| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
൧൬. ഏകധമ്മപാളി
16. Ekadhammapāḷi
൧. പഠമവഗ്ഗോ
1. Paṭhamavaggo
൨൯൬. ‘‘ഏകധമ്മോ , ഭിക്ഖവേ, ഭാവിതോ ബഹുലീകതോ ഏകന്തനിബ്ബിദായ വിരാഗായ നിരോധായ ഉപസമായ അഭിഞ്ഞായ സമ്ബോധായ നിബ്ബാനായ സംവത്തതി. കതമോ ഏകധമ്മോ? ബുദ്ധാനുസ്സതി. അയം ഖോ, ഭിക്ഖവേ, ഏകധമ്മോ ഭാവിതോ ബഹുലീകതോ ഏകന്തനിബ്ബിദായ വിരാഗായ നിരോധായ ഉപസമായ അഭിഞ്ഞായ സമ്ബോധായ നിബ്ബാനായ സംവത്തതീ’’തി.
296. ‘‘Ekadhammo , bhikkhave, bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattati. Katamo ekadhammo? Buddhānussati. Ayaṃ kho, bhikkhave, ekadhammo bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattatī’’ti.
൨൯൭. ‘‘ഏകധമ്മോ, ഭിക്ഖവേ, ഭാവിതോ ബഹുലീകതോ ഏകന്തനിബ്ബിദായ വിരാഗായ നിരോധായ ഉപസമായ അഭിഞ്ഞായ സമ്ബോധായ നിബ്ബാനായ സംവത്തതി. കതമോ ഏകധമ്മോ? ധമ്മാനുസ്സതി…പേ॰… സങ്ഘാനുസ്സതി… സീലാനുസ്സതി… ചാഗാനുസ്സതി… ദേവതാനുസ്സതി… ആനാപാനസ്സതി… മരണസ്സതി… കായഗതാസതി… ഉപസമാനുസ്സതി. അയം ഖോ, ഭിക്ഖവേ, ഏകധമ്മോ ഭാവിതോ ബഹുലീകതോ ഏകന്തനിബ്ബിദായ വിരാഗായ നിരോധായ ഉപസമായ അഭിഞ്ഞായ സമ്ബോധായ നിബ്ബാനായ സംവത്തതീ’’തി.
297. ‘‘Ekadhammo, bhikkhave, bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattati. Katamo ekadhammo? Dhammānussati…pe… saṅghānussati… sīlānussati… cāgānussati… devatānussati… ānāpānassati… maraṇassati… kāyagatāsati… upasamānussati. Ayaṃ kho, bhikkhave, ekadhammo bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattatī’’ti.
വഗ്ഗോ പഠമോ.
Vaggo paṭhamo.
൨. ദുതിയവഗ്ഗോ
2. Dutiyavaggo
൨൯൮. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യേന അനുപ്പന്നാ വാ അകുസലാ ധമ്മാ ഉപ്പജ്ജന്തി ഉപ്പന്നാ വാ അകുസലാ ധമ്മാ ഭിയ്യോഭാവായ വേപുല്ലായ സംവത്തന്തി യഥയിദം, ഭിക്ഖവേ, മിച്ഛാദിട്ഠി. മിച്ഛാദിട്ഠികസ്സ, ഭിക്ഖവേ, അനുപ്പന്നാ ചേവ അകുസലാ ധമ്മാ ഉപ്പജ്ജന്തി ഉപ്പന്നാ ച അകുസലാ ധമ്മാ ഭിയ്യോഭാവായ വേപുല്ലായ സംവത്തന്തീ’’തി.
298. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā uppajjanti uppannā vā akusalā dhammā bhiyyobhāvāya vepullāya saṃvattanti yathayidaṃ, bhikkhave, micchādiṭṭhi. Micchādiṭṭhikassa, bhikkhave, anuppannā ceva akusalā dhammā uppajjanti uppannā ca akusalā dhammā bhiyyobhāvāya vepullāya saṃvattantī’’ti.
൨൯൯. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യേന അനുപ്പന്നാ വാ കുസലാ ധമ്മാ ഉപ്പജ്ജന്തി ഉപ്പന്നാ വാ കുസലാ ധമ്മാ ഭിയ്യോഭാവായ വേപുല്ലായ സംവത്തന്തി യഥയിദം , ഭിക്ഖവേ, സമ്മാദിട്ഠി. സമ്മാദിട്ഠികസ്സ , ഭിക്ഖവേ, അനുപ്പന്നാ ചേവ കുസലാ ധമ്മാ ഉപ്പജ്ജന്തി ഉപ്പന്നാ ച കുസലാ ധമ്മാ ഭിയ്യോഭാവായ വേപുല്ലായ സംവത്തന്തീ’’തി.
299. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā kusalā dhammā uppajjanti uppannā vā kusalā dhammā bhiyyobhāvāya vepullāya saṃvattanti yathayidaṃ , bhikkhave, sammādiṭṭhi. Sammādiṭṭhikassa , bhikkhave, anuppannā ceva kusalā dhammā uppajjanti uppannā ca kusalā dhammā bhiyyobhāvāya vepullāya saṃvattantī’’ti.
൩൦൦. ‘‘നാഹം , ഭിക്ഖവേ, അഞ്ഞം ഏകധമ്മമ്പി സമനുപസ്സാമി യേന അനുപ്പന്നാ വാ കുസലാ ധമ്മാ നുപ്പജ്ജന്തി ഉപ്പന്നാ വാ കുസലാ ധമ്മാ പരിഹായന്തി യഥയിദം , ഭിക്ഖവേ, മിച്ഛാദിട്ഠി. മിച്ഛാദിട്ഠികസ്സ, ഭിക്ഖവേ, അനുപ്പന്നാ ചേവ കുസലാ ധമ്മാ നുപ്പജ്ജന്തി ഉപ്പന്നാ ച കുസലാ ധമ്മാ പരിഹായന്തീ’’തി.
300. ‘‘Nāhaṃ , bhikkhave, aññaṃ ekadhammampi samanupassāmi yena anuppannā vā kusalā dhammā nuppajjanti uppannā vā kusalā dhammā parihāyanti yathayidaṃ , bhikkhave, micchādiṭṭhi. Micchādiṭṭhikassa, bhikkhave, anuppannā ceva kusalā dhammā nuppajjanti uppannā ca kusalā dhammā parihāyantī’’ti.
