| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
16. ஞாணவிப⁴ங்கோ³
16. Ñāṇavibhaṅgo
1. ஏககமாதிகாதி³வண்ணனா
1. Ekakamātikādivaṇṇanā
751. இதா³னி தத³னந்தரே ஞாணவிப⁴ங்கே³ ஏகவிதே⁴ன ஞாணவத்தூ²திஆதி³னா நயேன பட²மங் ஏகவிதா⁴தீ³ஹி த³ஸவித⁴பரியோஸானேஹி த³ஸஹி பரிச்சே²தே³ஹி மாதிகங் ட²பெத்வா நிக்கி²த்தபதா³னுக்கமேன நித்³தே³ஸோ கதோ.
751. Idāni tadanantare ñāṇavibhaṅge ekavidhena ñāṇavatthūtiādinā nayena paṭhamaṃ ekavidhādīhi dasavidhapariyosānehi dasahi paricchedehi mātikaṃ ṭhapetvā nikkhittapadānukkamena niddeso kato.
தத்த² ஏகவிதே⁴னாதி ஏகப்பகாரேன, ஏககொட்டா²ஸேன வா. ஞாணவத்தூ²தி எத்த² பன ஞாணஞ்ச தங் வத்து² ச நானப்பகாரானங் ஸம்பத்தீனந்தி ஞாணவத்து²; ஓகாஸட்டே²ன ஞாணஸ்ஸ வத்தூ²திபி ஞாணவத்து². இத⁴ பன புரிமேனேவத்தே²ன ஞாணவத்து² வேதி³தப்³ப³ங். தேனேவ ஏகவித⁴பரிச்சே²தா³வஸானே ‘‘யாதா²வகவத்து²விபா⁴வனா பஞ்ஞா – ஏவங் ஏகவிதே⁴ன ஞாணவத்தூ²’’தி வுத்தங். பஞ்ச விஞ்ஞாணாதி சக்கு²விஞ்ஞாணாதீ³னி பஞ்ச. ந ஹேதூதிஆதீ³னி ஹெட்டா² த⁴ம்மஸங்க³ஹட்ட²கதா²யங் (த⁴॰ ஸ॰ அட்ட²॰ 1.6) வுத்தனயேனேவ வேதி³தப்³பா³னி. ஸங்கே²பதோ பனெத்த² யங் வத்தப்³ப³ங் தங் நித்³தே³ஸவாரே ஆவி ப⁴விஸ்ஸதி. யதா² செத்த², ஏவங் து³கமாதிகாதி³பதே³ஸுபி யங் வத்தப்³ப³ங் தங் தத்தே²வ ஆவி ப⁴விஸ்ஸதி. நிக்கே²பபரிச்சே²த³மத்தங் பனெத்த² ஏவங் வேதி³தப்³ப³ங். எத்த² ஹி ‘‘ந ஹேது அஹேதுகா’’திஆதீ³ஹி தாவ த⁴ம்மஸங்க³ஹமாதிகாவஸேன, ‘‘அனிச்சா ஜராபி⁴பூ⁴தா’’திஆதீ³ஹி அமாதிகாவஸேனாதி ஸங்கே²பதோ து³விதே⁴ஹி பபே⁴த³தோ அட்ட²ஸத்ததியா பதே³ஹி ஏககமாதிகா நிக்கி²த்தா.
Tattha ekavidhenāti ekappakārena, ekakoṭṭhāsena vā. Ñāṇavatthūti ettha pana ñāṇañca taṃ vatthu ca nānappakārānaṃ sampattīnanti ñāṇavatthu; okāsaṭṭhena ñāṇassa vatthūtipi ñāṇavatthu. Idha pana purimenevatthena ñāṇavatthu veditabbaṃ. Teneva ekavidhaparicchedāvasāne ‘‘yāthāvakavatthuvibhāvanā paññā – evaṃ ekavidhena ñāṇavatthū’’ti vuttaṃ. Pañca viññāṇāti cakkhuviññāṇādīni pañca. Na hetūtiādīni heṭṭhā dhammasaṅgahaṭṭhakathāyaṃ (dha. sa. aṭṭha. 1.6) vuttanayeneva veditabbāni. Saṅkhepato panettha yaṃ vattabbaṃ taṃ niddesavāre āvi bhavissati. Yathā cettha, evaṃ dukamātikādipadesupi yaṃ vattabbaṃ taṃ tattheva āvi bhavissati. Nikkhepaparicchedamattaṃ panettha evaṃ veditabbaṃ. Ettha hi ‘‘na hetu ahetukā’’tiādīhi tāva dhammasaṅgahamātikāvasena, ‘‘aniccā jarābhibhūtā’’tiādīhi amātikāvasenāti saṅkhepato duvidhehi pabhedato aṭṭhasattatiyā padehi ekakamātikā nikkhittā.
