Library / Tipiṭaka / তিপিটক • Tipiṭaka / সম্মোহৰিনোদনী-অট্ঠকথা • Sammohavinodanī-aṭṭhakathā

    ১৭. খুদ্দকৰত্থুৰিভঙ্গো

    17. Khuddakavatthuvibhaṅgo

    ১. এককমাতিকাদিৰণ্ণনা

    1. Ekakamātikādivaṇṇanā

    ৮৩২. ইদানি তদনন্তরে খুদ্দকৰত্থুৰিভঙ্গেপি পঠমং মাতিকং ঠপেত্ৰা নিক্খিত্তপদানুক্কমেন নিদ্দেসো কতো। তত্রাযং নিক্খেপপরিচ্ছেদো। আদিতো তাৰ জাতিমদোতিআদযো তেসত্ততি এককা নিক্খিত্তা, ততো কোধো চ উপনাহো চাতিআদযো অট্ঠারস দুকা, অকুসলমূলাদযো পঞ্চতিংস তিকা, আসৰচতুক্কাদযো চুদ্দস চতুক্কা, ওরম্ভাগিযসংযোজনাদযো পন্নরস পঞ্চকা, ৰিৰাদমূলাদযো চুদ্দস ছক্কা, অনুসযাদযো সত্ত সত্তকা, কিলেসৰত্থুআদযো অট্ঠ অট্ঠকা, আঘাতৰত্থুআদযো নৰ নৰকা, কিলেসৰত্থুআদযো সত্ত দসকা, অজ্ঝত্তিকস্স উপাদায অট্ঠারস তণ্হাৰিচরিতানীতিআদযো ছ অট্ঠারসকাতি সব্বানিপি এতানি অট্ঠ কিলেসসতানি নিক্খিত্তানীতি ৰেদিতব্বানি। অযং তাৰ নিক্খেপপরিচ্ছেদো।

    832. Idāni tadanantare khuddakavatthuvibhaṅgepi paṭhamaṃ mātikaṃ ṭhapetvā nikkhittapadānukkamena niddeso kato. Tatrāyaṃ nikkhepaparicchedo. Ādito tāva jātimadotiādayo tesattati ekakā nikkhittā, tato kodho ca upanāho cātiādayo aṭṭhārasa dukā, akusalamūlādayo pañcatiṃsa tikā, āsavacatukkādayo cuddasa catukkā, orambhāgiyasaṃyojanādayo pannarasa pañcakā, vivādamūlādayo cuddasa chakkā, anusayādayo satta sattakā, kilesavatthuādayo aṭṭha aṭṭhakā, āghātavatthuādayo nava navakā, kilesavatthuādayo satta dasakā, ajjhattikassa upādāya aṭṭhārasa taṇhāvicaritānītiādayo cha aṭṭhārasakāti sabbānipi etāni aṭṭha kilesasatāni nikkhittānīti veditabbāni. Ayaṃ tāva nikkhepaparicchedo.

    (১.) এককনিদ্দেসৰণ্ণনা

    (1.) Ekakaniddesavaṇṇanā

    ৮৪৩-৮৪৪. ইদানি যথানিক্খিত্তায মাতিকায তত্থ কতমো জাতিমদোতিআদিনা নযেন আরদ্ধে নিদ্দেসৰারে জাতিং পটিচ্চাতি জাতিং নিস্সায। এত্থ চ অত্থিপটিচ্চং নাম কথিতং, তস্মা জাতিযা সতীতি অযমেত্থ অত্থো। গোত্তং পটিচ্চাতিআদীসুপি এসেৰ নযো। মদনৰসেন মদো। মজ্জনাকারো মজ্জনা। মজ্জিতভাৰো মজ্জিতত্তং। মানো মঞ্ঞনাতিআদীনি হেট্ঠা ধম্মসঙ্গহট্ঠকথাযং (ধ॰ স॰ অট্ঠ॰ ১১২১) ৰুত্তত্থানেৰ। অযং ৰুচ্চতীতি অযং এৰং জাতিযা সতি তং জাতিং নিস্সায উপ্পন্নো মজ্জনাকারপ্পৰত্তো মানো জাতিমদোতি ৰুচ্চতি। স্ৰাযং খত্তিযাদীনং চতুন্নম্পি ৰণ্ণানং উপ্পজ্জতি। জাতিসম্পন্নো হি খত্তিযো ‘মাদিসো অঞ্ঞো নত্থি। অৰসেসা অন্তরা উট্ঠায খত্তিযা জাতা। অহং পন ৰংসাগতখত্তিযো’তি মানং করোতি। ব্রাহ্মণাদীসুপি এসেৰ নযো। গোত্তমদনিদ্দেসাদীসুপি ইমিনাৰুপাযেন অত্থো ৰেদিতব্বো। খত্তিযোপি হি ‘অহং কোণ্ডঞ্ঞগোত্তো, অহং আদিচ্চগোত্তো’তি মানং করোতি। ব্রাহ্মণোপি ‘অহং কস্সপগোত্তো , অহং ভারদ্ৰাজগোত্তো’তি মানং করোতি। ৰেস্সোপি সুদ্দোপি অত্তনো অত্তনো কুলগোত্তং নিস্সায মানং করোতি। অট্ঠারসাপি সেণিযো ‘একিস্সা সেণিযা জাতম্হা’তি মানং করোন্তিযেৰ।

    843-844. Idāni yathānikkhittāya mātikāya tattha katamo jātimadotiādinā nayena āraddhe niddesavāre jātiṃ paṭiccāti jātiṃ nissāya. Ettha ca atthipaṭiccaṃ nāma kathitaṃ, tasmā jātiyā satīti ayamettha attho. Gottaṃ paṭiccātiādīsupi eseva nayo. Madanavasena mado. Majjanākāro majjanā. Majjitabhāvo majjitattaṃ. Māno maññanātiādīni heṭṭhā dhammasaṅgahaṭṭhakathāyaṃ (dha. sa. aṭṭha. 1121) vuttatthāneva. Ayaṃ vuccatīti ayaṃ evaṃ jātiyā sati taṃ jātiṃ nissāya uppanno majjanākārappavatto māno jātimadoti vuccati. Svāyaṃ khattiyādīnaṃ catunnampi vaṇṇānaṃ uppajjati. Jātisampanno hi khattiyo ‘mādiso añño natthi. Avasesā antarā uṭṭhāya khattiyā jātā. Ahaṃ pana vaṃsāgatakhattiyo’ti mānaṃ karoti. Brāhmaṇādīsupi eseva nayo. Gottamadaniddesādīsupi imināvupāyena attho veditabbo. Khattiyopi hi ‘ahaṃ koṇḍaññagotto, ahaṃ ādiccagotto’ti mānaṃ karoti. Brāhmaṇopi ‘ahaṃ kassapagotto , ahaṃ bhāradvājagotto’ti mānaṃ karoti. Vessopi suddopi attano attano kulagottaṃ nissāya mānaṃ karoti. Aṭṭhārasāpi seṇiyo ‘ekissā seṇiyā jātamhā’ti mānaṃ karontiyeva.

    আরোগ্যমদাদীসু ‘অহং অরোগো, অৰসেসা রোগবহুলা, গদ্দুহনমত্তম্পি ময্হং ব্যাধি নাম নত্থী’তি মজ্জনৰসেন উপ্পন্নো মানো আরোগ্যমদো নাম।

    Ārogyamadādīsu ‘ahaṃ arogo, avasesā rogabahulā, gadduhanamattampi mayhaṃ byādhi nāma natthī’ti majjanavasena uppanno māno ārogyamado nāma.

    ‘অহং তরুণো, অৰসেসসত্তানং অত্তভাৰো পপাতে ঠিতরুক্খসদিসো, অহং পন পঠমৰযে ঠিতো’তি মজ্জনৰসেন উপ্পন্নো মানো যোব্বনমদো নাম।

    ‘Ahaṃ taruṇo, avasesasattānaṃ attabhāvo papāte ṭhitarukkhasadiso, ahaṃ pana paṭhamavaye ṭhito’ti majjanavasena uppanno māno yobbanamado nāma.

    ‘অহং চিরং জীৰিং, চিরং জীৰামি, চিরং জীৰিস্সামি; সুখং জীৰিং, সুখং জীৰামি, সুখং জীৰিস্সামী’তি মজ্জনৰসেন উপ্পন্নো মানো জীৰিতমদো নাম।

    ‘Ahaṃ ciraṃ jīviṃ, ciraṃ jīvāmi, ciraṃ jīvissāmi; sukhaṃ jīviṃ, sukhaṃ jīvāmi, sukhaṃ jīvissāmī’ti majjanavasena uppanno māno jīvitamado nāma.

    ‘অহং লাভী, অৰসেসা সত্তা অপ্পলাভা, ময্হং পন লাভস্স পমাণং নাম নত্থী’তি মজ্জনৰসেন উপ্পন্নো মানো লাভমদো নাম।

    ‘Ahaṃ lābhī, avasesā sattā appalābhā, mayhaṃ pana lābhassa pamāṇaṃ nāma natthī’ti majjanavasena uppanno māno lābhamado nāma.

    ‘অৰসেসা সত্তা যং ৰা তং ৰা লভন্তি, অহং পন সুকতং পণীতং চীৰরাদিপচ্চযং লভামী’তি মজ্জনৰসেন উপ্পন্নো মানো সক্কারমদো নাম।

    ‘Avasesā sattā yaṃ vā taṃ vā labhanti, ahaṃ pana sukataṃ paṇītaṃ cīvarādipaccayaṃ labhāmī’ti majjanavasena uppanno māno sakkāramado nāma.

    ‘অৰসেসভিক্খূনং পাদপিট্ঠিযং অক্কমিত্ৰা গচ্ছন্তা মনুস্সা অযং সমণোতিপি ন ৰন্দন্তি, মং পন দিস্ৰাৰ ৰন্দন্তি, পাসাণচ্ছত্তং ৰিয গরুং কত্ৰা অগ্গিক্খন্ধং ৰিয চ দুরাসদং কত্ৰা মঞ্ঞন্তী’তি মজ্জনৰসেন উপ্পন্নো মানো গরুকারমদো নাম।

    ‘Avasesabhikkhūnaṃ pādapiṭṭhiyaṃ akkamitvā gacchantā manussā ayaṃ samaṇotipi na vandanti, maṃ pana disvāva vandanti, pāsāṇacchattaṃ viya garuṃ katvā aggikkhandhaṃ viya ca durāsadaṃ katvā maññantī’ti majjanavasena uppanno māno garukāramado nāma.

    ‘উপ্পন্নো পঞ্হো ময্হমেৰ মুখেন ছিজ্জতি, ভিক্খাচারং গচ্ছন্তাপি মমেৰ পুরতো কত্ৰা পরিৰারেত্ৰা গচ্ছন্তী’তি মজ্জনৰসেন উপ্পন্নো মানো পুরেক্খারমদো নাম।

    ‘Uppanno pañho mayhameva mukhena chijjati, bhikkhācāraṃ gacchantāpi mameva purato katvā parivāretvā gacchantī’ti majjanavasena uppanno māno purekkhāramado nāma.

    অগারিকস্স তাৰ মহাপরিৰারস্স ‘পুরিসসতম্পি পুরিসসহস্সম্পি মং পরিৰারেতি,’ অনগারিযস্স পন ‘সমণসতম্পি সমণসহস্সম্পি মং পরিৰারেতি, সেসা অপ্পপরিৰারা, অহং মহাপরিৰারো চেৰ সুচিপরিৰারো চা’তি মজ্জনৰসেন উপ্পন্নো মানো পরিৰারমদো নাম।

    Agārikassa tāva mahāparivārassa ‘purisasatampi purisasahassampi maṃ parivāreti,’ anagāriyassa pana ‘samaṇasatampi samaṇasahassampi maṃ parivāreti, sesā appaparivārā, ahaṃ mahāparivāro ceva suciparivāro cā’ti majjanavasena uppanno māno parivāramado nāma.

    ভোগো পন কিঞ্চাপি লাভগ্গহণেনেৰ গহিতো হোতি, ইমস্মিং পন ঠানে নিক্খেপরাসি নাম গহিতো; তস্মা ‘অৰসেসা সত্তা অত্তনো পরিভোগমত্তম্পি ন লভন্তি, ময্হং পন নিধানগতস্সেৰ ধনস্স পমাণং নত্থী’তি মজ্জনৰসেন উপ্পন্নো মানো ভোগমদো নাম।

    Bhogo pana kiñcāpi lābhaggahaṇeneva gahito hoti, imasmiṃ pana ṭhāne nikkheparāsi nāma gahito; tasmā ‘avasesā sattā attano paribhogamattampi na labhanti, mayhaṃ pana nidhānagatasseva dhanassa pamāṇaṃ natthī’ti majjanavasena uppanno māno bhogamado nāma.

    ৰণ্ণং পটিচ্চাতি সরীরৰণ্ণম্পি গুণৰণ্ণম্পি পটিচ্চ। ‘অৰসেসা সত্তা দুব্বণ্ণা দুরূপা, অহং পন অভিরূপো পাসাদিকো; অৰসেসা সত্তা নিগ্গুণা পত্থটঅকিত্তিনো, ময্হং পন কিত্তিসদ্দো দেৰমনুস্সেসু পাকটো – ইতিপি থেরো বহুস্সুতো, ইতিপি সীলৰা, ইতিপি ধুতগুণযুত্তো’তি মজ্জনৰসেন উপ্পন্নো মানো ৰণ্ণমদো নাম।

    Vaṇṇaṃpaṭiccāti sarīravaṇṇampi guṇavaṇṇampi paṭicca. ‘Avasesā sattā dubbaṇṇā durūpā, ahaṃ pana abhirūpo pāsādiko; avasesā sattā nigguṇā patthaṭaakittino, mayhaṃ pana kittisaddo devamanussesu pākaṭo – itipi thero bahussuto, itipi sīlavā, itipi dhutaguṇayutto’ti majjanavasena uppanno māno vaṇṇamado nāma.

    ‘অৰসেসা সত্তা অপ্পস্সুতা, অহং পন বহুস্সুতো’তি মজ্জনৰসেন উপ্পন্নো মানো সুতমদো নাম।

    ‘Avasesā sattā appassutā, ahaṃ pana bahussuto’ti majjanavasena uppanno māno sutamado nāma.

    ‘অৰসেসা সত্তা অপ্পটিভানা, ময্হং পন পটিভানস্স পমাণং নত্থী’তি মজ্জনৰসেন উপ্পন্নো মানো পটিভানমদো নাম।

    ‘Avasesā sattā appaṭibhānā, mayhaṃ pana paṭibhānassa pamāṇaṃ natthī’ti majjanavasena uppanno māno paṭibhānamado nāma.

    ‘অহং রত্তঞ্ঞূ অসুকং বুদ্ধৰংসং, রাজৰংসং, জনপদৰংসং, গামৰংসং, রত্তিন্দিৰপরিচ্ছেদং, নক্খত্তমুহুত্তযোগং জানামী’তি মজ্জনৰসেন উপ্পন্নো মানো রত্তঞ্ঞুমদো নাম।

    ‘Ahaṃ rattaññū asukaṃ buddhavaṃsaṃ, rājavaṃsaṃ, janapadavaṃsaṃ, gāmavaṃsaṃ, rattindivaparicchedaṃ, nakkhattamuhuttayogaṃ jānāmī’ti majjanavasena uppanno māno rattaññumado nāma.

    ‘অৰসেসা ভিক্খূ অন্তরা পিণ্ডপাতিকা জাতা, অহং পন জাতিপিণ্ডপাতিকো’তি মজ্জনৰসেন উপ্পন্নো মানো পিণ্ডপাতিকমদো নাম।

    ‘Avasesā bhikkhū antarā piṇḍapātikā jātā, ahaṃ pana jātipiṇḍapātiko’ti majjanavasena uppanno māno piṇḍapātikamado nāma.

    ‘অৰসেসা সত্তা উঞ্ঞাতা অৰঞ্ঞাতা, অহং পন অনুঞ্ঞাতো অনৰঞ্ঞাতো’তি মজ্জনৰসেন উপ্পন্নো মানো অনৰঞ্ঞাতমদো নাম।

    ‘Avasesā sattā uññātā avaññātā, ahaṃ pana anuññāto anavaññāto’ti majjanavasena uppanno māno anavaññātamado nāma.

    ‘অৰসেসানং ইরিযাপথো অপাসাদিকো, ময্হং পন পাসাদিকো’তি মজ্জনৰসেন উপ্পন্নো মানো ইরিযাপথমদো নাম।

    ‘Avasesānaṃ iriyāpatho apāsādiko, mayhaṃ pana pāsādiko’ti majjanavasena uppanno māno iriyāpathamado nāma.

    ‘অৰসেসা সত্তা ছিন্নপক্খকাকসদিসা, অহং পন মহিদ্ধিকো মহানুভাৰো’তি ৰা ‘অহং যং যং কম্মং করোমি, তং তং ইজ্ঝতী’তি ৰা মজ্জনৰসেন উপ্পন্নো মানো ইদ্ধিমদো নাম।

    ‘Avasesā sattā chinnapakkhakākasadisā, ahaṃ pana mahiddhiko mahānubhāvo’ti vā ‘ahaṃ yaṃ yaṃ kammaṃ karomi, taṃ taṃ ijjhatī’ti vā majjanavasena uppanno māno iddhimado nāma.

    হেট্ঠা পরিৰারগ্গহণেন যসো গহিতোৰ হোতি। ইমস্মিং পন ঠানে উপট্ঠাকমদো নাম গহিতো। সো অগারিকেনপি অনগারিকেনপি দীপেতব্বো। অগারিকো হি একচ্চো অট্ঠারসসু সেণীসু একিস্সা জেট্ঠকো হোতি, তস্স ‘অৰসেসে পুরিসে অহং পট্ঠপেমি, অহং ৰিচারেমী’তি ; অনগারিকোপি একচ্চো কত্থচি জেট্ঠকো হোতি, তস্স ‘অৰসেসা ভিক্খূ ময্হং ওৰাদে ৰত্তন্তি, অহং জেট্ঠকো’তি মজ্জনৰসেন উপ্পন্নো মানো যসমদো নাম।

    Heṭṭhā parivāraggahaṇena yaso gahitova hoti. Imasmiṃ pana ṭhāne upaṭṭhākamado nāma gahito. So agārikenapi anagārikenapi dīpetabbo. Agāriko hi ekacco aṭṭhārasasu seṇīsu ekissā jeṭṭhako hoti, tassa ‘avasese purise ahaṃ paṭṭhapemi, ahaṃ vicāremī’ti ; anagārikopi ekacco katthaci jeṭṭhako hoti, tassa ‘avasesā bhikkhū mayhaṃ ovāde vattanti, ahaṃ jeṭṭhako’ti majjanavasena uppanno māno yasamado nāma.

