| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
ஏகாஹப்படிச்ச²ன்னஅப்³பா⁴னங்
Ekāhappaṭicchannaabbhānaṃ
106. ஸோ சிண்ணமானத்தோ பி⁴க்கூ²னங் ஆரோசேஸி – ‘‘அஹங், ஆவுஸோ, ஏகங் ஆபத்திங் ஆபஜ்ஜிங் ஸஞ்சேதனிகங் ஸுக்கவிஸ்ஸட்டி²ங் ஏகாஹப்படிச்ச²ன்னங். ஸோஹங் ஸங்க⁴ங் ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய ஏகாஹபரிவாஸங் யாசிங். தஸ்ஸ மே ஸங்கோ⁴ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய ஏகாஹபரிவாஸங் அதா³ஸி. ஸோஹங் பரிவுத்த²பரிவாஸோ ஸங்க⁴ங் ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய சா²ரத்தங் மானத்தங் யாசிங். தஸ்ஸ மே ஸங்கோ⁴ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய சா²ரத்தங் மானத்தங் அதா³ஸி. ஸோஹங் சிண்ணமானத்தோ. கத²ங் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். ‘‘தேன ஹி, பி⁴க்க²வே, ஸங்கோ⁴ உதா³யிங் பி⁴க்கு²ங் அப்³பே⁴து. ஏவஞ்ச பன, பி⁴க்க²வே, அப்³பே⁴தப்³போ³ –
106. So ciṇṇamānatto bhikkhūnaṃ ārocesi – ‘‘ahaṃ, āvuso, ekaṃ āpattiṃ āpajjiṃ sañcetanikaṃ sukkavissaṭṭhiṃ ekāhappaṭicchannaṃ. Sohaṃ saṅghaṃ ekissā āpattiyā sañcetanikāya sukkavissaṭṭhiyā ekāhappaṭicchannāya ekāhaparivāsaṃ yāciṃ. Tassa me saṅgho ekissā āpattiyā sañcetanikāya sukkavissaṭṭhiyā ekāhappaṭicchannāya ekāhaparivāsaṃ adāsi. Sohaṃ parivutthaparivāso saṅghaṃ ekissā āpattiyā sañcetanikāya sukkavissaṭṭhiyā ekāhappaṭicchannāya chārattaṃ mānattaṃ yāciṃ. Tassa me saṅgho ekissā āpattiyā sañcetanikāya sukkavissaṭṭhiyā ekāhappaṭicchannāya chārattaṃ mānattaṃ adāsi. Sohaṃ ciṇṇamānatto. Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. ‘‘Tena hi, bhikkhave, saṅgho udāyiṃ bhikkhuṃ abbhetu. Evañca pana, bhikkhave, abbhetabbo –
‘‘தேன பி⁴க்க²வே, உதா³யினா பி⁴க்கு²னா ஸங்க⁴ங் உபஸங்கமித்வா…பே॰… ஏவமஸ்ஸ வசனீயோ – ‘அஹங், ப⁴ந்தே, ஏகங் ஆபத்திங் ஆபஜ்ஜிங் ஸஞ்சேதனிகங் ஸுக்கவிஸ்ஸட்டி²ங் ஏகாஹப்படிச்ச²ன்னங். ஸோஹங் ஸங்க⁴ங் ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய ஏகாஹபரிவாஸங் யாசிங். தஸ்ஸ மே ஸங்கோ⁴ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய ஏகாஹபரிவாஸங் அதா³ஸி. ஸோஹங் பரிவுத்த²பரிவாஸோ ஸங்க⁴ங் ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய சா²ரத்தங் மானத்தங் யாசிங். தஸ்ஸ மே ஸங்கோ⁴ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய சா²ரத்தங் மானத்தங் அதா³ஸி. ஸோஹங், ப⁴ந்தே, சிண்ணமானத்தோ ஸங்க⁴ங் அப்³பா⁴னங் யாசாமீ’தி. து³தியம்பி யாசிதப்³ப³ங். ததியம்பி யாசிதப்³ப³ங். ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
‘‘Tena bhikkhave, udāyinā bhikkhunā saṅghaṃ upasaṅkamitvā…pe… evamassa vacanīyo – ‘ahaṃ, bhante, ekaṃ āpattiṃ āpajjiṃ sañcetanikaṃ sukkavissaṭṭhiṃ ekāhappaṭicchannaṃ. Sohaṃ saṅghaṃ ekissā āpattiyā sañcetanikāya sukkavissaṭṭhiyā ekāhappaṭicchannāya ekāhaparivāsaṃ yāciṃ. Tassa me saṅgho ekissā āpattiyā sañcetanikāya sukkavissaṭṭhiyā ekāhappaṭicchannāya ekāhaparivāsaṃ adāsi. Sohaṃ parivutthaparivāso saṅghaṃ ekissā āpattiyā sañcetanikāya sukkavissaṭṭhiyā ekāhappaṭicchannāya chārattaṃ mānattaṃ yāciṃ. Tassa me saṅgho ekissā āpattiyā sañcetanikāya sukkavissaṭṭhiyā ekāhappaṭicchannāya chārattaṃ mānattaṃ adāsi. Sohaṃ, bhante, ciṇṇamānatto saṅghaṃ abbhānaṃ yācāmī’ti. Dutiyampi yācitabbaṃ. Tatiyampi yācitabbaṃ. Byattena bhikkhunā paṭibalena saṅgho ñāpetabbo –
107. ‘‘ஸுணாது மே, ப⁴ந்தே, ஸங்கோ⁴. அயங் உதா³யீ பி⁴க்கு² ஏகங் ஆபத்திங் ஆபஜ்ஜி ஸஞ்சேதனிகங் ஸுக்கவிஸ்ஸட்டி²ங் ஏகாஹப்படிச்ச²ன்னங். ஸோ ஸங்க⁴ங் ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய ஏகாஹபரிவாஸங் யாசி. ஸங்கோ⁴ உதா³யிஸ்ஸ பி⁴க்கு²னோ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய ஏகாஹபரிவாஸங் அதா³ஸி. ஸோ பரிவுத்த²பரிவாஸோ ஸங்க⁴ங் ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய சா²ரத்தங் மானத்தங் யாசி. ஸங்கோ⁴ உதா³யிஸ்ஸ பி⁴க்கு²னோ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய சா²ரத்தங் மானத்தங் அதா³ஸி. ஸோ சிண்ணமானத்தோ ஸங்க⁴ங் அப்³பா⁴னங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ உதா³யிங் பி⁴க்கு²ங் அப்³பெ⁴ய்ய. ஏஸா ஞத்தி.
