| Library / Tipiṭaka / তিপিটক • Tipiṭaka / সম্মোহৰিনোদনী-অট্ঠকথা • Sammohavinodanī-aṭṭhakathā |
১৬. ঞাণৰিভঙ্গো
16. Ñāṇavibhaṅgo
১. এককমাতিকাদিৰণ্ণনা
1. Ekakamātikādivaṇṇanā
৭৫১. ইদানি তদনন্তরে ঞাণৰিভঙ্গে একৰিধেন ঞাণৰত্থূতিআদিনা নযেন পঠমং একৰিধাদীহি দসৰিধপরিযোসানেহি দসহি পরিচ্ছেদেহি মাতিকং ঠপেত্ৰা নিক্খিত্তপদানুক্কমেন নিদ্দেসো কতো।
751. Idāni tadanantare ñāṇavibhaṅge ekavidhena ñāṇavatthūtiādinā nayena paṭhamaṃ ekavidhādīhi dasavidhapariyosānehi dasahi paricchedehi mātikaṃ ṭhapetvā nikkhittapadānukkamena niddeso kato.
তত্থ একৰিধেনাতি একপ্পকারেন, এককোট্ঠাসেন ৰা। ঞাণৰত্থূতি এত্থ পন ঞাণঞ্চ তং ৰত্থু চ নানপ্পকারানং সম্পত্তীনন্তি ঞাণৰত্থু; ওকাসট্ঠেন ঞাণস্স ৰত্থূতিপি ঞাণৰত্থু। ইধ পন পুরিমেনেৰত্থেন ঞাণৰত্থু ৰেদিতব্বং। তেনেৰ একৰিধপরিচ্ছেদাৰসানে ‘‘যাথাৰকৰত্থুৰিভাৰনা পঞ্ঞা – এৰং একৰিধেন ঞাণৰত্থূ’’তি ৰুত্তং। পঞ্চ ৰিঞ্ঞাণাতি চক্খুৰিঞ্ঞাণাদীনি পঞ্চ। ন হেতূতিআদীনি হেট্ঠা ধম্মসঙ্গহট্ঠকথাযং (ধ॰ স॰ অট্ঠ॰ ১.৬) ৰুত্তনযেনেৰ ৰেদিতব্বানি। সঙ্খেপতো পনেত্থ যং ৰত্তব্বং তং নিদ্দেসৰারে আৰি ভৰিস্সতি। যথা চেত্থ, এৰং দুকমাতিকাদিপদেসুপি যং ৰত্তব্বং তং তত্থেৰ আৰি ভৰিস্সতি। নিক্খেপপরিচ্ছেদমত্তং পনেত্থ এৰং ৰেদিতব্বং। এত্থ হি ‘‘ন হেতু অহেতুকা’’তিআদীহি তাৰ ধম্মসঙ্গহমাতিকাৰসেন, ‘‘অনিচ্চা জরাভিভূতা’’তিআদীহি অমাতিকাৰসেনাতি সঙ্খেপতো দুৰিধেহি পভেদতো অট্ঠসত্ততিযা পদেহি এককমাতিকা নিক্খিত্তা।
Tattha ekavidhenāti ekappakārena, ekakoṭṭhāsena vā. Ñāṇavatthūti ettha pana ñāṇañca taṃ vatthu ca nānappakārānaṃ sampattīnanti ñāṇavatthu; okāsaṭṭhena ñāṇassa vatthūtipi ñāṇavatthu. Idha pana purimenevatthena ñāṇavatthu veditabbaṃ. Teneva ekavidhaparicchedāvasāne ‘‘yāthāvakavatthuvibhāvanā paññā – evaṃ ekavidhena ñāṇavatthū’’ti vuttaṃ. Pañca viññāṇāti cakkhuviññāṇādīni pañca. Na hetūtiādīni heṭṭhā dhammasaṅgahaṭṭhakathāyaṃ (dha. sa. aṭṭha. 1.6) vuttanayeneva veditabbāni. Saṅkhepato panettha yaṃ vattabbaṃ taṃ niddesavāre āvi bhavissati. Yathā cettha, evaṃ dukamātikādipadesupi yaṃ vattabbaṃ taṃ tattheva āvi bhavissati. Nikkhepaparicchedamattaṃ panettha evaṃ veditabbaṃ. Ettha hi ‘‘na hetu ahetukā’’tiādīhi tāva dhammasaṅgahamātikāvasena, ‘‘aniccā jarābhibhūtā’’tiādīhi amātikāvasenāti saṅkhepato duvidhehi pabhedato aṭṭhasattatiyā padehi ekakamātikā nikkhittā.