    ‘অৰসেসা সত্তা দুস্সীলা, অহং পন সীলৰা’তি মজ্জনৰসেন উপ্পন্নো মানো সীলমদো নাম। ‘অৰসেসসত্তানং কুক্কুটস্স উদকপানমত্তেপি কালে চিত্তেকগ্গতা নত্থি, অহং পন উপচারপ্পনানং লাভী’তি মজ্জনৰসেন উপ্পন্নো মানো ঝানমদো নাম।

    ‘Avasesā sattā dussīlā, ahaṃ pana sīlavā’ti majjanavasena uppanno māno sīlamado nāma. ‘Avasesasattānaṃ kukkuṭassa udakapānamattepi kāle cittekaggatā natthi, ahaṃ pana upacārappanānaṃ lābhī’ti majjanavasena uppanno māno jhānamado nāma.

    ‘অৰসেসা সত্তা নিস্সিপ্পা, অহং পন সিপ্পৰা’তি মজ্জনৰসেন উপ্পন্নো মানো সিপ্পমদো নাম। ‘অৰসেসা সত্তা রস্সা, অহং পন দীঘো’তি মজ্জনৰসেন উপ্পন্নো মানো আরোহমদো নাম। ‘অৰসেসা সত্তা রস্সা ৰা হোন্তি দীঘা ৰা, অহং নিগ্রোধপরিমণ্ডলো’তি মজ্জনৰসেন উপ্পন্নো মানো পরিণাহমদো নাম। ‘অৰসেসসত্তানং সরীরসণ্ঠানং ৰিরূপং বীভচ্ছং, ময্হং পন মনাপং পাসাদিক’ন্তি মজ্জনৰসেন উপ্পন্নো মানো সণ্ঠানমদো নাম। ‘অৰসেসানং সত্তানং সরীরে বহূ দোসা, ময্হং পন সরীরে কেসগ্গমত্তম্পি ৰজ্জং নত্থী’তি মজ্জনৰসেন উপ্পন্নো মানো পারিপূরিমদো নাম।

    ‘Avasesā sattā nissippā, ahaṃ pana sippavā’ti majjanavasena uppanno māno sippamado nāma. ‘Avasesā sattā rassā, ahaṃ pana dīgho’ti majjanavasena uppanno māno ārohamado nāma. ‘Avasesā sattā rassā vā honti dīghā vā, ahaṃ nigrodhaparimaṇḍalo’ti majjanavasena uppanno māno pariṇāhamado nāma. ‘Avasesasattānaṃ sarīrasaṇṭhānaṃ virūpaṃ bībhacchaṃ, mayhaṃ pana manāpaṃ pāsādika’nti majjanavasena uppanno māno saṇṭhānamado nāma. ‘Avasesānaṃ sattānaṃ sarīre bahū dosā, mayhaṃ pana sarīre kesaggamattampi vajjaṃ natthī’ti majjanavasena uppanno māno pāripūrimado nāma.

    ৮৪৫. ইমিনা এত্তকেন ঠানেন সৰত্থুকং মানং কথেত্ৰা ইদানি অৰত্থুকং নিব্বত্তিতমানমেৰ দস্সেন্তো তত্থ কতমো মদোতিআদিমাহ। তং উত্তানত্থমেৰ।

    845. Iminā ettakena ṭhānena savatthukaṃ mānaṃ kathetvā idāni avatthukaṃ nibbattitamānameva dassento tattha katamo madotiādimāha. Taṃ uttānatthameva.

    ৮৪৬. পমাদনিদ্দেসে চিত্তস্স ৰোস্সগ্গোতি ইমেসু এত্তকেসু ঠানেসু সতিযা অনিগ্গণ্হিত্ৰা চিত্তস্স ৰোস্সজ্জনং; সতিৰিরহোতি অত্থো। ৰোস্সগ্গানুপ্পদানন্তি ৰোস্সগ্গস্স অনুপ্পদানং; পুনপ্পুনং ৰিস্সজ্জনন্তি অত্থো। অসক্কচ্চকিরিযতাতি এতেসং দানাদীনং কুসলধম্মানং ভাৰনায পুগ্গলস্স ৰা দেয্যধম্মস্স ৰা অসক্কচ্চকরণৰসেন অসক্কচ্চকিরিযা। সততভাৰো সাতচ্চং। ন সততভাৰো অসাতচ্চং। ন সাতচ্চকিরিযতা অসাতচ্চকিরিযতা। অনট্ঠিতকরণং অনট্ঠিতকিরিযতা। যথা নাম ককণ্টকো থোকং গন্ত্ৰা থোকং তিট্ঠতি, ন নিরন্তরং গচ্ছতি, এৰমেৰ যো পুগ্গলো একদিৰসং দানং ৰা দত্ৰা পূজং ৰা কত্ৰা ধম্মং ৰা সুত্ৰা সমণধম্মং ৰা কত্ৰা পুন চিরস্সং করোতি, ন নিরন্তরং পৰত্তেতি, তস্স সা কিরিযা অনট্ঠিতকিরিযতাতি ৰুচ্চতি। ওলীনৰুত্তিতাতি নিরন্তরকরণসঙ্খাতস্স ৰিপ্ফারস্সেৰ অভাৰেন লীনৰুত্তিতা। নিক্খিত্তছন্দতাতি কুসলকিরিযায ৰীরিযছন্দস্স নিক্খিত্তভাৰো। নিক্খিত্তধুরতাতি ৰীরিযধুরস্স ওরোপনং, ওসক্কিতমানসতাতি অত্থো। অনধিট্ঠানন্তি কুসলকরণে পতিট্ঠাভাৰো। অননুযোগোতি অননুযুঞ্জনং। পমাদোতি পমজ্জনং। যো এৰরূপো পমাদোতি ইদং অত্থপরিযাযস্স ব্যঞ্জনপরিযাযস্স চ পরিযন্তাভাৰতো আকারদস্সনং। ইদং ৰুত্তং হোতি – য্ৰাযং আদিতো পট্ঠায দস্সিতো পমাদো, যো অঞ্ঞোপি এৰমাকারো এৰংজাতিকো পমাদো পমজ্জনাকারৰসেন পমজ্জনা, পমজ্জিতভাৰৰসেন পমজ্জিতত্তন্তি সঙ্খং গতো – অযং ৰুচ্চতি পমাদোতি। লক্খণতো পনেস পঞ্চসু কামগুণেসু সতিৰোস্সগ্গলক্খণো, তত্থেৰ সতিযা ৰিস্সট্ঠাকারো ৰেদিতব্বো।

    846. Pamādaniddese cittassa vossaggoti imesu ettakesu ṭhānesu satiyā aniggaṇhitvā cittassa vossajjanaṃ; sativirahoti attho. Vossaggānuppadānanti vossaggassa anuppadānaṃ; punappunaṃ vissajjananti attho. Asakkaccakiriyatāti etesaṃ dānādīnaṃ kusaladhammānaṃ bhāvanāya puggalassa vā deyyadhammassa vā asakkaccakaraṇavasena asakkaccakiriyā. Satatabhāvo sātaccaṃ. Na satatabhāvo asātaccaṃ. Na sātaccakiriyatā asātaccakiriyatā. Anaṭṭhitakaraṇaṃ anaṭṭhitakiriyatā. Yathā nāma kakaṇṭako thokaṃ gantvā thokaṃ tiṭṭhati, na nirantaraṃ gacchati, evameva yo puggalo ekadivasaṃ dānaṃ vā datvā pūjaṃ vā katvā dhammaṃ vā sutvā samaṇadhammaṃ vā katvā puna cirassaṃ karoti, na nirantaraṃ pavatteti, tassa sā kiriyā anaṭṭhitakiriyatāti vuccati. Olīnavuttitāti nirantarakaraṇasaṅkhātassa vipphārasseva abhāvena līnavuttitā. Nikkhittachandatāti kusalakiriyāya vīriyachandassa nikkhittabhāvo. Nikkhittadhuratāti vīriyadhurassa oropanaṃ, osakkitamānasatāti attho. Anadhiṭṭhānanti kusalakaraṇe patiṭṭhābhāvo. Ananuyogoti ananuyuñjanaṃ. Pamādoti pamajjanaṃ. Yo evarūpo pamādoti idaṃ atthapariyāyassa byañjanapariyāyassa ca pariyantābhāvato ākāradassanaṃ. Idaṃ vuttaṃ hoti – yvāyaṃ ādito paṭṭhāya dassito pamādo, yo aññopi evamākāro evaṃjātiko pamādo pamajjanākāravasena pamajjanā, pamajjitabhāvavasena pamajjitattanti saṅkhaṃ gato – ayaṃ vuccati pamādoti. Lakkhaṇato panesa pañcasu kāmaguṇesu sativossaggalakkhaṇo, tattheva satiyā vissaṭṭhākāro veditabbo.

    ৮৪৭. থম্ভনিদ্দেসে থদ্ধট্ঠেন থম্ভো; খলিযা থদ্ধসাটকস্স ৰিয চিত্তস্স থদ্ধতা এত্থ কথিতা। থম্ভনাকারো থম্ভনা। থম্ভিতস্স ভাৰো থম্ভিতত্তং। কক্খল়স্স পুগ্গলস্স ভাৰো কক্খল়িযং। ফরুসস্স পুগ্গলস্স ভাৰো ফারুসিযং। অভিৰাদনাদিসামীচিরহানং তস্সা সামীচিযা অকরণৰসেন উজুমেৰ ঠপিতচিত্তভাৰো উজুচিত্ততা। থদ্ধস্স অমুদুনো ভাৰো অমুদুতা। অযং ৰুচ্চতীতি অযং থম্ভো নাম ৰুচ্চতি, যেন সমন্নাগতো পুগ্গলো গিলিতনঙ্গলসীসো ৰিয অজগরো, ৰাতভরিতা ৰিয ভস্তা চেতিযং ৰা ৰুড্ঢতরে ৰা দিস্ৰা ওনমিতুং ন সক্কোতি, পরিযন্তেনেৰ চরতি। স্ৰাযং চিত্তস্স উদ্ধুমাতভাৰলক্খণোতি ৰেদিতব্বো।

    847. Thambhaniddese thaddhaṭṭhena thambho; khaliyā thaddhasāṭakassa viya cittassa thaddhatā ettha kathitā. Thambhanākāro thambhanā. Thambhitassa bhāvo thambhitattaṃ. Kakkhaḷassa puggalassa bhāvo kakkhaḷiyaṃ. Pharusassa puggalassa bhāvo phārusiyaṃ. Abhivādanādisāmīcirahānaṃ tassā sāmīciyā akaraṇavasena ujumeva ṭhapitacittabhāvo ujucittatā. Thaddhassa amuduno bhāvo amudutā. Ayaṃ vuccatīti ayaṃ thambho nāma vuccati, yena samannāgato puggalo gilitanaṅgalasīso viya ajagaro, vātabharitā viya bhastā cetiyaṃ vā vuḍḍhatare vā disvā onamituṃ na sakkoti, pariyanteneva carati. Svāyaṃ cittassa uddhumātabhāvalakkhaṇoti veditabbo.

    ৮৪৮. সারম্ভনিদ্দেসে সারম্ভনৰসেন সারম্ভো। পটিপ্ফরিত্ৰা সারম্ভো পটিসারম্ভো। সারম্ভনাকারো সারম্ভনা। পটিপ্ফরিত্ৰা সারম্ভনা পটিসারম্ভনা। পটিসারম্ভিতস্স ভাৰো পটিসারম্ভিতত্তং। অযং ৰুচ্চতীতি অযং সারম্ভো নাম ৰুচ্চতি। স্ৰাযং লক্খণতো করণুত্তরিযলক্খণো নাম ৰুচ্চতি, যেন সমন্নাগতো পুগ্গলো তদ্দিগুণং তদ্দিগুণং করোতি। অগারিকো সমানো একেনেকস্মিং ঘরৰত্থুস্মিং সজ্জিতে অপরো দ্ৰে ৰত্থূনি সজ্জেতি, অপরো চত্তারি, অপরো অট্ঠ, অপরো সোল়স। অনগারিকো সমানো একেনেকস্মিং নিকাযে গহিতে, ‘নাহং এতস্স হেট্ঠা ভৰিস্সামী’তি অপরো দ্ৰে গণ্হাতি, অপরো তযো, অপরো চত্তারো, অপরো পঞ্চ। সারম্ভৰসেন হি গণ্হিতুং ন ৰট্টতি। অকুসলপক্খো এস নিরযগামিমগ্গো। কুসলপক্খৰসেন পন একস্মিং একং সলাকভত্তং দেন্তে দ্ৰে দাতুং, দ্ৰে দেন্তে চত্তারি দাতুং ৰট্টতি। ভিক্খুনাপি পরেন একস্মিং নিকাযে গহিতে, ‘দ্ৰে নিকাযে গহেত্ৰা সজ্ঝাযন্তস্স মে ফাসু হোতী’তি ৰিৰট্টপক্খে ঠত্ৰা তদুত্তরি গণ্হিতুং ৰট্টতি।

    848. Sārambhaniddese sārambhanavasena sārambho. Paṭippharitvā sārambho paṭisārambho. Sārambhanākāro sārambhanā. Paṭippharitvā sārambhanā paṭisārambhanā. Paṭisārambhitassa bhāvo paṭisārambhitattaṃ. Ayaṃ vuccatīti ayaṃ sārambho nāma vuccati. Svāyaṃ lakkhaṇato karaṇuttariyalakkhaṇo nāma vuccati, yena samannāgato puggalo taddiguṇaṃ taddiguṇaṃ karoti. Agāriko samāno ekenekasmiṃ gharavatthusmiṃ sajjite aparo dve vatthūni sajjeti, aparo cattāri, aparo aṭṭha, aparo soḷasa. Anagāriko samāno ekenekasmiṃ nikāye gahite, ‘nāhaṃ etassa heṭṭhā bhavissāmī’ti aparo dve gaṇhāti, aparo tayo, aparo cattāro, aparo pañca. Sārambhavasena hi gaṇhituṃ na vaṭṭati. Akusalapakkho esa nirayagāmimaggo. Kusalapakkhavasena pana ekasmiṃ ekaṃ salākabhattaṃ dente dve dātuṃ, dve dente cattāri dātuṃ vaṭṭati. Bhikkhunāpi parena ekasmiṃ nikāye gahite, ‘dve nikāye gahetvā sajjhāyantassa me phāsu hotī’ti vivaṭṭapakkhe ṭhatvā taduttari gaṇhituṃ vaṭṭati.

    ৮৪৯. অত্রিচ্ছতানিদ্দেসে যথা অরিযৰংসসুত্তে (অ॰ নি॰ ৪.২৮) ‘লামকলামকট্ঠো ইতরীতরট্ঠো’ এৰং অগ্গহেত্ৰা চীৰরাদীসু যং যং লদ্ধং হোতি, তেন তেন অসন্তুট্ঠস্স; গিহিনো ৰা পন রূপসদ্দগন্ধরসফোট্ঠব্বেসু যং যং লদ্ধং হোতি, তেন তেন অসন্তুট্ঠস্স। ভিয্যোকম্যতাতি ৰিসেসকামতা। ইচ্ছনকৰসেন ইচ্ছা। ইচ্ছাৰ ইচ্ছাগতা, ইচ্ছনাকারো ৰা। অত্তনো লাভং অতিচ্চ ইচ্ছনভাৰো অতিচ্ছতা। রাগোতিআদীনি হেট্ঠা ৰুত্তত্থানেৰ। অযং ৰুচ্চতীতি অযং অতিচ্ছতা নাম ৰুচ্চতি। অত্রিচ্ছতাতিপি এতিস্সা এৰ নামং। লক্খণতো পন সকলাভে অসন্তুট্ঠি পরলাভে চ পত্থনা – এতং অত্রিচ্ছতালক্খণং। অত্রিচ্ছপুগ্গলস্স হি অত্তনা লদ্ধং পণীতম্পি লামকং ৰিয খাযতি, পরেন লদ্ধং লামকম্পি পণীতং ৰিয খাযতি; একভাজনে পক্কযাগু ৰা ভত্তং ৰা পূৰো ৰা অত্তনো পত্তে পক্খিত্তো লামকো ৰিয, পরস্স পত্তে পণীতো ৰিয খাযতি। অযং পন অত্রিচ্ছতা পব্বজিতানম্পি হোতি গিহীনম্পি তিরচ্ছানগতানম্পি।

    849. Atricchatāniddese yathā ariyavaṃsasutte (a. ni. 4.28) ‘lāmakalāmakaṭṭho itarītaraṭṭho’ evaṃ aggahetvā cīvarādīsu yaṃ yaṃ laddhaṃ hoti, tena tena asantuṭṭhassa; gihino vā pana rūpasaddagandharasaphoṭṭhabbesu yaṃ yaṃ laddhaṃ hoti, tena tena asantuṭṭhassa. Bhiyyokamyatāti visesakāmatā. Icchanakavasena icchā. Icchāva icchāgatā, icchanākāro vā. Attano lābhaṃ aticca icchanabhāvo aticchatā. Rāgotiādīni heṭṭhā vuttatthāneva. Ayaṃ vuccatīti ayaṃ aticchatā nāma vuccati. Atricchatātipi etissā eva nāmaṃ. Lakkhaṇato pana sakalābhe asantuṭṭhi paralābhe ca patthanā – etaṃ atricchatālakkhaṇaṃ. Atricchapuggalassa hi attanā laddhaṃ paṇītampi lāmakaṃ viya khāyati, parena laddhaṃ lāmakampi paṇītaṃ viya khāyati; ekabhājane pakkayāgu vā bhattaṃ vā pūvo vā attano patte pakkhitto lāmako viya, parassa patte paṇīto viya khāyati. Ayaṃ pana atricchatā pabbajitānampi hoti gihīnampi tiracchānagatānampi.

    তত্রিমানি ৰত্থূনি – একো কির কুটুম্বিকো তিংস ভিক্খুনিযো নিমন্তেত্ৰা সপূৰং ভত্তং অদাসি । সঙ্ঘত্থেরী সব্বভিক্খূনীনং পত্তে পূৰং পরিৰত্তাপেত্ৰা পচ্ছা অত্তনা লদ্ধমেৰ খাদি। বারাণসিরাজাপি ‘অঙ্গারপক্কমংসং খাদিস্সামী’তি দেৰিং আদায অরঞ্ঞং পৰিট্ঠো একং কিন্নরিং দিস্ৰা, দেৰিং পহায, তস্সানুপদং গতো। দেৰী নিৰত্তিত্ৰা অস্সমপদং গন্ত্ৰা কসিণপরিকম্মং কত্ৰা অট্ঠ সমাপত্তিযো পঞ্চ চ অভিঞ্ঞাযো পত্ৰা নিসিন্না রাজানং আগচ্ছন্তং দিস্ৰা আকাসে উপ্পতিত্ৰা অগমাসি। রুক্খে অধিৰত্থা দেৰতা ইমং গাথমাহ –

    Tatrimāni vatthūni – eko kira kuṭumbiko tiṃsa bhikkhuniyo nimantetvā sapūvaṃ bhattaṃ adāsi . Saṅghattherī sabbabhikkhūnīnaṃ patte pūvaṃ parivattāpetvā pacchā attanā laddhameva khādi. Bārāṇasirājāpi ‘aṅgārapakkamaṃsaṃ khādissāmī’ti deviṃ ādāya araññaṃ paviṭṭho ekaṃ kinnariṃ disvā, deviṃ pahāya, tassānupadaṃ gato. Devī nivattitvā assamapadaṃ gantvā kasiṇaparikammaṃ katvā aṭṭha samāpattiyo pañca ca abhiññāyo patvā nisinnā rājānaṃ āgacchantaṃ disvā ākāse uppatitvā agamāsi. Rukkhe adhivatthā devatā imaṃ gāthamāha –

    অত্রিচ্ছং অতিলোভেন, অতিলোভমদেন চ।

    Atricchaṃ atilobhena, atilobhamadena ca;

    এৰং হাযতি অত্থম্হা, অহংৰ অসিতাভুযাতি॥ (জা॰ ১.২.১৬৮)।

    Evaṃ hāyati atthamhā, ahaṃva asitābhuyāti. (jā. 1.2.168);

    যথা চন্দকিন্নরিং পত্থযন্তো অসিতাভুযা রাজধীতায হীনো পরিহীনো, এৰং অত্রিচ্ছং অতিলোভেন অত্থম্হ হাযতি জীযতীতি দেৰতা রঞ্ঞা সদ্ধিং কেল়িমকাসি।

    Yathā candakinnariṃ patthayanto asitābhuyā rājadhītāya hīno parihīno, evaṃ atricchaṃ atilobhena atthamha hāyati jīyatīti devatā raññā saddhiṃ keḷimakāsi.

