| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
3. ஏககா³மந்தரக³மனஸிக்கா²பத³வண்ணனா
3. Ekagāmantaragamanasikkhāpadavaṇṇanā
அஞ்ஞோ கா³மோ கா³மந்தரங். நதி³பாரந்தி நதி³யா பாரிமதீரங். ‘‘கா³மந்தரங் க³ச்செ²ய்யா’’தி (பாசி॰ 687, 691) வுத்தத்தா அஞ்ஞஸ்மிங் கா³மேயேவ ஆபத்தி, ந ஸககா³மேதி ஆஹ ‘‘ஸககா³மதோ தாவா’’திஆதி³. பரிக்கே²பே வா உபசாரே வா அதிக்கந்தேதி பரிக்கி²த்தஸ்ஸ கா³மஸ்ஸ பரிக்கே²பே வா அபரிக்கி²த்தஸ்ஸ கா³மஸ்ஸ பரிக்கே²பாரஹட்டா²னே வா அதிக்கந்தே. து³தியேன அதிக்கந்தமத்தேதி து³தியேன பாதே³ன இதரஸ்ஸ கா³மஸ்ஸ பரிக்கே²பே வா உபசாரே வா அதிக்கந்தமத்தே. யேஸு பன பொத்த²கேஸு ‘‘ஏகேன பாதே³ன இதரஸ்ஸ கா³மஸ்ஸ பரிக்கே²பே வா அதிக்கந்தே, உபசாரே வா ஓக்கந்தே து²ல்லச்சயங், து³தியேன அதிக்கந்தமத்தே, ஓக்கந்தமத்தே வா ஸங்கா⁴தி³ஸேஸோ’’தி பாடோ² தி³ஸ்ஸதி, தத்த² ‘‘ஓக்கந்தே, ஓக்கந்தமத்தே வா’’தி ஏதானி த்³வே பதா³னி பாளியா விருஜ்ஜ²ந்தி. ‘‘அபரிக்கி²த்தஸ்ஸ கா³மஸ்ஸ உபசாரங் அதிக்காமெந்தியா’’தி (பாசி॰ 692) ஹி பாளி. ததா² ஸமந்தபாஸாதி³காயபி விருஜ்ஜ²ந்தி. தத்த² ஹி –
Añño gāmo gāmantaraṃ. Nadipāranti nadiyā pārimatīraṃ. ‘‘Gāmantaraṃ gaccheyyā’’ti (pāci. 687, 691) vuttattā aññasmiṃ gāmeyeva āpatti, na sakagāmeti āha ‘‘sakagāmato tāvā’’tiādi. Parikkhepe vā upacāre vā atikkanteti parikkhittassa gāmassa parikkhepe vā aparikkhittassa gāmassa parikkhepārahaṭṭhāne vā atikkante. Dutiyena atikkantamatteti dutiyena pādena itarassa gāmassa parikkhepe vā upacāre vā atikkantamatte. Yesu pana potthakesu ‘‘ekena pādena itarassa gāmassa parikkhepe vā atikkante, upacāre vā okkante thullaccayaṃ, dutiyena atikkantamatte, okkantamatte vā saṅghādiseso’’ti pāṭho dissati, tattha ‘‘okkante, okkantamatte vā’’ti etāni dve padāni pāḷiyā virujjhanti. ‘‘Aparikkhittassa gāmassa upacāraṃ atikkāmentiyā’’ti (pāci. 692) hi pāḷi. Tathā samantapāsādikāyapi virujjhanti. Tattha hi –
‘‘பரிக்கே²பாரஹட்டா²னங் ஏகேன பாதே³ன அதிக்கமதி, து²ல்லச்சயங். து³தியேன அதிக்கந்தமத்தே ஸங்கா⁴தி³ஸேஸோ. அபிசெத்த² ஸககா³மதோ…பே॰… ஏகேன பாதே³ன இதரஸ்ஸ கா³மஸ்ஸ பரிக்கே²பே வா உபசாரேவா அதிக்கந்தமத்தே து²ல்லச்சயங், து³தியேன அதிக்கந்தமத்தே ஸங்கா⁴தி³ஸேஸோ’’தி –
‘‘Parikkhepārahaṭṭhānaṃ ekena pādena atikkamati, thullaccayaṃ. Dutiyena atikkantamatte saṅghādiseso. Apicettha sakagāmato…pe… ekena pādena itarassa gāmassa parikkhepe vā upacārevā atikkantamatte thullaccayaṃ, dutiyena atikkantamatte saṅghādiseso’’ti –
வுத்தங். ‘‘பட²மங் பாத³ங் அதிக்காமெந்தியா’’திஆதி³வசனதோ (பாசி॰ 692) பத³ஸா க³மனமேவ இதா⁴தி⁴ப்பேதந்தி ஆஹ ‘‘பத³ஸா பவிஸந்தியா ஆபத்தீ’’தி. இமினா ஸசேபி ஹத்தி²பிட்டி²ஆதீ³ஹி வா இத்³தி⁴யா வா பவிஸதி, வட்டதியேவாதி த³ஸ்ஸேதி. அயமெத்த² ஸங்கே²போ, வித்தா²ரோ பன ஸமந்தபாஸாதி³காய (பாசி॰ அட்ட²॰ 692) வுத்தோதி அதி⁴ப்பாயோ.