107. ‘‘Suṇātu me, bhante, saṅgho. Ayaṃ udāyī bhikkhu ekaṃ āpattiṃ āpajji sañcetanikaṃ sukkavissaṭṭhiṃ ekāhappaṭicchannaṃ. So saṅghaṃ ekissā āpattiyā sañcetanikāya sukkavissaṭṭhiyā ekāhappaṭicchannāya ekāhaparivāsaṃ yāci. Saṅgho udāyissa bhikkhuno ekissā āpattiyā sañcetanikāya sukkavissaṭṭhiyā ekāhappaṭicchannāya ekāhaparivāsaṃ adāsi. So parivutthaparivāso saṅghaṃ ekissā āpattiyā sañcetanikāya sukkavissaṭṭhiyā ekāhappaṭicchannāya chārattaṃ mānattaṃ yāci. Saṅgho udāyissa bhikkhuno ekissā āpattiyā sañcetanikāya sukkavissaṭṭhiyā ekāhappaṭicchannāya chārattaṃ mānattaṃ adāsi. So ciṇṇamānatto saṅghaṃ abbhānaṃ yācati. Yadi saṅghassa pattakallaṃ, saṅgho udāyiṃ bhikkhuṃ abbheyya. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் உதா³யீ பி⁴க்கு² ஏகங் ஆபத்திங் ஆபஜ்ஜி ஸஞ்சேதனிகங் ஸுக்கவிஸ்ஸட்டி²ங் ஏகாஹப்படிச்ச²ன்னங். ஸோ ஸங்க⁴ங் ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய ஏகாஹபரிவாஸங் யாசி. ஸங்கோ⁴ உதா³யிஸ்ஸ பி⁴க்கு²னோ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய ஏகாஹபரிவாஸங் அதா³ஸி. ஸோ பரிவுத்த²பரிவாஸோ ஸங்க⁴ங் ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய சா²ரத்தங் மானத்தங் யாசி. ஸங்கோ⁴ உதா³யிஸ்ஸ பி⁴க்கு²னோ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹப்படிச்ச²ன்னாய சா²ரத்தங் மானத்தங் அதா³ஸி. ஸோ சிண்ணமானத்தோ ஸங்க⁴ங் அப்³பா⁴னங் யாசதி. ஸங்கோ⁴ உதா³யிங் பி⁴க்கு²ங் அப்³பே⁴தி. யஸ்ஸாயஸ்மதோ க²மதி உதா³யிஸ்ஸ பி⁴க்கு²னோ அப்³பா⁴னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ udāyī bhikkhu ekaṃ āpattiṃ āpajji sañcetanikaṃ sukkavissaṭṭhiṃ ekāhappaṭicchannaṃ. So saṅghaṃ ekissā āpattiyā sañcetanikāya sukkavissaṭṭhiyā ekāhappaṭicchannāya ekāhaparivāsaṃ yāci. Saṅgho udāyissa bhikkhuno ekissā āpattiyā sañcetanikāya sukkavissaṭṭhiyā ekāhappaṭicchannāya ekāhaparivāsaṃ adāsi. So parivutthaparivāso saṅghaṃ ekissā āpattiyā sañcetanikāya sukkavissaṭṭhiyā ekāhappaṭicchannāya chārattaṃ mānattaṃ yāci. Saṅgho udāyissa bhikkhuno ekissā āpattiyā sañcetanikāya sukkavissaṭṭhiyā ekāhappaṭicchannāya chārattaṃ mānattaṃ adāsi. So ciṇṇamānatto saṅghaṃ abbhānaṃ yācati. Saṅgho udāyiṃ bhikkhuṃ abbheti. Yassāyasmato khamati udāyissa bhikkhuno abbhānaṃ, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி…பே॰… ததியம்பி ஏதமத்த²ங் வதா³மி…பே॰….
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘அப்³பி⁴தோ ஸங்கே⁴ன உதா³யீ பி⁴க்கு². க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Abbhito saṅghena udāyī bhikkhu. Khamati saṅghassa, tasmā tuṇhī, evametaṃ dhārayāmī’’ti.