து³கானுரூபேஹி பன பஞ்சதிங்ஸாய து³கேஹி து³கமாதிகா நிக்கி²த்தா.
Dukānurūpehi pana pañcatiṃsāya dukehi dukamātikā nikkhittā.
திகானுரூபேஹி ‘‘சிந்தாமயா பஞ்ஞா’’திஆதீ³ஹி சதூஹி பா³ஹிரத்திகேஹி, ‘‘விபாகா பஞ்ஞா’’திஆதீ³ஹி அனியமிதபஞ்ஞாவஸேன வுத்தேஹி சுத்³த³ஸஹி மாதிகாதிகேஹி, விதக்கத்திகே பட²மபதே³ன நியமிதபஞ்ஞாவஸேன வுத்தேஹி தேரஸஹி, து³தியபதே³ன நியமிதபஞ்ஞாவஸேன வுத்தேஹி ஸத்தஹி, ததியபதே³ன நியமிதபஞ்ஞாவஸேன வுத்தேஹி த்³வாத³ஸஹி, பீதித்திகே ச பட²மபதே³ன நியமிதபஞ்ஞாவஸேன வுத்தேஹி தேரஸஹி, ததா² து³தியபதே³ன, ததியபதே³ன நியமிதபஞ்ஞாவஸேன வுத்தேஹி த்³வாத³ஸஹீதி அட்டா²ஸீதியா திகேஹி திகமாதிகா நிக்கி²த்தா.
Tikānurūpehi ‘‘cintāmayā paññā’’tiādīhi catūhi bāhirattikehi, ‘‘vipākā paññā’’tiādīhi aniyamitapaññāvasena vuttehi cuddasahi mātikātikehi, vitakkattike paṭhamapadena niyamitapaññāvasena vuttehi terasahi, dutiyapadena niyamitapaññāvasena vuttehi sattahi, tatiyapadena niyamitapaññāvasena vuttehi dvādasahi, pītittike ca paṭhamapadena niyamitapaññāvasena vuttehi terasahi, tathā dutiyapadena, tatiyapadena niyamitapaññāvasena vuttehi dvādasahīti aṭṭhāsītiyā tikehi tikamātikā nikkhittā.
சதுக்கமாதிகா பன ‘கம்மஸ்ஸகதஞாண’ந்திஆதீ³ஹி ஏகவீஸதியா சதுக்கேஹி, பஞ்சகமாதிகா த்³வீஹி பஞ்சகேஹி, ச²க்கமாதிகா ஏகேன ச²க்கேன, ஸத்தகமாதிகா ‘‘ஸத்தஸத்ததி ஞாணவத்தூ²னீ’’தி ஏவங் ஸங்கே²பதோ வுத்தேஹி ஏகாத³ஸஹி ஸத்தகேஹி, அட்ட²கமாதிகா ஏகேன அட்ட²கேன, நவகமாதிகா ஏகேன நவகேன.
Catukkamātikā pana ‘kammassakatañāṇa’ntiādīhi ekavīsatiyā catukkehi, pañcakamātikā dvīhi pañcakehi, chakkamātikā ekena chakkena, sattakamātikā ‘‘sattasattati ñāṇavatthūnī’’ti evaṃ saṅkhepato vuttehi ekādasahi sattakehi, aṭṭhakamātikā ekena aṭṭhakena, navakamātikā ekena navakena.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 16. ஞாணவிப⁴ங்கோ³ • 16. Ñāṇavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 16. ஞாணவிப⁴ங்கோ³ • 16. Ñāṇavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 16. ஞாணவிப⁴ங்கோ³ • 16. Ñāṇavibhaṅgo