Vuttaṃ. ‘‘Paṭhamaṃ pādaṃ atikkāmentiyā’’tiādivacanato (pāci. 692) padasā gamanameva idhādhippetanti āha ‘‘padasā pavisantiyā āpattī’’ti. Iminā sacepi hatthipiṭṭhiādīhi vā iddhiyā vā pavisati, vaṭṭatiyevāti dasseti. Ayamettha saṅkhepo, vitthāro pana samantapāsādikāya (pāci. aṭṭha. 692) vuttoti adhippāyo.
நதி³பாரக³மனே வுத்தலக்க²ணாய நதி³யாதி ‘‘நதீ³ நாம திமண்ட³லங் படிச்சா²தெ³த்வா யத்த² கத்த²சி உத்தரந்தியா அந்தரவாஸகோ தேமியதீ’’தி (பாசி॰ 692) நதி³பாரக³மனவிப⁴ங்கே³ வுத்தலக்க²ணாய நதி³யா. நதி³பாரக³மனவிப⁴ங்கோ³ ஹி இத⁴ நதி³பாரக³மனஸத்³தே³ன வுத்தோ. புன ஓரிமதீரமேவ பச்சுத்தரந்தியா வாதி பரதீரங் க³ந்துகாமதாய ஓதிண்ணத்தா வுத்தங். இதரிஸ்ஸா பன அயங் பக்கந்தட்டா²னே டி²தா ஹோதி, தஸ்மா பரதீரங் க³ச்ச²ந்தியா அனாபத்தி. ஸசே ஸஜ்ஜா²யங் வா பதா⁴னங் வா அஞ்ஞங் வா கிஞ்சி கம்மங் குருமானா ‘‘புரே அருணேயேவ து³தியிகாய ஸந்திகங் க³மிஸ்ஸாமீ’’தி (பாசி॰ அட்ட²॰ 692) ஆபோ⁴க³ங் கரோதி, அஜானந்தியா ஏவ தஸ்ஸா அருணோ உக்³க³ச்ச²தி , அனாபத்தீதி ஆஹ ‘‘புரே அருணேயேவா’’திஆதி³. அத² பன ‘‘யாவ அருணுக்³க³மனா இதே⁴வ ப⁴விஸ்ஸாமீ’’தி வா அனாபோ⁴கே³ன வா விஹாரஸ்ஸ ஏகதே³ஸே அச்ச²தி, து³தியிகாய ஹத்த²பாஸங் ந ஓதரதி, அருணுக்³க³மனே ஸங்கா⁴தி³ஸேஸோ. ஹத்த²பாஸோயேவ ஹி இத⁴ பமாணங். ஹத்த²பாஸாதிக்கமே ஏகக³ப்³போ⁴பி ந ரக்க²தி. தேனாஹ ‘‘ஏகக³ப்³பே⁴…பே॰… ஆபத்தீ’’தி.
