| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
3. ஏககா³மந்தரக³மனஸிக்கா²பத³வண்ணனா
3. Ekagāmantaragamanasikkhāpadavaṇṇanā
‘‘ஆபோ⁴க³ங் வினா’’தி வுத்தத்தா ஆபோ⁴கே³ ஸதி அனாபத்தி, இமஸ்மிங் பன ஸிக்கா²பதே³ ஸமந்தபாஸாதி³காயங் உபசாராதிக்கமே ஆபத்தி வுத்தா, இத⁴ ஓக்கமே. த்³வீஸுபி வுத்தங் அத்த²தோ ஏகமேவ கா³மந்தரக³மனஸங்கா⁴தி³ஸேஸங் உபசாரஸ்ஸ ஸந்தா⁴ய வுத்தத்தா. க³ணம்ஹா ஓஹீயனஸ்ஸ விரோதோ⁴. ‘‘அரஞ்ஞே’’தி இத³ங் அத்த²வஸேன வுத்தங், கா³மந்தரேபி ஹோதி ஏவ.
‘‘Ābhogaṃ vinā’’ti vuttattā ābhoge sati anāpatti, imasmiṃ pana sikkhāpade samantapāsādikāyaṃ upacārātikkame āpatti vuttā, idha okkame. Dvīsupi vuttaṃ atthato ekameva gāmantaragamanasaṅghādisesaṃ upacārassa sandhāya vuttattā. Gaṇamhā ohīyanassa virodho. ‘‘Araññe’’ti idaṃ atthavasena vuttaṃ, gāmantarepi hoti eva.
ஸிக்கா²பதா³ பு³த்³த⁴வரேன வண்ணிதாதி கா³தா²ய வஸேன, அட்ட²கதா²யம்பி கா³மந்தரபரியாபன்னங் நதி³பாரந்தி வுத்தங்.
Sikkhāpadābuddhavarena vaṇṇitāti gāthāya vasena, aṭṭhakathāyampi gāmantarapariyāpannaṃ nadipāranti vuttaṃ.
ஏககா³மந்தரக³மனஸிக்கா²பத³வண்ணனா நிட்டி²தா.
Ekagāmantaragamanasikkhāpadavaṇṇanā niṭṭhitā.
‘‘சா²த³னபச்சயா பன து³க்கடங் ஆபஜ்ஜதீ’’தி இத³ங் –
‘‘Chādanapaccayāpana dukkaṭaṃ āpajjatī’’ti idaṃ –
‘‘ஆபஜ்ஜதி க³ருகங் ஸாவஸேஸங்;
‘‘Āpajjati garukaṃ sāvasesaṃ;
சா²தே³தி அனாத³ரியங் படிச்ச;
Chādeti anādariyaṃ paṭicca;
ந பி⁴க்கு²னீ நோ ச பு²ஸெய்ய வஜ்ஜங்;
Na bhikkhunī no ca phuseyya vajjaṃ;
பஞ்ஹாமேஸா குஸலேஹி சிந்திதா’’தி. (பரி॰ 481) –
Pañhāmesā kusalehi cintitā’’ti. (pari. 481) –
இமாய விருஜ்ஜ²தி. தஸ்மா பமாத³லேகா² விய தி³ஸ்ஸதீதி க³வேஸிதப்³போ³ எத்த² அத்தோ². பி⁴க்கூ²னங் மானத்தகதா²யங் ‘‘பரிக்கி²த்தஸ்ஸ விஹாரஸ்ஸ பரிக்கே²பதோ, அபரிக்கி²த்தஸ்ஸ பரிக்கே²பாரஹட்டா²னதோ த்³வே லெட்³டு³பாதே அதிக்கமித்வா’’தி (கங்கா²॰ அட்ட²॰ நிக³மனவண்ணனா) வுத்தங், இத⁴ பன ‘‘கா³மூபசாரதோ ச பி⁴க்கூ²னங் விஹாரூபசாரதோ ச த்³வே லெட்³டு³பாதே’’திஆதி³ வுத்தங். தத்ர பி⁴க்கூ²னங் வுத்தப்பகாரப்பதே³ஸங் அதிக்கமித்வா கா³மேபி தங் கம்மங் காதுங் வட்டதி, பி⁴க்கு²னீனங் பன கா³மே ந வட்டதி. தஸ்மா ஏவங் வுத்தந்தி ஏகே. அபரே பன பி⁴க்கூ²னம்பி கா³மே ந வட்டதி. பி⁴க்கு²விஹாரோ நாம புப்³பே³ ஏவ கா³மூபசாரங் அதிக்கமித்வா டி²தோ, தஸ்மா கா³மங் அவத்வா விஹாரூபசாரமேவ ஹெட்டா² வுத்தங். பி⁴க்கு²னீனங் விஹாரோ கா³மே ஏவ வட்டதி, ந ப³ஹி, தஸ்மா கா³மூபசாரஞ்ச விஹாரூபசாரஞ்ச உப⁴யமேவெத்த² த³ஸ்ஸிதங். தஸ்மா உப⁴யத்தா²பி அத்த²தோ நானாத்தங் நத்தீ²தி வத³ந்தி. யங் யுஜ்ஜதி, தங் க³ஹேதப்³ப³ங்.
Imāya virujjhati. Tasmā pamādalekhā viya dissatīti gavesitabbo ettha attho. Bhikkhūnaṃ mānattakathāyaṃ ‘‘parikkhittassa vihārassa parikkhepato, aparikkhittassa parikkhepārahaṭṭhānato dve leḍḍupāte atikkamitvā’’ti (kaṅkhā. aṭṭha. nigamanavaṇṇanā) vuttaṃ, idha pana ‘‘gāmūpacārato ca bhikkhūnaṃ vihārūpacārato ca dve leḍḍupāte’’tiādi vuttaṃ. Tatra bhikkhūnaṃ vuttappakārappadesaṃ atikkamitvā gāmepi taṃ kammaṃ kātuṃ vaṭṭati, bhikkhunīnaṃ pana gāme na vaṭṭati. Tasmā evaṃ vuttanti eke. Apare pana bhikkhūnampi gāme na vaṭṭati. Bhikkhuvihāro nāma pubbe eva gāmūpacāraṃ atikkamitvā ṭhito, tasmā gāmaṃ avatvā vihārūpacārameva heṭṭhā vuttaṃ. Bhikkhunīnaṃ vihāro gāme eva vaṭṭati, na bahi, tasmā gāmūpacārañca vihārūpacārañca ubhayamevettha dassitaṃ. Tasmā ubhayatthāpi atthato nānāttaṃ natthīti vadanti. Yaṃ yujjati, taṃ gahetabbaṃ.
ஸங்கா⁴தி³ஸேஸவண்ணனா நிட்டி²தா.
Saṅghādisesavaṇṇanā niṭṭhitā.