൩൦൧. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യേന അനുപ്പന്നാ വാ അകുസലാ ധമ്മാ നുപ്പജ്ജന്തി ഉപ്പന്നാ വാ അകുസലാ ധമ്മാ പരിഹായന്തി യഥയിദം, ഭിക്ഖവേ, സമ്മാദിട്ഠി. സമ്മാദിട്ഠികസ്സ, ഭിക്ഖവേ, അനുപ്പന്നാ ചേവ അകുസലാ ധമ്മാ നുപ്പജ്ജന്തി ഉപ്പന്നാ ച അകുസലാ ധമ്മാ പരിഹായന്തീ’’തി.
301. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā akusalā dhammā nuppajjanti uppannā vā akusalā dhammā parihāyanti yathayidaṃ, bhikkhave, sammādiṭṭhi. Sammādiṭṭhikassa, bhikkhave, anuppannā ceva akusalā dhammā nuppajjanti uppannā ca akusalā dhammā parihāyantī’’ti.
൩൦൨. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യേന അനുപ്പന്നാ വാ മിച്ഛാദിട്ഠി ഉപ്പജ്ജതി ഉപ്പന്നാ വാ മിച്ഛാദിട്ഠി പവഡ്ഢതി യഥയിദം, ഭിക്ഖവേ, അയോനിസോമനസികാരോ. അയോനിസോ, ഭിക്ഖവേ, മനസി കരോതോ അനുപ്പന്നാ ചേവ മിച്ഛാദിട്ഠി ഉപ്പജ്ജതി ഉപ്പന്നാ ച മിച്ഛാദിട്ഠി പവഡ്ഢതീ’’തി.
302. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā micchādiṭṭhi uppajjati uppannā vā micchādiṭṭhi pavaḍḍhati yathayidaṃ, bhikkhave, ayonisomanasikāro. Ayoniso, bhikkhave, manasi karoto anuppannā ceva micchādiṭṭhi uppajjati uppannā ca micchādiṭṭhi pavaḍḍhatī’’ti.
൩൦൩. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യേന അനുപ്പന്നാ വാ സമ്മാദിട്ഠി ഉപ്പജ്ജതി ഉപ്പന്നാ വാ സമ്മാദിട്ഠി പവഡ്ഢതി യഥയിദം, ഭിക്ഖവേ, യോനിസോമനസികാരോ. യോനിസോ, ഭിക്ഖവേ, മനസി കരോതോ അനുപ്പന്നാ ചേവ സമ്മാദിട്ഠി ഉപ്പജ്ജതി ഉപ്പന്നാ ച സമ്മാദിട്ഠി പവഡ്ഢതീ’’തി.
303. ‘‘Nāhaṃ, bhikkhave, aññaṃ ekadhammampi samanupassāmi yena anuppannā vā sammādiṭṭhi uppajjati uppannā vā sammādiṭṭhi pavaḍḍhati yathayidaṃ, bhikkhave, yonisomanasikāro. Yoniso, bhikkhave, manasi karoto anuppannā ceva sammādiṭṭhi uppajjati uppannā ca sammādiṭṭhi pavaḍḍhatī’’ti.
൩൦൪. ‘‘നാഹം , ഭിക്ഖവേ, അഞ്ഞം ഏകധമ്മമ്പി സമനുപസ്സാമി യേന 1 സത്താ കായസ്സ ഭേദാ പരം മരണാ അപായം ദുഗ്ഗതിം വിനിപാതം നിരയം ഉപപജ്ജന്തി യഥയിദം, ഭിക്ഖവേ, മിച്ഛാദിട്ഠി. മിച്ഛാദിട്ഠിയാ, ഭിക്ഖവേ, സമന്നാഗതാ സത്താ കായസ്സ ഭേദാ പരം മരണാ അപായം ദുഗ്ഗതിം വിനിപാതം നിരയം ഉപപജ്ജന്തീ’’തി.
304. ‘‘Nāhaṃ , bhikkhave, aññaṃ ekadhammampi samanupassāmi yena 2 sattā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjanti yathayidaṃ, bhikkhave, micchādiṭṭhi. Micchādiṭṭhiyā, bhikkhave, samannāgatā sattā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjantī’’ti.
൩൦൫. ‘‘നാഹം , ഭിക്ഖവേ, അഞ്ഞം ഏകധമ്മമ്പി സമനുപസ്സാമി യേന സത്താ കായസ്സ ഭേദാ പരം മരണാ സുഗതിം സഗ്ഗം ലോകം ഉപപജ്ജന്തി യഥയിദം, ഭിക്ഖവേ, സമ്മാദിട്ഠി. സമ്മാദിട്ഠിയാ, ഭിക്ഖവേ, സമന്നാഗതാ സത്താ കായസ്സ ഭേദാ പരം മരണാ സുഗതിം സഗ്ഗം ലോകം ഉപപജ്ജന്തീ’’തി.
305. ‘‘Nāhaṃ , bhikkhave, aññaṃ ekadhammampi samanupassāmi yena sattā kāyassa bhedā paraṃ maraṇā sugatiṃ saggaṃ lokaṃ upapajjanti yathayidaṃ, bhikkhave, sammādiṭṭhi. Sammādiṭṭhiyā, bhikkhave, samannāgatā sattā kāyassa bhedā paraṃ maraṇā sugatiṃ saggaṃ lokaṃ upapajjantī’’ti.
൩൦൬. ‘‘മിച്ഛാദിട്ഠികസ്സ, ഭിക്ഖവേ, പുരിസപുഗ്ഗലസ്സ യഞ്ചേവ കായകമ്മം യഥാദിട്ഠി സമത്തം സമാദിന്നം യഞ്ച വചീകമ്മം…പേ॰… യഞ്ച മനോകമ്മം യഥാദിട്ഠി സമത്തം സമാദിന്നം യാ ച ചേതനാ യാ ച പത്ഥനാ യോ ച പണിധി യേ ച സങ്ഖാരാ സബ്ബേ തേ ധമ്മാ അനിട്ഠായ അകന്തായ അമനാപായ അഹിതായ ദുക്ഖായ സംവത്തന്തി. തം കിസ്സ ഹേതു? ദിട്ഠി ഹിസ്സ 3, ഭിക്ഖവേ, പാപികാ. സേയ്യഥാപി, ഭിക്ഖവേ , നിമ്ബബീജം വാ കോസാതകിബീജം വാ തിത്തകലാബുബീജം വാ അല്ലായ പഥവിയാ 4 നിക്ഖിത്തം യഞ്ചേവ പഥവിരസം ഉപാദിയതി യഞ്ച ആപോരസം ഉപാദിയതി സബ്ബം തം തിത്തകത്തായ കടുകത്തായ അസാതത്തായ സംവത്തതി. തം കിസ്സ ഹേതു? ബീജം ഹിസ്സ 5, ഭിക്ഖവേ, പാപകം. ഏവമേവം ഖോ, ഭിക്ഖവേ, മിച്ഛാദിട്ഠികസ്സ പുരിസപുഗ്ഗലസ്സ യഞ്ചേവ കായകമ്മം യഥാദിട്ഠി സമത്തം സമാദിന്നം യഞ്ച വചീകമ്മം…പേ॰… യഞ്ച മനോകമ്മം യഥാദിട്ഠി സമത്തം സമാദിന്നം യാ ച ചേതനാ യാ ച പത്ഥനാ യോ ച പണിധി യേ ച സങ്ഖാരാ സബ്ബേ തേ ധമ്മാ അനിട്ഠായ അകന്തായ അമനാപായ അഹിതായ ദുക്ഖായ സംവത്തന്തി. തം കിസ്സ ഹേതു? ദിട്ഠി ഹിസ്സ, ഭിക്ഖവേ, പാപികാ’’തി.
