhave, dhammavinaye yo kusīto so dukkhaṃ viharati. Taṃ kissa hetu? Svākkhātattā, bhikkhave, dhammassā’’ti.
༣༡༨. ‘‘དུརཀྑཱཏེ, བྷིཀྑཝེ, དྷམྨཝིནཡེ ཡོ ཀུསཱིཏོ སོ སུཁཾ ཝིཧརཏི ། ཏཾ ཀིསྶ ཧེཏུ? དུརཀྑཱཏཏྟཱ, བྷིཀྑཝེ, དྷམྨསྶཱ’’ཏི།
318. ‘‘Durakkhāte, bhikkhave, dhammavinaye yo kusīto so sukhaṃ viharati . Taṃ kissa hetu? Durakkhātattā, bhikkhave, dhammassā’’ti.
༣༡༩. ‘‘སྭཱཀྑཱཏེ, བྷིཀྑཝེ, དྷམྨཝིནཡེ ཡོ ཨཱརདྡྷཝཱིརིཡོ སོ སུཁཾ ཝིཧརཏི། ཏཾ ཀིསྶ ཧེཏུ? སྭཱཀྑཱཏཏྟཱ, བྷིཀྑཝེ, དྷམྨསྶཱ’’ཏི།
319. ‘‘Svākkhāte, bhikkhave, dhammavinaye yo āraddhavīriyo so sukhaṃ viharati. Taṃ kissa hetu? Svākkhātattā, bhikkhave, dhammassā’’ti.
༣༢༠. ‘‘སེཡྻཐཱཔི , བྷིཀྑཝེ, ཨཔྤམཏྟཀོཔི གཱུཐོ དུགྒནྡྷོ ཧོཏི; ཨེཝམེཝཾ ཁོ ཨཧཾ, བྷིཀྑཝེ, ཨཔྤམཏྟཀམྤི བྷཝཾ ན ཝཎྞེམི, ཨནྟམསོ ཨཙྪརཱསངྒྷཱཏམཏྟམྤི’’།
320. ‘‘Seyyathāpi , bhikkhave, appamattakopi gūtho duggandho hoti; evamevaṃ kho ahaṃ, bhikkhave, appamattakampi bhavaṃ na vaṇṇemi, antamaso accharāsaṅghātamattampi’’.
༣༢༡. ‘‘སེཡྻཐཱཔི, བྷིཀྑཝེ, ཨཔྤམཏྟཀམྤི མུཏྟཾ དུགྒནྡྷཾ ཧོཏི… ཨཔྤམཏྟཀོཔི ཁེལོ༹ དུགྒནྡྷོ ཧོཏི… ཨཔྤམཏྟཀོཔི པུབྦོ དུགྒནྡྷོ ཧོཏི… ཨཔྤམཏྟཀམྤི ལོཧིཏཾ དུགྒནྡྷཾ ཧོཏི; ཨེཝམེཝཾ ཁོ ཨཧཾ, བྷིཀྑཝེ, ཨཔྤམཏྟཀམྤི བྷཝཾ ན ཝཎྞེམི, ཨནྟམསོ ཨཙྪརཱསངྒྷཱཏམཏྟམྤི’’།
321. ‘‘Seyyathāpi, bhikkhave, appamattakampi muttaṃ duggandhaṃ hoti… appamattakopi kheḷo duggandho hoti… appamattakopi pubbo duggandho hoti… appamattakampi lohitaṃ duggandhaṃ hoti; evamevaṃ kho ahaṃ, bhikkhave, appamattakampi bhavaṃ na vaṇṇemi, antamaso accharāsaṅghātamattampi’’.
ཝགྒོ ཏཏིཡོ།
Vaggo tatiyo.
