| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๒. เอกทุสฺสทายกเตฺถรอปทานํ
2. Ekadussadāyakattheraapadānaṃ
๑๕.
15.
‘‘นคเร หํสวติยา, อโหสิํ ติณหารโก;
‘‘Nagare haṃsavatiyā, ahosiṃ tiṇahārako;
ติณหาเรน ชีวามิ, เตน โปเสมิ ทารเกฯ
Tiṇahārena jīvāmi, tena posemi dārake.
๑๖.
16.
‘‘ปทุมุตฺตโร นาม ชิโน, สพฺพธมฺมาน ปารคู;
‘‘Padumuttaro nāma jino, sabbadhammāna pāragū;
ตมนฺธการํ นาเสตฺวา, อุปฺปชฺชิ โลกนายโกฯ
Tamandhakāraṃ nāsetvā, uppajji lokanāyako.
๑๗.
17.
‘‘สเก ฆเร นิสีทิตฺวา, เอวํ จิเนฺตสิ ตาวเท;
‘‘Sake ghare nisīditvā, evaṃ cintesi tāvade;
‘พุโทฺธ โลเก สมุปฺปโนฺน, เทยฺยธโมฺม น วิชฺชติฯ
‘Buddho loke samuppanno, deyyadhammo na vijjati.
๑๘.
18.
‘‘‘อิทํ เม สาฎกํ เอกํ, นตฺถิ เม โกจิ ทายโก;
‘‘‘Idaṃ me sāṭakaṃ ekaṃ, natthi me koci dāyako;
ทุโกฺข นิรยสมฺผโสฺส, โรปยิสฺสามิ ทกฺขิณํ’ฯ
Dukkho nirayasamphasso, ropayissāmi dakkhiṇaṃ’.
๑๙.
19.
‘‘เอวาหํ จินฺตยิตฺวาน, สกํ จิตฺตํ ปสาทยิํ;
‘‘Evāhaṃ cintayitvāna, sakaṃ cittaṃ pasādayiṃ;
เอกํ ทุสฺสํ คเหตฺวาน, พุทฺธเสฎฺฐสฺสทาสหํฯ
Ekaṃ dussaṃ gahetvāna, buddhaseṭṭhassadāsahaṃ.
๒๐.
20.
‘‘เอกํ ทุสฺสํ ททิตฺวาน, อุกฺกุฎฺฐิํ สมฺปวตฺตยิํ;
‘‘Ekaṃ dussaṃ daditvāna, ukkuṭṭhiṃ sampavattayiṃ;
‘ยทิ พุโทฺธ ตุวํ วีร, ตาเรหิ มํ มหามุนิ’ฯ
‘Yadi buddho tuvaṃ vīra, tārehi maṃ mahāmuni’.
๒๑.
21.
‘‘ปทุมุตฺตโร โลกวิทู, อาหุตีนํ ปฎิคฺคโห;
‘‘Padumuttaro lokavidū, āhutīnaṃ paṭiggaho;
มม ทานํ ปกิเตฺตโนฺต, อกา เม อนุโมทนํฯ
Mama dānaṃ pakittento, akā me anumodanaṃ.
๒๒.
22.
‘‘‘อิมินา เอกทุเสฺสน, เจตนาปณิธีหิ จ;
‘‘‘Iminā ekadussena, cetanāpaṇidhīhi ca;
กปฺปสตสหสฺสานิ, วินิปาตํ น คจฺฉสิฯ
Kappasatasahassāni, vinipātaṃ na gacchasi.
๒๓.
23.
‘‘‘ฉตฺติํสกฺขตฺตุํ เทวิโนฺท, เทวรชฺชํ กริสฺสสิ;
‘‘‘Chattiṃsakkhattuṃ devindo, devarajjaṃ karissasi;
๒๔.
24.
เทวโลเก มนุเสฺส วา, สํสรโนฺต ตุวํ ภเวฯ
Devaloke manusse vā, saṃsaranto tuvaṃ bhave.
๒๕.
25.