306. ‘‘Micchādiṭṭhikassa, bhikkhave, purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa 6, bhikkhave, pāpikā. Seyyathāpi, bhikkhave , nimbabījaṃ vā kosātakibījaṃ vā tittakalābubījaṃ vā allāya pathaviyā 7 nikkhittaṃ yañceva pathavirasaṃ upādiyati yañca āporasaṃ upādiyati sabbaṃ taṃ tittakattāya kaṭukattāya asātattāya saṃvattati. Taṃ kissa hetu? Bījaṃ hissa 8, bhikkhave, pāpakaṃ. Evamevaṃ kho, bhikkhave, micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa, bhikkhave, pāpikā’’ti.
൩൦൭. ‘‘സമ്മാദിട്ഠികസ്സ, ഭിക്ഖവേ, പുരിസപുഗ്ഗലസ്സ യഞ്ചേവ കായകമ്മം യഥാദിട്ഠി സമത്തം സമാദിന്നം യഞ്ച വചീകമ്മം…പേ॰… യഞ്ച മനോകമ്മം യഥാദിട്ഠി സമത്തം സമാദിന്നം യാ ച ചേതനാ യാ ച പത്ഥനാ യോ ച പണിധി യേ ച സങ്ഖാരാ സബ്ബേ തേ ധമ്മാ ഇട്ഠായ കന്തായ മനാപായ ഹിതായ സുഖായ സംവത്തന്തി. തം കിസ്സ ഹേതു? ദിട്ഠി ഹിസ്സ, ഭിക്ഖവേ, ഭദ്ദികാ. സേയ്യഥാപി, ഭിക്ഖവേ, ഉച്ഛുബീജം വാ സാലിബീജം വാ മുദ്ദികാബീജം വാ അല്ലായ പഥവിയാ നിക്ഖിത്തം യഞ്ചേവ പഥവിരസം ഉപാദിയതി യഞ്ച ആപോരസം ഉപാദിയതി സബ്ബം തം മധുരത്തായ സാതത്തായ അസേചനകത്തായ സംവത്തതി. തം കിസ്സ ഹേതു? ബീജം ഹിസ്സ, ഭിക്ഖവേ, ഭദ്ദകം. ഏവമേവം ഖോ, ഭിക്ഖവേ, സമ്മാദിട്ഠികസ്സ പുരിസപുഗ്ഗലസ്സ യഞ്ചേവ കായകമ്മം യഥാദിട്ഠി സമത്തം സമാദിന്നം യഞ്ച വചീകമ്മം…പേ॰… യഞ്ച മനോകമ്മം യഥാദിട്ഠി സമത്തം സമാദിന്നം യാ ച ചേതനാ യാ ച പത്ഥനാ യോ ച പണിധി യേ ച സങ്ഖാരാ സബ്ബേ തേ ധമ്മാ ഇട്ഠായ കന്തായ മനാപായ ഹിതായ സുഖായ സംവത്തന്തി. തം കിസ്സ ഹേതു? ദിട്ഠി ഹിസ്സ, ഭിക്ഖവേ, ഭദ്ദികാ’’തി.
307. ‘‘Sammādiṭṭhikassa, bhikkhave, purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā. Seyyathāpi, bhikkhave, ucchubījaṃ vā sālibījaṃ vā muddikābījaṃ vā allāya pathaviyā nikkhittaṃ yañceva pathavirasaṃ upādiyati yañca āporasaṃ upādiyati sabbaṃ taṃ madhurattāya sātattāya asecanakattāya saṃvattati. Taṃ kissa hetu? Bījaṃ hissa, bhikkhave, bhaddakaṃ. Evamevaṃ kho, bhikkhave, sammādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā’’ti.
വഗ്ഗോ ദുതിയോ.
Vaggo dutiyo.
൩. തതിയവഗ്ഗോ
3. Tatiyavaggo
൩൦൮. ‘‘ഏകപുഗ്ഗലോ , ഭിക്ഖവേ, ലോകേ ഉപ്പജ്ജമാനോ ഉപ്പജ്ജതി ബഹുജനഅഹിതായ ബഹുജനഅസുഖായ, ബഹുനോ ജനസ്സ അനത്ഥായ അഹിതായ ദുക്ഖായ ദേവമനുസ്സാനം. കതമോ ഏകപുഗ്ഗലോ? മിച്ഛാദിട്ഠികോ ഹോതി വിപരീതദസ്സനോ. സോ ബഹുജനം സദ്ധമ്മാ വുട്ഠാപേത്വാ അസദ്ധമ്മേ പതിട്ഠാപേതി. അയം ഖോ, ഭിക്ഖവേ, ഏകപുഗ്ഗലോ ലോകേ ഉപ്പജ്ജമാനോ ഉപ്പജ്ജതി ബഹുജനഅഹിതായ ബഹുജനഅസുഖായ, ബഹുനോ ജനസ്സ അനത്ഥായ അഹിതായ ദുക്ഖായ ദേവമനുസ്സാന’’ന്തി.
308. ‘‘Ekapuggalo , bhikkhave, loke uppajjamāno uppajjati bahujanaahitāya bahujanaasukhāya, bahuno janassa anatthāya ahitāya dukkhāya devamanussānaṃ. Katamo ekapuggalo? Micchādiṭṭhiko hoti viparītadassano. So bahujanaṃ saddhammā vuṭṭhāpetvā asaddhamme patiṭṭhāpeti. Ayaṃ kho, bhikkhave, ekapuggalo loke uppajjamāno uppajjati bahujanaahitāya bahujanaasukhāya, bahuno janassa anatthāya ahitāya dukkhāya devamanussāna’’nti.