༤. ཙཏུཏྠཝགྒོ
4. Catutthavaggo
༣༢༢. ‘‘སེཡྻཐཱཔི , བྷིཀྑཝེ, ཨཔྤམཏྟཀཾ ཨིམསྨིཾ ཛམྦུདཱིཔེ ཨཱརཱམརཱམཎེཡྻཀཾ ཝནརཱམཎེཡྻཀཾ བྷཱུམིརཱམཎེཡྻཀཾ པོཀྑརཎིརཱམཎེཡྻཀཾ; ཨཐ ཁོ ཨེཏདེཝ བཧུཏརཾ ཡདིདཾ ཨུཀྐཱུལཝིཀཱུལཾ ནདཱིཝིདུགྒཾ ཁཱཎུཀཎྚཀཊྛཱནཾ 17 པབྦཏཝིསམཾ; ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ ཐལཛཱ, ཨཐ ཁོ ཨེཏེཝ སཏྟཱ བཧུཏརཱ ཡེ ཨོདཀཱ’’།
322. ‘‘Seyyathāpi , bhikkhave, appamattakaṃ imasmiṃ jambudīpe ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇirāmaṇeyyakaṃ; atha kho etadeva bahutaraṃ yadidaṃ ukkūlavikūlaṃ nadīviduggaṃ khāṇukaṇṭakaṭṭhānaṃ 18 pabbatavisamaṃ; evamevaṃ kho, bhikkhave, appakā te sattā ye thalajā, atha kho eteva sattā bahutarā ye odakā’’.
༣༢༣. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ མནུསྶེསུ པཙྩཱཛཱཡནྟི; ཨཐ ཁོ ཨེཏེཝ སཏྟཱ བཧུཏརཱ ཡེ ཨཉྙཏྲ མནུསྶེཧི པཙྩཱཛཱཡནྟི།
323. … Evamevaṃ kho, bhikkhave, appakā te sattā ye manussesu paccājāyanti; atha kho eteva sattā bahutarā ye aññatra manussehi paccājāyanti.
… ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ མཛ྄ཛྷིམེསུ ཛནཔདེསུ པཙྩཱཛཱཡནྟི; ཨཐ ཁོ ཨེཏེཝ སཏྟཱ བཧུཏརཱ ཡེ པཙྩནྟིམེསུ ཛནཔདེསུ པཙྩཱཛཱཡནྟི ཨཝིཉྙཱཏཱརེསུ མིལཀྑེསུ 19།
… Evamevaṃ kho, bhikkhave, appakā te sattā ye majjhimesu janapadesu paccājāyanti; atha kho eteva sattā bahutarā ye paccantimesu janapadesu paccājāyanti aviññātāresu milakkhesu 20.
༣༢༤. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ པཉྙཝནྟོ ཨཛལཱ༹ ཨནེལ༹མཱུགཱ པཊིབལཱ སུབྷཱསིཏདུབྦྷཱསིཏསྶ ཨཏྠམཉྙཱཏུཾ; ཨཐ ཁོ ཨེཏེཝ སཏྟཱ བཧུཏརཱ ཡེ དུཔྤཉྙཱ ཛལཱ༹ ཨེལ༹མཱུགཱ ན པཊིབལཱ སུབྷཱསིཏདུབྦྷཱསིཏསྶ ཨཏྠམཉྙཱཏུཾ།
324. … Evamevaṃ kho, bhikkhave, appakā te sattā ye paññavanto ajaḷā aneḷamūgā paṭibalā subhāsitadubbhāsitassa atthamaññātuṃ; atha kho eteva sattā bahutarā ye duppaññā jaḷā eḷamūgā na paṭibalā subhāsitadubbhāsitassa atthamaññātuṃ.
༣༢༥. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ ཨརིཡེན པཉྙཱཙཀྑུནཱ སམནྣཱགཏཱ; ཨཐ ཁོ ཨེཏེཝ སཏྟཱ བཧུཏརཱ ཡེ ཨཝིཛྫཱགཏཱ སམྨཱུལ༹ྷཱ།
325. … Evamevaṃ kho, bhikkhave, appakā te sattā ye ariyena paññācakkhunā samannāgatā; atha kho eteva sattā bahutarā ye avijjāgatā sammūḷhā.
༣༢༦. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ ལབྷནྟི ཏཐཱགཏཾ དསྶནཱཡ; ཨཐ ཁོ ཨེཏེཝ སཏྟཱ བཧུཏརཱ ཡེ ན ལབྷནྟི ཏཐཱགཏཾ དསྶནཱཡ།
326. … Evamevaṃ kho, bhikkhave, appakā te sattā ye labhanti tathāgataṃ dassanāya; atha kho eteva sattā bahutarā ye na labhanti tathāgataṃ dassanāya.
