| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. একধম্মসুত্তং
9. Ekadhammasuttaṃ
২১০. ‘‘নাহং , ভিক্খৰে, অঞ্ঞং একধম্মম্পি সমনুপস্সামি, যো এৰং ভাৰিতো বহুলীকতো সংযোজনীযানং ধম্মানং পহানায সংৰত্ততি, যথযিদং, ভিক্খৰে, সত্ত বোজ্ঝঙ্গা। কতমে সত্ত? সতিসম্বোজ্ঝঙ্গো…পে॰… উপেক্খাসম্বোজ্ঝঙ্গো। কথং ভাৰিতা চ, ভিক্খৰে, সত্ত বোজ্ঝঙ্গা কথং বহুলীকতা সংযোজনীযানং ধম্মানং পহানায সংৰত্তন্তি?
210. ‘‘Nāhaṃ , bhikkhave, aññaṃ ekadhammampi samanupassāmi, yo evaṃ bhāvito bahulīkato saṃyojanīyānaṃ dhammānaṃ pahānāya saṃvattati, yathayidaṃ, bhikkhave, satta bojjhaṅgā. Katame satta? Satisambojjhaṅgo…pe… upekkhāsambojjhaṅgo. Kathaṃ bhāvitā ca, bhikkhave, satta bojjhaṅgā kathaṃ bahulīkatā saṃyojanīyānaṃ dhammānaṃ pahānāya saṃvattanti?
‘‘ইধ, ভিক্খৰে, ভিক্খু সতিসম্বোজ্ঝঙ্গং ভাৰেতি ৰিৰেকনিস্সিতং…পে॰… উপেক্খাসম্বোজ্ঝঙ্গং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং। এৰং ভাৰিতা খো, ভিক্খৰে, সত্ত বোজ্ঝঙ্গা এৰং বহুলীকতা সংযোজনীযানং ধম্মানং পহানায সংৰত্তন্তি।
‘‘Idha, bhikkhave, bhikkhu satisambojjhaṅgaṃ bhāveti vivekanissitaṃ…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ bhāvitā kho, bhikkhave, satta bojjhaṅgā evaṃ bahulīkatā saṃyojanīyānaṃ dhammānaṃ pahānāya saṃvattanti.
‘‘কতমে চ, ভিক্খৰে, সংযোজনীযা ধম্মা? চক্খু, ভিক্খৰে, সংযোজনীযো ধম্মো। এত্থেতে উপ্পজ্জন্তি সংযোজনৰিনিবন্ধা অজ্ঝোসানা…পে॰… জিৰ্হা সংযোজনীযা ধম্মা। এত্থেতে উপ্পজ্জন্তি সংযোজনৰিনিবন্ধা অজ্ঝোসানা…পে॰… মনো সংযোজনীযো ধম্মো। এত্থেতে উপ্পজ্জন্তি সংযোজনৰিনিবন্ধা অজ্ঝোসানা। ইমে ৰুচ্চন্তি, ভিক্খৰে, সংযোজনীযা ধম্মা’’তি। নৰমং।
‘‘Katame ca, bhikkhave, saṃyojanīyā dhammā? Cakkhu, bhikkhave, saṃyojanīyo dhammo. Etthete uppajjanti saṃyojanavinibandhā ajjhosānā…pe… jivhā saṃyojanīyā dhammā. Etthete uppajjanti saṃyojanavinibandhā ajjhosānā…pe… mano saṃyojanīyo dhammo. Etthete uppajjanti saṃyojanavinibandhā ajjhosānā. Ime vuccanti, bhikkhave, saṃyojanīyā dhammā’’ti. Navamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. একধম্মসুত্তৰণ্ণনা • 9. Ekadhammasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. একধম্মসুত্তৰণ্ণনা • 9. Ekadhammasuttavaṇṇanā