൩൦൯. ‘‘ഏകപുഗ്ഗലോ, ഭിക്ഖവേ, ലോകേ ഉപ്പജ്ജമാനോ ഉപ്പജ്ജതി ബഹുജനഹിതായ ബഹുജനസുഖായ, ബഹുനോ ജനസ്സ അത്ഥായ ഹിതായ സുഖായ ദേവമനുസ്സാനം. കതമോ ഏകപുഗ്ഗലോ? സമ്മാദിട്ഠികോ ഹോതി അവിപരീതദസ്സനോ. സോ ബഹുജനം അസദ്ധമ്മാ വുട്ഠാപേത്വാ സദ്ധമ്മേ പതിട്ഠാപേതി. അയം ഖോ, ഭിക്ഖവേ, ഏകപുഗ്ഗലോ ലോകേ ഉപപജ്ജമാനോ ഉപ്പജ്ജതി ബഹുജനഹിതായ ബഹുജനസുഖായ, ബഹുനോ ജനസ്സ അത്ഥായ ഹിതായ സുഖായ ദേവമനുസ്സാന’’ന്തി.
309. ‘‘Ekapuggalo, bhikkhave, loke uppajjamāno uppajjati bahujanahitāya bahujanasukhāya, bahuno janassa atthāya hitāya sukhāya devamanussānaṃ. Katamo ekapuggalo? Sammādiṭṭhiko hoti aviparītadassano. So bahujanaṃ asaddhammā vuṭṭhāpetvā saddhamme patiṭṭhāpeti. Ayaṃ kho, bhikkhave, ekapuggalo loke upapajjamāno uppajjati bahujanahitāya bahujanasukhāya, bahuno janassa atthāya hitāya sukhāya devamanussāna’’nti.
൩൧൦. ‘‘നാഹം, ഭിക്ഖവേ, അഞ്ഞം ഏകധമ്മമ്പി സമനുപസ്സാമി യം ഏവം മഹാസാവജ്ജം യഥയിദം, ഭിക്ഖവേ, മിച്ഛാദിട്ഠി. മിച്ഛാദിട്ഠിപരമാനി, ഭിക്ഖവേ, മഹാസാവജ്ജാനീ’’തി 9.
310. ‘‘Nāhaṃ, bhikkhave, aññaṃ ekadhammampi samanupassāmi yaṃ evaṃ mahāsāvajjaṃ yathayidaṃ, bhikkhave, micchādiṭṭhi. Micchādiṭṭhiparamāni, bhikkhave, mahāsāvajjānī’’ti 10.
൩൧൧. ‘‘നാഹം, ഭിക്ഖവേ, അഞ്ഞം ഏകപുഗ്ഗലമ്പി സമനുപസ്സാമി യോ ഏവം ബഹുജനഅഹിതായ പടിപന്നോ ബഹുജനഅസുഖായ, ബഹുനോ ജനസ്സ അനത്ഥായ അഹിതായ ദുക്ഖായ ദേവമനുസ്സാനം യഥയിദം, ഭിക്ഖവേ, മക്ഖലി മോഘപുരിസോ. സേയ്യഥാപി, ഭിക്ഖവേ, നദീമുഖേ ഖിപ്പം 11 ഉഡ്ഡേയ്യ 12 ബഹൂനം മച്ഛാനം അഹിതായ ദുക്ഖായ അനയായ ബ്യസനായ; ഏവമേവം ഖോ, ഭിക്ഖവേ , മക്ഖലി മോഘപുരിസോ മനുസ്സഖിപ്പം മഞ്ഞേ ലോകേ ഉപ്പന്നോ ബഹൂനം സത്താനം അഹിതായ ദുക്ഖായ അനയായ ബ്യസനായാ’’തി.
311. ‘‘Nāhaṃ, bhikkhave, aññaṃ ekapuggalampi samanupassāmi yo evaṃ bahujanaahitāya paṭipanno bahujanaasukhāya, bahuno janassa anatthāya ahitāya dukkhāya devamanussānaṃ yathayidaṃ, bhikkhave, makkhali moghapuriso. Seyyathāpi, bhikkhave, nadīmukhe khippaṃ 13 uḍḍeyya 14 bahūnaṃ macchānaṃ ahitāya dukkhāya anayāya byasanāya; evamevaṃ kho, bhikkhave , makkhali moghapuriso manussakhippaṃ maññe loke uppanno bahūnaṃ sattānaṃ ahitāya dukkhāya anayāya byasanāyā’’ti.
൩൧൨. ‘‘ദുരക്ഖാതേ , ഭിക്ഖവേ, ധമ്മവിനയേ യോ ച സമാദപേതി 15 യഞ്ച സമാദപേതി യോ ച സമാദപിതോ തഥത്തായ പടിപജ്ജതി സബ്ബേ തേ ബഹും അപുഞ്ഞം പസവന്തി. തം കിസ്സ ഹേതു? ദുരക്ഖാതത്താ, ഭിക്ഖവേ, ധമ്മസ്സാ’’തി.
312. ‘‘Durakkhāte , bhikkhave, dhammavinaye yo ca samādapeti 16 yañca samādapeti yo ca samādapito tathattāya paṭipajjati sabbe te bahuṃ apuññaṃ pasavanti. Taṃ kissa hetu? Durakkhātattā, bhikkhave, dhammassā’’ti.
൩൧൩. ‘‘സ്വാക്ഖാതേ , ഭിക്ഖവേ, ധമ്മവിനയേ യോ ച സമാദപേതി യഞ്ച സമാദപേതി യോ ച സമാദപിതോ തഥത്തായ പടിപജ്ജതി സബ്ബേ തേ ബഹും പുഞ്ഞം പസവന്തി. തം കിസ്സ ഹേതു? സ്വാക്ഖാതത്താ, ഭിക്ഖവേ, ധമ്മസ്സാ’’തി.
313. ‘‘Svākkhāte , bhikkhave, dhammavinaye yo ca samādapeti yañca samādapeti yo ca samādapito tathattāya paṭipajjati sabbe te bahuṃ puññaṃ pasavanti. Taṃ kissa hetu? Svākkhātattā, bhikkhave, dhammassā’’ti.
൩൧൪. ‘‘ദുരക്ഖാതേ, ഭിക്ഖവേ, ധമ്മവിനയേ ദായകേന മത്താ ജാനിതബ്ബാ, നോ പടിഗ്ഗാഹകേന. തം കിസ്സ ഹേതു? ദുരക്ഖാതത്താ, ഭിക്ഖവേ, ധമ്മസ്സാ’’തി.
