| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৩. একগামন্তরগমনসিক্খাপদৰণ্ণনা
3. Ekagāmantaragamanasikkhāpadavaṇṇanā
অঞ্ঞো গামো গামন্তরং। নদিপারন্তি নদিযা পারিমতীরং। ‘‘গামন্তরং গচ্ছেয্যা’’তি (পাচি॰ ৬৮৭, ৬৯১) ৰুত্তত্তা অঞ্ঞস্মিং গামেযেৰ আপত্তি, ন সকগামেতি আহ ‘‘সকগামতো তাৰা’’তিআদি। পরিক্খেপে ৰা উপচারে ৰা অতিক্কন্তেতি পরিক্খিত্তস্স গামস্স পরিক্খেপে ৰা অপরিক্খিত্তস্স গামস্স পরিক্খেপারহট্ঠানে ৰা অতিক্কন্তে। দুতিযেন অতিক্কন্তমত্তেতি দুতিযেন পাদেন ইতরস্স গামস্স পরিক্খেপে ৰা উপচারে ৰা অতিক্কন্তমত্তে। যেসু পন পোত্থকেসু ‘‘একেন পাদেন ইতরস্স গামস্স পরিক্খেপে ৰা অতিক্কন্তে, উপচারে ৰা ওক্কন্তে থুল্লচ্চযং, দুতিযেন অতিক্কন্তমত্তে, ওক্কন্তমত্তে ৰা সঙ্ঘাদিসেসো’’তি পাঠো দিস্সতি, তত্থ ‘‘ওক্কন্তে, ওক্কন্তমত্তে ৰা’’তি এতানি দ্ৰে পদানি পাল়িযা ৰিরুজ্ঝন্তি। ‘‘অপরিক্খিত্তস্স গামস্স উপচারং অতিক্কামেন্তিযা’’তি (পাচি॰ ৬৯২) হি পাল়ি। তথা সমন্তপাসাদিকাযপি ৰিরুজ্ঝন্তি। তত্থ হি –
Añño gāmo gāmantaraṃ. Nadipāranti nadiyā pārimatīraṃ. ‘‘Gāmantaraṃ gaccheyyā’’ti (pāci. 687, 691) vuttattā aññasmiṃ gāmeyeva āpatti, na sakagāmeti āha ‘‘sakagāmato tāvā’’tiādi. Parikkhepe vā upacāre vā atikkanteti parikkhittassa gāmassa parikkhepe vā aparikkhittassa gāmassa parikkhepārahaṭṭhāne vā atikkante. Dutiyena atikkantamatteti dutiyena pādena itarassa gāmassa parikkhepe vā upacāre vā atikkantamatte. Yesu pana potthakesu ‘‘ekena pādena itarassa gāmassa parikkhepe vā atikkante, upacāre vā okkante thullaccayaṃ, dutiyena atikkantamatte, okkantamatte vā saṅghādiseso’’ti pāṭho dissati, tattha ‘‘okkante, okkantamatte vā’’ti etāni dve padāni pāḷiyā virujjhanti. ‘‘Aparikkhittassa gāmassa upacāraṃ atikkāmentiyā’’ti (pāci. 692) hi pāḷi. Tathā samantapāsādikāyapi virujjhanti. Tattha hi –
‘‘পরিক্খেপারহট্ঠানং একেন পাদেন অতিক্কমতি, থুল্লচ্চযং। দুতিযেন অতিক্কন্তমত্তে সঙ্ঘাদিসেসো। অপিচেত্থ সকগামতো…পে॰… একেন পাদেন ইতরস্স গামস্স পরিক্খেপে ৰা উপচারেৰা অতিক্কন্তমত্তে থুল্লচ্চযং, দুতিযেন অতিক্কন্তমত্তে সঙ্ঘাদিসেসো’’তি –
‘‘Parikkhepārahaṭṭhānaṃ ekena pādena atikkamati, thullaccayaṃ. Dutiyena atikkantamatte saṅghādiseso. Apicettha sakagāmato…pe… ekena pādena itarassa gāmassa parikkhepe vā upacārevā atikkantamatte thullaccayaṃ, dutiyena atikkantamatte saṅghādiseso’’ti –
ৰুত্তং। ‘‘পঠমং পাদং অতিক্কামেন্তিযা’’তিআদিৰচনতো (পাচি॰ ৬৯২) পদসা গমনমেৰ ইধাধিপ্পেতন্তি আহ ‘‘পদসা পৰিসন্তিযা আপত্তী’’তি। ইমিনা সচেপি হত্থিপিট্ঠিআদীহি ৰা ইদ্ধিযা ৰা পৰিসতি, ৰট্টতিযেৰাতি দস্সেতি। অযমেত্থ সঙ্খেপো, ৰিত্থারো পন সমন্তপাসাদিকায (পাচি॰ অট্ঠ॰ ৬৯২) ৰুত্তোতি অধিপ্পাযো।
Vuttaṃ. ‘‘Paṭhamaṃ pādaṃ atikkāmentiyā’’tiādivacanato (pāci. 692) padasā gamanameva idhādhippetanti āha ‘‘padasā pavisantiyā āpattī’’ti. Iminā sacepi hatthipiṭṭhiādīhi vā iddhiyā vā pavisati, vaṭṭatiyevāti dasseti. Ayamettha saṅkhepo, vitthāro pana samantapāsādikāya (pāci. aṭṭha. 692) vuttoti adhippāyo.
