| Library / Tipiṭaka / তিপিটক • Tipiṭaka / কঙ্খাৰিতরণী-পুরাণ-টীকা • Kaṅkhāvitaraṇī-purāṇa-ṭīkā |
৩. একগামন্তরগমনসিক্খাপদৰণ্ণনা
3. Ekagāmantaragamanasikkhāpadavaṇṇanā
‘‘আভোগং ৰিনা’’তি ৰুত্তত্তা আভোগে সতি অনাপত্তি, ইমস্মিং পন সিক্খাপদে সমন্তপাসাদিকাযং উপচারাতিক্কমে আপত্তি ৰুত্তা, ইধ ওক্কমে। দ্ৰীসুপি ৰুত্তং অত্থতো একমেৰ গামন্তরগমনসঙ্ঘাদিসেসং উপচারস্স সন্ধায ৰুত্তত্তা। গণম্হা ওহীযনস্স ৰিরোধো। ‘‘অরঞ্ঞে’’তি ইদং অত্থৰসেন ৰুত্তং, গামন্তরেপি হোতি এৰ।
‘‘Ābhogaṃ vinā’’ti vuttattā ābhoge sati anāpatti, imasmiṃ pana sikkhāpade samantapāsādikāyaṃ upacārātikkame āpatti vuttā, idha okkame. Dvīsupi vuttaṃ atthato ekameva gāmantaragamanasaṅghādisesaṃ upacārassa sandhāya vuttattā. Gaṇamhā ohīyanassa virodho. ‘‘Araññe’’ti idaṃ atthavasena vuttaṃ, gāmantarepi hoti eva.
সিক্খাপদা বুদ্ধৰরেন ৰণ্ণিতাতি গাথায ৰসেন, অট্ঠকথাযম্পি গামন্তরপরিযাপন্নং নদিপারন্তি ৰুত্তং।
Sikkhāpadābuddhavarena vaṇṇitāti gāthāya vasena, aṭṭhakathāyampi gāmantarapariyāpannaṃ nadipāranti vuttaṃ.
একগামন্তরগমনসিক্খাপদৰণ্ণনা নিট্ঠিতা।
Ekagāmantaragamanasikkhāpadavaṇṇanā niṭṭhitā.
‘‘ছাদনপচ্চযা পন দুক্কটং আপজ্জতী’’তি ইদং –
‘‘Chādanapaccayāpana dukkaṭaṃ āpajjatī’’ti idaṃ –
‘‘আপজ্জতি গরুকং সাৰসেসং।
‘‘Āpajjati garukaṃ sāvasesaṃ;
ছাদেতি অনাদরিযং পটিচ্চ।
Chādeti anādariyaṃ paṭicca;
ন ভিক্খুনী নো চ ফুসেয্য ৰজ্জং।
Na bhikkhunī no ca phuseyya vajjaṃ;
পঞ্হামেসা কুসলেহি চিন্তিতা’’তি॥ (পরি॰ ৪৮১) –
Pañhāmesā kusalehi cintitā’’ti. (pari. 481) –
ইমায ৰিরুজ্ঝতি। তস্মা পমাদলেখা ৰিয দিস্সতীতি গৰেসিতব্বো এত্থ অত্থো। ভিক্খূনং মানত্তকথাযং ‘‘পরিক্খিত্তস্স ৰিহারস্স পরিক্খেপতো, অপরিক্খিত্তস্স পরিক্খেপারহট্ঠানতো দ্ৰে লেড্ডুপাতে অতিক্কমিত্ৰা’’তি (কঙ্খা॰ অট্ঠ॰ নিগমনৰণ্ণনা) ৰুত্তং, ইধ পন ‘‘গামূপচারতো চ ভিক্খূনং ৰিহারূপচারতো চ দ্ৰে লেড্ডুপাতে’’তিআদি ৰুত্তং। তত্র ভিক্খূনং ৰুত্তপ্পকারপ্পদেসং অতিক্কমিত্ৰা গামেপি তং কম্মং কাতুং ৰট্টতি, ভিক্খুনীনং পন গামে ন ৰট্টতি। তস্মা এৰং ৰুত্তন্তি একে। অপরে পন ভিক্খূনম্পি গামে ন ৰট্টতি। ভিক্খুৰিহারো নাম পুব্বে এৰ গামূপচারং অতিক্কমিত্ৰা ঠিতো, তস্মা গামং অৰত্ৰা ৰিহারূপচারমেৰ হেট্ঠা ৰুত্তং। ভিক্খুনীনং ৰিহারো গামে এৰ ৰট্টতি, ন বহি, তস্মা গামূপচারঞ্চ ৰিহারূপচারঞ্চ উভযমেৰেত্থ দস্সিতং। তস্মা উভযত্থাপি অত্থতো নানাত্তং নত্থীতি ৰদন্তি। যং যুজ্জতি, তং গহেতব্বং।
Imāya virujjhati. Tasmā pamādalekhā viya dissatīti gavesitabbo ettha attho. Bhikkhūnaṃ mānattakathāyaṃ ‘‘parikkhittassa vihārassa parikkhepato, aparikkhittassa parikkhepārahaṭṭhānato dve leḍḍupāte atikkamitvā’’ti (kaṅkhā. aṭṭha. nigamanavaṇṇanā) vuttaṃ, idha pana ‘‘gāmūpacārato ca bhikkhūnaṃ vihārūpacārato ca dve leḍḍupāte’’tiādi vuttaṃ. Tatra bhikkhūnaṃ vuttappakārappadesaṃ atikkamitvā gāmepi taṃ kammaṃ kātuṃ vaṭṭati, bhikkhunīnaṃ pana gāme na vaṭṭati. Tasmā evaṃ vuttanti eke. Apare pana bhikkhūnampi gāme na vaṭṭati. Bhikkhuvihāro nāma pubbe eva gāmūpacāraṃ atikkamitvā ṭhito, tasmā gāmaṃ avatvā vihārūpacārameva heṭṭhā vuttaṃ. Bhikkhunīnaṃ vihāro gāme eva vaṭṭati, na bahi, tasmā gāmūpacārañca vihārūpacārañca ubhayamevettha dassitaṃ. Tasmā ubhayatthāpi atthato nānāttaṃ natthīti vadanti. Yaṃ yujjati, taṃ gahetabbaṃ.
সঙ্ঘাদিসেসৰণ্ণনা নিট্ঠিতা।
Saṅghādisesavaṇṇanā niṭṭhitā.