314. ‘‘Durakkhāte, bhikkhave, dhammavinaye dāyakena mattā jānitabbā, no paṭiggāhakena. Taṃ kissa hetu? Durakkhātattā, bhikkhave, dhammassā’’ti.
൩൧൫. ‘‘സ്വാക്ഖാതേ, ഭിക്ഖവേ, ധമ്മവിനയേ പടിഗ്ഗാഹകേന മത്താ ജാനിതബ്ബാ, നോ ദായകേന. തം കിസ്സ ഹേതു? സ്വാക്ഖാതത്താ, ഭിക്ഖവേ, ധമ്മസ്സാ’’തി.
315. ‘‘Svākkhāte, bhikkhave, dhammavinaye paṭiggāhakena mattā jānitabbā, no dāyakena. Taṃ kissa hetu? Svākkhātattā, bhikkhave, dhammassā’’ti.
൩൧൬. ‘‘ദുരക്ഖാതേ, ഭിക്ഖവേ, ധമ്മവിനയേ യോ ആരദ്ധവീരിയോ സോ ദുക്ഖം വിഹരതി. തം കിസ്സ ഹേതു? ദുരക്ഖാതത്താ, ഭിക്ഖവേ, ധമ്മസ്സാ’’തി.
316. ‘‘Durakkhāte, bhikkhave, dhammavinaye yo āraddhavīriyo so dukkhaṃ viharati. Taṃ kissa hetu? Durakkhātattā, bhikkhave, dhammassā’’ti.
൩൧൭. ‘‘സ്വാക്ഖാതേ, ഭിക്ഖവേ, ധമ്മവിനയേ യോ കുസീതോ സോ ദുക്ഖം വിഹരതി. തം കിസ്സ ഹേതു? സ്വാക്ഖാതത്താ, ഭിക്ഖവേ, ധമ്മസ്സാ’’തി.
317. ‘‘Svākkhāte, bhikkhave, dhammavinaye yo kusīto so dukkhaṃ viharati. Taṃ kissa hetu? Svākkhātattā, bhikkhave, dhammassā’’ti.
൩൧൮. ‘‘ദുരക്ഖാതേ, ഭിക്ഖവേ, ധമ്മവിനയേ യോ കുസീതോ സോ സുഖം വിഹരതി . തം കിസ്സ ഹേതു? ദുരക്ഖാതത്താ, ഭിക്ഖവേ, ധമ്മസ്സാ’’തി.
318. ‘‘Durakkhāte, bhikkhave, dhammavinaye yo kusīto so sukhaṃ viharati . Taṃ kissa hetu? Durakkhātattā, bhikkhave, dhammassā’’ti.
൩൧൯. ‘‘സ്വാക്ഖാതേ, ഭിക്ഖവേ, ധമ്മവിനയേ യോ ആരദ്ധവീരിയോ സോ സുഖം വിഹരതി. തം കിസ്സ ഹേതു? സ്വാക്ഖാതത്താ, ഭിക്ഖവേ, ധമ്മസ്സാ’’തി.
319. ‘‘Svākkhāte, bhikkhave, dhammavinaye yo āraddhavīriyo so sukhaṃ viharati. Taṃ kissa hetu? Svākkhātattā, bhikkhave, dhammassā’’ti.
൩൨൦. ‘‘സേയ്യഥാപി , ഭിക്ഖവേ, അപ്പമത്തകോപി ഗൂഥോ ദുഗ്ഗന്ധോ ഹോതി; ഏവമേവം ഖോ അഹം, ഭിക്ഖവേ, അപ്പമത്തകമ്പി ഭവം ന വണ്ണേമി, അന്തമസോ അച്ഛരാസങ്ഘാതമത്തമ്പി’’.
320. ‘‘Seyyathāpi , bhikkhave, appamattakopi gūtho duggandho hoti; evamevaṃ kho ahaṃ, bhikkhave, appamattakampi bhavaṃ na vaṇṇemi, antamaso accharāsaṅghātamattampi’’.
൩൨൧. ‘‘സേയ്യഥാപി, ഭിക്ഖവേ, അപ്പമത്തകമ്പി മുത്തം ദുഗ്ഗന്ധം ഹോതി… അപ്പമത്തകോപി ഖേളോ ദുഗ്ഗന്ധോ ഹോതി… അപ്പമത്തകോപി പുബ്ബോ ദുഗ്ഗന്ധോ ഹോതി… അപ്പമത്തകമ്പി ലോഹിതം ദുഗ്ഗന്ധം ഹോതി; ഏവമേവം ഖോ അഹം, ഭിക്ഖവേ, അപ്പമത്തകമ്പി ഭവം ന വണ്ണേമി, അന്തമസോ അച്ഛരാസങ്ഘാതമത്തമ്പി’’.
321. ‘‘Seyyathāpi, bhikkhave, appamattakampi muttaṃ duggandhaṃ hoti… appamattakopi kheḷo duggandho hoti… appamattakopi pubbo duggandho hoti… appamattakampi lohitaṃ duggandhaṃ hoti; evamevaṃ kho ahaṃ, bhikkhave, appamattakampi bhavaṃ na vaṇṇemi, antamaso accharāsaṅghātamattampi’’.
വഗ്ഗോ തതിയോ.
Vaggo tatiyo.
൪. ചതുത്ഥവഗ്ഗോ
4. Catutthavaggo
൩൨൨. ‘‘സേയ്യഥാപി , ഭിക്ഖവേ, അപ്പമത്തകം ഇമസ്മിം ജമ്ബുദീപേ ആരാമരാമണേയ്യകം വനരാമണേയ്യകം ഭൂമിരാമണേയ്യകം പോക്ഖരണിരാമണേയ്യകം; അഥ ഖോ ഏതദേവ ബഹുതരം യദിദം ഉക്കൂലവികൂലം നദീവിദുഗ്ഗം ഖാണുകണ്ടകട്ഠാനം 17 പബ്ബതവിസമം; ഏവമേവം ഖോ, ഭിക്ഖവേ, അപ്പകാ തേ സത്താ യേ ഥലജാ, അഥ ഖോ ഏതേവ സത്താ ബഹുതരാ യേ ഓദകാ’’.
322. ‘‘Seyyathāpi , bhikkhave, appamattakaṃ imasmiṃ jambudīpe ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇirāmaṇeyyakaṃ; atha kho etadeva bahutaraṃ yadidaṃ ukkūlavikūlaṃ nadīviduggaṃ khāṇukaṇṭakaṭṭhānaṃ 18 pabbatavisamaṃ; evamevaṃ kho, bhikkhave, appakā te sattā ye thalajā, atha kho eteva sattā bahutarā ye odakā’’.