༣༢༧. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ ལབྷནྟི ཏཐཱགཏཔྤཝེདིཏཾ དྷམྨཝིནཡཾ སཝནཱཡ; ཨཐ ཁོ ཨེཏེཝ སཏྟཱ བཧུཏརཱ ཡེ ན ལབྷནྟི ཏཐཱགཏཔྤཝེདིཏཾ དྷམྨཝིནཡཾ སཝནཱཡ།
327. … Evamevaṃ kho, bhikkhave, appakā te sattā ye labhanti tathāgatappaveditaṃ dhammavinayaṃ savanāya; atha kho eteva sattā bahutarā ye na labhanti tathāgatappaveditaṃ dhammavinayaṃ savanāya.
༣༢༨. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ སུཏྭཱ དྷམྨཾ དྷཱརེནྟི; ཨཐ ཁོ ཨེཏེཝ སཏྟཱ བཧུཏརཱ ཡེ སུཏྭཱ དྷམྨཾ ན དྷཱརེནྟི།
328. … Evamevaṃ kho, bhikkhave, appakā te sattā ye sutvā dhammaṃ dhārenti; atha kho eteva sattā bahutarā ye sutvā dhammaṃ na dhārenti.
༣༢༩. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ དྷཱཏཱནཾ 21 དྷམྨཱནཾ ཨཏྠཾ ཨུཔཔརིཀྑནྟི; ཨཐ ཁོ ཨེཏེཝ སཏྟཱ བཧུཏརཱ ཡེ དྷཱཏཱནཾ དྷམྨཱནཾ ཨཏྠཾ ན ཨུཔཔརིཀྑནྟི།
329. … Evamevaṃ kho, bhikkhave, appakā te sattā ye dhātānaṃ 22 dhammānaṃ atthaṃ upaparikkhanti; atha kho eteva sattā bahutarā ye dhātānaṃ dhammānaṃ atthaṃ na upaparikkhanti.
༣༣༠. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ ཨཏྠམཉྙཱཡ དྷམྨམཉྙཱཡ དྷམྨཱནུདྷམྨཾ པཊིཔཛྫནྟི; ཨཐ ཁོ ཨེཏེཝ སཏྟཱ བཧུཏརཱ ཡེ ཨཏྠམཉྙཱཡ དྷམྨམཉྙཱཡ དྷམྨཱནུདྷམྨཾ ན པཊིཔཛྫནྟི།
330. … Evamevaṃ kho, bhikkhave, appakā te sattā ye atthamaññāya dhammamaññāya dhammānudhammaṃ paṭipajjanti; atha kho eteva sattā bahutarā ye atthamaññāya dhammamaññāya dhammānudhammaṃ na paṭipajjanti.
༣༣༡. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ སཾཝེཛནིཡེསུ ཋཱནེསུ སཾཝིཛྫནྟི; ཨཐ ཁོ ཨེཏེཝ སཏྟཱ བཧུཏརཱ ཡེ སཾཝེཛནིཡེསུ ཋཱནེསུ ན སཾཝིཛྫནྟི།
331. … Evamevaṃ kho, bhikkhave, appakā te sattā ye saṃvejaniyesu ṭhānesu saṃvijjanti; atha kho eteva sattā bahutarā ye saṃvejaniyesu ṭhānesu na saṃvijjanti.
༣༣༢. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ སཾཝིགྒཱ ཡོནིསོ པདཧནྟི; ཨཐ ཁོ ཨེཏེཝ སཏྟཱ བཧུཏརཱ ཡེ སཾཝིགྒཱ ཡོནིསོ ན པདཧནྟི།
332. … Evamevaṃ kho, bhikkhave, appakā te sattā ye saṃviggā yoniso padahanti; atha kho eteva sattā bahutarā ye saṃviggā yoniso na padahanti.