নদিপারগমনে ৰুত্তলক্খণায নদিযাতি ‘‘নদী নাম তিমণ্ডলং পটিচ্ছাদেত্ৰা যত্থ কত্থচি উত্তরন্তিযা অন্তরৰাসকো তেমিযতী’’তি (পাচি॰ ৬৯২) নদিপারগমনৰিভঙ্গে ৰুত্তলক্খণায নদিযা। নদিপারগমনৰিভঙ্গো হি ইধ নদিপারগমনসদ্দেন ৰুত্তো। পুন ওরিমতীরমেৰ পচ্চুত্তরন্তিযা ৰাতি পরতীরং গন্তুকামতায ওতিণ্ণত্তা ৰুত্তং। ইতরিস্সা পন অযং পক্কন্তট্ঠানে ঠিতা হোতি, তস্মা পরতীরং গচ্ছন্তিযা অনাপত্তি। সচে সজ্ঝাযং ৰা পধানং ৰা অঞ্ঞং ৰা কিঞ্চি কম্মং কুরুমানা ‘‘পুরে অরুণেযেৰ দুতিযিকায সন্তিকং গমিস্সামী’’তি (পাচি॰ অট্ঠ॰ ৬৯২) আভোগং করোতি, অজানন্তিযা এৰ তস্সা অরুণো উগ্গচ্ছতি , অনাপত্তীতি আহ ‘‘পুরে অরুণেযেৰা’’তিআদি। অথ পন ‘‘যাৰ অরুণুগ্গমনা ইধেৰ ভৰিস্সামী’’তি ৰা অনাভোগেন ৰা ৰিহারস্স একদেসে অচ্ছতি, দুতিযিকায হত্থপাসং ন ওতরতি, অরুণুগ্গমনে সঙ্ঘাদিসেসো। হত্থপাসোযেৰ হি ইধ পমাণং। হত্থপাসাতিক্কমে একগব্ভোপি ন রক্খতি। তেনাহ ‘‘একগব্ভে…পে॰… আপত্তী’’তি।
Nadipāragamane vuttalakkhaṇāya nadiyāti ‘‘nadī nāma timaṇḍalaṃ paṭicchādetvā yattha katthaci uttarantiyā antaravāsako temiyatī’’ti (pāci. 692) nadipāragamanavibhaṅge vuttalakkhaṇāya nadiyā. Nadipāragamanavibhaṅgo hi idha nadipāragamanasaddena vutto. Puna orimatīrameva paccuttarantiyā vāti paratīraṃ gantukāmatāya otiṇṇattā vuttaṃ. Itarissā pana ayaṃ pakkantaṭṭhāne ṭhitā hoti, tasmā paratīraṃ gacchantiyā anāpatti. Sace sajjhāyaṃ vā padhānaṃ vā aññaṃ vā kiñci kammaṃ kurumānā ‘‘pure aruṇeyeva dutiyikāya santikaṃ gamissāmī’’ti (pāci. aṭṭha. 692) ābhogaṃ karoti, ajānantiyā eva tassā aruṇo uggacchati , anāpattīti āha ‘‘pure aruṇeyevā’’tiādi. Atha pana ‘‘yāva aruṇuggamanā idheva bhavissāmī’’ti vā anābhogena vā vihārassa ekadese acchati, dutiyikāya hatthapāsaṃ na otarati, aruṇuggamane saṅghādiseso. Hatthapāsoyeva hi idha pamāṇaṃ. Hatthapāsātikkame ekagabbhopi na rakkhati. Tenāha ‘‘ekagabbhe…pe… āpattī’’ti.