Nadipāragamane vuttalakkhaṇāya nadiyāti ‘‘nadī nāma timaṇḍalaṃ paṭicchādetvā yattha katthaci uttarantiyā antaravāsako temiyatī’’ti (pāci. 692) nadipāragamanavibhaṅge vuttalakkhaṇāya nadiyā. Nadipāragamanavibhaṅgo hi idha nadipāragamanasaddena vutto. Puna orimatīrameva paccuttarantiyā vāti paratīraṃ gantukāmatāya otiṇṇattā vuttaṃ. Itarissā pana ayaṃ pakkantaṭṭhāne ṭhitā hoti, tasmā paratīraṃ gacchantiyā anāpatti. Sace sajjhāyaṃ vā padhānaṃ vā aññaṃ vā kiñci kammaṃ kurumānā ‘‘pure aruṇeyeva dutiyikāya santikaṃ gamissāmī’’ti (pāci. aṭṭha. 692) ābhogaṃ karoti, ajānantiyā eva tassā aruṇo uggacchati , anāpattīti āha ‘‘pure aruṇeyevā’’tiādi. Atha pana ‘‘yāva aruṇuggamanā idheva bhavissāmī’’ti vā anābhogena vā vihārassa ekadese acchati, dutiyikāya hatthapāsaṃ na otarati, aruṇuggamane saṅghādiseso. Hatthapāsoyeva hi idha pamāṇaṃ. Hatthapāsātikkame ekagabbhopi na rakkhati. Tenāha ‘‘ekagabbhe…pe… āpattī’’ti.
த³ஸ்ஸனூபசாரங் வா ஸவனூபசாரங் வாதி எத்த² த³ஸ்ஸனூபசாரோ நாம யத்த² டி²தங் து³தியிகா பஸ்ஸதி. ஸவனூபசாரோ நாம யத்த² டி²தா மக்³க³மூள்ஹஸத்³தே³ன விய, த⁴ம்மஸ்ஸவனாரோசனஸத்³தே³ன விய ச ‘‘அய்யே’’தி ஸத்³தா³யந்தியா ஸத்³த³ங் ஸுணாதி. தஸ்மாதி யஸ்மா ஓஹீயனங் நாம த³ஸ்ஸனூபசாரஸவனூபசாரானமஞ்ஞதரஸ்ஸ விஜஹனங், தஸ்மா. அந்தோகா³மே பன ஓஹீயனங் வட்டதீதி ஆஹ ‘‘இந்த³கீ²லாதிக்கமதோ பட்டா²யா’’தி ஆதி³. தத்த² இந்த³கீ²லாதிக்கமதோதி உம்மாராதிக்கமதோ. ப³ஹிகா³மேதி கா³மஸ்ஸ ப³ஹிபதே³ஸே. மக்³க³மூள்ஹா உச்சாஸத்³த³ங் கரொந்தீதி ஆஹ ‘‘மக்³க³மூள்ஹஸத்³தே³ன வியா’’தி. மக்³க³மூள்ஹங் அவ்ஹாயந்தஸ்ஸ ஸத்³தே³ன வியாதிபி வத³ந்தி. ஸத்³தா³யந்தியாதி ஸத்³த³ங் கரொந்தியா. ‘‘ஸத்³த³ஸ்ஸவனாதிக்கமே ஆபத்தியேவா’’தி இமினா த³ஸ்ஸனூபசாரோ ஏவரூபே ஸவனூபசாரே விஜஹிதே ந ரக்க²தி, ஜஹிதமத்தேவ ஆபத்தி ஸங்கா⁴தி³ஸேஸஸ்ஸாதி த³ஸ்ஸேதி.
Dassanūpacāraṃ vā savanūpacāraṃ vāti ettha dassanūpacāro nāma yattha ṭhitaṃ dutiyikā passati. Savanūpacāro nāma yattha ṭhitā maggamūḷhasaddena viya, dhammassavanārocanasaddena viya ca ‘‘ayye’’ti saddāyantiyā saddaṃ suṇāti. Tasmāti yasmā ohīyanaṃ nāma dassanūpacārasavanūpacārānamaññatarassa vijahanaṃ, tasmā. Antogāme pana ohīyanaṃ vaṭṭatīti āha ‘‘indakhīlātikkamato paṭṭhāyā’’ti ādi. Tattha indakhīlātikkamatoti ummārātikkamato. Bahigāmeti gāmassa bahipadese. Maggamūḷhā uccāsaddaṃ karontīti āha ‘‘maggamūḷhasaddena viyā’’ti. Maggamūḷhaṃ avhāyantassa saddena viyātipi vadanti. Saddāyantiyāti saddaṃ karontiyā. ‘‘Saddassavanātikkame āpattiyevā’’ti iminā dassanūpacāro evarūpe savanūpacāre vijahite na rakkhati, jahitamatteva āpatti saṅghādisesassāti dasseti.