    কস্সপবুদ্ধকালেপি মিত্তৰিন্দকো নাম সেট্ঠিপুত্তো অস্সদ্ধো অপ্পসন্নো মাতরা ‘তাত, অজ্জ উপোসথিকো হুত্ৰা ৰিহারে সব্বরত্তিং ধম্মসৰনং সুণ, সহস্সং তে দস্সামী’তি ৰুত্তে ধনলোভেন উপোসথঙ্গানি সমাদায ৰিহারং গন্ত্ৰা ‘ইদং ঠানং অকুতোভয’ন্তি সল্লক্খেত্ৰা ধম্মাসনস্স হেট্ঠা নিপন্নো সব্বরত্তিং নিদ্দাযিত্ৰা ঘরং অগমাসি। মাতা পাতোৰ যাগুং পচিত্ৰা উপনামেসি। সো সহস্সং গহেত্ৰাৰ যাগুং পিৰি। অথস্স এতদহোসি – ‘ধনং সংহরিস্সামী’তি। সো নাৰায সমুদ্দং পক্খন্দিতুকামো অহোসি। অথ নং মাতা ‘‘তাত, ইমস্মিং কুলে চত্তালীসকোটিধনং অত্থি; অলং গমনেনা’’তি ৰারেসি। সো তস্সা ৰচনং অনাদিযিত্ৰা গচ্ছতি এৰ। সা পুরতো অট্ঠাসি। অথ নং কুজ্ঝিত্ৰা ‘অযং ময্হং পুরতো তিট্ঠতী’তি পাদেন পহরিত্ৰা পতিতং মাতরং অন্তরং কত্ৰা অগমাসি। মাতা উট্ঠহিত্ৰা ‘‘মাদিসায মাতরি এৰরূপং কম্মং কত্ৰা গতস্স মে গতট্ঠানে সুখং ভৰিস্সতী’’তি এৰংসঞ্ঞী নাম ত্ৰং পুত্তাতি আহ। তস্স নাৰং আরুয্হ গচ্ছতো সত্তমে দিৰসে নাৰা অট্ঠাসি। অথ তে মনুস্সা ‘‘অদ্ধা এত্থ পাপপুরিসো অত্থি; সলাকং দেথা’’তি সলাকা দীযমানা তস্সেৰ তিক্খত্তুং পাপুণি। তে তস্স উল়ুম্পং দত্ৰা তং সমুদ্দে পক্খিপিংসু। সো একং দীপং গন্ত্ৰা ৰিমানপেতীহি সদ্ধিং সম্পত্তিং অনুভৰন্তো তাহি ‘‘পুরতো মা অগমাসী’’তি ৰুচ্চমানোপি তদ্দিগুণং সম্পত্তিং পস্সন্তো অনুপুব্বেন খুরচক্কধরং একং পুরিসং অদ্দস। তস্স তং চক্কং পদুমপুপ্ফং ৰিয উপট্ঠাতি। সো তং আহ – ‘‘অম্ভো, ইদং তযা পিল়ন্ধপদুমং ময্হং দেহী’’তি। ‘‘নযিদং, সামি , পদুমং; খুরচক্কং এত’’ন্তি। সো ‘‘ৰঞ্চেসি মং ত্ৰং। কিং মে পদুমং ন দিট্ঠপুব্ব’’ন্তি ৰত্ৰা ‘‘ত্ৰঞ্হি লোহিতচন্দনং লিম্পেত্ৰা পিল়ন্ধনং পদুমপুপ্ফং ময্হং ন দাতুকামোসী’’তি আহ। সো চিন্তেসি – ‘অযম্পি মযা কতসদিসং কম্মং কত্ৰা তস্স ফলং অনুভৰিতুকামো’তি। অথ নং ‘‘হন্দ রে’’তি ৰত্ৰা তস্স মত্থকে চক্কং পক্খিপিত্ৰা পলাযি। এতমত্থং ৰিদিত্ৰা সত্থা ইমং গাথমাহ –

    Kassapabuddhakālepi mittavindako nāma seṭṭhiputto assaddho appasanno mātarā ‘tāta, ajja uposathiko hutvā vihāre sabbarattiṃ dhammasavanaṃ suṇa, sahassaṃ te dassāmī’ti vutte dhanalobhena uposathaṅgāni samādāya vihāraṃ gantvā ‘idaṃ ṭhānaṃ akutobhaya’nti sallakkhetvā dhammāsanassa heṭṭhā nipanno sabbarattiṃ niddāyitvā gharaṃ agamāsi. Mātā pātova yāguṃ pacitvā upanāmesi. So sahassaṃ gahetvāva yāguṃ pivi. Athassa etadahosi – ‘dhanaṃ saṃharissāmī’ti. So nāvāya samuddaṃ pakkhanditukāmo ahosi. Atha naṃ mātā ‘‘tāta, imasmiṃ kule cattālīsakoṭidhanaṃ atthi; alaṃ gamanenā’’ti vāresi. So tassā vacanaṃ anādiyitvā gacchati eva. Sā purato aṭṭhāsi. Atha naṃ kujjhitvā ‘ayaṃ mayhaṃ purato tiṭṭhatī’ti pādena paharitvā patitaṃ mātaraṃ antaraṃ katvā agamāsi. Mātā uṭṭhahitvā ‘‘mādisāya mātari evarūpaṃ kammaṃ katvā gatassa me gataṭṭhāne sukhaṃ bhavissatī’’ti evaṃsaññī nāma tvaṃ puttāti āha. Tassa nāvaṃ āruyha gacchato sattame divase nāvā aṭṭhāsi. Atha te manussā ‘‘addhā ettha pāpapuriso atthi; salākaṃ dethā’’ti salākā dīyamānā tasseva tikkhattuṃ pāpuṇi. Te tassa uḷumpaṃ datvā taṃ samudde pakkhipiṃsu. So ekaṃ dīpaṃ gantvā vimānapetīhi saddhiṃ sampattiṃ anubhavanto tāhi ‘‘purato mā agamāsī’’ti vuccamānopi taddiguṇaṃ sampattiṃ passanto anupubbena khuracakkadharaṃ ekaṃ purisaṃ addasa. Tassa taṃ cakkaṃ padumapupphaṃ viya upaṭṭhāti. So taṃ āha – ‘‘ambho, idaṃ tayā piḷandhapadumaṃ mayhaṃ dehī’’ti. ‘‘Nayidaṃ, sāmi , padumaṃ; khuracakkaṃ eta’’nti. So ‘‘vañcesi maṃ tvaṃ. Kiṃ me padumaṃ na diṭṭhapubba’’nti vatvā ‘‘tvañhi lohitacandanaṃ limpetvā piḷandhanaṃ padumapupphaṃ mayhaṃ na dātukāmosī’’ti āha. So cintesi – ‘ayampi mayā katasadisaṃ kammaṃ katvā tassa phalaṃ anubhavitukāmo’ti. Atha naṃ ‘‘handa re’’ti vatvā tassa matthake cakkaṃ pakkhipitvā palāyi. Etamatthaṃ viditvā satthā imaṃ gāthamāha –

    ‘‘চতুব্ভি অট্ঠজ্ঝগমা, অট্ঠহি পিচ সোল়স।

    ‘‘Catubbhi aṭṭhajjhagamā, aṭṭhahi pica soḷasa;

    সোল়সাহি চ বাত্তিংস, অত্রিচ্ছং চক্কমাসদো।

    Soḷasāhi ca bāttiṃsa, atricchaṃ cakkamāsado;

    ইচ্ছাহতস্স পোসস্স, চক্কং ভমতি মত্থকে’’তি॥ (জা॰ ১.১.১০৪)।

    Icchāhatassa posassa, cakkaṃ bhamati matthake’’ti. (jā. 1.1.104);

    অঞ্ঞতরোপি অত্রিচ্ছো অমচ্চো সকৰিসযং অতিক্কমিত্ৰা পরৰিসযং পাৰিসি। তত্থ পোথিতো পলাযিত্ৰা একস্স তাপসস্স ৰসনট্ঠানং পৰিসিত্ৰা উপোসথঙ্গানি অধিট্ঠায নিপজ্জি। সো তাপসেন ‘কিং তে কত’ন্তি পুচ্ছিতো ইমা গাথাযো অভাসি –

    Aññataropi atriccho amacco sakavisayaṃ atikkamitvā paravisayaṃ pāvisi. Tattha pothito palāyitvā ekassa tāpasassa vasanaṭṭhānaṃ pavisitvā uposathaṅgāni adhiṭṭhāya nipajji. So tāpasena ‘kiṃ te kata’nti pucchito imā gāthāyo abhāsi –

    ‘‘সকং নিকেতং অতিহীল়যানো,

    ‘‘Sakaṃ niketaṃ atihīḷayāno,

    অত্রিচ্ছতা মল্লগামং অগচ্ছিং।

    Atricchatā mallagāmaṃ agacchiṃ;

    ততো জনা নিক্খমিত্ৰান গামা,

    Tato janā nikkhamitvāna gāmā,

    কোদণ্ডকেন পরিপোথযিংসু মং॥

    Kodaṇḍakena paripothayiṃsu maṃ.

    ‘‘সো ভিন্নসীসো রুহিরমক্খিতঙ্গো,

    ‘‘So bhinnasīso ruhiramakkhitaṅgo,

    পচ্চাগমাসিং সকং নিকেতং।

    Paccāgamāsiṃ sakaṃ niketaṃ;

    তস্মা অহং পোসথং পালযামি,

    Tasmā ahaṃ posathaṃ pālayāmi,

    অত্রিচ্ছতা মা পুনরাগমাসী’’তি॥ (জা॰ ১.১৪.১৩৮-১৩৯)।

    Atricchatā mā punarāgamāsī’’ti. (jā. 1.14.138-139);

    ৮৫০. মহিচ্ছতানিদ্দেসে মহন্তানি ৰত্থূনি ইচ্ছতি, মহতী ৰাস্স ইচ্ছাতি মহিচ্ছো, তস্স ভাৰো মহিচ্ছতা। লক্খণতো পন অসন্তগুণসম্ভাৰনতা পটিগ্গহণে চ পরিভোগে চ অমত্তঞ্ঞুতা – এতং মহিচ্ছতালক্খণং। মহিচ্ছো হি পুগ্গলো যথা নাম কচ্ছপুটৰাণিজো পিল়ন্ধনভণ্ডকং হত্থেন গহেত্ৰা উচ্ছঙ্গেপি পক্খিপিতব্বযুত্তকং পক্খিপিত্ৰা মহাজনস্স পস্সন্তস্সেৰ ‘‘অম্মা, অসুকং গণ্হথ, অসুকং গণ্হথা’’তি মুখেন সংৰিদহতি। এৰমেৰ সো অপ্পমত্তকম্পি অত্তনো সীলং ৰা গন্থং ৰা ধুতগুণং ৰা অন্তমসো অরঞ্ঞৰাসমত্তকম্পি মহাজনস্স জানন্তস্সেৰ সম্ভাৰেতুকামো হোতি, সম্ভাৰেত্ৰা চ পন সকটেহিপি উপনীতে পচ্চযে ‘অল’ন্তি অৰত্ৰা গণ্হাতি। তযো হি পূরেতুং ন সক্কা – অগ্গি উপাদানেন, সমুদ্দো উদকেন, মহিচ্ছো পচ্চযেহীতি।

    850. Mahicchatāniddese mahantāni vatthūni icchati, mahatī vāssa icchāti mahiccho, tassa bhāvo mahicchatā. Lakkhaṇato pana asantaguṇasambhāvanatā paṭiggahaṇe ca paribhoge ca amattaññutā – etaṃ mahicchatālakkhaṇaṃ. Mahiccho hi puggalo yathā nāma kacchapuṭavāṇijo piḷandhanabhaṇḍakaṃ hatthena gahetvā ucchaṅgepi pakkhipitabbayuttakaṃ pakkhipitvā mahājanassa passantasseva ‘‘ammā, asukaṃ gaṇhatha, asukaṃ gaṇhathā’’ti mukhena saṃvidahati. Evameva so appamattakampi attano sīlaṃ vā ganthaṃ vā dhutaguṇaṃ vā antamaso araññavāsamattakampi mahājanassa jānantasseva sambhāvetukāmo hoti, sambhāvetvā ca pana sakaṭehipi upanīte paccaye ‘ala’nti avatvā gaṇhāti. Tayo hi pūretuṃ na sakkā – aggi upādānena, samuddo udakena, mahiccho paccayehīti.

    অগ্গিক্খন্ধো সমুদ্দো চ, মহিচ্ছো চাপি পুগ্গলো।

    Aggikkhandho samuddo ca, mahiccho cāpi puggalo;

    বহুকে পচ্চযে দেন্তে, তযো পেতে ন পূরযে॥

    Bahuke paccaye dente, tayo pete na pūraye.

    মহিচ্ছপুগ্গলো হি ৰিজাতমাতুযাপি মনং গণ্হিতুং ন সক্কোতি, পগেৰ উপট্ঠাকানং।

    Mahicchapuggalo hi vijātamātuyāpi manaṃ gaṇhituṃ na sakkoti, pageva upaṭṭhākānaṃ.

    তত্রিমানি ৰত্থূনি – একো কির দহরভিক্খু পিট্ঠপূৰে পিযাযতি। অথস্স মাতা পটিপত্তিং ৰীমংসমানা ‘সচে মে পুত্তো পটিগ্গহণে মত্তং জানাতি, সকলম্পি নং তেমাসং পূৰেহেৰ উপট্ঠহিস্সামী’তি ৰস্সূপনাযিকদিৰসে পরিৰীমংসমানা পঠমং একং পূৰং অদাসি, তস্মিং নিট্ঠিতে দুতিযং, তস্মিম্পি নিট্ঠিতে ততিযং। দহরো ‘অল’ন্তি অৰত্ৰা খাদিযেৰ। মাতা তস্স অমত্তঞ্ঞুভাৰং ঞত্ৰা ‘অজ্জেৰ মে পুত্তেন সকলতেমাসস্স পূৰা খাদিতা’তি দুতিযদিৰসতো পট্ঠায একপূৰম্পি ন অদাসি।

    Tatrimāni vatthūni – eko kira daharabhikkhu piṭṭhapūve piyāyati. Athassa mātā paṭipattiṃ vīmaṃsamānā ‘sace me putto paṭiggahaṇe mattaṃ jānāti, sakalampi naṃ temāsaṃ pūveheva upaṭṭhahissāmī’ti vassūpanāyikadivase parivīmaṃsamānā paṭhamaṃ ekaṃ pūvaṃ adāsi, tasmiṃ niṭṭhite dutiyaṃ, tasmimpi niṭṭhite tatiyaṃ. Daharo ‘ala’nti avatvā khādiyeva. Mātā tassa amattaññubhāvaṃ ñatvā ‘ajjeva me puttena sakalatemāsassa pūvā khāditā’ti dutiyadivasato paṭṭhāya ekapūvampi na adāsi.

    তিস্সমহারাজাপি দেৰসিকং চেতিযপব্বতে ভিক্খুসঙ্ঘস্স দানং দদমানো ‘মহারাজ, কিং একমেৰ ঠানং ভজসি? কিং অঞ্ঞত্থ দাতুং ন ৰট্টতী’তি জানপদেহি ৰুত্তো দুতিযদিৰসে অনুরাধপুরে মহাদানং দাপেসি। একভিক্খুপি পটিগ্গহণে মত্তং ন অঞ্ঞাসি। একমেকেন পটিগ্গহিতং খাদনীযভোজনীযং দ্ৰে তযো জনা উক্খিপিংসু। রাজা দুতিযদিৰসে চেতিযপব্বতে ভিক্খুসঙ্ঘং নিমন্তাপেত্ৰা রাজন্তেপুরং আগতকালে ‘‘পত্তং দেথা’’তি আহ। ‘‘অলং, মহারাজ, অত্তনো পমাণেন ভিক্খং গণ্হিস্সতী’’তি একভিক্খুপি পত্তং ন অদাসি। সব্বে পমাণযুত্তকমেৰ পটিগ্গহেসুং। অথ রাজা আহ – ‘‘পস্সথ তুম্হাকং ভিক্খূসু একোপি মত্তং ন জানাতি। হিয্যো কিঞ্চি অৰসেসং নাহোসি। অজ্জ গহিতং মন্দং, অৰসেসমেৰ বহূ’’তি তেসং মত্তঞ্ঞুতায অত্তমনো ইতরেসঞ্চ অমত্তঞ্ঞুতায অনত্তমনো অহোসি।

    Tissamahārājāpi devasikaṃ cetiyapabbate bhikkhusaṅghassa dānaṃ dadamāno ‘mahārāja, kiṃ ekameva ṭhānaṃ bhajasi? Kiṃ aññattha dātuṃ na vaṭṭatī’ti jānapadehi vutto dutiyadivase anurādhapure mahādānaṃ dāpesi. Ekabhikkhupi paṭiggahaṇe mattaṃ na aññāsi. Ekamekena paṭiggahitaṃ khādanīyabhojanīyaṃ dve tayo janā ukkhipiṃsu. Rājā dutiyadivase cetiyapabbate bhikkhusaṅghaṃ nimantāpetvā rājantepuraṃ āgatakāle ‘‘pattaṃ dethā’’ti āha. ‘‘Alaṃ, mahārāja, attano pamāṇena bhikkhaṃ gaṇhissatī’’ti ekabhikkhupi pattaṃ na adāsi. Sabbe pamāṇayuttakameva paṭiggahesuṃ. Atha rājā āha – ‘‘passatha tumhākaṃ bhikkhūsu ekopi mattaṃ na jānāti. Hiyyo kiñci avasesaṃ nāhosi. Ajja gahitaṃ mandaṃ, avasesameva bahū’’ti tesaṃ mattaññutāya attamano itaresañca amattaññutāya anattamano ahosi.