൩൨൩. … ഏവമേവം ഖോ, ഭിക്ഖവേ, അപ്പകാ തേ സത്താ യേ മനുസ്സേസു പച്ചാജായന്തി; അഥ ഖോ ഏതേവ സത്താ ബഹുതരാ യേ അഞ്ഞത്ര മനുസ്സേഹി പച്ചാജായന്തി.
323. … Evamevaṃ kho, bhikkhave, appakā te sattā ye manussesu paccājāyanti; atha kho eteva sattā bahutarā ye aññatra manussehi paccājāyanti.
… ഏവമേവം ഖോ, ഭിക്ഖവേ, അപ്പകാ തേ സത്താ യേ മജ്ഝിമേസു ജനപദേസു പച്ചാജായന്തി; അഥ ഖോ ഏതേവ സത്താ ബഹുതരാ യേ പച്ചന്തിമേസു ജനപദേസു പച്ചാജായന്തി അവിഞ്ഞാതാരേസു മിലക്ഖേസു 19.
… Evamevaṃ kho, bhikkhave, appakā te sattā ye majjhimesu janapadesu paccājāyanti; atha kho eteva sattā bahutarā ye paccantimesu janapadesu paccājāyanti aviññātāresu milakkhesu 20.
൩൨൪. … ഏവമേവം ഖോ, ഭിക്ഖവേ, അപ്പകാ തേ സത്താ യേ പഞ്ഞവന്തോ അജളാ അനേളമൂഗാ പടിബലാ സുഭാസിതദുബ്ഭാസിതസ്സ അത്ഥമഞ്ഞാതും; അഥ ഖോ ഏതേവ സത്താ ബഹുതരാ യേ ദുപ്പഞ്ഞാ ജളാ ഏളമൂഗാ ന പടിബലാ സുഭാസിതദുബ്ഭാസിതസ്സ അത്ഥമഞ്ഞാതും.
324. … Evamevaṃ kho, bhikkhave, appakā te sattā ye paññavanto ajaḷā aneḷamūgā paṭibalā subhāsitadubbhāsitassa atthamaññātuṃ; atha kho eteva sattā bahutarā ye duppaññā jaḷā eḷamūgā na paṭibalā subhāsitadubbhāsitassa atthamaññātuṃ.
൩൨൫. … ഏവമേവം ഖോ, ഭിക്ഖവേ, അപ്പകാ തേ സത്താ യേ അരിയേന പഞ്ഞാചക്ഖുനാ സമന്നാഗതാ; അഥ ഖോ ഏതേവ സത്താ ബഹുതരാ യേ അവിജ്ജാഗതാ സമ്മൂള്ഹാ.
325. … Evamevaṃ kho, bhikkhave, appakā te sattā ye ariyena paññācakkhunā samannāgatā; atha kho eteva sattā bahutarā ye avijjāgatā sammūḷhā.
൩൨൬. … ഏവമേവം ഖോ, ഭിക്ഖവേ, അപ്പകാ തേ സത്താ യേ ലഭന്തി തഥാഗതം ദസ്സനായ; അഥ ഖോ ഏതേവ സത്താ ബഹുതരാ യേ ന ലഭന്തി തഥാഗതം ദസ്സനായ.
326. … Evamevaṃ kho, bhikkhave, appakā te sattā ye labhanti tathāgataṃ dassanāya; atha kho eteva sattā bahutarā ye na labhanti tathāgataṃ dassanāya.
൩൨൭. … ഏവമേവം ഖോ, ഭിക്ഖവേ, അപ്പകാ തേ സത്താ യേ ലഭന്തി തഥാഗതപ്പവേദിതം ധമ്മവിനയം സവനായ; അഥ ഖോ ഏതേവ സത്താ ബഹുതരാ യേ ന ലഭന്തി തഥാഗതപ്പവേദിതം ധമ്മവിനയം സവനായ.
327. … Evamevaṃ kho, bhikkhave, appakā te sattā ye labhanti tathāgatappaveditaṃ dhammavinayaṃ savanāya; atha kho eteva sattā bahutarā ye na labhanti tathāgatappaveditaṃ dhammavinayaṃ savanāya.
൩൨൮. … ഏവമേവം ഖോ, ഭിക്ഖവേ, അപ്പകാ തേ സത്താ യേ സുത്വാ ധമ്മം ധാരേന്തി; അഥ ഖോ ഏതേവ സത്താ ബഹുതരാ യേ സുത്വാ ധമ്മം ന ധാരേന്തി.
328. … Evamevaṃ kho, bhikkhave, appakā te sattā ye sutvā dhammaṃ dhārenti; atha kho eteva sattā bahutarā ye sutvā dhammaṃ na dhārenti.
൩൨൯. … ഏവമേവം ഖോ, ഭിക്ഖവേ, അപ്പകാ തേ സത്താ യേ ധാതാനം 21 ധമ്മാനം അത്ഥം ഉപപരിക്ഖന്തി; അഥ ഖോ ഏതേവ സത്താ ബഹുതരാ യേ ധാതാനം ധമ്മാനം അത്ഥം ന ഉപപരിക്ഖന്തി.
329. … Evamevaṃ kho, bhikkhave, appakā te sattā ye dhātānaṃ 22 dhammānaṃ atthaṃ upaparikkhanti; atha kho eteva sattā bahutarā ye dhātānaṃ dhammānaṃ atthaṃ na upaparikkhanti.
൩൩൦. … ഏവമേവം ഖോ, ഭിക്ഖവേ, അപ്പകാ തേ സത്താ യേ അത്ഥമഞ്ഞായ ധമ്മമഞ്ഞായ ധമ്മാനുധമ്മം പടിപജ്ജന്തി; അഥ ഖോ ഏതേവ സത്താ ബഹുതരാ യേ അത്ഥമഞ്ഞായ ധമ്മമഞ്ഞായ ധമ്മാനുധമ്മം ന പടിപജ്ജന്തി.
330. … Evamevaṃ kho, bhikkhave, appakā te sattā ye atthamaññāya dhammamaññāya dhammānudhammaṃ paṭipajjanti; atha kho eteva sattā bahutarā ye atthamaññāya dhammamaññāya dhammānudhammaṃ na paṭipajjanti.