দস্সনূপচারং ৰা সৰনূপচারং ৰাতি এত্থ দস্সনূপচারো নাম যত্থ ঠিতং দুতিযিকা পস্সতি। সৰনূপচারো নাম যত্থ ঠিতা মগ্গমূল়্হসদ্দেন ৰিয, ধম্মস্সৰনারোচনসদ্দেন ৰিয চ ‘‘অয্যে’’তি সদ্দাযন্তিযা সদ্দং সুণাতি। তস্মাতি যস্মা ওহীযনং নাম দস্সনূপচারসৰনূপচারানমঞ্ঞতরস্স ৰিজহনং, তস্মা। অন্তোগামে পন ওহীযনং ৰট্টতীতি আহ ‘‘ইন্দখীলাতিক্কমতো পট্ঠাযা’’তি আদি। তত্থ ইন্দখীলাতিক্কমতোতি উম্মারাতিক্কমতো। বহিগামেতি গামস্স বহিপদেসে। মগ্গমূল়্হা উচ্চাসদ্দং করোন্তীতি আহ ‘‘মগ্গমূল়্হসদ্দেন ৰিযা’’তি। মগ্গমূল়্হং অৰ্হাযন্তস্স সদ্দেন ৰিযাতিপি ৰদন্তি। সদ্দাযন্তিযাতি সদ্দং করোন্তিযা। ‘‘সদ্দস্সৰনাতিক্কমে আপত্তিযেৰা’’তি ইমিনা দস্সনূপচারো এৰরূপে সৰনূপচারে ৰিজহিতে ন রক্খতি, জহিতমত্তেৰ আপত্তি সঙ্ঘাদিসেসস্সাতি দস্সেতি।
Dassanūpacāraṃ vā savanūpacāraṃ vāti ettha dassanūpacāro nāma yattha ṭhitaṃ dutiyikā passati. Savanūpacāro nāma yattha ṭhitā maggamūḷhasaddena viya, dhammassavanārocanasaddena viya ca ‘‘ayye’’ti saddāyantiyā saddaṃ suṇāti. Tasmāti yasmā ohīyanaṃ nāma dassanūpacārasavanūpacārānamaññatarassa vijahanaṃ, tasmā. Antogāme pana ohīyanaṃ vaṭṭatīti āha ‘‘indakhīlātikkamato paṭṭhāyā’’ti ādi. Tattha indakhīlātikkamatoti ummārātikkamato. Bahigāmeti gāmassa bahipadese. Maggamūḷhā uccāsaddaṃ karontīti āha ‘‘maggamūḷhasaddena viyā’’ti. Maggamūḷhaṃ avhāyantassa saddena viyātipi vadanti. Saddāyantiyāti saddaṃ karontiyā. ‘‘Saddassavanātikkame āpattiyevā’’ti iminā dassanūpacāro evarūpe savanūpacāre vijahite na rakkhati, jahitamatteva āpatti saṅghādisesassāti dasseti.
মগ্গং গচ্ছন্তীতি একমগ্গং গচ্ছন্তি। সচে পুরিমাযো অঞ্ঞেন মগ্গেন গচ্ছন্তি, পক্কন্তা নাম হোন্তি, অনাপত্তিযেৰ। দ্ৰিন্নং গচ্ছন্তীনং একা অনুবন্ধিতুং অসক্কোন্তী ‘‘গচ্ছতু অয’’ন্তি ওহীযতি, ইতরাপি ‘‘ওহীযতু অয’’ন্তি গচ্ছতি, দ্ৰিন্নম্পি আপত্তি। সচে পন গচ্ছন্তীসু পুরিমাপি অঞ্ঞং মগ্গং গণ্হাতি, পচ্ছিমাপি অঞ্ঞং, একা একিস্সা পক্কন্তট্ঠানে তিট্ঠতি, দ্ৰিন্নম্পি অনাপত্তি।
Maggaṃ gacchantīti ekamaggaṃ gacchanti. Sace purimāyo aññena maggena gacchanti, pakkantā nāma honti, anāpattiyeva. Dvinnaṃ gacchantīnaṃ ekā anubandhituṃ asakkontī ‘‘gacchatu aya’’nti ohīyati, itarāpi ‘‘ohīyatu aya’’nti gacchati, dvinnampi āpatti. Sace pana gacchantīsu purimāpi aññaṃ maggaṃ gaṇhāti, pacchimāpi aññaṃ, ekā ekissā pakkantaṭṭhāne tiṭṭhati, dvinnampi anāpatti.
‘‘সঙ্ঘাদিসেসা চতুরো’’তি (পরি॰ অট্ঠ॰ ৪৭৯) অযং পঞ্হো অরুণুগ্গমনে গামন্তরপরিযাপন্নং নদিপারং ওক্কন্তভিক্খুনিং সন্ধায ৰুত্তো। সা হি সকগামতো পচ্চূসসমযে নিক্খমিত্ৰা অরুণুগ্গমনকালে ৰুত্তপ্পকারং নদিপারং ওক্কন্তমত্তাৰ রত্তিৰিপ্পৰাসগামন্তরনদিপারগমনগণম্হাওহীযনলক্খণে একপ্পহারেনেৰ চতুরো সঙ্ঘাদিসেসে আপজ্জতি।
‘‘Saṅghādisesā caturo’’ti (pari. aṭṭha. 479) ayaṃ pañho aruṇuggamane gāmantarapariyāpannaṃ nadipāraṃ okkantabhikkhuniṃ sandhāya vutto. Sā hi sakagāmato paccūsasamaye nikkhamitvā aruṇuggamanakāle vuttappakāraṃ nadipāraṃ okkantamattāva rattivippavāsagāmantaranadipāragamanagaṇamhāohīyanalakkhaṇe ekappahāreneva caturo saṅghādisese āpajjati.
পক্খসঙ্কন্তায ৰাতি তিত্থাযতনং সঙ্কন্তায। অনন্তরাযেনাতি হত্থিমোচনাদিঅন্তরাযং ৰিনা।
Pakkhasaṅkantāya vāti titthāyatanaṃ saṅkantāya. Anantarāyenāti hatthimocanādiantarāyaṃ vinā.
একগামন্তরগমনসিক্খাপদৰণ্ণনা নিট্ঠিতা।
Ekagāmantaragamanasikkhāpadavaṇṇanā niṭṭhitā.