༣༣༤. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ ཨནྣགྒརསགྒཱནཾ ལཱབྷིནོ; ཨཐ ཁོ ཨེཏེཝ སཏྟཱ བཧུཏརཱ ཡེ ཨནྣགྒརསགྒཱནཾ ན ལཱབྷིནོ, ཨུཉྪེན ཀཔཱལཱབྷཏེན ཡཱཔེནྟི།
334. … Evamevaṃ kho, bhikkhave, appakā te sattā ye annaggarasaggānaṃ lābhino; atha kho eteva sattā bahutarā ye annaggarasaggānaṃ na lābhino, uñchena kapālābhatena yāpenti.
༣༣༥. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ ཨཏྠརསསྶ དྷམྨརསསྶ ཝིམུཏྟིརསསྶ ལཱབྷིནོ; ཨཐ ཁོ ཨེཏེཝ སཏྟཱ བཧུཏརཱ ཡེ ཨཏྠརསསྶ དྷམྨརསསྶ ཝིམུཏྟིརསསྶ ན ལཱབྷིནོ། ཏསྨཱཏིཧ, བྷིཀྑཝེ , ཨེཝཾ སིཀྑིཏབྦཾ – ཨཏྠརསསྶ དྷམྨརསསྶ ཝིམུཏྟིརསསྶ ལཱབྷིནོ བྷཝིསྶཱམཱཏི། ཨེཝཉྷི ཝོ, བྷིཀྑཝེ, སིཀྑིཏབྦནྟི།
335. … Evamevaṃ kho, bhikkhave, appakā te sattā ye attharasassa dhammarasassa vimuttirasassa lābhino; atha kho eteva sattā bahutarā ye attharasassa dhammarasassa vimuttirasassa na lābhino. Tasmātiha, bhikkhave , evaṃ sikkhitabbaṃ – attharasassa dhammarasassa vimuttirasassa lābhino bhavissāmāti. Evañhi vo, bhikkhave, sikkhitabbanti.
༣༣༦-༣༣༨. ‘‘སེཡྻཐཱཔི , བྷིཀྑཝེ, ཨཔྤམཏྟཀཾ ཨིམསྨིཾ ཛམྦུདཱིཔེ ཨཱརཱམརཱམཎེཡྻཀཾ ཝནརཱམཎེཡྻཀཾ བྷཱུམིརཱམཎེཡྻཀཾ པོཀྑརཎིརཱམཎེཡྻཀཾ; ཨཐ ཁོ ཨེཏདེཝ བཧུཏརཾ ཡདིདཾ ཨུཀྐཱུལཝིཀཱུལཾ ནདཱིཝིདུགྒཾ ཁཱཎུཀཎྚཀཊྛཱནཾ པབྦཏཝིསམཾ། ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ མནུསྶཱ ཙུཏཱ མནུསྶེསུ པཙྩཱཛཱཡནྟི, ཨཐ ཁོ ཨེཏེཝ སཏྟཱ བཧུཏརཱ ཡེ མནུསྶཱ ཙུཏཱ ནིརཡེ པཙྩཱཛཱཡནྟི…པེ॰… ཏིརཙྪཱནཡོནིཡཱ པཙྩཱཛཱཡནྟི…པེ॰… པེཏྟིཝིསཡེ པཙྩཱཛཱཡནྟི’’།
336-338. ‘‘Seyyathāpi , bhikkhave, appamattakaṃ imasmiṃ jambudīpe ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇirāmaṇeyyakaṃ; atha kho etadeva bahutaraṃ yadidaṃ ukkūlavikūlaṃ nadīviduggaṃ khāṇukaṇṭakaṭṭhānaṃ pabbatavisamaṃ. Evamevaṃ kho, bhikkhave, appakā te sattā ye manussā cutā manussesu paccājāyanti, atha kho eteva sattā bahutarā ye manussā cutā niraye paccājāyanti…pe… tiracchānayoniyā paccājāyanti…pe… pettivisaye paccājāyanti’’.