மக்³க³ங் க³ச்ச²ந்தீதி ஏகமக்³க³ங் க³ச்ச²ந்தி. ஸசே புரிமாயோ அஞ்ஞேன மக்³கே³ன க³ச்ச²ந்தி, பக்கந்தா நாம ஹொந்தி, அனாபத்தியேவ. த்³வின்னங் க³ச்ச²ந்தீனங் ஏகா அனுப³ந்தி⁴துங் அஸக்கொந்தீ ‘‘க³ச்ச²து அய’’ந்தி ஓஹீயதி, இதராபி ‘‘ஓஹீயது அய’’ந்தி க³ச்ச²தி, த்³வின்னம்பி ஆபத்தி. ஸசே பன க³ச்ச²ந்தீஸு புரிமாபி அஞ்ஞங் மக்³க³ங் க³ண்ஹாதி, பச்சி²மாபி அஞ்ஞங், ஏகா ஏகிஸ்ஸா பக்கந்தட்டா²னே திட்ட²தி, த்³வின்னம்பி அனாபத்தி.
Maggaṃ gacchantīti ekamaggaṃ gacchanti. Sace purimāyo aññena maggena gacchanti, pakkantā nāma honti, anāpattiyeva. Dvinnaṃ gacchantīnaṃ ekā anubandhituṃ asakkontī ‘‘gacchatu aya’’nti ohīyati, itarāpi ‘‘ohīyatu aya’’nti gacchati, dvinnampi āpatti. Sace pana gacchantīsu purimāpi aññaṃ maggaṃ gaṇhāti, pacchimāpi aññaṃ, ekā ekissā pakkantaṭṭhāne tiṭṭhati, dvinnampi anāpatti.
‘‘ஸங்கா⁴தி³ஸேஸா சதுரோ’’தி (பரி॰ அட்ட²॰ 479) அயங் பஞ்ஹோ அருணுக்³க³மனே கா³மந்தரபரியாபன்னங் நதி³பாரங் ஓக்கந்தபி⁴க்கு²னிங் ஸந்தா⁴ய வுத்தோ. ஸா ஹி ஸககா³மதோ பச்சூஸஸமயே நிக்க²மித்வா அருணுக்³க³மனகாலே வுத்தப்பகாரங் நதி³பாரங் ஓக்கந்தமத்தாவ ரத்திவிப்பவாஸகா³மந்தரனதி³பாரக³மனக³ணம்ஹாஓஹீயனலக்க²ணே ஏகப்பஹாரேனேவ சதுரோ ஸங்கா⁴தி³ஸேஸே ஆபஜ்ஜதி.
‘‘Saṅghādisesā caturo’’ti (pari. aṭṭha. 479) ayaṃ pañho aruṇuggamane gāmantarapariyāpannaṃ nadipāraṃ okkantabhikkhuniṃ sandhāya vutto. Sā hi sakagāmato paccūsasamaye nikkhamitvā aruṇuggamanakāle vuttappakāraṃ nadipāraṃ okkantamattāva rattivippavāsagāmantaranadipāragamanagaṇamhāohīyanalakkhaṇe ekappahāreneva caturo saṅghādisese āpajjati.
பக்க²ஸங்கந்தாய வாதி தித்தா²யதனங் ஸங்கந்தாய. அனந்தராயேனாதி ஹத்தி²மோசனாதி³அந்தராயங் வினா.
Pakkhasaṅkantāya vāti titthāyatanaṃ saṅkantāya. Anantarāyenāti hatthimocanādiantarāyaṃ vinā.
ஏககா³மந்தரக³மனஸிக்கா²பத³வண்ணனா நிட்டி²தா.
Ekagāmantaragamanasikkhāpadavaṇṇanā niṭṭhitā.
