| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೯. ಏಕಧಮ್ಮಸುತ್ತಂ
9. Ekadhammasuttaṃ
೨೧೦. ‘‘ನಾಹಂ , ಭಿಕ್ಖವೇ, ಅಞ್ಞಂ ಏಕಧಮ್ಮಮ್ಪಿ ಸಮನುಪಸ್ಸಾಮಿ, ಯೋ ಏವಂ ಭಾವಿತೋ ಬಹುಲೀಕತೋ ಸಂಯೋಜನೀಯಾನಂ ಧಮ್ಮಾನಂ ಪಹಾನಾಯ ಸಂವತ್ತತಿ, ಯಥಯಿದಂ, ಭಿಕ್ಖವೇ, ಸತ್ತ ಬೋಜ್ಝಙ್ಗಾ। ಕತಮೇ ಸತ್ತ? ಸತಿಸಮ್ಬೋಜ್ಝಙ್ಗೋ…ಪೇ॰… ಉಪೇಕ್ಖಾಸಮ್ಬೋಜ್ಝಙ್ಗೋ। ಕಥಂ ಭಾವಿತಾ ಚ, ಭಿಕ್ಖವೇ, ಸತ್ತ ಬೋಜ್ಝಙ್ಗಾ ಕಥಂ ಬಹುಲೀಕತಾ ಸಂಯೋಜನೀಯಾನಂ ಧಮ್ಮಾನಂ ಪಹಾನಾಯ ಸಂವತ್ತನ್ತಿ?
210. ‘‘Nāhaṃ , bhikkhave, aññaṃ ekadhammampi samanupassāmi, yo evaṃ bhāvito bahulīkato saṃyojanīyānaṃ dhammānaṃ pahānāya saṃvattati, yathayidaṃ, bhikkhave, satta bojjhaṅgā. Katame satta? Satisambojjhaṅgo…pe… upekkhāsambojjhaṅgo. Kathaṃ bhāvitā ca, bhikkhave, satta bojjhaṅgā kathaṃ bahulīkatā saṃyojanīyānaṃ dhammānaṃ pahānāya saṃvattanti?
‘‘ಇಧ, ಭಿಕ್ಖವೇ, ಭಿಕ್ಖು ಸತಿಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ…ಪೇ॰… ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ ವಿರಾಗನಿಸ್ಸಿತಂ ನಿರೋಧನಿಸ್ಸಿತಂ ವೋಸ್ಸಗ್ಗಪರಿಣಾಮಿಂ। ಏವಂ ಭಾವಿತಾ ಖೋ, ಭಿಕ್ಖವೇ, ಸತ್ತ ಬೋಜ್ಝಙ್ಗಾ ಏವಂ ಬಹುಲೀಕತಾ ಸಂಯೋಜನೀಯಾನಂ ಧಮ್ಮಾನಂ ಪಹಾನಾಯ ಸಂವತ್ತನ್ತಿ।
‘‘Idha, bhikkhave, bhikkhu satisambojjhaṅgaṃ bhāveti vivekanissitaṃ…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ bhāvitā kho, bhikkhave, satta bojjhaṅgā evaṃ bahulīkatā saṃyojanīyānaṃ dhammānaṃ pahānāya saṃvattanti.
‘‘ಕತಮೇ ಚ, ಭಿಕ್ಖವೇ, ಸಂಯೋಜನೀಯಾ ಧಮ್ಮಾ? ಚಕ್ಖು, ಭಿಕ್ಖವೇ, ಸಂಯೋಜನೀಯೋ ಧಮ್ಮೋ। ಏತ್ಥೇತೇ ಉಪ್ಪಜ್ಜನ್ತಿ ಸಂಯೋಜನವಿನಿಬನ್ಧಾ ಅಜ್ಝೋಸಾನಾ…ಪೇ॰… ಜಿವ್ಹಾ ಸಂಯೋಜನೀಯಾ ಧಮ್ಮಾ। ಏತ್ಥೇತೇ ಉಪ್ಪಜ್ಜನ್ತಿ ಸಂಯೋಜನವಿನಿಬನ್ಧಾ ಅಜ್ಝೋಸಾನಾ…ಪೇ॰… ಮನೋ ಸಂಯೋಜನೀಯೋ ಧಮ್ಮೋ। ಏತ್ಥೇತೇ ಉಪ್ಪಜ್ಜನ್ತಿ ಸಂಯೋಜನವಿನಿಬನ್ಧಾ ಅಜ್ಝೋಸಾನಾ। ಇಮೇ ವುಚ್ಚನ್ತಿ, ಭಿಕ್ಖವೇ, ಸಂಯೋಜನೀಯಾ ಧಮ್ಮಾ’’ತಿ। ನವಮಂ।
‘‘Katame ca, bhikkhave, saṃyojanīyā dhammā? Cakkhu, bhikkhave, saṃyojanīyo dhammo. Etthete uppajjanti saṃyojanavinibandhā ajjhosānā…pe… jivhā saṃyojanīyā dhammā. Etthete uppajjanti saṃyojanavinibandhā ajjhosānā…pe… mano saṃyojanīyo dhammo. Etthete uppajjanti saṃyojanavinibandhā ajjhosānā. Ime vuccanti, bhikkhave, saṃyojanīyā dhammā’’ti. Navamaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೯. ಏಕಧಮ್ಮಸುತ್ತವಣ್ಣನಾ • 9. Ekadhammasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೯. ಏಕಧಮ್ಮಸುತ್ತವಣ್ಣನಾ • 9. Ekadhammasuttavaṇṇanā