দুকানুরূপেহি পন পঞ্চতিংসায দুকেহি দুকমাতিকা নিক্খিত্তা।
Dukānurūpehi pana pañcatiṃsāya dukehi dukamātikā nikkhittā.
তিকানুরূপেহি ‘‘চিন্তামযা পঞ্ঞা’’তিআদীহি চতূহি বাহিরত্তিকেহি, ‘‘ৰিপাকা পঞ্ঞা’’তিআদীহি অনিযমিতপঞ্ঞাৰসেন ৰুত্তেহি চুদ্দসহি মাতিকাতিকেহি, ৰিতক্কত্তিকে পঠমপদেন নিযমিতপঞ্ঞাৰসেন ৰুত্তেহি তেরসহি, দুতিযপদেন নিযমিতপঞ্ঞাৰসেন ৰুত্তেহি সত্তহি, ততিযপদেন নিযমিতপঞ্ঞাৰসেন ৰুত্তেহি দ্ৰাদসহি, পীতিত্তিকে চ পঠমপদেন নিযমিতপঞ্ঞাৰসেন ৰুত্তেহি তেরসহি, তথা দুতিযপদেন, ততিযপদেন নিযমিতপঞ্ঞাৰসেন ৰুত্তেহি দ্ৰাদসহীতি অট্ঠাসীতিযা তিকেহি তিকমাতিকা নিক্খিত্তা।
Tikānurūpehi ‘‘cintāmayā paññā’’tiādīhi catūhi bāhirattikehi, ‘‘vipākā paññā’’tiādīhi aniyamitapaññāvasena vuttehi cuddasahi mātikātikehi, vitakkattike paṭhamapadena niyamitapaññāvasena vuttehi terasahi, dutiyapadena niyamitapaññāvasena vuttehi sattahi, tatiyapadena niyamitapaññāvasena vuttehi dvādasahi, pītittike ca paṭhamapadena niyamitapaññāvasena vuttehi terasahi, tathā dutiyapadena, tatiyapadena niyamitapaññāvasena vuttehi dvādasahīti aṭṭhāsītiyā tikehi tikamātikā nikkhittā.
চতুক্কমাতিকা পন ‘কম্মস্সকতঞাণ’ন্তিআদীহি একৰীসতিযা চতুক্কেহি, পঞ্চকমাতিকা দ্ৰীহি পঞ্চকেহি, ছক্কমাতিকা একেন ছক্কেন, সত্তকমাতিকা ‘‘সত্তসত্ততি ঞাণৰত্থূনী’’তি এৰং সঙ্খেপতো ৰুত্তেহি একাদসহি সত্তকেহি, অট্ঠকমাতিকা একেন অট্ঠকেন, নৰকমাতিকা একেন নৰকেন।
Catukkamātikā pana ‘kammassakatañāṇa’ntiādīhi ekavīsatiyā catukkehi, pañcakamātikā dvīhi pañcakehi, chakkamātikā ekena chakkena, sattakamātikā ‘‘sattasattati ñāṇavatthūnī’’ti evaṃ saṅkhepato vuttehi ekādasahi sattakehi, aṭṭhakamātikā ekena aṭṭhakena, navakamātikā ekena navakena.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১৬. ঞাণৰিভঙ্গো • 16. Ñāṇavibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ১৬. ঞাণৰিভঙ্গো • 16. Ñāṇavibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ১৬. ঞাণৰিভঙ্গো • 16. Ñāṇavibhaṅgo