อโกฺขภํ อมิตํ ทุสฺสํ, ลภิสฺสสิ ยทิจฺฉกํ’ฯ
Akkhobhaṃ amitaṃ dussaṃ, labhissasi yadicchakaṃ’.
๒๖.
26.
‘‘อิทํ วตฺวาน สมฺพุโทฺธ, ชลชุตฺตมนามโก;
‘‘Idaṃ vatvāna sambuddho, jalajuttamanāmako;
๒๗.
27.
‘‘ยํ ยํ โยนุปปชฺชามิ, เทวตฺตํ อถ มานุสํ;
‘‘Yaṃ yaṃ yonupapajjāmi, devattaṃ atha mānusaṃ;
โภเค เม อูนตา นตฺถิ, เอกทุสฺสสฺสิทํ ผลํฯ
Bhoge me ūnatā natthi, ekadussassidaṃ phalaṃ.
๒๘.
28.
‘‘ปทุทฺธาเร ปทุทฺธาเร, ทุสฺสํ นิพฺพตฺตเต มมํ;
‘‘Paduddhāre paduddhāre, dussaṃ nibbattate mamaṃ;
เหฎฺฐา ทุสฺสมฺหิ ติฎฺฐามิ, อุปริจฺฉทนํ มมฯ
Heṭṭhā dussamhi tiṭṭhāmi, uparicchadanaṃ mama.
๒๙.
29.
‘‘จกฺกวาฬํ อุปาทาย, สกานนํ สปพฺพตํ;
‘‘Cakkavāḷaṃ upādāya, sakānanaṃ sapabbataṃ;
อิจฺฉมาโน จหํ อชฺช, ทุเสฺสหจฺฉาทเยยฺย ตํฯ
Icchamāno cahaṃ ajja, dussehacchādayeyya taṃ.
๓๐.
30.
‘‘เตเนว เอกทุเสฺสน, สํสรโนฺต ภวาภเว;
‘‘Teneva ekadussena, saṃsaranto bhavābhave;
สุวณฺณวโณฺณ หุตฺวาน, สํสรามิ ภวาภเวฯ
Suvaṇṇavaṇṇo hutvāna, saṃsarāmi bhavābhave.
๓๑.
31.
‘‘วิปากํ วิเอกทุสฺสสฺส, นาชฺฌคํ กตฺถจิกฺขยํ;
‘‘Vipākaṃ viekadussassa, nājjhagaṃ katthacikkhayaṃ;
อยํ เม อนฺติมา ชาติ, วิปจฺจติ อิธาปิ เมฯ
Ayaṃ me antimā jāti, vipaccati idhāpi me.
๓๒.
32.
‘‘สตสหสฺสิโต กเปฺป, ยํ ทุสฺสมททิํ ตทา;
‘‘Satasahassito kappe, yaṃ dussamadadiṃ tadā;
ทุคฺคติํ นาภิชานามิ, เอกทุสฺสสฺสิทํ ผลํฯ
Duggatiṃ nābhijānāmi, ekadussassidaṃ phalaṃ.
๓๓.
33.
‘‘กิเลสา ฌาปิตา มยฺหํ…เป.… วิหรามิ อนาสโวฯ
‘‘Kilesā jhāpitā mayhaṃ…pe… viharāmi anāsavo.
๓๔.
34.
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
‘‘Svāgataṃ vata me āsi…pe… kataṃ buddhassa sāsanaṃ.
๓๕.
35.
‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ
‘‘Paṭisambhidā catasso…pe… kataṃ buddhassa sāsanaṃ’’.
อิตฺถํ สุทํ อายสฺมา เอกทุสฺสทายโก เถโร อิมา คาถาโย อภาสิตฺถาติ;
Itthaṃ sudaṃ āyasmā ekadussadāyako thero imā gāthāyo abhāsitthāti;
เอกทุสฺสทายกเตฺถรสฺสาปทานํ ทุติยํฯ
Ekadussadāyakattherassāpadānaṃ dutiyaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๑-๖๐. สกิํสมฺมชฺชกเตฺถรอปทานาทิวณฺณนา • 1-60. Sakiṃsammajjakattheraapadānādivaṇṇanā