    ৮৫১. পাপিচ্ছতানিদ্দেসে অস্সদ্ধো সমানো সদ্ধোতি মং জনো জানাতূতিআদীসু এৰং ইচ্ছন্তো কিং করোতি? অস্সদ্ধো সদ্ধাকারং দস্সেতি; দুস্সীলাদযো সীলৰন্তাদীনং আকারং দস্সেন্তি। কথং? অস্সদ্ধো তাৰ মহামহদিৰসে মনুস্সানং ৰিহারং আগমনৰেলায সম্মজ্জনিং আদায ৰিহারং সম্মজ্জতি, কচৰরং ছড্ডেতি, মনুস্সেহি দিট্ঠভাৰং ঞত্ৰা চেতিযঙ্গণং গচ্ছতি, তত্থাপি সম্মজ্জিত্ৰা কচৰরং ছড্ডেতি, ৰালিকং সমং করোতি, আসনানি ধোৰতি, বোধিম্হি উদকং সিঞ্চতি। মনুস্সা দিস্ৰা ‘নত্থি মঞ্ঞে অঞ্ঞো ভিক্খু ৰিহারজগ্গনকো, অযমেৰ ইমং ৰিহারং পটিজগ্গতি, সদ্ধো থেরো’তি গমনকালে নিমন্তেত্ৰা গচ্ছন্তি। দুস্সীলোপি উপট্ঠাকানং সম্মুখে ৰিনযধরং উপসঙ্কমিত্ৰা পুচ্ছতি ‘‘ভন্তে, মযি গচ্ছন্তে গোণো উব্বিগ্গো। তেন ধাৰতা তিণানি ছিন্নানি। সম্মজ্জন্তস্স মে তিণানি ছিজ্জন্তি। চঙ্কমন্তস্স মে পাণকা মীযন্তি। খেল়ং পাতেন্তস্স অসতিযা তিণমত্থকে পততি; তত্থ তত্থ কিং হোতী’’তি? ‘‘অনাপত্তি, আৰুসো, অসঞ্চিচ্চ অসতিযা অজানন্তস্সা’’তি চ ৰুত্তে ‘‘ভন্তে, ময্হং গরুকং ৰিয উপট্ঠাতি; সুট্ঠু ৰীমংসথা’’তি ভণতি। তং সুত্ৰা মনুস্সা ‘অম্হাকং অয্যো এত্তকেপি কুক্কুচ্চাযতি! অঞ্ঞস্মিং ওল়ারিকে কিং নাম করিস্সতি; নত্থি ইমিনা সদিসো সীলৰাতি পসন্না সক্কারং করোন্তি। অপ্পস্সুতোপি উপট্ঠাকমজ্ঝে নিসিন্নো ‘‘অসুকো তিপিটকধরো, অসুকো চতুনিকাযিকো ময্হং অন্তেৰাসিকো, মম সন্তিকে তেহি ধম্মো উগ্গহিতো’’তি ৰদতি। মনুস্সা ‘অম্হাকং অয্যেন সদিসো বহুস্সুতো নত্থি, এতস্স কির সন্তিকে অসুকেন চ অসুকেন চ ধম্মো উগ্গহিতো’তি পসন্না সক্কারং করোন্তি।

    851. Pāpicchatāniddese assaddho samāno saddhoti maṃ jano jānātūtiādīsu evaṃ icchanto kiṃ karoti? Assaddho saddhākāraṃ dasseti; dussīlādayo sīlavantādīnaṃ ākāraṃ dassenti. Kathaṃ? Assaddho tāva mahāmahadivase manussānaṃ vihāraṃ āgamanavelāya sammajjaniṃ ādāya vihāraṃ sammajjati, kacavaraṃ chaḍḍeti, manussehi diṭṭhabhāvaṃ ñatvā cetiyaṅgaṇaṃ gacchati, tatthāpi sammajjitvā kacavaraṃ chaḍḍeti, vālikaṃ samaṃ karoti, āsanāni dhovati, bodhimhi udakaṃ siñcati. Manussā disvā ‘natthi maññe añño bhikkhu vihārajagganako, ayameva imaṃ vihāraṃ paṭijaggati, saddho thero’ti gamanakāle nimantetvā gacchanti. Dussīlopi upaṭṭhākānaṃ sammukhe vinayadharaṃ upasaṅkamitvā pucchati ‘‘bhante, mayi gacchante goṇo ubbiggo. Tena dhāvatā tiṇāni chinnāni. Sammajjantassa me tiṇāni chijjanti. Caṅkamantassa me pāṇakā mīyanti. Kheḷaṃ pātentassa asatiyā tiṇamatthake patati; tattha tattha kiṃ hotī’’ti? ‘‘Anāpatti, āvuso, asañcicca asatiyā ajānantassā’’ti ca vutte ‘‘bhante, mayhaṃ garukaṃ viya upaṭṭhāti; suṭṭhu vīmaṃsathā’’ti bhaṇati. Taṃ sutvā manussā ‘amhākaṃ ayyo ettakepi kukkuccāyati! Aññasmiṃ oḷārike kiṃ nāma karissati; natthi iminā sadiso sīlavāti pasannā sakkāraṃ karonti. Appassutopi upaṭṭhākamajjhe nisinno ‘‘asuko tipiṭakadharo, asuko catunikāyiko mayhaṃ antevāsiko, mama santike tehi dhammo uggahito’’ti vadati. Manussā ‘amhākaṃ ayyena sadiso bahussuto natthi, etassa kira santike asukena ca asukena ca dhammo uggahito’ti pasannā sakkāraṃ karonti.

    সঙ্গণিকারামোপি মহামহদিৰসে দীঘপীঠঞ্চ অপস্সযঞ্চ গাহাপেত্ৰা ৰিহারপচ্চন্তে রুক্খমূলে দিৰাৰিহারং নিসীদতি। মনুস্সা আগন্ত্ৰা ‘‘থেরো কুহি’’ন্তি পুচ্ছন্তি। ‘‘গণ্ঠিকপুত্তা নাম গণ্ঠিকা এৰ হোন্তি। তেন থেরো এৰরূপে কালে ইধ ন নিসীদতি, ৰিহারপচ্চন্তে দিৰাট্ঠানে দীঘচঙ্কমে ৰিহরতী’’তি ৰদন্তি। সোপি দিৰসভাগং ৰীতিনামেত্ৰা নলাটে মক্কটসুত্তং অল্লিযাপেত্ৰা পীঠং গাহাপেত্ৰা আগম্ম পরিৰেণদ্ৰারে নিসীদতি। মনুস্সা ‘‘কহং, ভন্তে, গতত্থ? আগন্ত্ৰা ন অদ্দসম্হা’’তি ৰদন্তি। ‘‘উপাসকা, অন্তোৰিহারো আকিণ্ণো; দহরসামণেরানং ৰিচরণট্ঠানমেতং সট্ঠিহত্থচঙ্কমে দিৰাট্ঠানে নিসীদিম্হা’’তি অত্তনো পৰিৰিত্তভাৰং জানাপেতি।

    Saṅgaṇikārāmopi mahāmahadivase dīghapīṭhañca apassayañca gāhāpetvā vihārapaccante rukkhamūle divāvihāraṃ nisīdati. Manussā āgantvā ‘‘thero kuhi’’nti pucchanti. ‘‘Gaṇṭhikaputtā nāma gaṇṭhikā eva honti. Tena thero evarūpe kāle idha na nisīdati, vihārapaccante divāṭṭhāne dīghacaṅkame viharatī’’ti vadanti. Sopi divasabhāgaṃ vītināmetvā nalāṭe makkaṭasuttaṃ alliyāpetvā pīṭhaṃ gāhāpetvā āgamma pariveṇadvāre nisīdati. Manussā ‘‘kahaṃ, bhante, gatattha? Āgantvā na addasamhā’’ti vadanti. ‘‘Upāsakā, antovihāro ākiṇṇo; daharasāmaṇerānaṃ vicaraṇaṭṭhānametaṃ saṭṭhihatthacaṅkame divāṭṭhāne nisīdimhā’’ti attano pavivittabhāvaṃ jānāpeti.

    কুসীতোপি উপট্ঠাকমজ্ঝে নিসিন্নো ‘‘উপাসকা, তুম্হেহি উক্কাপাতো দিট্ঠো’’তি ৰদতি। ‘‘ন পস্সাম, ভন্তে; কায ৰেলায অহোসী’’তি চ পুট্ঠো ‘‘অম্হাকং চঙ্কমনৰেলাযা’’তি ৰত্ৰা ‘‘ভূমিচালসদ্দং অস্সুত্থা’’তি পুচ্ছতি। ‘‘ন সুণাম, ভন্তে; কায ৰেলাযা’’তি পুট্ঠো ‘‘মজ্ঝিমযামে অম্হাকং আলম্বনফলকং অপস্সায ঠিতকালে’’তি ৰত্ৰা ‘‘মহাওভাসো অহোসি; সো ৰো দিট্ঠো’’তি পুচ্ছতি। ‘‘কায ৰেলায, ভন্তে’’তি চ ৰুত্তে ‘‘ময্হং চঙ্কমম্হা ওতরণকালে’’তি ৰদতি। মনুস্সা ‘অম্হাকং থেরো তীসুপি যামেসু চঙ্কমেযেৰ হোতি; নত্থি অয্যেন সদিসো আরদ্ধৰীরিযো’তি পসন্না সক্কারং করোন্তি।

    Kusītopi upaṭṭhākamajjhe nisinno ‘‘upāsakā, tumhehi ukkāpāto diṭṭho’’ti vadati. ‘‘Na passāma, bhante; kāya velāya ahosī’’ti ca puṭṭho ‘‘amhākaṃ caṅkamanavelāyā’’ti vatvā ‘‘bhūmicālasaddaṃ assutthā’’ti pucchati. ‘‘Na suṇāma, bhante; kāya velāyā’’ti puṭṭho ‘‘majjhimayāme amhākaṃ ālambanaphalakaṃ apassāya ṭhitakāle’’ti vatvā ‘‘mahāobhāso ahosi; so vo diṭṭho’’ti pucchati. ‘‘Kāya velāya, bhante’’ti ca vutte ‘‘mayhaṃ caṅkamamhā otaraṇakāle’’ti vadati. Manussā ‘amhākaṃ thero tīsupi yāmesu caṅkameyeva hoti; natthi ayyena sadiso āraddhavīriyo’ti pasannā sakkāraṃ karonti.

    মুট্ঠস্সতীপি উপট্ঠাকমজ্ঝে নিসিন্নো ‘‘মযা অসুককালে নাম দীঘনিকাযো উগ্গহিতো, অসুককালে মজ্ঝিমো, সংযুত্তকো, অঙ্গুত্তরিকো; অন্তরা ওলোকনং নাম নত্থি, ইচ্ছিতিচ্ছতট্ঠানে মুখারুল়্হোৰ তন্তি আগচ্ছতি; ইমে পনঞ্ঞে ভিক্খূ এল়কা ৰিয মুখং ফন্দাপেন্তা ৰিহরন্তী’’তি ৰদতি। মনুস্সা ‘নত্থি অয্যেন সদিসো উপট্ঠিতসতী’তি পসন্না সক্কারং করোন্তি।

    Muṭṭhassatīpi upaṭṭhākamajjhe nisinno ‘‘mayā asukakāle nāma dīghanikāyo uggahito, asukakāle majjhimo, saṃyuttako, aṅguttariko; antarā olokanaṃ nāma natthi, icchiticchataṭṭhāne mukhāruḷhova tanti āgacchati; ime panaññe bhikkhū eḷakā viya mukhaṃ phandāpentā viharantī’’ti vadati. Manussā ‘natthi ayyena sadiso upaṭṭhitasatī’ti pasannā sakkāraṃ karonti.

    অসমাহিতোপি উপট্ঠাকানং সম্মুখে অট্ঠকথাচরিযে পঞ্হং পুচ্ছতি – ‘কসিণং নাম কথং ভাৰেতি? কিত্তকেন নিমিত্তং উপ্পন্নং নাম হোতি? কিত্তকেন উপচারো? কিত্তকেন অপ্পনা? পঠমস্স ঝানস্স কতি অঙ্গানি? দুতিযস্স ততিযস্স চতুত্থস্স ঝানস্স কতি অঙ্গানি’’তি পুচ্ছতি। তেহি অত্তনো উগ্গহিতানুরূপেন কথিতকালে সিতং কত্ৰা ‘কিং, আৰুসো, এৰং ন হোসী’তি ৰুত্তে ‘ৰট্টতি, ভন্তে’তি অত্তনো সমাপত্তিলাভিতং সূচেতি। মনুস্সা ‘সমাপত্তিলাভী অয্যো’তি পসন্না সক্কারং করোন্তি।

    Asamāhitopi upaṭṭhākānaṃ sammukhe aṭṭhakathācariye pañhaṃ pucchati – ‘kasiṇaṃ nāma kathaṃ bhāveti? Kittakena nimittaṃ uppannaṃ nāma hoti? Kittakena upacāro? Kittakena appanā? Paṭhamassa jhānassa kati aṅgāni? Dutiyassa tatiyassa catutthassa jhānassa kati aṅgāni’’ti pucchati. Tehi attano uggahitānurūpena kathitakāle sitaṃ katvā ‘kiṃ, āvuso, evaṃ na hosī’ti vutte ‘vaṭṭati, bhante’ti attano samāpattilābhitaṃ sūceti. Manussā ‘samāpattilābhī ayyo’ti pasannā sakkāraṃ karonti.

    দুপ্পঞ্ঞোপি উপট্ঠাকানং মজ্ঝে নিসিন্নো ‘মজ্ঝিমনিকাযে মে পঞ্চত্তযং ওলোকেন্তস্স সহিদ্ধিযাৰ মগ্গো আগতো। পরিযত্তি নাম অম্হাকং ন দুক্করা। পরিযত্তিৰাৰটো পন দুক্খতো ন মুচ্চতীতি পরিযত্তিং ৰিস্সজ্জযিম্হা’তিআদীনি ৰদন্তো অত্তনো মহাপঞ্ঞতং দীপেতি। এৰং ৰদন্তো পনস্স সাসনে পহারং দেতি। ইমিনা সদিসো মহাচোরো নাম নত্থি। ন হি পরিযত্তিধরো দুক্খতো ন মুচ্চতীতি। অখীণাসৰোপি গামদারকে দিস্ৰা ‘তুম্হাকং মাতাপিতরো অম্হে কিং ৰদন্তী’’তি? ‘‘অরহাতি ৰদন্তি, ভন্তে’’তি। ‘যাৰ ছেকা গহপতিকা, ন সক্কা ৰঞ্চেতু’ন্তি অত্তনো খীণাসৰভাৰং দীপেতি।

    Duppaññopi upaṭṭhākānaṃ majjhe nisinno ‘majjhimanikāye me pañcattayaṃ olokentassa sahiddhiyāva maggo āgato. Pariyatti nāma amhākaṃ na dukkarā. Pariyattivāvaṭo pana dukkhato na muccatīti pariyattiṃ vissajjayimhā’tiādīni vadanto attano mahāpaññataṃ dīpeti. Evaṃ vadanto panassa sāsane pahāraṃ deti. Iminā sadiso mahācoro nāma natthi. Na hi pariyattidharo dukkhato na muccatīti. Akhīṇāsavopi gāmadārake disvā ‘tumhākaṃ mātāpitaro amhe kiṃ vadantī’’ti? ‘‘Arahāti vadanti, bhante’’ti. ‘Yāva chekā gahapatikā, na sakkā vañcetu’nti attano khīṇāsavabhāvaṃ dīpeti.

    অঞ্ঞেপি চেত্থ চাটিঅরহন্তপারোহঅরহন্তাদযো ৰেদিতব্বা – একো কির কুহকো অন্তোগব্ভে চাটিং নিখণিত্ৰা মনুস্সানং আগমনকালে পৰিসতি। মনুস্সা ‘কহং থেরো’তি পুচ্ছন্তি। ‘অন্তোগব্ভে’তি চ ৰুত্তে পৰিসিত্ৰা ৰিচিনন্তাপি অদিস্ৰা নিক্খমিত্ৰা ‘নত্থি থেরো’তি ৰদন্তি। ‘অন্তোগব্ভেযেৰ থেরো’তি চ ৰুত্তে পুন পৰিসন্তি। থেরো চাটিতো নিক্খমিত্ৰা পীঠে নিসিন্নো হোতি। ততো তেহি ‘মযং, ভন্তে, পুব্বে অদিস্ৰা নিক্খন্তা, কহং তুম্হে গতত্থা’’তি ৰুত্তে ‘সমণা নাম অত্তনো ইচ্ছিতিচ্ছিতট্ঠানং গচ্ছন্তী’তি ৰচনেন অত্তনো খীণাসৰভাৰং দীপেতি।

    Aññepi cettha cāṭiarahantapārohaarahantādayo veditabbā – eko kira kuhako antogabbhe cāṭiṃ nikhaṇitvā manussānaṃ āgamanakāle pavisati. Manussā ‘kahaṃ thero’ti pucchanti. ‘Antogabbhe’ti ca vutte pavisitvā vicinantāpi adisvā nikkhamitvā ‘natthi thero’ti vadanti. ‘Antogabbheyeva thero’ti ca vutte puna pavisanti. Thero cāṭito nikkhamitvā pīṭhe nisinno hoti. Tato tehi ‘mayaṃ, bhante, pubbe adisvā nikkhantā, kahaṃ tumhe gatatthā’’ti vutte ‘samaṇā nāma attano icchiticchitaṭṭhānaṃ gacchantī’ti vacanena attano khīṇāsavabhāvaṃ dīpeti.

