| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
9. එකධම්‌මසුත්‌තං
9. Ekadhammasuttaṃ
210. ‘‘නාහං , භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි, යො එවං භාවිතො බහුලීකතො සංයොජනීයානං ධම්‌මානං පහානාය සංවත්‌තති, යථයිදං, භික්‌ඛවෙ, සත්‌ත බොජ්‌ඣඞ්‌ගා. කතමෙ සත්‌ත? සතිසම්‌බොජ්‌ඣඞ්‌ගො…පෙ.… උපෙක්‌ඛාසම්‌බොජ්‌ඣඞ්‌ගො. කථං භාවිතා ච, භික්‌ඛවෙ, සත්‌ත බොජ්‌ඣඞ්‌ගා කථං බහුලීකතා සංයොජනීයානං ධම්‌මානං පහානාය සංවත්‌තන්‌ති?
210. ‘‘Nāhaṃ , bhikkhave, aññaṃ ekadhammampi samanupassāmi, yo evaṃ bhāvito bahulīkato saṃyojanīyānaṃ dhammānaṃ pahānāya saṃvattati, yathayidaṃ, bhikkhave, satta bojjhaṅgā. Katame satta? Satisambojjhaṅgo…pe… upekkhāsambojjhaṅgo. Kathaṃ bhāvitā ca, bhikkhave, satta bojjhaṅgā kathaṃ bahulīkatā saṃyojanīyānaṃ dhammānaṃ pahānāya saṃvattanti?
‘‘ඉධ, භික්‌ඛවෙ, භික්‌ඛු සතිසම්‌බොජ්‌ඣඞ්‌ගං භාවෙති විවෙකනිස්‌සිතං…පෙ.… උපෙක්‌ඛාසම්‌බොජ්‌ඣඞ්‌ගං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං. එවං භාවිතා ඛො, භික්‌ඛවෙ, සත්‌ත බොජ්‌ඣඞ්‌ගා එවං බහුලීකතා සංයොජනීයානං ධම්‌මානං පහානාය සංවත්‌තන්‌ති.
‘‘Idha, bhikkhave, bhikkhu satisambojjhaṅgaṃ bhāveti vivekanissitaṃ…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ bhāvitā kho, bhikkhave, satta bojjhaṅgā evaṃ bahulīkatā saṃyojanīyānaṃ dhammānaṃ pahānāya saṃvattanti.
‘‘කතමෙ ච, භික්‌ඛවෙ, සංයොජනීයා ධම්‌මා? චක්‌ඛු, භික්‌ඛවෙ, සංයොජනීයො ධම්‌මො. එත්‌ථෙතෙ උප්‌පජ්‌ජන්‌ති සංයොජනවිනිබන්‌ධා අජ්‌ඣොසානා…පෙ.… ජිව්‌හා සංයොජනීයා ධම්‌මා. එත්‌ථෙතෙ උප්‌පජ්‌ජන්‌ති සංයොජනවිනිබන්‌ධා අජ්‌ඣොසානා…පෙ.… මනො සංයොජනීයො ධම්‌මො. එත්‌ථෙතෙ උප්‌පජ්‌ජන්‌ති සංයොජනවිනිබන්‌ධා අජ්‌ඣොසානා. ඉමෙ වුච්‌චන්‌ති, භික්‌ඛවෙ, සංයොජනීයා ධම්‌මා’’ති. නවමං.
‘‘Katame ca, bhikkhave, saṃyojanīyā dhammā? Cakkhu, bhikkhave, saṃyojanīyo dhammo. Etthete uppajjanti saṃyojanavinibandhā ajjhosānā…pe… jivhā saṃyojanīyā dhammā. Etthete uppajjanti saṃyojanavinibandhā ajjhosānā…pe… mano saṃyojanīyo dhammo. Etthete uppajjanti saṃyojanavinibandhā ajjhosānā. Ime vuccanti, bhikkhave, saṃyojanīyā dhammā’’ti. Navamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. එකධම්‌මසුත්‌තවණ්‌ණනා • 9. Ekadhammasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. එකධම්‌මසුත්‌තවණ්‌ණනා • 9. Ekadhammasuttavaṇṇanā