༣༣༩-༣༤༡. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ མནུསྶཱ ཙུཏཱ དེཝེསུ པཙྩཱཛཱཡནྟི; ཨཐ ཁོ ཨེཏེཝ སཏྟཱ བཧུཏརཱ ཡེ མནུསྶཱ ཙུཏཱ ནིརཡེ པཙྩཱཛཱཡནྟི… ཏིརཙྪཱནཡོནིཡཱ པཙྩཱཛཱཡནྟི… པེཏྟིཝིསཡེ པཙྩཱཛཱཡནྟི།
339-341. … Evamevaṃ kho, bhikkhave, appakā te sattā ye manussā cutā devesu paccājāyanti; atha kho eteva sattā bahutarā ye manussā cutā niraye paccājāyanti… tiracchānayoniyā paccājāyanti… pettivisaye paccājāyanti.
༣༤༢-༣༤༤. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ དེཝཱ ཙུཏཱ དེཝེསུ པཙྩཱཛཱཡནྟི; ཨཐ ཁོ ཨེཏེཝ སཏྟཱ བཧུཏརཱ ཡེ དེཝཱ ཙུཏཱ ནིརཡེ པཙྩཱཛཱཡནྟི… ཏིརཙྪཱནཡོནིཡཱ པཙྩཱཛཱཡནྟི… པེཏྟིཝིསཡེ པཙྩཱཛཱཡནྟི།
342-344. … Evamevaṃ kho, bhikkhave, appakā te sattā ye devā cutā devesu paccājāyanti; atha kho eteva sattā bahutarā ye devā cutā niraye paccājāyanti… tiracchānayoniyā paccājāyanti… pettivisaye paccājāyanti.
༣༤༥-༣༤༧. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ དེཝཱ ཙུཏཱ མནུསྶེསུ པཙྩཱཛཱཡནྟི; ཨཐ ཁོ ཨེཏེཝ སཏྟཱ བཧུཏརཱ ཡེ དེཝཱ ཙུཏཱ ནིརཡེ པཙྩཱཛཱཡནྟི… ཏིརཙྪཱནཡོནིཡཱ པཙྩཱཛཱཡནྟི… པེཏྟིཝིསཡེ པཙྩཱཛཱཡནྟི།
345-347. … Evamevaṃ kho, bhikkhave, appakā te sattā ye devā cutā manussesu paccājāyanti; atha kho eteva sattā bahutarā ye devā cutā niraye paccājāyanti… tiracchānayoniyā paccājāyanti… pettivisaye paccājāyanti.
༣༤༨-༣༥༠. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ ནིརཡཱ ཙུཏཱ མནུསྶེསུ པཙྩཱཛཱཡནྟི; ཨཐ ཁོ ཨེཏེཝ སཏྟཱ བཧུཏརཱ ཡེ ནིརཡཱ ཙུཏཱ ནིརཡེ པཙྩཱཛཱཡནྟི… ཏིརཙྪཱནཡོནིཡཱ པཙྩཱཛཱཡནྟི… པེཏྟིཝིསཡེ པཙྩཱཛཱཡནྟི།
348-350. … Evamevaṃ kho, bhikkhave, appakā te sattā ye nirayā cutā manussesu paccājāyanti; atha kho eteva sattā bahutarā ye nirayā cutā niraye paccājāyanti… tiracchānayoniyā paccājāyanti… pettivisaye paccājāyanti.
༣༥༡-༣༥༣. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ ནིརཡཱ ཙུཏཱ དེཝེསུ པཙྩཱཛཱཡནྟི; ཨཐ ཁོ ཨེཏེཝ སཏྟཱ བཧུཏརཱ ཡེ ནིརཡཱ ཙུཏཱ ནིརཡེ པཙྩཱཛཱཡནྟི… ཏིརཙྪཱནཡོནིཡཱ པཙྩཱཛཱཡནྟི… པེཏྟིཝིསཡེ པཙྩཱཛཱཡནྟི།
351-353. … Evamevaṃ kho, bhikkhave, appakā te sattā ye nirayā cutā devesu paccājāyanti; atha kho eteva sattā bahutarā ye nirayā cutā niraye paccājāyanti… tiracchānayoniyā paccājāyanti… pettivisaye paccājāyanti.
