| Library / Tipiṭaka / तिपिटक • Tipiṭaka / अपदानपाळि • Apadānapāḷi |
२. एकदुस्सदायकत्थेरअपदानं
2. Ekadussadāyakattheraapadānaṃ
१५.
15.
‘‘नगरे हंसवतिया, अहोसिं तिणहारको।
‘‘Nagare haṃsavatiyā, ahosiṃ tiṇahārako;
तिणहारेन जीवामि, तेन पोसेमि दारके॥
Tiṇahārena jīvāmi, tena posemi dārake.
१६.
16.
‘‘पदुमुत्तरो नाम जिनो, सब्बधम्मान पारगू।
‘‘Padumuttaro nāma jino, sabbadhammāna pāragū;
तमन्धकारं नासेत्वा, उप्पज्जि लोकनायको॥
Tamandhakāraṃ nāsetvā, uppajji lokanāyako.
१७.
17.
‘‘सके घरे निसीदित्वा, एवं चिन्तेसि तावदे।
‘‘Sake ghare nisīditvā, evaṃ cintesi tāvade;
‘बुद्धो लोके समुप्पन्नो, देय्यधम्मो न विज्जति॥
‘Buddho loke samuppanno, deyyadhammo na vijjati.
१८.
18.
‘‘‘इदं मे साटकं एकं, नत्थि मे कोचि दायको।
‘‘‘Idaṃ me sāṭakaṃ ekaṃ, natthi me koci dāyako;
दुक्खो निरयसम्फस्सो, रोपयिस्सामि दक्खिणं’॥
Dukkho nirayasamphasso, ropayissāmi dakkhiṇaṃ’.
१९.
19.
‘‘एवाहं चिन्तयित्वान, सकं चित्तं पसादयिं।
‘‘Evāhaṃ cintayitvāna, sakaṃ cittaṃ pasādayiṃ;
एकं दुस्सं गहेत्वान, बुद्धसेट्ठस्सदासहं॥
Ekaṃ dussaṃ gahetvāna, buddhaseṭṭhassadāsahaṃ.
२०.
20.
‘‘एकं दुस्सं ददित्वान, उक्कुट्ठिं सम्पवत्तयिं।
‘‘Ekaṃ dussaṃ daditvāna, ukkuṭṭhiṃ sampavattayiṃ;
‘यदि बुद्धो तुवं वीर, तारेहि मं महामुनि’॥
‘Yadi buddho tuvaṃ vīra, tārehi maṃ mahāmuni’.
२१.
21.
‘‘पदुमुत्तरो लोकविदू, आहुतीनं पटिग्गहो।
‘‘Padumuttaro lokavidū, āhutīnaṃ paṭiggaho;
मम दानं पकित्तेन्तो, अका मे अनुमोदनं॥
Mama dānaṃ pakittento, akā me anumodanaṃ.
२२.
22.
‘‘‘इमिना एकदुस्सेन, चेतनापणिधीहि च।
‘‘‘Iminā ekadussena, cetanāpaṇidhīhi ca;
कप्पसतसहस्सानि, विनिपातं न गच्छसि॥
Kappasatasahassāni, vinipātaṃ na gacchasi.
२३.
23.
‘‘‘छत्तिंसक्खत्तुं देविन्दो, देवरज्जं करिस्ससि।
‘‘‘Chattiṃsakkhattuṃ devindo, devarajjaṃ karissasi;
२४.
24.
देवलोके मनुस्से वा, संसरन्तो तुवं भवे॥
Devaloke manusse vā, saṃsaranto tuvaṃ bhave.
२५.
25.
अक्खोभं अमितं दुस्सं, लभिस्ससि यदिच्छकं’॥
Akkhobhaṃ amitaṃ dussaṃ, labhissasi yadicchakaṃ’.
२६.
26.
‘‘इदं वत्वान सम्बुद्धो, जलजुत्तमनामको।
‘‘Idaṃ vatvāna sambuddho, jalajuttamanāmako;
२७.
27.
‘‘यं यं योनुपपज्जामि, देवत्तं अथ मानुसं।
‘‘Yaṃ yaṃ yonupapajjāmi, devattaṃ atha mānusaṃ;
भोगे मे ऊनता नत्थि, एकदुस्सस्सिदं फलं॥
Bhoge me ūnatā natthi, ekadussassidaṃ phalaṃ.
२८.
28.
‘‘पदुद्धारे पदुद्धारे, दुस्सं निब्बत्तते ममं।
‘‘Paduddhāre paduddhāre, dussaṃ nibbattate mamaṃ;
हेट्ठा दुस्सम्हि तिट्ठामि, उपरिच्छदनं मम॥
Heṭṭhā dussamhi tiṭṭhāmi, uparicchadanaṃ mama.
२९.
29.
‘‘चक्कवाळं उपादाय, सकाननं सपब्बतं।
‘‘Cakkavāḷaṃ upādāya, sakānanaṃ sapabbataṃ;
इच्छमानो चहं अज्ज, दुस्सेहच्छादयेय्य तं॥
Icchamāno cahaṃ ajja, dussehacchādayeyya taṃ.
३०.
30.
‘‘तेनेव एकदुस्सेन, संसरन्तो भवाभवे।
‘‘Teneva ekadussena, saṃsaranto bhavābhave;
सुवण्णवण्णो हुत्वान, संसरामि भवाभवे॥
Suvaṇṇavaṇṇo hutvāna, saṃsarāmi bhavābhave.
३१.
31.
‘‘विपाकं विएकदुस्सस्स, नाज्झगं कत्थचिक्खयं।
‘‘Vipākaṃ viekadussassa, nājjhagaṃ katthacikkhayaṃ;
अयं मे अन्तिमा जाति, विपच्चति इधापि मे॥
Ayaṃ me antimā jāti, vipaccati idhāpi me.
३२.
32.
‘‘सतसहस्सितो कप्पे, यं दुस्समददिं तदा।
‘‘Satasahassito kappe, yaṃ dussamadadiṃ tadā;
दुग्गतिं नाभिजानामि, एकदुस्सस्सिदं फलं॥
Duggatiṃ nābhijānāmi, ekadussassidaṃ phalaṃ.
३३.
33.
‘‘किलेसा झापिता मय्हं…पे॰… विहरामि अनासवो॥
‘‘Kilesā jhāpitā mayhaṃ…pe… viharāmi anāsavo.
३४.
34.
‘‘स्वागतं वत मे आसि…पे॰… कतं बुद्धस्स सासनं॥
‘‘Svāgataṃ vata me āsi…pe… kataṃ buddhassa sāsanaṃ.
३५.
35.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा एकदुस्सदायको थेरो इमा गाथायो अभासित्थाति।
Itthaṃ sudaṃ āyasmā ekadussadāyako thero imā gāthāyo abhāsitthāti;
एकदुस्सदायकत्थेरस्सापदानं दुतियं।
Ekadussadāyakattherassāpadānaṃ dutiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १-६०. सकिंसम्मज्जकत्थेरअपदानादिवण्णना • 1-60. Sakiṃsammajjakattheraapadānādivaṇṇanā