൩൩൧. … ഏവമേവം ഖോ, ഭിക്ഖവേ, അപ്പകാ തേ സത്താ യേ സംവേജനിയേസു ഠാനേസു സംവിജ്ജന്തി; അഥ ഖോ ഏതേവ സത്താ ബഹുതരാ യേ സംവേജനിയേസു ഠാനേസു ന സംവിജ്ജന്തി.
331. … Evamevaṃ kho, bhikkhave, appakā te sattā ye saṃvejaniyesu ṭhānesu saṃvijjanti; atha kho eteva sattā bahutarā ye saṃvejaniyesu ṭhānesu na saṃvijjanti.
൩൩൨. … ഏവമേവം ഖോ, ഭിക്ഖവേ, അപ്പകാ തേ സത്താ യേ സംവിഗ്ഗാ യോനിസോ പദഹന്തി; അഥ ഖോ ഏതേവ സത്താ ബഹുതരാ യേ സംവിഗ്ഗാ യോനിസോ ന പദഹന്തി.
332. … Evamevaṃ kho, bhikkhave, appakā te sattā ye saṃviggā yoniso padahanti; atha kho eteva sattā bahutarā ye saṃviggā yoniso na padahanti.
൩൩൪. … ഏവമേവം ഖോ, ഭിക്ഖവേ, അപ്പകാ തേ സത്താ യേ അന്നഗ്ഗരസഗ്ഗാനം ലാഭിനോ; അഥ ഖോ ഏതേവ സത്താ ബഹുതരാ യേ അന്നഗ്ഗരസഗ്ഗാനം ന ലാഭിനോ, ഉഞ്ഛേന കപാലാഭതേന യാപേന്തി.
334. … Evamevaṃ kho, bhikkhave, appakā te sattā ye annaggarasaggānaṃ lābhino; atha kho eteva sattā bahutarā ye annaggarasaggānaṃ na lābhino, uñchena kapālābhatena yāpenti.
൩൩൫. … ഏവമേവം ഖോ, ഭിക്ഖവേ, അപ്പകാ തേ സത്താ യേ അത്ഥരസസ്സ ധമ്മരസസ്സ വിമുത്തിരസസ്സ ലാഭിനോ; അഥ ഖോ ഏതേവ സത്താ ബഹുതരാ യേ അത്ഥരസസ്സ ധമ്മരസസ്സ വിമുത്തിരസസ്സ ന ലാഭിനോ. തസ്മാതിഹ, ഭിക്ഖവേ , ഏവം സിക്ഖിതബ്ബം – അത്ഥരസസ്സ ധമ്മരസസ്സ വിമുത്തിരസസ്സ ലാഭിനോ ഭവിസ്സാമാതി. ഏവഞ്ഹി വോ, ഭിക്ഖവേ, സിക്ഖിതബ്ബന്തി.
335. … Evamevaṃ kho, bhikkhave, appakā te sattā ye attharasassa dhammarasassa vimuttirasassa lābhino; atha kho eteva sattā bahutarā ye attharasassa dhammarasassa vimuttirasassa na lābhino. Tasmātiha, bhikkhave , evaṃ sikkhitabbaṃ – attharasassa dhammarasassa vimuttirasassa lābhino bhavissāmāti. Evañhi vo, bhikkhave, sikkhitabbanti.
൩൩൬-൩൩൮. ‘‘സേയ്യഥാപി , ഭിക്ഖവേ, അപ്പമത്തകം ഇമസ്മിം ജമ്ബുദീപേ ആരാമരാമണേയ്യകം വനരാമണേയ്യകം ഭൂമിരാമണേയ്യകം പോക്ഖരണിരാമണേയ്യകം; അഥ ഖോ ഏതദേവ ബഹുതരം യദിദം ഉക്കൂലവികൂലം നദീവിദുഗ്ഗം ഖാണുകണ്ടകട്ഠാനം പബ്ബതവിസമം. ഏവമേവം ഖോ, ഭിക്ഖവേ, അപ്പകാ തേ സത്താ യേ മനുസ്സാ ചുതാ മനുസ്സേസു പച്ചാജായന്തി, അഥ ഖോ ഏതേവ സത്താ ബഹുതരാ യേ മനുസ്സാ ചുതാ നിരയേ പച്ചാജായന്തി…പേ॰… തിരച്ഛാനയോനിയാ പച്ചാജായന്തി…പേ॰… പേത്തിവിസയേ പച്ചാജായന്തി’’.
336-338. ‘‘Seyyathāpi , bhikkhave, appamattakaṃ imasmiṃ jambudīpe ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇirāmaṇeyyakaṃ; atha kho etadeva bahutaraṃ yadidaṃ ukkūlavikūlaṃ nadīviduggaṃ khāṇukaṇṭakaṭṭhānaṃ pabbatavisamaṃ. Evamevaṃ kho, bhikkhave, appakā te sattā ye manussā cutā manussesu paccājāyanti, atha kho eteva sattā bahutarā ye manussā cutā niraye paccājāyanti…pe… tiracchānayoniyā paccājāyanti…pe… pettivisaye paccājāyanti’’.
൩൩൯-൩൪൧. … ഏവമേവം ഖോ, ഭിക്ഖവേ, അപ്പകാ തേ സത്താ യേ മനുസ്സാ ചുതാ ദേവേസു പച്ചാജായന്തി; അഥ ഖോ ഏതേവ സത്താ ബഹുതരാ യേ മനുസ്സാ ചുതാ നിരയേ പച്ചാജായന്തി… തിരച്ഛാനയോനിയാ പച്ചാജായന്തി… പേത്തിവിസയേ പച്ചാജായന്തി.
339-341. … Evamevaṃ kho, bhikkhave, appakā te sattā ye manussā cutā devesu paccājāyanti; atha kho eteva sattā bahutarā ye manussā cutā niraye paccājāyanti… tiracchānayoniyā paccājāyanti… pettivisaye paccājāyanti.
൩൪൨-൩൪൪. … ഏവമേവം ഖോ, ഭിക്ഖവേ, അപ്പകാ തേ സത്താ യേ ദേവാ ചുതാ ദേവേസു പച്ചാജായന്തി; അഥ ഖോ ഏതേവ സത്താ ബഹുതരാ യേ ദേവാ ചുതാ നിരയേ പച്ചാജായന്തി… തിരച്ഛാനയോനിയാ പച്ചാജായന്തി… പേത്തിവിസയേ പച്ചാജായന്തി.
342-344. … Evamevaṃ kho, bhikkhave, appakā te sattā ye devā cutā devesu paccājāyanti; atha kho eteva sattā bahutarā ye devā cutā niraye paccājāyanti… tiracchānayoniyā paccājāyanti… pettivisaye paccājāyanti.
