| Library / Tipiṭaka / तिपिटक • Tipiṭaka / अपदानपाळि • Apadānapāḷi |
४. एकदुस्सदायकत्थेरअपदानं
4. Ekadussadāyakattheraapadānaṃ
१९.
19.
‘‘नगरे हंसवतिया, अहोसिं तिणहारको।
‘‘Nagare haṃsavatiyā, ahosiṃ tiṇahārako;
तिणहारेन जीवामि, तेन पोसेमि दारके॥
Tiṇahārena jīvāmi, tena posemi dārake.
२०.
20.
‘‘पदुमुत्तरो नाम जिनो, सब्बधम्मान पारगू।
‘‘Padumuttaro nāma jino, sabbadhammāna pāragū;
तमन्धकारं नासेत्वा, उप्पज्जि लोकनायको॥
Tamandhakāraṃ nāsetvā, uppajji lokanāyako.
२१.
21.
‘‘सके घरे निसीदित्वा, एवं चिन्तेसहं तदा।
‘‘Sake ghare nisīditvā, evaṃ cintesahaṃ tadā;
‘बुद्धो लोके समुप्पन्नो, देय्यधम्मो च नत्थि मे॥
‘Buddho loke samuppanno, deyyadhammo ca natthi me.
२२.
22.
‘‘‘इदं मे साटकं एकं, नत्थि मे कोचि दायको।
‘‘‘Idaṃ me sāṭakaṃ ekaṃ, natthi me koci dāyako;
दुक्खो निरयसम्फस्सो, रोपयिस्सामि दक्खिणं’॥
Dukkho nirayasamphasso, ropayissāmi dakkhiṇaṃ’.
२३.
23.
‘‘एवाहं चिन्तयित्वान, सकं चित्तं पसादयिं।
‘‘Evāhaṃ cintayitvāna, sakaṃ cittaṃ pasādayiṃ;
एकं दुस्सं गहेत्वान, बुद्धसेट्ठस्सदासहं॥
Ekaṃ dussaṃ gahetvāna, buddhaseṭṭhassadāsahaṃ.
२४.
24.
‘‘एकं दुस्सं ददित्वान, उक्कुट्ठिं सम्पवत्तयिं।
‘‘Ekaṃ dussaṃ daditvāna, ukkuṭṭhiṃ sampavattayiṃ;
यदि बुद्धो तुवं वीर, तारेहि मं महामुनि॥
Yadi buddho tuvaṃ vīra, tārehi maṃ mahāmuni.
२५.
25.
‘‘पदुमुत्तरो लोकविदू, आहुतीनं पटिग्गहो।
‘‘Padumuttaro lokavidū, āhutīnaṃ paṭiggaho;
मम दानं पकित्तेन्तो, अका मे अनुमोदनं॥
Mama dānaṃ pakittento, akā me anumodanaṃ.
२६.
26.
‘‘‘इमिना एकदुस्सेन, चेतनापणिधीहि च।
‘‘‘Iminā ekadussena, cetanāpaṇidhīhi ca;
कप्पसतसहस्सानि, विनिपातं न गच्छति॥
Kappasatasahassāni, vinipātaṃ na gacchati.
२७.
27.
‘‘‘छत्तिंसक्खत्तुं देविन्दो, देवरज्जं करिस्सति।
‘‘‘Chattiṃsakkhattuṃ devindo, devarajjaṃ karissati;
तेत्तिंसक्खत्तुं राजा च, चक्कवत्ती भविस्सति।
Tettiṃsakkhattuṃ rājā ca, cakkavattī bhavissati;
पदेसरज्जं विपुलं, गणनातो असङ्खियं॥
Padesarajjaṃ vipulaṃ, gaṇanāto asaṅkhiyaṃ.
२८.
28.
‘‘‘देवलोके मनुस्से वा, संसरन्तो तुवं भवे।
‘‘‘Devaloke manusse vā, saṃsaranto tuvaṃ bhave;
रूपवा गुणसम्पन्नो, अनवक्कन्तदेहवा।
Rūpavā guṇasampanno, anavakkantadehavā;
अक्खोभं अमितं दुस्सं, लभिस्ससि यदिच्छकं’॥
Akkhobhaṃ amitaṃ dussaṃ, labhissasi yadicchakaṃ’.
२९.
29.
‘‘इदं वत्वान सम्बुद्धो, जलजुत्तमनामको।
‘‘Idaṃ vatvāna sambuddho, jalajuttamanāmako;
नभं अब्भुग्गमी धीरो, हंसराजाव अम्बरे॥
Nabhaṃ abbhuggamī dhīro, haṃsarājāva ambare.
३०.
30.
‘‘यं यं योनुपपज्जामि, देवत्तं अथ मानुसं।
‘‘Yaṃ yaṃ yonupapajjāmi, devattaṃ atha mānusaṃ;
भोगे मे ऊनता नत्थि, एकदुस्सस्सिदं फलं॥
Bhoge me ūnatā natthi, ekadussassidaṃ phalaṃ.
३१.
31.
‘‘पदुद्धारे पदुद्धारे, दुस्सं निब्बत्तते ममं।
‘‘Paduddhāre paduddhāre, dussaṃ nibbattate mamaṃ;
हेट्ठा दुस्सम्हि तिट्ठामि, उपरि छदनं मम॥
Heṭṭhā dussamhi tiṭṭhāmi, upari chadanaṃ mama.
३२.
32.
‘‘चक्कवाळमुपादाय, सकाननं सपब्बतं।
‘‘Cakkavāḷamupādāya, sakānanaṃ sapabbataṃ;
इच्छमानो चहं अज्ज, दुस्सेहि छादयेय्यहं॥
Icchamāno cahaṃ ajja, dussehi chādayeyyahaṃ.
३३.
33.
‘‘तेनेव एकदुस्सेन, संसरन्तो भवाभवे।
‘‘Teneva ekadussena, saṃsaranto bhavābhave;
सुवण्णवण्णो हुत्वान, संसरामि भवाभवे॥
Suvaṇṇavaṇṇo hutvāna, saṃsarāmi bhavābhave.
३४.
34.
‘‘विपाकं एकदुस्सस्स, नज्झगं कत्थचिक्खयं।
‘‘Vipākaṃ ekadussassa, najjhagaṃ katthacikkhayaṃ;
अयं मे अन्तिमा जाति, विपच्चति इधापि मे॥
Ayaṃ me antimā jāti, vipaccati idhāpi me.
३५.
35.
‘‘सतसहस्सितो कप्पे, यं दुस्समददिं तदा।
‘‘Satasahassito kappe, yaṃ dussamadadiṃ tadā;
दुग्गतिं नाभिजानामि, एकदुस्सस्सिदं फलं॥
Duggatiṃ nābhijānāmi, ekadussassidaṃ phalaṃ.
३६.
36.
‘‘किलेसा झापिता मय्हं, भवा सब्बे समूहता।
‘‘Kilesā jhāpitā mayhaṃ, bhavā sabbe samūhatā;
नागोव बन्धनं छेत्वा, विहरामि अनासवो॥
Nāgova bandhanaṃ chetvā, viharāmi anāsavo.
३७.
37.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा एकदुस्सदायको थेरो इमा गाथायो अभासित्थाति।
Itthaṃ sudaṃ āyasmā ekadussadāyako thero imā gāthāyo abhāsitthāti.
एकदुस्सदायकत्थेरस्सापदानं चतुत्थं।
Ekadussadāyakattherassāpadānaṃ catutthaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १-१०. थोमकत्थेरअपदानादिवण्णना • 1-10. Thomakattheraapadānādivaṇṇanā
