| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
7. згад̇хаммасаванийяад̇т̇зраг̇аат̇ааван̣н̣анаа
7. Ekadhammasavanīyattheragāthāvaṇṇanā
гилзсаа жхаабид̇аа маяханд̇и ааяасмад̇о згад̇хаммасаванийяад̇т̇зрасса г̇аат̇аа. гаа уббад̇д̇и? со гира бад̣̇умуд̇д̇арасса бхаг̇авад̇о гаалз ругкад̣̇звад̇аа худ̇ваа ниб̣б̣ад̇д̇о гад̇ибаяз бхигкуу маг̇г̇амуул̣хз махааран̃н̃з вижаранд̇з д̣̇исваа анугамбамаано ад̇д̇ано бхаванад̇о од̇арид̇ваа д̇з самассаасзд̇ваа бхож̇зд̇ваа яат̇аад̇хиббзд̇адтаанам̣ баабзси. со д̇зна бун̃н̃агаммзна д̣̇звамануссзсу сам̣саранд̇о гассабз бхаг̇авад̇и логз уббаж̇ж̇ид̇ваа гад̇аб̣уд̣̇д̇хагижжз бариниб̣б̣уд̇з д̇асмим̣ гаалз б̣аараан̣асирааж̇аа гигий наама ахоси. д̇асмим̣ гаалан̇гад̇з д̇асса бут̇увинд̣̇арааж̇аа наама буд̇д̇о ааси. д̇асса буд̇д̇о сусаамо наама. д̇асса буд̇д̇о гигийб̣рахмад̣̇ад̇д̇о наама худ̇ваа раж̇ж̇ам̣ гаарзнд̇о саасанз анд̇арахид̇з д̇хаммассаванам̣ алабханд̇о, ‘‘яо д̇хаммам̣ д̣̇зсзд̇и, д̇асса сахассам̣ д̣̇аммий’’д̇и гхосаабзд̇ваа згамби д̇хаммагат̇игам̣ алабханд̇о, ‘‘маяхам̣ бид̇убид̇аамахаад̣̇ийнам̣ гаалз д̇хаммо сам̣вад̇д̇ад̇и, д̇хаммагат̇игаа сулабхаа ахзсум̣. ид̣̇аани бана жад̇уббад̣̇игаг̇аат̇аамад̇д̇амби гат̇знд̇о д̣̇уллабхо. яаава д̇хаммасан̃н̃аа на винассад̇и, д̇аавад̣̇зва баб̣б̣аж̇иссаамий’’д̇и раж̇ж̇ам̣ бахааяа химаванд̇ам̣ уд̣̇д̣̇исса г̇ажчанд̇ам̣ сагго д̣̇зварааж̇аа ааг̇анд̇ваа, ‘‘анижжаа вад̇а сан̇каараа’’д̇и г̇аат̇ааяа д̇хаммам̣ гат̇зд̇ваа нивад̇д̇зси. со нивад̇д̇ид̇ваа б̣ахум̣ бун̃н̃ам̣ гад̇ваа д̣̇звамануссзсу сам̣саранд̇о имасмим̣ б̣уд̣̇д̇хуббаад̣̇з сзд̇аб̣яанаг̇арз сздтигулз ниб̣б̣ад̇д̇ид̇ваа ваяаббад̇д̇о бхаг̇авад̇и сзд̇аб̣яанаг̇арз сим̣сабааванз вихаранд̇з сад̇т̇аарам̣ убасан̇гамид̇ваа ванд̣̇ид̇ваа згаманд̇ам̣ нисийд̣̇и. д̇асса сад̇т̇аа аж̇жхаасаяам̣ ологзд̇ваа, ‘‘анижжаа вад̇а сан̇каараа’’д̇и имааяа г̇аат̇ааяа д̇хаммам̣ д̣̇зсзси. д̇асса д̇ад̇т̇а гад̇аад̇хигаарад̇ааяа со анижжасан̃н̃ааяа баагадад̇арам̣ худ̇ваа убадтид̇ааяа бадилад̣̇д̇хасам̣взг̇о баб̣б̣аж̇ид̇ваа д̇хаммасаммасанам̣ бадтабзд̇ваа д̣̇угкасан̃н̃ам̣ анад̇д̇асан̃н̃ан̃жа манасигаронд̇о вибассанам̣ уссуггаабзд̇ваа арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 1.12.66-71) –
Kilesājhāpitā mayhanti āyasmato ekadhammasavanīyattherassa gāthā. Kā uppatti? So kira padumuttarassa bhagavato kāle rukkhadevatā hutvā nibbatto katipaye bhikkhū maggamūḷhe mahāraññe vicarante disvā anukampamāno attano bhavanato otaritvā te samassāsetvā bhojetvā yathādhippetaṭṭhānaṃ pāpesi. So tena puññakammena devamanussesu saṃsaranto kassape bhagavati loke uppajjitvā katabuddhakicce parinibbute