    অপরোপি কুহকো একস্মিং পব্বতে পণ্ণসালাযং ৰসতি। পণ্ণসালায চ পচ্ছতো পপাতট্ঠানে একো কচ্ছকরুক্খো অত্থি। তস্স পারোহো গন্ত্ৰা পরভাগে ভূমিযং পতিট্ঠিতো। মনুস্সা মগ্গেনাগন্ত্ৰা নিমন্তেন্তি। সো পত্তচীৰরমাদায পারোহেন ওতরিত্ৰা গামদ্ৰারে অত্তানং দস্সেতি। ততো মনুস্সেহি পচ্ছা আগন্ত্ৰা ‘কতরেন মগ্গেন আগতত্থ, ভন্তে’তি পুট্ঠো ‘সমণানং আগতমগ্গো নাম পুচ্ছিতুং ন ৰট্টতি, অত্তনো ইচ্ছিতিচ্ছিতট্ঠানেনেৰ আগচ্ছন্তী’তি ৰচনেন খীণাসৰভাৰং দীপেতি। তং পন কুহকং একো ৰিদ্ধকণ্ণো ঞত্ৰা ‘পরিগ্গহেস্সামি ন’ন্তি একদিৰসং পারোহেন ওতরন্তং দিস্ৰা পচ্ছতো ছিন্দিত্ৰা অপ্পমত্তকেন ঠপেসি। সো ‘পারোহতো ওতরিস্সামী’তি ‘ঠ’ন্তি পতিতো, মত্তিকা পত্তো ভিজ্জি। সো ‘ঞাতোম্হী’তি নিক্খমিত্ৰা পলাযি। পাপিচ্ছস্স ভাৰো পাপিচ্ছতা। লক্খণতো পন অসন্তগুণসম্ভাৰনতা, পটিগ্গহণে চ অমত্তঞ্ঞুতা; এতং পাপিচ্ছতালক্খণন্তি ৰেদিতব্বং।

    Aparopi kuhako ekasmiṃ pabbate paṇṇasālāyaṃ vasati. Paṇṇasālāya ca pacchato papātaṭṭhāne eko kacchakarukkho atthi. Tassa pāroho gantvā parabhāge bhūmiyaṃ patiṭṭhito. Manussā maggenāgantvā nimantenti. So pattacīvaramādāya pārohena otaritvā gāmadvāre attānaṃ dasseti. Tato manussehi pacchā āgantvā ‘katarena maggena āgatattha, bhante’ti puṭṭho ‘samaṇānaṃ āgatamaggo nāma pucchituṃ na vaṭṭati, attano icchiticchitaṭṭhāneneva āgacchantī’ti vacanena khīṇāsavabhāvaṃ dīpeti. Taṃ pana kuhakaṃ eko viddhakaṇṇo ñatvā ‘pariggahessāmi na’nti ekadivasaṃ pārohena otarantaṃ disvā pacchato chinditvā appamattakena ṭhapesi. So ‘pārohato otarissāmī’ti ‘ṭha’nti patito, mattikā patto bhijji. So ‘ñātomhī’ti nikkhamitvā palāyi. Pāpicchassa bhāvo pāpicchatā. Lakkhaṇato pana asantaguṇasambhāvanatā, paṭiggahaṇe ca amattaññutā; etaṃ pāpicchatālakkhaṇanti veditabbaṃ.

    ৮৫২. সিঙ্গনিদ্দেসে ৰিজ্ঝনট্ঠেন সিঙ্গং; নাগরিকভাৰসঙ্খাতস্স কিলেসসিঙ্গস্সেতং নামং। সিঙ্গারভাৰো সিঙ্গারতা, সিঙ্গারকরণাকারো ৰা। চতুরভাৰো চতুরতা। তথা চাতুরিযং। পরিক্খতভাৰো পরিক্খততা; পরিখণিত্ৰা ঠপিতস্সেৰ দল়্হসিঙ্গারভাৰস্সেতং নামং । ইতরং তস্সেৰ ৰেৰচনং। এৰং সব্বেহিপি পদেহি কিলেসসিঙ্গারতাৰ কথিতা।

    852. Siṅganiddese vijjhanaṭṭhena siṅgaṃ; nāgarikabhāvasaṅkhātassa kilesasiṅgassetaṃ nāmaṃ. Siṅgārabhāvo siṅgāratā, siṅgārakaraṇākāro vā. Caturabhāvo caturatā. Tathā cāturiyaṃ. Parikkhatabhāvo parikkhatatā; parikhaṇitvā ṭhapitasseva daḷhasiṅgārabhāvassetaṃ nāmaṃ . Itaraṃ tasseva vevacanaṃ. Evaṃ sabbehipi padehi kilesasiṅgāratāva kathitā.

    ৮৫৩. তিন্তিণনিদ্দেসে তিন্তিণন্তি খীযনং। তিন্তিণাযনাকারো তিন্তিণাযনা। তিন্তিণেন অযিতস্স তিন্তিণসমঙ্গিনো ভাৰো তিন্তিণাযিতত্তং। লোলুপভাৰো লোলুপ্পং। ইতরে দ্ৰে আকারভাৰনিদ্দেসা। পুচ্ছঞ্জিকতাতি লাভলভনকট্ঠানে ৰেধনাকম্পনা নীচৰুত্তিতা। সাধুকম্যতাতি পণীতপণীতানং পত্থনা। এৰং সব্বেহিপি পদেহি সুৰানদোণিযং কঞ্জিযং পিৰনকসুনখস্স অঞ্ঞং সুনখং দিস্ৰা ভুভুক্করণং ৰিয ‘তৰ সন্তকং, মম সন্তক’ন্তি কিলেসৰসেন খীযনাকারো কথিতো।

    853. Tintiṇaniddese tintiṇanti khīyanaṃ. Tintiṇāyanākāro tintiṇāyanā. Tintiṇena ayitassa tintiṇasamaṅgino bhāvo tintiṇāyitattaṃ. Lolupabhāvo loluppaṃ. Itare dve ākārabhāvaniddesā. Pucchañjikatāti lābhalabhanakaṭṭhāne vedhanākampanā nīcavuttitā. Sādhukamyatāti paṇītapaṇītānaṃ patthanā. Evaṃ sabbehipi padehi suvānadoṇiyaṃ kañjiyaṃ pivanakasunakhassa aññaṃ sunakhaṃ disvā bhubhukkaraṇaṃ viya ‘tava santakaṃ, mama santaka’nti kilesavasena khīyanākāro kathito.

    ৮৫৪. চাপল্যনিদ্দেসে আকোটিতপচ্চাকোটিতভাৰাদীহি চীৰরস্স মণ্ডনা চীৰরমণ্ডনা। মণিৰণ্ণচ্ছৰিকরণাদীহি পত্তস্স মণ্ডনা পত্তমণ্ডনা। চিত্তকম্মাদীহি পুগ্গলিকসেনাসনস্স মণ্ডনা সেনাসনমণ্ডনা। ইমস্স ৰা পূতিকাযস্সাতি ইমস্স মনুস্সসরীরস্স। যথা হি তদহুজাতোপি সিঙ্গালো জরসিঙ্গালোত্ৰেৰ ঊরুপ্পমাণাপি চ গল়োচিলতা পূতিলতাত্ৰেৰ সঙ্খং গচ্ছতি, এৰং সুৰণ্ণৰণ্ণোপি মনুস্সকাযো পূতিকাযোত্ৰেৰ ৰুচ্চতি। তস্স অন্তরন্তরা রত্তৰণ্ণপণ্ডুৰণ্ণাদীহি নিৰাসনপারুপনাদীহি সজ্জনা মণ্ডনা নাম। বাহিরানং ৰা পরিক্খারানন্তি ঠপেত্ৰা পত্তচীৰরং সেসপরিক্খারানং; অথৰা যা এসা চীৰরমণ্ডনা পত্তমণ্ডনাতি ৰুত্তা, সা তেহি ৰা পরিক্খারেহি কাযস্স মণ্ডনা তেসং ৰা বাহিরপরিক্খারানং মণ্ডেত্ৰা ঠপনৰসেন মণ্ডনাতি এৰমেত্থ অত্থো ৰেদিতব্বো। মণ্ডনা ৰিভূসনাতি এত্থ ঊনট্ঠানস্স পূরণৰসেন মণ্ডনা, ছৰিরাগাদিৰসেন ৰিভূসনাতি ৰেদিতব্বা। কেল়নাতি কীল়না। পরিকেল়নাতি পরিকীল়না। গিদ্ধিকতাতি গেধযুত্ততা। গিদ্ধিকত্তন্তি তস্সেৰ ৰেৰচনং। চপলভাৰো চপলতা। তথা চাপল্যং। ইদং ৰুচ্চতীতি ইদং চাপল্যং নাম ৰুচ্চতি, যেন সমন্নাগতো পুগ্গলো ৰস্সসতিকোপি সমানো তদহুজাতদারকো ৰিয হোতি।

    854. Cāpalyaniddese ākoṭitapaccākoṭitabhāvādīhi cīvarassa maṇḍanā cīvaramaṇḍanā. Maṇivaṇṇacchavikaraṇādīhi pattassa maṇḍanā pattamaṇḍanā. Cittakammādīhi puggalikasenāsanassa maṇḍanā senāsanamaṇḍanā. Imassa vā pūtikāyassāti imassa manussasarīrassa. Yathā hi tadahujātopi siṅgālo jarasiṅgālotveva ūruppamāṇāpi ca gaḷocilatā pūtilatātveva saṅkhaṃ gacchati, evaṃ suvaṇṇavaṇṇopi manussakāyo pūtikāyotveva vuccati. Tassa antarantarā rattavaṇṇapaṇḍuvaṇṇādīhi nivāsanapārupanādīhi sajjanā maṇḍanā nāma. Bāhirānaṃ vā parikkhārānanti ṭhapetvā pattacīvaraṃ sesaparikkhārānaṃ; athavā yā esā cīvaramaṇḍanā pattamaṇḍanāti vuttā, sā tehi vā parikkhārehi kāyassa maṇḍanā tesaṃ vā bāhiraparikkhārānaṃ maṇḍetvā ṭhapanavasena maṇḍanāti evamettha attho veditabbo. Maṇḍanā vibhūsanāti ettha ūnaṭṭhānassa pūraṇavasena maṇḍanā, chavirāgādivasena vibhūsanāti veditabbā. Keḷanāti kīḷanā. Parikeḷanāti parikīḷanā. Giddhikatāti gedhayuttatā. Giddhikattanti tasseva vevacanaṃ. Capalabhāvo capalatā. Tathā cāpalyaṃ. Idaṃ vuccatīti idaṃ cāpalyaṃ nāma vuccati, yena samannāgato puggalo vassasatikopi samāno tadahujātadārako viya hoti.

    ৮৫৫. অসভাগৰুত্তিনিদ্দেসে ৰিপ্পটিকূলগ্গাহিতাতি অননুলোমগ্গাহিতা। ৰিপচ্চনীকসাততাতি ৰিপচ্চনীকেন পটিৰিরুদ্ধকরণেন সুখাযনা। অনাদরভাৰো অনাদরিযং। তথা অনাদরিযতা। অগারৰস্স ভাৰো অগারৰতা। জেট্ঠকভাৰস্স অকরণং অপ্পতিস্সৰতা। অযং ৰুচ্চতীতি অযং অসভাগৰুত্তি নাম ৰুচ্চতি; ৰিসভাগজীৰিকতাতি অত্থো; যায সমন্নাগতো পুগ্গলো মাতরং পিতরং ৰা গিলানং পটিৰত্তিত্ৰাপি ন ওলোকেতি; পিতুসন্তকস্স কারণা মাতরা সদ্ধিং, মাতুসন্তকস্স কারণা পিতরা সদ্ধিং কলহং করোতি; ৰিসভাগজীৰিতং জীৰতি, মাতাপিতূনং সন্তকস্স কারণা জেট্ঠেন ৰা কনিট্ঠেন ৰা ভাতরা সদ্ধিং কলহং করোতি, নিল্লজ্জৰচনং ৰদতি, আচরিযস্স ৰা উপজ্ঝাযস্স ৰা ৰত্তপটিৰত্তং ন করোতি, গিলানং ন উপট্ঠাতি, বুদ্ধস্স ভগৰতো চেতিযদস্সনট্ঠানে উচ্চারং ৰা পস্সাৰং ৰা করোতি, খেল়ম্পি সিঙ্ঘাণিকম্পি ছড্ডেতি, ছত্তং ধারেতি, উপাহনা আরুয্হ গচ্ছতি, বুদ্ধসাৰকেসু ন লজ্জতি, সঙ্ঘে চিত্তীকারং ন করোতি, মাতিমত্তপিতিমত্তাদীসু গরুট্ঠানীযেসু হিরোত্তপ্পং ন পচ্চুপট্ঠাপেতি। তস্সেৰং পৰত্তমানস্স সব্বা পেসা কিরিযা মাতরীতিআদীসুপি ৰত্থূসু অসভাগৰুত্তিতা নাম হোতি।

    855. Asabhāgavuttiniddese vippaṭikūlaggāhitāti ananulomaggāhitā. Vipaccanīkasātatāti vipaccanīkena paṭiviruddhakaraṇena sukhāyanā. Anādarabhāvo anādariyaṃ. Tathā anādariyatā. Agāravassa bhāvo agāravatā. Jeṭṭhakabhāvassa akaraṇaṃ appatissavatā. Ayaṃvuccatīti ayaṃ asabhāgavutti nāma vuccati; visabhāgajīvikatāti attho; yāya samannāgato puggalo mātaraṃ pitaraṃ vā gilānaṃ paṭivattitvāpi na oloketi; pitusantakassa kāraṇā mātarā saddhiṃ, mātusantakassa kāraṇā pitarā saddhiṃ kalahaṃ karoti; visabhāgajīvitaṃ jīvati, mātāpitūnaṃ santakassa kāraṇā jeṭṭhena vā kaniṭṭhena vā bhātarā saddhiṃ kalahaṃ karoti, nillajjavacanaṃ vadati, ācariyassa vā upajjhāyassa vā vattapaṭivattaṃ na karoti, gilānaṃ na upaṭṭhāti, buddhassa bhagavato cetiyadassanaṭṭhāne uccāraṃ vā passāvaṃ vā karoti, kheḷampi siṅghāṇikampi chaḍḍeti, chattaṃ dhāreti, upāhanā āruyha gacchati, buddhasāvakesu na lajjati, saṅghe cittīkāraṃ na karoti, mātimattapitimattādīsu garuṭṭhānīyesu hirottappaṃ na paccupaṭṭhāpeti. Tassevaṃ pavattamānassa sabbā pesā kiriyā mātarītiādīsupi vatthūsu asabhāgavuttitā nāma hoti.

    ৮৫৬. অরতিনিদ্দেসে পন্তেসূতি দূরেসু ৰিৰিত্তেসু ৰা। অধিকুসলেসূতি সমথৰিপস্সনাধম্মেসু। অরতীতি রতিপটিক্খেপো। অরতিতাতি অরমণাকারো। অনভিরতীতি অনভিরতভাৰো। অনভিরমণাতি অনভিরমণাকারো। উক্কণ্ঠিতাতি উক্কণ্ঠনাকারো। পরিতস্সিতাতি উক্কণ্ঠনৰসেনেৰ পরিতস্সনা।

    856. Aratiniddese pantesūti dūresu vivittesu vā. Adhikusalesūti samathavipassanādhammesu. Aratīti ratipaṭikkhepo. Aratitāti aramaṇākāro. Anabhiratīti anabhiratabhāvo. Anabhiramaṇāti anabhiramaṇākāro. Ukkaṇṭhitāti ukkaṇṭhanākāro. Paritassitāti ukkaṇṭhanavaseneva paritassanā.

    ৮৫৭. তন্দীনিদ্দেসে তন্দীতি জাতিআলসিযং। তন্দিযনাতি তন্দিযনাকারো। তন্দিমনকতাতি তন্দিযা অভিভূতচিত্ততা। অলসস্স ভাৰো আলস্যং। আলস্যাযনাকারো আলস্যাযনা। অলস্যাযিতস্স ভাৰো আলস্যাযিতত্তং। ইতি সব্বেহিপি ইমেহি পদেহি কিলেসৰসেন কাযালসিযং কথিতং।

    857. Tandīniddese tandīti jātiālasiyaṃ. Tandiyanāti tandiyanākāro. Tandimanakatāti tandiyā abhibhūtacittatā. Alasassa bhāvo ālasyaṃ. Ālasyāyanākāro ālasyāyanā. Alasyāyitassa bhāvo ālasyāyitattaṃ. Iti sabbehipi imehi padehi kilesavasena kāyālasiyaṃ kathitaṃ.

    ৮৫৮. ৰিজম্ভিতানিদ্দেসে জম্ভনাতি ফন্দনা। পুনপ্পুনং জম্ভনা ৰিজম্ভনা। আনমনাতি পুরতো নমনা। ৰিনমনাতি পচ্ছতো নমনা। সন্নমনাতি সমন্ততো নমনা। পণমনাতি যথা হি তন্ততো উট্ঠিতপেসকারো কিস্মিঞ্চিদেৰ গহেত্ৰা উজুকং কাযং উস্সাপেতি, এৰং কাযস্স উদ্ধং ঠপনা। ব্যাধিযকন্তি উপ্পন্নব্যাধিতা। ইতি সব্বেহিপি ইমেহি পদেহি কিলেসৰসেন কাযফন্দনমেৰ কথিতং।

    858. Vijambhitāniddese jambhanāti phandanā. Punappunaṃ jambhanā vijambhanā. Ānamanāti purato namanā. Vinamanāti pacchato namanā. Sannamanāti samantato namanā. Paṇamanāti yathā hi tantato uṭṭhitapesakāro kismiñcideva gahetvā ujukaṃ kāyaṃ ussāpeti, evaṃ kāyassa uddhaṃ ṭhapanā. Byādhiyakanti uppannabyādhitā. Iti sabbehipi imehi padehi kilesavasena kāyaphandanameva kathitaṃ.

    ৮৫৯. ভত্তসম্মদনিদ্দেসে ভুত্তাৰিস্সাতি ভুত্তৰতো। ভত্তমুচ্ছাতি ভত্তগেলঞ্ঞং; বলৰভত্তেন হি মুচ্ছাপত্তো ৰিয হোতি। ভত্তকিলমথোতি ভত্তেন কিলন্তভাৰো। ভত্তপরিল়াহোতি ভত্তদরথো। তস্মিঞ্হি সমযে পরিল়াহুপ্পত্তিযা উপহতিন্দ্রিযো হোতি, কাযো জীরতি। কাযদুট্ঠুল্লন্তি ভত্তং নিস্সায কাযস্স অকম্মঞ্ঞতা।

    859. Bhattasammadaniddese bhuttāvissāti bhuttavato. Bhattamucchāti bhattagelaññaṃ; balavabhattena hi mucchāpatto viya hoti. Bhattakilamathoti bhattena kilantabhāvo. Bhattapariḷāhoti bhattadaratho. Tasmiñhi samaye pariḷāhuppattiyā upahatindriyo hoti, kāyo jīrati. Kāyaduṭṭhullanti bhattaṃ nissāya kāyassa akammaññatā.

    ৮৬০. চেতসো লীনত্তনিদ্দেসো হেট্ঠা ধম্মসঙ্গহট্ঠকথাযং ৰুত্তত্থোযেৰ। ইমেহি পন সব্বেহিপি পদেহি কিলেসৰসেন চিত্তস্স গিলানাকারো কথিতোতি ৰেদিতব্বো।

    860. Cetaso līnattaniddeso heṭṭhā dhammasaṅgahaṭṭhakathāyaṃ vuttatthoyeva. Imehi pana sabbehipi padehi kilesavasena cittassa gilānākāro kathitoti veditabbo.

    ৮৬১. কুহনানিদ্দেসে লাভসক্কারসিলোকসন্নিস্সিতস্সাতি লাভঞ্চ সক্কারঞ্চ কিত্তিসদ্দঞ্চ নিস্সিতস্স, পত্থযন্তস্সাতি অত্থো। পাপিচ্ছস্সাতি অসন্তগুণদীপনকামস্স। ইচ্ছাপকতস্সাতি ইচ্ছায অপকতস্স, উপদ্দুতস্সাতি অত্থো।

    861. Kuhanāniddese lābhasakkārasilokasannissitassāti lābhañca sakkārañca kittisaddañca nissitassa, patthayantassāti attho. Pāpicchassāti asantaguṇadīpanakāmassa. Icchāpakatassāti icchāya apakatassa, upaddutassāti attho.