༣༥༤-༣༥༦. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ ཏིརཙྪཱནཡོནིཡཱ ཙུཏཱ མནུསྶེསུ པཙྩཱཛཱཡནྟི; ཨཐ ཁོ ཨེཏེཝ སཏྟཱ བཧུཏརཱ ཡེ ཏིརཙྪཱནཡོནིཡཱ ཙུཏཱ ནིརཡེ པཙྩཱཛཱཡནྟི… ཏིརཙྪཱནཡོནིཡཱ པཙྩཱཛཱཡནྟི… པེཏྟིཝིསཡེ པཙྩཱཛཱཡནྟི།
354-356. … Evamevaṃ kho, bhikkhave, appakā te sattā ye tiracchānayoniyā cutā manussesu paccājāyanti; atha kho eteva sattā bahutarā ye tiracchānayoniyā cutā niraye paccājāyanti… tiracchānayoniyā paccājāyanti… pettivisaye paccājāyanti.
༣༥༧-༣༥༩. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ ཏིརཙྪཱནཡོནིཡཱ ཙུཏཱ དེཝེསུ པཙྩཱཛཱཡནྟི; ཨཐ ཁོ ཨེཏེཝ སཏྟཱ བཧུཏརཱ ཡེ ཏིརཙྪཱནཡོནིཡཱ ཙུཏཱ ནིརཡེ པཙྩཱཛཱཡནྟི… ཏིརཙྪཱནཡོནིཡཱ པཙྩཱཛཱཡནྟི… པེཏྟིཝིསཡེ པཙྩཱཛཱཡནྟི།
357-359. … Evamevaṃ kho, bhikkhave, appakā te sattā ye tiracchānayoniyā cutā devesu paccājāyanti; atha kho eteva sattā bahutarā ye tiracchānayoniyā cutā niraye paccājāyanti… tiracchānayoniyā paccājāyanti… pettivisaye paccājāyanti.
༣༦༠-༣༦༢. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ པེཏྟིཝིསཡཱ ཙུཏཱ མནུསྶེསུ པཙྩཱཛཱཡནྟི; ཨཐ ཁོ ཨེཏེཝ སཏྟཱ བཧུཏརཱ ཡེ པེཏྟིཝིསཡཱ ཙུཏཱ ནིརཡེ པཙྩཱཛཱཡནྟི… ཏིརཙྪཱནཡོནིཡཱ པཙྩཱཛཱཡནྟི… པེཏྟིཝིསཡེ པཙྩཱཛཱཡནྟི།
360-362. … Evamevaṃ kho, bhikkhave, appakā te sattā ye pettivisayā cutā manussesu paccājāyanti; atha kho eteva sattā bahutarā ye pettivisayā cutā niraye paccājāyanti… tiracchānayoniyā paccājāyanti… pettivisaye paccājāyanti.
༣༦༣-༣༦༥. … ཨེཝམེཝཾ ཁོ, བྷིཀྑཝེ, ཨཔྤཀཱ ཏེ སཏྟཱ ཡེ པེཏྟིཝིསཡཱ ཙུཏཱ དེཝེསུ པཙྩཱཛཱཡནྟི ; ཨཐ ཁོ ཨེཏེཝ སཏྟཱ བཧུཏརཱ ཡེ པེཏྟིཝིསཡཱ ཙུཏཱ ནིརཡེ པཙྩཱཛཱཡནྟི… ཏིརཙྪཱནཡོནིཡཱ པཙྩཱཛཱཡནྟི… པེཏྟིཝིསཡེ པཙྩཱཛཱཡནྟི།
363-365. … Evamevaṃ kho, bhikkhave, appakā te sattā ye pettivisayā cutā devesu paccājāyanti ; atha kho eteva sattā bahutarā ye pettivisayā cutā niraye paccājāyanti… tiracchānayoniyā paccājāyanti… pettivisaye paccājāyanti.
ཝགྒོ ཙཏུཏྠོ།
Vaggo catuttho.
ཛམྦུདཱིཔཔེཡྻཱལོ ནིཊྛིཏོ།
Jambudīpapeyyālo niṭṭhito.
ཨེཀདྷམྨཔཱལི༹ སོལ༹སམོ།
Ekadhammapāḷi soḷasamo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡༦. ཨེཀདྷམྨཔཱལི༹ • 16. Ekadhammapāḷi
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡༦. ཨེཀདྷམྨཔཱལི༹ • 16. Ekadhammapāḷi
