| Library / Tipiṭaka / तिपिटक • Tipiṭaka / कङ्खावितरणी-पुराण-टीका • Kaṅkhāvitaraṇī-purāṇa-ṭīkā |
३. एकगामन्तरगमनसिक्खापदवण्णना
3. Ekagāmantaragamanasikkhāpadavaṇṇanā
‘‘आभोगं विना’’ति वुत्तत्ता आभोगे सति अनापत्ति, इमस्मिं पन सिक्खापदे समन्तपासादिकायं उपचारातिक्कमे आपत्ति वुत्ता, इध ओक्कमे। द्वीसुपि वुत्तं अत्थतो एकमेव गामन्तरगमनसङ्घादिसेसं उपचारस्स सन्धाय वुत्तत्ता। गणम्हा ओहीयनस्स विरोधो। ‘‘अरञ्ञे’’ति इदं अत्थवसेन वुत्तं, गामन्तरेपि होति एव।
‘‘Ābhogaṃ vinā’’ti vuttattā ābhoge sati anāpatti, imasmiṃ pana sikkhāpade samantapāsādikāyaṃ upacārātikkame āpatti vuttā, idha okkame. Dvīsupi vuttaṃ atthato ekameva gāmantaragamanasaṅghādisesaṃ upacārassa sandhāya vuttattā. Gaṇamhā ohīyanassa virodho. ‘‘Araññe’’ti idaṃ atthavasena vuttaṃ, gāmantarepi hoti eva.
सिक्खापदा बुद्धवरेन वण्णिताति गाथाय वसेन, अट्ठकथायम्पि गामन्तरपरियापन्नं नदिपारन्ति वुत्तं।
Sikkhāpadābuddhavarena vaṇṇitāti gāthāya vasena, aṭṭhakathāyampi gāmantarapariyāpannaṃ nadipāranti vuttaṃ.
एकगामन्तरगमनसिक्खापदवण्णना निट्ठिता।
Ekagāmantaragamanasikkhāpadavaṇṇanā niṭṭhitā.
‘‘छादनपच्चया पन दुक्कटं आपज्जती’’ति इदं –
‘‘Chādanapaccayāpana dukkaṭaṃ āpajjatī’’ti idaṃ –
‘‘आपज्जति गरुकं सावसेसं।
‘‘Āpajjati garukaṃ sāvasesaṃ;
छादेति अनादरियं पटिच्च।
Chādeti anādariyaṃ paṭicca;
न भिक्खुनी नो च फुसेय्य वज्जं।
Na bhikkhunī no ca phuseyya vajjaṃ;
पञ्हामेसा कुसलेहि चिन्तिता’’ति॥ (परि॰ ४८१) –
Pañhāmesā kusalehi cintitā’’ti. (pari. 481) –
इमाय विरुज्झति। तस्मा पमादलेखा विय दिस्सतीति गवेसितब्बो एत्थ अत्थो। भिक्खूनं मानत्तकथायं ‘‘परिक्खित्तस्स विहारस्स परिक्खेपतो, अपरिक्खित्तस्स परिक्खेपारहट्ठानतो द्वे लेड्डुपाते अतिक्कमित्वा’’ति (कङ्खा॰ अट्ठ॰ निगमनवण्णना) वुत्तं, इध पन ‘‘गामूपचारतो च भिक्खूनं विहारूपचारतो च द्वे लेड्डुपाते’’तिआदि वुत्तं। तत्र भिक्खूनं वुत्तप्पकारप्पदेसं अतिक्कमित्वा गामेपि तं कम्मं कातुं वट्टति, भिक्खुनीनं पन गामे न वट्टति। तस्मा एवं वुत्तन्ति एके। अपरे पन भिक्खूनम्पि गामे न वट्टति। भिक्खुविहारो नाम पुब्बे एव गामूपचारं अतिक्कमित्वा ठितो, तस्मा गामं अवत्वा विहारूपचारमेव हेट्ठा वुत्तं। भिक्खुनीनं विहारो गामे एव वट्टति, न बहि, तस्मा गामूपचारञ्च विहारूपचारञ्च उभयमेवेत्थ दस्सितं। तस्मा उभयत्थापि अत्थतो नानात्तं नत्थीति वदन्ति। यं युज्जति, तं गहेतब्बं।
Imāya virujjhati. Tasmā pamādalekhā viya dissatīti gavesitabbo ettha attho. Bhikkhūnaṃ mānattakathāyaṃ ‘‘parikkhittassa vihārassa parikkhepato, aparikkhittassa parikkhepārahaṭṭhānato dve leḍḍupāte atikkamitvā’’ti (kaṅkhā. aṭṭha. nigamanavaṇṇanā) vuttaṃ, idha pana ‘‘gāmūpacārato ca bhikkhūnaṃ vihārūpacārato ca dve leḍḍupāte’’tiādi vuttaṃ. Tatra bhikkhūnaṃ vuttappakārappadesaṃ atikkamitvā gāmepi taṃ kammaṃ kātuṃ vaṭṭati, bhikkhunīnaṃ pana gāme na vaṭṭati. Tasmā evaṃ vuttanti eke. Apare pana bhikkhūnampi gāme na vaṭṭati. Bhikkhuvihāro nāma pubbe eva gāmūpacāraṃ atikkamitvā ṭhito, tasmā gāmaṃ avatvā vihārūpacārameva heṭṭhā vuttaṃ. Bhikkhunīnaṃ vihāro gāme eva vaṭṭati, na bahi, tasmā gāmūpacārañca vihārūpacārañca ubhayamevettha dassitaṃ. Tasmā ubhayatthāpi atthato nānāttaṃ natthīti vadanti. Yaṃ yujjati, taṃ gahetabbaṃ.
सङ्घादिसेसवण्णना निट्ठिता।
Saṅghādisesavaṇṇanā niṭṭhitā.