    ইতো পরং যস্মা পচ্চযপটিসেৰন সামন্তজপ্পনইরিযাপথসন্নিস্সিতৰসেন মহানিদ্দেসে তিৰিধং কুহনৰত্থু আগতং, তস্মা তিৰিধম্পি তং দস্সেতুং পচ্চযপটিসেৰনসঙ্খাতেন ৰাতি এৰমাদি আরদ্ধং। তত্থ চীৰরাদীহি নিমন্তিতস্স তদত্থিকস্সেৰ সতো পাপিচ্ছতং নিস্সায পটিক্খিপনেন, তে চ গহপতিকে অত্তনি সুপ্পতিট্ঠিতসদ্ধে ঞত্ৰা পুন তেসং ‘অহো অয্যো অপ্পিচ্ছো, ন কিঞ্চি পটিগ্গণ্হিতুং ইচ্ছতি, সুলদ্ধং ৰত নো অস্স সচে অপ্পমত্তকং কিঞ্চি পটিগ্গণ্হেয্যা’তি নানাৰিধেহি উপাযেহি পণীতানি চীৰরাদীনি উপনেন্তানং তদনুগ্গহকামতংযেৰ আৰিকত্ৰা পটিগ্গহণেন চ ততো পভুতি অসীতিসকটভারেহি উপনামনহেতুভূতং ৰিম্হাপনং পচ্চযপটিসেৰনসঙ্খাতং কুহনৰত্থূতি ৰেদিতব্বং। ৰুত্তম্পি চেতং মহানিদ্দেসে (মহানি॰ ৮৭) –

    Ito paraṃ yasmā paccayapaṭisevana sāmantajappanairiyāpathasannissitavasena mahāniddese tividhaṃ kuhanavatthu āgataṃ, tasmā tividhampi taṃ dassetuṃ paccayapaṭisevanasaṅkhātena vāti evamādi āraddhaṃ. Tattha cīvarādīhi nimantitassa tadatthikasseva sato pāpicchataṃ nissāya paṭikkhipanena, te ca gahapatike attani suppatiṭṭhitasaddhe ñatvā puna tesaṃ ‘aho ayyo appiccho, na kiñci paṭiggaṇhituṃ icchati, suladdhaṃ vata no assa sace appamattakaṃ kiñci paṭiggaṇheyyā’ti nānāvidhehi upāyehi paṇītāni cīvarādīni upanentānaṃ tadanuggahakāmataṃyeva āvikatvā paṭiggahaṇena ca tato pabhuti asītisakaṭabhārehi upanāmanahetubhūtaṃ vimhāpanaṃ paccayapaṭisevanasaṅkhātaṃ kuhanavatthūti veditabbaṃ. Vuttampi cetaṃ mahāniddese (mahāni. 87) –

    ‘‘কতমং পচ্চযপটিসেৰনসঙ্খাতং কুহনৰত্থু? ইধ গহপতিকা ভিক্খুং নিমন্তেন্তি চীৰরপিণ্ডপাতসেনাসনগিলানপচ্চযভেসজ্জপরিক্খারেহি। সো পাপিচ্ছো ইচ্ছাপকতো অত্থিকো চীৰর …পে॰… পরিক্খারানং ভিয্যোকম্যতং উপাদায চীৰরং পচ্চক্খাতি, পিণ্ডপাতং পচ্চক্খাতি, সেনাসনং পচ্চক্খাতি, গিলানপচ্চযভেসজ্জপরিক্খারং পচ্চক্খাতি। সো এৰমাহ – ‘‘কিং সমণস্স মহগ্ঘেন চীৰরেন? এতং সারুপ্পং যং সমণো সুসানা ৰা সঙ্কারকূটা ৰা পাপণিকা ৰা নন্তকানি উচ্চিনিত্ৰা সঙ্ঘাটিং কত্ৰা ধারেয্য। কিং সমণস্স মহগ্ঘেন পিণ্ডপাতেন? এতং সারুপ্পং যং সমণো উঞ্ছাচরিযায পিণ্ডিযালোপেন জীৰিকং কপ্পেয্য। কিং সমণস্স মহগ্ঘেন সেনাসনেন? এতং সারুপ্পং যং সমণো রুক্খমূলিকো ৰা অস্স সোসানিকো ৰা অব্ভোকাসিকো ৰা। কিং সমণস্স মহগ্ঘেন গিলানপচ্চযভেসজ্জপরিক্খারেন? এতং সারুপ্পং যং সমণো পূতিমুত্তেন ৰা হরীতকীখণ্ডেন ৰা ওসধং করেয্যাতি। তদুপাদায লূখং চীৰরং ধারেতি, লূখং পিণ্ডপাতং পরিভুঞ্জতি, লূখং সেনাসনং পটিসেৰতি, লূখং গিলানপচ্চযভেসজ্জপরিক্খারং পটিসেৰতি। তমেনং গহপতিকা এৰং জানন্তি – ‘অযং সমণো অপ্পিচ্ছো সন্তুট্ঠো পৰিৰিত্তো অসংসট্ঠো আরদ্ধৰীরিযো ধুতৰাদো’তি ভিয্যো ভিয্যো নিমন্তেন্তি চীৰর…পে॰… পরিক্খারেহি। সো এৰমাহ – ‘তিণ্ণং সম্মুখীভাৰা সদ্ধো কুলপুত্তো বহুং পুঞ্ঞং পসৰতি – সদ্ধায সম্মুখীভাৰা সদ্ধো কুলপুত্তো বহুং পুঞ্ঞং পসৰতি, দেয্যধম্মস্স…পে॰… দক্খিণেয্যানং সম্মুখীভাৰা সদ্ধো কুলপুত্তো বহুং পুঞ্ঞং পসৰতি। তুম্হাকঞ্চেৰাযং সদ্ধা অত্থি, দেয্যধম্মো চ সংৰিজ্জতি, অহঞ্চ পটিগ্গাহকো। সচাহং ন পটিগ্গহেস্সামি, এৰং তুম্হে পুঞ্ঞেন পরিবাহিরা ভৰিস্সথ; ন ময্হং ইমিনা অত্থো, অপিচ তুম্হাকং এৰ অনুকম্পায পটিগ্গণ্হামী’তি। তদুপাদায বহুম্পি চীৰরং পটিগ্গণ্হাতি, বহুম্পি পিণ্ডপাতং…পে॰… ভেসজ্জপরিক্খারং পটিগ্গণ্হাতি। যা এৰরূপা ভাকুটিকা ভাকুটিযং কুহনা কুহাযনা কুহিতত্তং – ইদং ৰুচ্চতি পচ্চযপটিসেৰনসঙ্খাতং কুহনৰত্থূ’’তি।

    ‘‘Katamaṃ paccayapaṭisevanasaṅkhātaṃ kuhanavatthu? Idha gahapatikā bhikkhuṃ nimantenti cīvarapiṇḍapātasenāsanagilānapaccayabhesajjaparikkhārehi. So pāpiccho icchāpakato atthiko cīvara …pe… parikkhārānaṃ bhiyyokamyataṃ upādāya cīvaraṃ paccakkhāti, piṇḍapātaṃ paccakkhāti, senāsanaṃ paccakkhāti, gilānapaccayabhesajjaparikkhāraṃ paccakkhāti. So evamāha – ‘‘kiṃ samaṇassa mahagghena cīvarena? Etaṃ sāruppaṃ yaṃ samaṇo susānā vā saṅkārakūṭā vā pāpaṇikā vā nantakāni uccinitvā saṅghāṭiṃ katvā dhāreyya. Kiṃ samaṇassa mahagghena piṇḍapātena? Etaṃ sāruppaṃ yaṃ samaṇo uñchācariyāya piṇḍiyālopena jīvikaṃ kappeyya. Kiṃ samaṇassa mahagghena senāsanena? Etaṃ sāruppaṃ yaṃ samaṇo rukkhamūliko vā assa sosāniko vā abbhokāsiko vā. Kiṃ samaṇassa mahagghena gilānapaccayabhesajjaparikkhārena? Etaṃ sāruppaṃ yaṃ samaṇo pūtimuttena vā harītakīkhaṇḍena vā osadhaṃ kareyyāti. Tadupādāya lūkhaṃ cīvaraṃ dhāreti, lūkhaṃ piṇḍapātaṃ paribhuñjati, lūkhaṃ senāsanaṃ paṭisevati, lūkhaṃ gilānapaccayabhesajjaparikkhāraṃ paṭisevati. Tamenaṃ gahapatikā evaṃ jānanti – ‘ayaṃ samaṇo appiccho santuṭṭho pavivitto asaṃsaṭṭho āraddhavīriyo dhutavādo’ti bhiyyo bhiyyo nimantenti cīvara…pe… parikkhārehi. So evamāha – ‘tiṇṇaṃ sammukhībhāvā saddho kulaputto bahuṃ puññaṃ pasavati – saddhāya sammukhībhāvā saddho kulaputto bahuṃ puññaṃ pasavati, deyyadhammassa…pe… dakkhiṇeyyānaṃ sammukhībhāvā saddho kulaputto bahuṃ puññaṃ pasavati. Tumhākañcevāyaṃ saddhā atthi, deyyadhammo ca saṃvijjati, ahañca paṭiggāhako. Sacāhaṃ na paṭiggahessāmi, evaṃ tumhe puññena paribāhirā bhavissatha; na mayhaṃ iminā attho, apica tumhākaṃ eva anukampāya paṭiggaṇhāmī’ti. Tadupādāya bahumpi cīvaraṃ paṭiggaṇhāti, bahumpi piṇḍapātaṃ…pe… bhesajjaparikkhāraṃ paṭiggaṇhāti. Yā evarūpā bhākuṭikā bhākuṭiyaṃ kuhanā kuhāyanā kuhitattaṃ – idaṃ vuccati paccayapaṭisevanasaṅkhātaṃ kuhanavatthū’’ti.

    পাপিচ্ছস্সেৰ পন সতো উত্তরিমনুস্সধম্মাধিগমপরিদীপনৰাচায তথা তথা ৰিম্হাপনং সামন্তজপ্পনসঙ্খাতং কুহনৰত্থূতি ৰেদিতব্বং। যথাহ – ‘‘কতমং সামন্তজপ্পনসঙ্খাতং কুহনৰত্থু ? ইধেকচ্চো পাপিচ্ছো ইচ্ছাপকতো সম্ভাৰনাধিপ্পাযো ‘এৰং মং জনো সম্ভাৰেস্সতী’তি অরিযধম্মসন্নিস্সিতং ৰাচং ভাসতি – ‘যো এৰরূপং চীৰরং ধারেতি, সো সমণো মহেসক্খো’তি ভণতি; ‘যো এৰরূপং পত্তং, লোহথালকং, ধমকরণং, পরিসাৰনং, কুঞ্চিকং, উপাহনং, কাযবন্ধনং, আযোগং ধারেতি, সো সমণো মহেসক্খো’তি ভণতি; ‘যস্স এৰরূপো উপজ্ঝাযো, আচরিযো, সমানুপজ্ঝাযো, সমানাচরিযকো, মিত্তো সন্দিট্ঠো, সম্ভত্তো, সহাযো; যো এৰরূপে ৰিহারে ৰসতি – অড্ঢযোগে, পাসাদে, হম্মিযে, গুহাযং, লেণে, কুটিযা, কূটাগারে, অট্টে, মাল়ে, উদোসিতে, উদ্দণ্ডে, উপট্ঠানসালাযং, মণ্ডপে, রুক্খমূলে ৰসতি, সো সমণো মহেসক্খো’তি ভণতি।

    Pāpicchasseva pana sato uttarimanussadhammādhigamaparidīpanavācāya tathā tathā vimhāpanaṃ sāmantajappanasaṅkhātaṃ kuhanavatthūti veditabbaṃ. Yathāha – ‘‘katamaṃ sāmantajappanasaṅkhātaṃ kuhanavatthu ? Idhekacco pāpiccho icchāpakato sambhāvanādhippāyo ‘evaṃ maṃ jano sambhāvessatī’ti ariyadhammasannissitaṃ vācaṃ bhāsati – ‘yo evarūpaṃ cīvaraṃ dhāreti, so samaṇo mahesakkho’ti bhaṇati; ‘yo evarūpaṃ pattaṃ, lohathālakaṃ, dhamakaraṇaṃ, parisāvanaṃ, kuñcikaṃ, upāhanaṃ, kāyabandhanaṃ, āyogaṃ dhāreti, so samaṇo mahesakkho’ti bhaṇati; ‘yassa evarūpo upajjhāyo, ācariyo, samānupajjhāyo, samānācariyako, mitto sandiṭṭho, sambhatto, sahāyo; yo evarūpe vihāre vasati – aḍḍhayoge, pāsāde, hammiye, guhāyaṃ, leṇe, kuṭiyā, kūṭāgāre, aṭṭe, māḷe, udosite, uddaṇḍe, upaṭṭhānasālāyaṃ, maṇḍape, rukkhamūle vasati, so samaṇo mahesakkho’ti bhaṇati.

    ‘‘অথ ৰা কোরজিককোরজিকো ভাকুটিকভাকুটিকো কুহককুহকো লপকলপকো মুখসম্ভাৰিতো ‘অযং সমণো ইমাসং এৰরূপানং সন্তানং ৰিহারসমাপত্তীনং লাভী’তি তাদিসং গম্ভীরং গূল়্হং নিপুণং পটিচ্ছন্নং লোকুত্তরং সুঞ্ঞতাপটিসংযুত্তং কথং কথেতি। যা এৰরূপা ভাকুটিকা ভাকুটিযং কুহনা কুহাযনা কুহিতত্তং – ইদং ৰুচ্চতি সামন্তজপ্পনসঙ্খাতং কুহনৰত্থূ’’তি।

    ‘‘Atha vā korajikakorajiko bhākuṭikabhākuṭiko kuhakakuhako lapakalapako mukhasambhāvito ‘ayaṃ samaṇo imāsaṃ evarūpānaṃ santānaṃ vihārasamāpattīnaṃ lābhī’ti tādisaṃ gambhīraṃ gūḷhaṃ nipuṇaṃ paṭicchannaṃ lokuttaraṃ suññatāpaṭisaṃyuttaṃ kathaṃ katheti. Yā evarūpā bhākuṭikā bhākuṭiyaṃ kuhanā kuhāyanā kuhitattaṃ – idaṃ vuccati sāmantajappanasaṅkhātaṃ kuhanavatthū’’ti.

    পাপিচ্ছস্সেৰ পন সতো সম্ভাৰনাধিপ্পাযকতেন ইরিযাপথেন ৰিম্হাপনং ইরিযাপথসন্নিস্সিতং কুহনৰত্থূতি ৰেদিতব্বং। যথাহ – ‘‘কতমং ইরিযাপথসঙ্খাতং কুহনৰত্থু? ইধেকচ্চো পাপিচ্ছো ইচ্ছাপকতো সম্ভাৰনাধিপ্পাযো ‘এৰং মং জনো সম্ভাৰেস্সতী’তি গমনং সণ্ঠপেতি, সযনং সণ্ঠপেতি, পণিধায গচ্ছতি, পণিধায তিট্ঠতি, পণিধায নিসীদতি, পণিধায সেয্যং কপ্পেতি, সমাহিতো ৰিয গচ্ছতি, সমাহিতো ৰিয তিট্ঠতি, নিসীদতি, সেয্যং কপ্পেতি, আপাথকজ্ঝাযীৰ হোতি। যা এৰরূপা ইরিযাপথস্স আঠপনা ঠপনা সণ্ঠপনা ভাকুটিকা ভাকুটিযং কুহনা কুহাযনা কুহিতত্তং – ইদং ৰুচ্চতি ইরিযাপথসঙ্খাতং কুহনৰত্থূ’’তি।

    Pāpicchasseva pana sato sambhāvanādhippāyakatena iriyāpathena vimhāpanaṃ iriyāpathasannissitaṃ kuhanavatthūti veditabbaṃ. Yathāha – ‘‘katamaṃ iriyāpathasaṅkhātaṃ kuhanavatthu? Idhekacco pāpiccho icchāpakato sambhāvanādhippāyo ‘evaṃ maṃ jano sambhāvessatī’ti gamanaṃ saṇṭhapeti, sayanaṃ saṇṭhapeti, paṇidhāya gacchati, paṇidhāya tiṭṭhati, paṇidhāya nisīdati, paṇidhāya seyyaṃ kappeti, samāhito viya gacchati, samāhito viya tiṭṭhati, nisīdati, seyyaṃ kappeti, āpāthakajjhāyīva hoti. Yā evarūpā iriyāpathassa āṭhapanā ṭhapanā saṇṭhapanā bhākuṭikā bhākuṭiyaṃ kuhanā kuhāyanā kuhitattaṃ – idaṃ vuccati iriyāpathasaṅkhātaṃ kuhanavatthū’’ti.

    তত্থ পচ্চযপটিসেৰনসঙ্খাতেনাতি পচ্চযপটিসেৰনন্তি এৰং সঙ্খাতেন পচ্চযপটিসেৰনেন। সামন্তজপ্পিতেনাতি সমীপে ভণিতেন। ইরিযাপথস্সাতি চতুইরিযাপথস্স। আঠপনাতি আদিঠপনা, আদরেন ৰা ঠপনা। ঠপনাতি ঠপনাকারো। সণ্ঠপনাতি অভিসঙ্খরণা, পাসাদিকভাৰকরণন্তি ৰুত্তং হোতি। ভাকুটিকাতি পধানপুরিমট্ঠিতভাৰদস্সনেন ভাকুটিকরণং, মুখসঙ্কোচোতি ৰুত্তং হোতি। ভাকুটিকরণং সীলমস্সাতি ভাকুটিকো; ভাকুটিকস্স ভাৰো ভাকুটিযং। কুহনাতি ৰিম্হাপনং, কুহস্স আযনা কুহাযনা। কুহিতস্স ভাৰো কুহিতত্তন্তি।

    Tattha paccayapaṭisevanasaṅkhātenāti paccayapaṭisevananti evaṃ saṅkhātena paccayapaṭisevanena. Sāmantajappitenāti samīpe bhaṇitena. Iriyāpathassāti catuiriyāpathassa. Āṭhapanāti ādiṭhapanā, ādarena vā ṭhapanā. Ṭhapanāti ṭhapanākāro. Saṇṭhapanāti abhisaṅkharaṇā, pāsādikabhāvakaraṇanti vuttaṃ hoti. Bhākuṭikāti padhānapurimaṭṭhitabhāvadassanena bhākuṭikaraṇaṃ, mukhasaṅkocoti vuttaṃ hoti. Bhākuṭikaraṇaṃ sīlamassāti bhākuṭiko; bhākuṭikassa bhāvo bhākuṭiyaṃ. Kuhanāti vimhāpanaṃ, kuhassa āyanā kuhāyanā. Kuhitassa bhāvo kuhitattanti.