൩൪൫-൩൪൭. … ഏവമേവം ഖോ, ഭിക്ഖവേ, അപ്പകാ തേ സത്താ യേ ദേവാ ചുതാ മനുസ്സേസു പച്ചാജായന്തി; അഥ ഖോ ഏതേവ സത്താ ബഹുതരാ യേ ദേവാ ചുതാ നിരയേ പച്ചാജായന്തി… തിരച്ഛാനയോനിയാ പച്ചാജായന്തി… പേത്തിവിസയേ പച്ചാജായന്തി.
345-347. … Evamevaṃ kho, bhikkhave, appakā te sattā ye devā cutā manussesu paccājāyanti; atha kho eteva sattā bahutarā ye devā cutā niraye paccājāyanti… tiracchānayoniyā paccājāyanti… pettivisaye paccājāyanti.
൩൪൮-൩൫൦. … ഏവമേവം ഖോ, ഭിക്ഖവേ, അപ്പകാ തേ സത്താ യേ നിരയാ ചുതാ മനുസ്സേസു പച്ചാജായന്തി; അഥ ഖോ ഏതേവ സത്താ ബഹുതരാ യേ നിരയാ ചുതാ നിരയേ പച്ചാജായന്തി… തിരച്ഛാനയോനിയാ പച്ചാജായന്തി… പേത്തിവിസയേ പച്ചാജായന്തി.
348-350. … Evamevaṃ kho, bhikkhave, appakā te sattā ye nirayā cutā manussesu paccājāyanti; atha kho eteva sattā bahutarā ye nirayā cutā niraye paccājāyanti… tiracchānayoniyā paccājāyanti… pettivisaye paccājāyanti.
൩൫൧-൩൫൩. … ഏവമേവം ഖോ, ഭിക്ഖവേ, അപ്പകാ തേ സത്താ യേ നിരയാ ചുതാ ദേവേസു പച്ചാജായന്തി; അഥ ഖോ ഏതേവ സത്താ ബഹുതരാ യേ നിരയാ ചുതാ നിരയേ പച്ചാജായന്തി… തിരച്ഛാനയോനിയാ പച്ചാജായന്തി… പേത്തിവിസയേ പച്ചാജായന്തി.
351-353. … Evamevaṃ kho, bhikkhave, appakā te sattā ye nirayā cutā devesu paccājāyanti; atha kho eteva sattā bahutarā ye nirayā cutā niraye paccājāyanti… tiracchānayoniyā paccājāyanti… pettivisaye paccājāyanti.
൩൫൪-൩൫൬. … ഏവമേവം ഖോ, ഭിക്ഖവേ, അപ്പകാ തേ സത്താ യേ തിരച്ഛാനയോനിയാ ചുതാ മനുസ്സേസു പച്ചാജായന്തി; അഥ ഖോ ഏതേവ സത്താ ബഹുതരാ യേ തിരച്ഛാനയോനിയാ ചുതാ നിരയേ പച്ചാജായന്തി… തിരച്ഛാനയോനിയാ പച്ചാജായന്തി… പേത്തിവിസയേ പച്ചാജായന്തി.
354-356. … Evamevaṃ kho, bhikkhave, appakā te sattā ye tiracchānayoniyā cutā manussesu paccājāyanti; atha kho eteva sattā bahutarā ye tiracchānayoniyā cutā niraye paccājāyanti… tiracchānayoniyā paccājāyanti… pettivisaye paccājāyanti.
൩൫൭-൩൫൯. … ഏവമേവം ഖോ, ഭിക്ഖവേ, അപ്പകാ തേ സത്താ യേ തിരച്ഛാനയോനിയാ ചുതാ ദേവേസു പച്ചാജായന്തി; അഥ ഖോ ഏതേവ സത്താ ബഹുതരാ യേ തിരച്ഛാനയോനിയാ ചുതാ നിരയേ പച്ചാജായന്തി… തിരച്ഛാനയോനിയാ പച്ചാജായന്തി… പേത്തിവിസയേ പച്ചാജായന്തി.
357-359. … Evamevaṃ kho, bhikkhave, appakā te sattā ye tiracchānayoniyā cutā devesu paccājāyanti; atha kho eteva sattā bahutarā ye tiracchānayoniyā cutā niraye paccājāyanti… tiracchānayoniyā paccājāyanti… pettivisaye paccājāyanti.
൩൬൦-൩൬൨. … ഏവമേവം ഖോ, ഭിക്ഖവേ, അപ്പകാ തേ സത്താ യേ പേത്തിവിസയാ ചുതാ മനുസ്സേസു പച്ചാജായന്തി; അഥ ഖോ ഏതേവ സത്താ ബഹുതരാ യേ പേത്തിവിസയാ ചുതാ നിരയേ പച്ചാജായന്തി… തിരച്ഛാനയോനിയാ പച്ചാജായന്തി… പേത്തിവിസയേ പച്ചാജായന്തി.
360-362. … Evamevaṃ kho, bhikkhave, appakā te sattā ye pettivisayā cutā manussesu paccājāyanti; atha kho eteva sattā bahutarā ye pettivisayā cutā niraye paccājāyanti… tiracchānayoniyā paccājāyanti… pettivisaye paccājāyanti.
൩൬൩-൩൬൫. … ഏവമേവം ഖോ, ഭിക്ഖവേ, അപ്പകാ തേ സത്താ യേ പേത്തിവിസയാ ചുതാ ദേവേസു പച്ചാജായന്തി ; അഥ ഖോ ഏതേവ സത്താ ബഹുതരാ യേ പേത്തിവിസയാ ചുതാ നിരയേ പച്ചാജായന്തി… തിരച്ഛാനയോനിയാ പച്ചാജായന്തി… പേത്തിവിസയേ പച്ചാജായന്തി.
363-365. … Evamevaṃ kho, bhikkhave, appakā te sattā ye pettivisayā cutā devesu paccājāyanti ; atha kho eteva sattā bahutarā ye pettivisayā cutā niraye paccājāyanti… tiracchānayoniyā paccājāyanti… pettivisaye paccājāyanti.
വഗ്ഗോ ചതുത്ഥോ.
Vaggo catuttho.
ജമ്ബുദീപപേയ്യാലോ നിട്ഠിതോ.
Jambudīpapeyyālo niṭṭhito.
ഏകധമ്മപാളി സോളസമോ.
Ekadhammapāḷi soḷasamo.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൧൬. ഏകധമ്മപാളി • 16. Ekadhammapāḷi
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൧൬. ഏകധമ്മപാളി • 16. Ekadhammapāḷi