tasmiṃ kāle bārāṇasirājā kikī nāma ahosi. Tasmiṃ kālaṅkate tassa puthuvindarājā nāma putto āsi. Tassa putto susāmo nāma. Tassa putto kikībrahmadatto nāma hutvā rajjaṃ kārento sāsane antarahite dhammassavanaṃ alabhanto, ‘‘yo dhammaṃ deseti, tassa sahassaṃ dammī’’ti ghosāpetvā ekampi dhammakathikaṃ alabhanto, ‘‘mayhaṃ pitupitāmahādīnaṃ kāle dhammo saṃvattati, dhammakathikā sulabhā ahesuṃ. Idāni pana catuppadikagāthāmattampi kathento dullabho. Yāva dhammasaññā na vinassati, tāvadeva pabbajissāmī’’ti rajjaṃ pahāya himavantaṃ uddissa gacchantaṃ sakko devarājā āgantvā, ‘‘aniccā vata saṅkhārā’’ti gāthāya dhammaṃ kathetvā nivattesi. So nivattitvā bahuṃ puññaṃ katvā devamanussesu saṃsaranto imasmiṃ buddhuppāde setabyanagare seṭṭhikule nibbattitvā vayappatto bhagavati setabyanagare siṃsapāvane viharante satthāraṃ upasaṅkamitvā vanditvā ekamantaṃ nisīdi. Tassa satthā ajjhāsayaṃ oloketvā, ‘‘aniccā vata saṅkhārā’’ti imāya gāthāya dhammaṃ desesi. Tassa tattha katādhikāratāya so aniccasaññāya pākaṭataraṃ hutvā upaṭṭhitāya paṭiladdhasaṃvego pabbajitvā dhammasammasanaṃ paṭṭhapetvā dukkhasaññaṃ anattasaññañca manasikaronto vipassanaṃ ussukkāpetvā arahattaṃ pāpuṇi. Tena vuttaṃ apadāne (apa. thera 1.12.66-71) –
‘‘бад̣̇умуд̇д̇араб̣уд̣̇д̇хасса, саавагаа ванажаарино;
‘‘Padumuttarabuddhassa, sāvakā vanacārino;
виббанадтаа б̣рахааран̃н̃з, анд̇хаава анусуяяарз.
Vippanaṭṭhā brahāraññe, andhāva anusuyyare.
‘‘ануссарид̇ваа самб̣уд̣̇д̇хам̣, бад̣̇умуд̇д̇аранааяагам̣;
‘‘Anussaritvā sambuddhaṃ, padumuttaranāyakaṃ;
д̇асса д̇з мунино буд̇д̇аа, виббанадтаа махааванз.
Tassa te munino puttā, vippanaṭṭhā mahāvane.
‘‘бхаванаа орухид̇ваана, аг̇амим̣ бхигкусанд̇игам̣;
‘‘Bhavanā oruhitvāna, agamiṃ bhikkhusantikaṃ;
д̇зсам̣ маг̇г̇ан̃жа аажигким̣, бхож̇анан̃жа ад̣̇аасахам̣.
Tesaṃ maggañca ācikkhiṃ, bhojanañca adāsahaṃ.
‘‘д̇зна гаммзна д̣̇вибад̣̇инд̣̇а, логаж̇здта нараасабха;
‘‘Tena kammena dvipadinda, lokajeṭṭha narāsabha;
ж̇аад̇ияаа сад̇д̇авассохам̣, арахад̇д̇амабаабун̣им̣.
Jātiyā sattavassohaṃ, arahattamapāpuṇiṃ.
‘‘сажагкуу наама наамзна, д̣̇ваад̣̇аса жаггавад̇д̇ино;
‘‘Sacakkhū nāma nāmena, dvādasa cakkavattino;
сад̇д̇арад̇анасамбаннаа, бан̃жагаббасад̇з ид̇о.
Sattaratanasampannā, pañcakappasate ito.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
д̇асса згзнзва д̇хаммассаванзна нибпаннагижжад̇д̇аа згад̇хаммасаванийяод̇взва саман̃н̃аа ахоси. со арахаа худ̇ваа ан̃н̃ам̣ б̣яаагаронд̇о –
Tassa ekeneva dhammassavanena nipphannakiccattā ekadhammasavanīyotveva samaññā ahosi. So arahā hutvā aññaṃ byākaronto –
67.