    ৮৬২. লপনানিদ্দেসে আলপনাতি ৰিহারং আগতমনুস্সে দিস্ৰা কিমত্থায ভোন্তো আগতা? কিং ভিক্খূ নিমন্তেতুং? যদি এৰং গচ্ছথ; অহং পচ্ছতো ভিক্খূ গহেত্ৰা আগচ্ছামী’তি এৰং আদিতোৰ লপনা। অথ ৰা অত্তানং উপনেত্ৰা ‘অহং তিস্সো, মযি রাজা পসন্নো, মযি অসুকো চ অসুকো চ রাজমহামত্তো পসন্নো’তি এৰং অত্তুপনাযিকা লপনা আলপনা। লপনাতি পুট্ঠস্স সতো ৰুত্তপ্পকারমেৰ লপনং। সল্লপনাতি গহপতিকানং উক্কণ্ঠনে ভীতস্স ওকাসং দত্ৰা সুট্ঠু লপনা। উল্লপনাতি ‘মহাকুটুম্বিকো, মহানাৰিকো, মহাদানপতী’তি এৰং উদ্ধং কত্ৰা লপনা। সমুল্লপনাতি সব্বতোভাগেন উদ্ধং কত্ৰা লপনা। উন্নহনাতি ‘উপাসকা, পুব্বে ঈদিসে কালে দানং দেথ; ইদানি কিং ন দেথা’তি এৰং যাৰ ‘দস্সাম, ভন্তে, ওকাসং ন লভামা’তিআদীনি ৰদন্তি তাৰ উদ্ধং নহনা, ৰেঠনাতি ৰুত্তং হোতি। অথ ৰা উচ্ছুহত্থং দিস্ৰা ‘কুতো আগতা, উপাসকা’তি পুচ্ছতি। ‘উচ্ছুখেত্ততো, ভন্তে’তি। ‘কিং তত্থ উচ্ছু মধুর’ন্তি? ‘খাদিত্ৰা, ভন্তে, জানিতব্ব’ন্তি। ‘ন, উপাসকা, ভিক্খুস্স ‘উচ্ছুং দেথা’তি ৰত্তুং ৰট্টতী’তি যা এৰরূপা নিব্বেঠেন্তস্সাপি ৰেঠনককথা, সা উন্নহনা । সব্বতোভাগেন পুনপ্পুনং উন্নহনা সমুন্নহনা। উক্কাচনাতি ‘এতং কুলং মংযেৰ জানাতি, সচে এত্থ দেয্যধম্মো উপ্পজ্জতি, ময্হমেৰ দেতী’তি এৰং উক্খিপিত্ৰা কাচনা উক্কাচনা; উদ্দীপনাতি ৰুত্তং হোতি।

    862. Lapanāniddese ālapanāti vihāraṃ āgatamanusse disvā kimatthāya bhonto āgatā? Kiṃ bhikkhū nimantetuṃ? Yadi evaṃ gacchatha; ahaṃ pacchato bhikkhū gahetvā āgacchāmī’ti evaṃ āditova lapanā. Atha vā attānaṃ upanetvā ‘ahaṃ tisso, mayi rājā pasanno, mayi asuko ca asuko ca rājamahāmatto pasanno’ti evaṃ attupanāyikā lapanā ālapanā. Lapanāti puṭṭhassa sato vuttappakārameva lapanaṃ. Sallapanāti gahapatikānaṃ ukkaṇṭhane bhītassa okāsaṃ datvā suṭṭhu lapanā. Ullapanāti ‘mahākuṭumbiko, mahānāviko, mahādānapatī’ti evaṃ uddhaṃ katvā lapanā. Samullapanāti sabbatobhāgena uddhaṃ katvā lapanā. Unnahanāti ‘upāsakā, pubbe īdise kāle dānaṃ detha; idāni kiṃ na dethā’ti evaṃ yāva ‘dassāma, bhante, okāsaṃ na labhāmā’tiādīni vadanti tāva uddhaṃ nahanā, veṭhanāti vuttaṃ hoti. Atha vā ucchuhatthaṃ disvā ‘kuto āgatā, upāsakā’ti pucchati. ‘Ucchukhettato, bhante’ti. ‘Kiṃ tattha ucchu madhura’nti? ‘Khāditvā, bhante, jānitabba’nti. ‘Na, upāsakā, bhikkhussa ‘ucchuṃ dethā’ti vattuṃ vaṭṭatī’ti yā evarūpā nibbeṭhentassāpi veṭhanakakathā, sā unnahanā . Sabbatobhāgena punappunaṃ unnahanā samunnahanā. Ukkācanāti ‘etaṃ kulaṃ maṃyeva jānāti, sace ettha deyyadhammo uppajjati, mayhameva detī’ti evaṃ ukkhipitvā kācanā ukkācanā; uddīpanāti vuttaṃ hoti.

    তেলকন্দরিকৰত্থু চেত্থ ৰত্তব্বং। দ্ৰে কির ভিক্খূ একং গামং পৰিসিত্ৰা আসনসালায নিসীদিত্ৰা একং কুমারিকং দিস্ৰা পক্কোসিংসু। তায আগতায তত্রেকো একং পুচ্ছি – ‘অযং, ভন্তে, কস্স কুমারিকা’তি? ‘অম্হাকং উপট্ঠাযিকায তেলকন্দরিকায ধীতা, আৰুসো। ইমিস্সা মাতা মযি গেহং গতে সপ্পিং দদমানা ঘটেনেৰ দেতি, অযম্পি মাতা ৰিয ঘটেনেৰ দেতী’তি উক্কাচেতি।

    Telakandarikavatthu cettha vattabbaṃ. Dve kira bhikkhū ekaṃ gāmaṃ pavisitvā āsanasālāya nisīditvā ekaṃ kumārikaṃ disvā pakkosiṃsu. Tāya āgatāya tatreko ekaṃ pucchi – ‘ayaṃ, bhante, kassa kumārikā’ti? ‘Amhākaṃ upaṭṭhāyikāya telakandarikāya dhītā, āvuso. Imissā mātā mayi gehaṃ gate sappiṃ dadamānā ghaṭeneva deti, ayampi mātā viya ghaṭeneva detī’ti ukkāceti.

    সব্বতোভাগেন পুনপ্পুনং উক্কাচনা সমুক্কাচনা। অনুপ্পিযভাণিতাতি সচ্চানুরূপং ৰা ধম্মানুরূপং ৰা অনপলোকেত্ৰা পুনপ্পুনং পিযভণনমেৰ। চাটুকম্যতাতি নীচৰুত্তিতা; অত্তানং হেট্ঠতো ঠপেত্ৰা ৰত্তনং। মুগ্গসূপ্যতাতি মুগ্গসূপসদিসতা। যথা মুগ্গেসু পচ্চমানেসু কোচিদেৰ ন পচ্চতি, অৰসেসা পচ্চন্তি; এৰং যস্স পুগ্গলস্স ৰচনে কিঞ্চিদেৰ সচ্চং হোতি, সেসং অলিকং – অযং পুগ্গলো মুগ্গসূপ্যোতি ৰুচ্চতি। তস্স ভাৰো মুগ্গসূপ্যতা। পারিভটযতাতি পারিভটযভাৰো। যো হি কুলদারকে ধাতী ৰিয অঙ্কেন ৰা খন্ধেন ৰা পরিভটতি, ধারেতীতি অত্থো; তস্স পরিভটস্স কম্মং পারিভটযং; পারিভটযস্স ভাৰো পারিভটযতাতি।

    Sabbatobhāgena punappunaṃ ukkācanā samukkācanā. Anuppiyabhāṇitāti saccānurūpaṃ vā dhammānurūpaṃ vā anapaloketvā punappunaṃ piyabhaṇanameva. Cāṭukamyatāti nīcavuttitā; attānaṃ heṭṭhato ṭhapetvā vattanaṃ. Muggasūpyatāti muggasūpasadisatā. Yathā muggesu paccamānesu kocideva na paccati, avasesā paccanti; evaṃ yassa puggalassa vacane kiñcideva saccaṃ hoti, sesaṃ alikaṃ – ayaṃ puggalo muggasūpyoti vuccati. Tassa bhāvo muggasūpyatā. Pāribhaṭayatāti pāribhaṭayabhāvo. Yo hi kuladārake dhātī viya aṅkena vā khandhena vā paribhaṭati, dhāretīti attho; tassa paribhaṭassa kammaṃ pāribhaṭayaṃ; pāribhaṭayassa bhāvo pāribhaṭayatāti.

    ৮৬৩. নেমিত্তিকতানিদ্দেসে নিমিত্তন্তি যংকিঞ্চি পরেসং পচ্চযদানসংযোজনকং কাযৰচীকম্মং। নিমিত্তকম্মন্তি নিমিত্তস্স করণকোসল্লং।

    863. Nemittikatāniddese nimittanti yaṃkiñci paresaṃ paccayadānasaṃyojanakaṃ kāyavacīkammaṃ. Nimittakammanti nimittassa karaṇakosallaṃ.

    তত্রিদং ৰত্থু – একো কির পিণ্ডপাতিকো উপট্ঠাককম্মারস্স গেহদ্ৰারং গন্ত্ৰা ‘কিং ভন্তে’তি পুচ্ছিতো চীৰরন্তরেন হত্থং নীহরিত্ৰা ৰাসিপহরণাকারং অকাসি। কম্মারো ‘সল্লক্খিতং মে, ভন্তে’তি ৰাসিং কত্ৰা অদাসি। ওভাসোতি পচ্চযপটিসংযুত্তকথা। ওভাসকম্মন্তি ৰচ্ছকপালকে দিস্ৰা ‘কিং ইমে ৰচ্ছা খীরগোৰচ্ছা, তক্কগোৰচ্ছা’তি পুচ্ছিত্ৰা ‘খীরগোৰচ্ছা, ভন্তে’তি ৰুত্তে ‘ন খীরগোৰচ্ছা, যদি খীরগোৰচ্ছা সিযুং ভিক্খূপি খীরং লভেয্যু’ন্তি এৰমাদিনা নযেন তেসং দারকানং মাতাপিতূনং নিৰেদেত্ৰা খীরদাপনাদিকং ওভাসকরণং। সামন্তজপ্পাতি সমীপং কত্ৰা জপ্পনং।

    Tatridaṃ vatthu – eko kira piṇḍapātiko upaṭṭhākakammārassa gehadvāraṃ gantvā ‘kiṃ bhante’ti pucchito cīvarantarena hatthaṃ nīharitvā vāsipaharaṇākāraṃ akāsi. Kammāro ‘sallakkhitaṃ me, bhante’ti vāsiṃ katvā adāsi. Obhāsoti paccayapaṭisaṃyuttakathā. Obhāsakammanti vacchakapālake disvā ‘kiṃ ime vacchā khīragovacchā, takkagovacchā’ti pucchitvā ‘khīragovacchā, bhante’ti vutte ‘na khīragovacchā, yadi khīragovacchā siyuṃ bhikkhūpi khīraṃ labheyyu’nti evamādinā nayena tesaṃ dārakānaṃ mātāpitūnaṃ nivedetvā khīradāpanādikaṃ obhāsakaraṇaṃ. Sāmantajappāti samīpaṃ katvā jappanaṃ.

    জাতকভাণকৰত্থু চেত্থ কথেতব্বং। একো কির জাতকভাণকত্থেরো ভুঞ্জিতুকামো উপট্ঠাযিকায গেহং পৰিসিত্ৰা নিসীদি। সা অদাতুকামা ‘তণ্ডুলা নত্থী’তি ভণন্তী তণ্ডুলে আহরিতুকামা ৰিয পটিৰিস্সকঘরং গতা। ভিক্খু অন্তোগব্ভং পৰিসিত্ৰা ওলোকেন্তো কৰাটকোণে উচ্ছুং, ভাজনে গুল়ং, পিটকে লোণমচ্ছফালং, কুম্ভিযং তণ্ডুলে, ঘটে ঘতং দিস্ৰা নিক্খমিত্ৰা নিসীদি। ঘরণী ‘তণ্ডুলং নালত্থ’ন্তি আগতা। থেরো ‘উপাসিকে, অজ্জ ভিক্খা ন সম্পজ্জিস্সতী’তি পটিকচ্চেৰ নিমিত্তং অদ্দস’ন্তি আহ। ‘কিং, ভন্তে’তি? ‘কৰাটকোণে নিক্খিত্তং উচ্ছুং ৰিয সপ্পং অদ্দসং; ‘তং পহরিস্সামী’তি ওলোকেন্তো ভাজনে ঠপিতং গুল়পিণ্ডং ৰিয পাসাণং লেড্ডুকেন; পহটেন সপ্পেন কতং, পিটকে নিক্খিত্তলোণমচ্ছফালসদিসং, ফণং; তস্স তং লেড্ডুং ডংসিতুকামস্স, কুম্ভিযা তণ্ডুলসদিসে দন্তে; অথস্স কুপিতস্স, ঘটে পক্খিত্তঘতসদিসং, মুখতো নিক্খমন্তং ৰিসমিস্সকং খেল়’ন্তি। সা ‘ন সক্কা মুণ্ডকং ৰঞ্চেতু’ন্তি উচ্ছুং দত্ৰা ওদনং পচিত্ৰা ঘতগুল়মচ্ছেহি সদ্ধিং অদাসীতি। এৰং সমীপং কত্ৰা জপ্পনং সামন্তজপ্পাতি ৰেদিতব্বং। পরিকথাতি যথা তং লভতি তথা পরিৰত্তেত্ৰা পরিৰত্তেত্ৰা কথনং।

    Jātakabhāṇakavatthu cettha kathetabbaṃ. Eko kira jātakabhāṇakatthero bhuñjitukāmo upaṭṭhāyikāya gehaṃ pavisitvā nisīdi. Sā adātukāmā ‘taṇḍulā natthī’ti bhaṇantī taṇḍule āharitukāmā viya paṭivissakagharaṃ gatā. Bhikkhu antogabbhaṃ pavisitvā olokento kavāṭakoṇe ucchuṃ, bhājane guḷaṃ, piṭake loṇamacchaphālaṃ, kumbhiyaṃ taṇḍule, ghaṭe ghataṃ disvā nikkhamitvā nisīdi. Gharaṇī ‘taṇḍulaṃ nālattha’nti āgatā. Thero ‘upāsike, ajja bhikkhā na sampajjissatī’ti paṭikacceva nimittaṃ addasa’nti āha. ‘Kiṃ, bhante’ti? ‘Kavāṭakoṇe nikkhittaṃ ucchuṃ viya sappaṃ addasaṃ; ‘taṃ paharissāmī’ti olokento bhājane ṭhapitaṃ guḷapiṇḍaṃ viya pāsāṇaṃ leḍḍukena; pahaṭena sappena kataṃ, piṭake nikkhittaloṇamacchaphālasadisaṃ, phaṇaṃ; tassa taṃ leḍḍuṃ ḍaṃsitukāmassa, kumbhiyā taṇḍulasadise dante; athassa kupitassa, ghaṭe pakkhittaghatasadisaṃ, mukhato nikkhamantaṃ visamissakaṃ kheḷa’nti. Sā ‘na sakkā muṇḍakaṃ vañcetu’nti ucchuṃ datvā odanaṃ pacitvā ghataguḷamacchehi saddhiṃ adāsīti. Evaṃ samīpaṃ katvā jappanaṃ sāmantajappāti veditabbaṃ. Parikathāti yathā taṃ labhati tathā parivattetvā parivattetvā kathanaṃ.

    ৮৬৪. নিপ্পেসিকতানিদ্দেসে অক্কোসনাতি দসহি অক্কোসৰত্থূহি অক্কোসনা। ৰম্ভনাতি পরিভৰিত্ৰা কথনং। গরহনাতি ‘অস্সদ্ধো অপ্পসন্নো’তিআদিনা নযেন দোসারোপনা। উক্খেপনাতি ‘মা এতং এত্থ কথেথা’তি ৰাচায উক্খিপনং। সব্বতোভাগেন সৰত্থুকং সহেতুকং কত্ৰা উক্খেপনা সমুক্খেপনা। অথৰা অদেন্তং ‘অহো দানপতী’তি এৰং উক্খিপনং উক্খেপনা। ‘মহাদানপতী’তি এৰং সুট্ঠু উক্খেপনা সমুক্খেপনা। খিপনাতি ‘কিং ইমস্স জীৰিতং বীজভোজিনো’তি এৰং উপ্পণ্ডনা। সঙ্খিপনাতি ‘কিং ইমং অদাযকোতি ভণথ যো নিচ্চকালং সব্বেসম্পি নত্থীতি ৰচনং দেতী’তি এৰং সুট্ঠুতরং উপ্পণ্ডনা। পাপনাতি অদাযকত্তস্স অৰণ্ণস্স ৰা পাপনং। সব্বতোভাগেন পাপনা সম্পাপনা। অৰণ্ণহারিকাতি ‘এৰং মে অৰণ্ণভযাপি দস্সতী’তি গেহতো গেহং, গামতো গামং, জনপদতো জনপদং অৰণ্ণহরণং। পরপিট্ঠিমংসিকতাতি পুরতো মধুরং ভণিত্ৰা পরম্মুখে অৰণ্ণভাসিতা। এসা হি অভিমুখং ওলোকেতুং অসক্কোন্তস্স পরম্মুখানং পিট্ঠিমংসখাদনং ৰিয হোতি। তস্মা পরপিট্ঠিমংসিকতাতি ৰুত্তা। অযং ৰুচ্চতি নিপ্পেসিকতাতি অযং যস্মা ৰেল়ুপেসিকা ৰিয অব্ভঙ্গং পরস্স গুণং নিপ্পেসেতি নিপুঞ্ছতি, যস্মা ৰা গন্ধজাতং নিপিসিত্ৰা গন্ধমগ্গনা ৰিয পরগুণে নিপিসিত্ৰা ৰিচুণ্ণেত্ৰা এসা লাভমগ্গনা হোতি, তস্মা নিপ্পেসিকতাতি ৰুচ্চতীতি।

    864. Nippesikatāniddese akkosanāti dasahi akkosavatthūhi akkosanā. Vambhanāti paribhavitvā kathanaṃ. Garahanāti ‘assaddho appasanno’tiādinā nayena dosāropanā. Ukkhepanāti ‘mā etaṃ ettha kathethā’ti vācāya ukkhipanaṃ. Sabbatobhāgena savatthukaṃ sahetukaṃ katvā ukkhepanā samukkhepanā. Athavā adentaṃ ‘aho dānapatī’ti evaṃ ukkhipanaṃ ukkhepanā. ‘Mahādānapatī’ti evaṃ suṭṭhu ukkhepanā samukkhepanā. Khipanāti ‘kiṃ imassa jīvitaṃ bījabhojino’ti evaṃ uppaṇḍanā. Saṅkhipanāti ‘kiṃ imaṃ adāyakoti bhaṇatha yo niccakālaṃ sabbesampi natthīti vacanaṃ detī’ti evaṃ suṭṭhutaraṃ uppaṇḍanā. Pāpanāti adāyakattassa avaṇṇassa vā pāpanaṃ. Sabbatobhāgena pāpanā sampāpanā. Avaṇṇahārikāti ‘evaṃ me avaṇṇabhayāpi dassatī’ti gehato gehaṃ, gāmato gāmaṃ, janapadato janapadaṃ avaṇṇaharaṇaṃ. Parapiṭṭhimaṃsikatāti purato madhuraṃ bhaṇitvā parammukhe avaṇṇabhāsitā. Esā hi abhimukhaṃ oloketuṃ asakkontassa parammukhānaṃ piṭṭhimaṃsakhādanaṃ viya hoti. Tasmā parapiṭṭhimaṃsikatāti vuttā. Ayaṃ vuccati nippesikatāti ayaṃ yasmā veḷupesikā viya abbhaṅgaṃ parassa guṇaṃ nippeseti nipuñchati, yasmā vā gandhajātaṃ nipisitvā gandhamagganā viya paraguṇe nipisitvā vicuṇṇetvā esā lābhamagganā hoti, tasmā nippesikatāti vuccatīti.