67.
‘‘гилзсаа жхаабид̇аа маяхам̣, бхаваа саб̣б̣з самуухад̇аа;
‘‘Kilesā jhāpitā mayhaṃ, bhavā sabbe samūhatā;
вигкийн̣о ж̇аад̇исам̣сааро, над̇т̇и д̣̇аани бунаб̣бхаво’’д̇и. – г̇аат̇ам̣ абхааси;
Vikkhīṇo jātisaṃsāro, natthi dāni punabbhavo’’ti. – gāthaṃ abhāsi;
д̇ад̇т̇а гилзсаад̇и яасмим̣ санд̇аанз уббаннаа, д̇ам̣ гилзсзнд̇и виб̣аад̇хзнд̇и убад̇аабзнд̇и ваад̇и гилзсаа, рааг̇аад̣̇аяо. жхаабид̇аад̇и инд̣̇аг̇г̇инаа вияа ругкаг̇ажчаад̣̇аяо арияамаг̇г̇ан̃аан̣аг̇г̇инаа самуулам̣ д̣̇ад̣дхаа. маяханд̇и маяаа, мама санд̇аанз ваа. бхаваа саб̣б̣з самуухад̇аад̇и гаамагаммабхаваад̣̇аяо саб̣б̣з бхаваа самуг̇гхаадид̇аа гилзсаанам̣ жхаабид̇ад̇д̇аа. сад̇и хи гилзсаваддз гаммаваддзна бхавид̇аб̣б̣ам̣. гаммабхаваанам̣ самуухад̇ад̇д̇аа зва жа убабад̇д̇ибхавааби самуухад̇аа зва ануббад̇д̇ид̇хаммад̇ааяа аабаад̣̇ид̇ад̇д̇аа. вигкийн̣о ж̇аад̇исам̣саарод̇и ж̇аад̇иаад̣̇иго –
Tattha kilesāti yasmiṃ santāne uppannā, taṃ kilesenti vibādhenti upatāpenti vāti kilesā, rāgādayo. Jhāpitāti indagginā viya rukkhagacchādayo ariyamaggañāṇagginā samūlaṃ daḍḍhā. Mayhanti mayā, mama santāne vā. Bhavā sabbe samūhatāti kāmakammabhavādayo sabbe bhavā samugghāṭitā kilesānaṃ jhāpitattā. Sati hi kilesavaṭṭe kammavaṭṭena bhavitabbaṃ. Kammabhavānaṃ samūhatattā eva ca upapattibhavāpi samūhatā eva anuppattidhammatāya āpāditattā. Vikkhīṇo jātisaṃsāroti jātiādiko –
‘‘канд̇хаанан̃жа бадибаади, д̇хаад̇уааяад̇анаана жа;
‘‘Khandhānañca paṭipāṭi, dhātuāyatanāna ca;
аб̣б̣ожчиннам̣ вад̇д̇амаанаа, сам̣саарод̇и бавужжад̇ий’’д̇и. –
Abbocchinnaṃ vattamānā, saṃsāroti pavuccatī’’ti. –
вуд̇д̇алагкан̣о сам̣сааро висзсад̇о кийн̣о, д̇асмаа над̇т̇и д̣̇аани бунаб̣бхаво. яасмаа ааяад̇им̣ бунаб̣бхаво над̇т̇и, д̇асмаа вигкийн̣о ж̇аад̇исам̣сааро. д̇асмаа жа бунаб̣бхаво над̇т̇и, яасмаа бхаваа саб̣б̣з самуухад̇аад̇и аавад̇д̇зд̇ваа вад̇д̇аб̣б̣ам̣. ат̇а ваа вигкийн̣о ж̇аад̇исам̣сааро, д̇ад̇о зва над̇т̇и д̣̇аани бунаб̣бхавод̇и яож̇зд̇аб̣б̣ам̣.
Vuttalakkhaṇo saṃsāro visesato khīṇo, tasmā natthi dāni punabbhavo. Yasmā āyatiṃ punabbhavo natthi, tasmā vikkhīṇo jātisaṃsāro. Tasmā ca punabbhavo natthi, yasmā bhavā sabbe samūhatāti āvattetvā vattabbaṃ. Atha vā vikkhīṇo jātisaṃsāro, tato eva natthi dāni punabbhavoti yojetabbaṃ.
згад̇хаммасаванийяад̇т̇зраг̇аат̇ааван̣н̣анаа нидтид̇аа.
Ekadhammasavanīyattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 7. згад̇хаммасаванийяад̇т̇зраг̇аат̇аа • 7. Ekadhammasavanīyattheragāthā