    ৮৬৫. লাভেন লাভং নিজিগীসনতানিদ্দেসে নিজিগীসনতাতি মগ্গনা। ইতো লদ্ধন্তি ইমম্হা গেহা লদ্ধং। অমুত্রাতি অমুকম্হি গেহে। এট্ঠীতি ইচ্ছনা। গৰেট্ঠীতি মগ্গনা। পরিযেট্ঠীতি পুনপ্পুনং মগ্গনা। আদিতো পট্ঠায লদ্ধং লদ্ধং ভিক্খং তত্র তত্র কুলদারকানং দত্ৰা অন্তে খীরযাগুং লভিত্ৰা গতভিক্খুৰত্থু চেত্থ কথেতব্বং। এসনাতিআদীনি এট্ঠীতিআদীনং ৰেৰচনানি, তস্মা এট্ঠীতি এসনা, গৰেট্ঠীতি গৰেসনা, পরিযেট্ঠীতি পরিযেসনা। ইচ্চেৰমেত্থ যোজনা ৰেদিতব্বা।

    865. Lābhena lābhaṃ nijigīsanatāniddese nijigīsanatāti magganā. Ito laddhanti imamhā gehā laddhaṃ. Amutrāti amukamhi gehe. Eṭṭhīti icchanā. Gaveṭṭhīti magganā. Pariyeṭṭhīti punappunaṃ magganā. Ādito paṭṭhāya laddhaṃ laddhaṃ bhikkhaṃ tatra tatra kuladārakānaṃ datvā ante khīrayāguṃ labhitvā gatabhikkhuvatthu cettha kathetabbaṃ. Esanātiādīni eṭṭhītiādīnaṃ vevacanāni, tasmā eṭṭhīti esanā, gaveṭṭhīti gavesanā, pariyeṭṭhīti pariyesanā. Iccevamettha yojanā veditabbā.

    ৮৬৬. সেয্যমাননিদ্দেসে জাতিযাতি খত্তিযভাৰাদিজাতিসম্পত্তিযা। গোত্তেনাতি গোতমগোত্তাদিনা উক্কট্ঠগোত্তেন। কোলপুত্তিযেনাতি মহাকুলভাৰেন। ৰণ্ণপোক্খরতাযাতি ৰণ্ণসম্পন্নসরীরতায। সরীরঞ্হি পোক্খরন্তি ৰুচ্চতি, তস্স ৰণ্ণসম্পত্তিযা অভিরূপভাৰেনাতি অত্থো। ধনেনাতিআদীনি উত্তানত্থানেৰ। মানং জপ্পেতীতি এতেসু যেন কেনচি ৰত্থুনা ‘সেয্যোহমস্মী’তি মানং পৰত্তেতি করোতি।

    866. Seyyamānaniddese jātiyāti khattiyabhāvādijātisampattiyā. Gottenāti gotamagottādinā ukkaṭṭhagottena. Kolaputtiyenāti mahākulabhāvena. Vaṇṇapokkharatāyāti vaṇṇasampannasarīratāya. Sarīrañhi pokkharanti vuccati, tassa vaṇṇasampattiyā abhirūpabhāvenāti attho. Dhanenātiādīni uttānatthāneva. Mānaṃ jappetīti etesu yena kenaci vatthunā ‘seyyohamasmī’ti mānaṃ pavatteti karoti.

    ৮৬৭. সদিসমাননিদ্দেসে মানং জপ্পেতীতি এতেসু যেন কেনচি ৰত্থুনা ‘সদিসোহমস্মী’তি মানং পৰত্তেতি। অযমেত্থ অত্থতো ৰিসেসো। পাল়িযং পন নানাকরণং নত্থি।

    867. Sadisamānaniddese mānaṃ jappetīti etesu yena kenaci vatthunā ‘sadisohamasmī’ti mānaṃ pavatteti. Ayamettha atthato viseso. Pāḷiyaṃ pana nānākaraṇaṃ natthi.

    ৮৬৮. হীনমাননিদ্দেসে ওমানং জপ্পেতীতি হেট্ঠামানং পৰত্তেতি। ওমানোতি লামকো হেট্ঠামানো। ওমঞ্ঞনা ওমঞ্ঞিতত্তন্তি আকারভাৰনিদ্দেসো। হীল়নাতি জাতিআদীহি অত্তজিগুচ্ছনা। ওহীল়নাতি অতিরেকতো হীল়না। ওহীল়িতত্তন্তি তস্সেৰ ভাৰনিদ্দেসো। অত্তুঞ্ঞাতি অত্তানং হীনং কত্ৰা জাননা। অত্তাৰঞ্ঞাতি অত্তানং অৰজাননা। অত্তপরিভৰোতি জাতিআদিসম্পত্তিনামমেৰ জাতাতি অত্তানং পরিভৰিত্ৰা মঞ্ঞনা। এৰমিমে তযো মানা পুগ্গলং অনিস্সায জাতিআদিৰত্থুৰসেনেৰ কথিতা। তেসু একেকো তিণ্ণম্পি সেয্যসদিসহীনানং উপ্পজ্জতি। তত্থ ‘সেয্যোহমস্মী’তি মানো সেয্যস্সেৰ যাথাৰমানো, সেসানং অযাথাৰমানো। ‘সদিসোহমস্মী’তি মানো সদিসস্সেৰ যাথাৰমানো, সেসানং অযাথাৰমানো। ‘হীনোহমস্মী’তি মানো হীনস্সেৰ যাথাৰমানো, সেসানং অযাথাৰমানো।

    868. Hīnamānaniddese omānaṃ jappetīti heṭṭhāmānaṃ pavatteti. Omānoti lāmako heṭṭhāmāno. Omaññanā omaññitattanti ākārabhāvaniddeso. Hīḷanāti jātiādīhi attajigucchanā. Ohīḷanāti atirekato hīḷanā. Ohīḷitattanti tasseva bhāvaniddeso. Attuññāti attānaṃ hīnaṃ katvā jānanā. Attāvaññāti attānaṃ avajānanā. Attaparibhavoti jātiādisampattināmameva jātāti attānaṃ paribhavitvā maññanā. Evamime tayo mānā puggalaṃ anissāya jātiādivatthuvaseneva kathitā. Tesu ekeko tiṇṇampi seyyasadisahīnānaṃ uppajjati. Tattha ‘seyyohamasmī’ti māno seyyasseva yāthāvamāno, sesānaṃ ayāthāvamāno. ‘Sadisohamasmī’ti māno sadisasseva yāthāvamāno, sesānaṃ ayāthāvamāno. ‘Hīnohamasmī’ti māno hīnasseva yāthāvamāno, sesānaṃ ayāthāvamāno.

    ৮৬৯. তত্থ কতমো সেয্যস্স সেয্যোহমস্মীতিআদযো পন নৰ মানা পুগ্গলং নিস্সায কথিতা। তেসু তযো তযো একেকস্স উপ্পজ্জন্তি। তত্থ দহতীতি ঠপেতি। তং নিস্সাযাতি তং সেয্যতো দহনং নিস্সায। এত্থ পন সেয্যস্স সেয্যোহমস্মীতি মানো রাজূনঞ্চেৰ পব্বজিতানঞ্চ উপ্পজ্জতি। রাজা হি ‘রট্ঠেন ৰা ধনেন ৰা ৰাহনেহি ৰা কো মযা সদিসো অত্থী’তি এতং মানং করোতি। পব্বজিতোপি ‘সীলধুতঙ্গাদীহি কো মযা সদিসো অত্থী’তি এতং মানং করোতি।

    869. Tattha katamo seyyassa seyyohamasmītiādayo pana nava mānā puggalaṃ nissāya kathitā. Tesu tayo tayo ekekassa uppajjanti. Tattha dahatīti ṭhapeti. Taṃ nissāyāti taṃ seyyato dahanaṃ nissāya. Ettha pana seyyassa seyyohamasmīti māno rājūnañceva pabbajitānañca uppajjati. Rājā hi ‘raṭṭhena vā dhanena vā vāhanehi vā ko mayā sadiso atthī’ti etaṃ mānaṃ karoti. Pabbajitopi ‘sīladhutaṅgādīhi ko mayā sadiso atthī’ti etaṃ mānaṃ karoti.

    ৮৭০. সেয্যস্স সদিসোহমস্মীতি মানোপি এতেসংযেৰ উপ্পজ্জতি। রাজা হি ‘রট্ঠেন ৰা ধনেন ৰা ৰাহনেহি ৰা অঞ্ঞরাজূহি সদ্ধিং ময্হং কিং নানাকরণ’ন্তি এতং মানং করোতি। পব্বজিতোপি ‘সীলধুতঙ্গাদীহি অঞ্ঞেন ভিক্খুনা সদ্ধিং ময্হং কিং নানাকরণ’ন্তি এতং মানং করোতি।

    870. Seyyassa sadisohamasmīti mānopi etesaṃyeva uppajjati. Rājā hi ‘raṭṭhena vā dhanena vā vāhanehi vā aññarājūhi saddhiṃ mayhaṃ kiṃ nānākaraṇa’nti etaṃ mānaṃ karoti. Pabbajitopi ‘sīladhutaṅgādīhi aññena bhikkhunā saddhiṃ mayhaṃ kiṃ nānākaraṇa’nti etaṃ mānaṃ karoti.

    ৮৭১. সেয্যস্স হীনোহমস্মীতি মানোপি এতেসংযেৰ উপ্পজ্জতি। যস্স হি রঞ্ঞো রট্ঠং ৰা ধনং ৰা ৰাহনানি ৰা সম্পন্নানি ন হোন্তি, সো ‘ময্হং রাজাতি ৰোহারসুখমত্তমেৰ; কিং রাজা নাম অহ’ন্তি এতং মানং করোতি। পব্বজিতোপি ‘অপ্পলাভসক্কারো অহং। ধম্মকথিকো বহুস্সুতো মহাথেরোতি কথামত্তমেৰ। কিং ধম্মকথিকো নামাহং, কিং বহুস্সুতো নামাহং, কিং মহাথেরো নামাহং যস্স মে লাভসক্কারো নত্থী’তি এতং মানং করোতি।

    871. Seyyassa hīnohamasmīti mānopi etesaṃyeva uppajjati. Yassa hi rañño raṭṭhaṃ vā dhanaṃ vā vāhanāni vā sampannāni na honti, so ‘mayhaṃ rājāti vohārasukhamattameva; kiṃ rājā nāma aha’nti etaṃ mānaṃ karoti. Pabbajitopi ‘appalābhasakkāro ahaṃ. Dhammakathiko bahussuto mahātheroti kathāmattameva. Kiṃ dhammakathiko nāmāhaṃ, kiṃ bahussuto nāmāhaṃ, kiṃ mahāthero nāmāhaṃ yassa me lābhasakkāro natthī’ti etaṃ mānaṃ karoti.

    ৮৭২. সদিসস্স সেয্যোহমস্মীতি মানাদযো অমচ্চাদীনং উপ্পজ্জন্তি। অমচ্চো হি রট্ঠিযো ৰা ‘ভোগযানৰাহনাদীহি কো মযা সদিসো অঞ্ঞো রাজপুরিসো অত্থী’তি ৰা ‘ময্হং অঞ্ঞেহি সদ্ধিং কিং নানাকরণ’ন্তি ৰা ‘অমচ্চোতি নামমত্তমেৰ ময্হং; ঘাসচ্ছাদনমত্তম্পি মে নত্থি। কিং অমচ্চো নামাহ’ন্তি এতে মানে করোতি।

    872. Sadisassa seyyohamasmīti mānādayo amaccādīnaṃ uppajjanti. Amacco hi raṭṭhiyo vā ‘bhogayānavāhanādīhi ko mayā sadiso añño rājapuriso atthī’ti vā ‘mayhaṃ aññehi saddhiṃ kiṃ nānākaraṇa’nti vā ‘amaccoti nāmamattameva mayhaṃ; ghāsacchādanamattampi me natthi. Kiṃ amacco nāmāha’nti ete māne karoti.

    ৮৭৫. হীনস্স সেয্যোহমস্মীতি মানাদযো দাসাদীনং উপ্পজ্জন্তি। দাসো হি ‘মাতিতো ৰা পিতিতো ৰা কো মযা সদিসো অঞ্ঞো দাসো নাম অত্থি’ অঞ্ঞে জীৰিতুং অসক্কোন্তা কুচ্ছিহেতু দাসা নাম জাতা। অহং পন পৰেণীআগতত্তা সেয্যো’তি ৰা ‘পৰেণীআগতভাৰেন উভতোসুদ্ধিকদাসত্তেন অসুকদাসেন নাম সদ্ধিং কিং ময্হং নানাকরণ’ন্তি ৰা ‘কুচ্ছিৰসেনাহং দাসব্যং উপগতো। মাতাপিতুকোটিযা পন মে দাসট্ঠানং নত্থি। কিং দাসো নাম অহ’ন্তি ৰা এতে মানে করোতি। যথা চ দাসো এৰং পুক্কুসচণ্ডালাদযোপি এতে মানে করোন্তিযেৰ।

    875. Hīnassa seyyohamasmīti mānādayo dāsādīnaṃ uppajjanti. Dāso hi ‘mātito vā pitito vā ko mayā sadiso añño dāso nāma atthi’ aññe jīvituṃ asakkontā kucchihetu dāsā nāma jātā. Ahaṃ pana paveṇīāgatattā seyyo’ti vā ‘paveṇīāgatabhāvena ubhatosuddhikadāsattena asukadāsena nāma saddhiṃ kiṃ mayhaṃ nānākaraṇa’nti vā ‘kucchivasenāhaṃ dāsabyaṃ upagato. Mātāpitukoṭiyā pana me dāsaṭṭhānaṃ natthi. Kiṃ dāso nāma aha’nti vā ete māne karoti. Yathā ca dāso evaṃ pukkusacaṇḍālādayopi ete māne karontiyeva.

    এত্থ চ ‘সেয্যস্স সেয্যোহমস্মী’তি উপ্পন্নমানোৰ যাথাৰমানো, ইতরে দ্ৰে অযাথাৰমানা। তথা ‘সদিসস্স সদিসোহমস্মী’তি ‘হীনস্স হীনোহমস্মী’তি উপ্পন্নমানোৰ যাথাৰমানো, ইতরে দ্ৰে অযাথাৰমানা। তত্থ যাথাৰমানা অরহত্তমগ্গৰজ্ঝা, অযাথাৰমানা সোতাপত্তিমগ্গৰজ্ঝা।

    Ettha ca ‘seyyassa seyyohamasmī’ti uppannamānova yāthāvamāno, itare dve ayāthāvamānā. Tathā ‘sadisassa sadisohamasmī’ti ‘hīnassa hīnohamasmī’ti uppannamānova yāthāvamāno, itare dve ayāthāvamānā. Tattha yāthāvamānā arahattamaggavajjhā, ayāthāvamānā sotāpattimaggavajjhā.

    ৮৭৮. এৰং সৰত্থুকে মানে কথেত্ৰা ইদানি অৰত্থুকং নিব্বত্তিতমানমেৰ দস্সেতুং তত্থ কতমো মানোতিআদি ৰুত্তং।

    878. Evaṃ savatthuke māne kathetvā idāni avatthukaṃ nibbattitamānameva dassetuṃ tattha katamo mānotiādi vuttaṃ.

    ৮৭৯. অতিমাননিদ্দেসে সেয্যাদিৰসেন পুগ্গলং অনামসিত্ৰা জাতিআদীনং ৰত্থুৰসেনেৰ নিদ্দিট্ঠো। তত্থ অতিমঞ্ঞতীতি ‘জাতিআদীহি মযা সদিসো নত্থী’তি অতিক্কমিত্ৰা মঞ্ঞতি।

    879. Atimānaniddese seyyādivasena puggalaṃ anāmasitvā jātiādīnaṃ vatthuvaseneva niddiṭṭho. Tattha atimaññatīti ‘jātiādīhi mayā sadiso natthī’ti atikkamitvā maññati.

    ৮৮০. মানাতিমাননিদ্দেসে যো এৰরূপোতি যো এসো ‘অযং পুব্বে মযা সদিসো, ইদানি অহং সেট্ঠো, অহং হীনতরো’তি উপ্পন্নো মানো। অযং ভারাতিভারো ৰিয পুরিমং সদিসমানং উপাদায মানাতিমানোতি দস্সেতুং এৰমাহ।

    880. Mānātimānaniddese yo evarūpoti yo eso ‘ayaṃ pubbe mayā sadiso, idāni ahaṃ seṭṭho, ahaṃ hīnataro’ti uppanno māno. Ayaṃ bhārātibhāro viya purimaṃ sadisamānaṃ upādāya mānātimānoti dassetuṃ evamāha.

    ৮৮১. ওমাননিদ্দেসো হীনমাননিদ্দেসসদিসোযেৰ। ৰেনেয্যৰসেন পন সো ‘হীনোহমস্মী’তি মানো নাম ৰুত্তো – অযং ওমানো নাম। অপিচেত্থ ‘ত্ৰং জাতিমা, কাকজাতি ৰিয তে জাতি; ত্ৰং গোত্তৰা, চণ্ডালগোত্তং ৰিয তে গোত্তং; তুয্হং সরো অত্থি, কাকস্সরো ৰিয তে সরো’তি এৰং অত্তানং হেট্ঠা কত্ৰা পৰত্তনৰসেন অযং ওমানোতি ৰেদিতব্বো।

    881. Omānaniddeso hīnamānaniddesasadisoyeva. Veneyyavasena pana so ‘hīnohamasmī’ti māno nāma vutto – ayaṃ omāno nāma. Apicettha ‘tvaṃ jātimā, kākajāti viya te jāti; tvaṃ gottavā, caṇḍālagottaṃ viya te gottaṃ; tuyhaṃ saro atthi, kākassaro viya te saro’ti evaṃ attānaṃ heṭṭhā katvā pavattanavasena ayaṃ omānoti veditabbo.

    ৮৮২. অধিমাননিদ্দেসে অপ্পত্তে পত্তসঞ্ঞিতাতি চত্তারি সচ্চানি অপ্পত্ৰা পত্তসঞ্ঞিতায । অকতেতি চতূহি মগ্গেহি কত্তব্বকিচ্চে অকতেযেৰ। অনধিগতেতি চতুসচ্চধম্মে অনধিগতে। অসচ্ছিকতেতি অরহত্তেন অপচ্চক্খকতে। অযং ৰুচ্চতি অধিমানোতি অযং অধিগতমানো নাম ৰুচ্চতি।

    882. Adhimānaniddese appatte pattasaññitāti cattāri saccāni appatvā pattasaññitāya . Akateti catūhi maggehi kattabbakicce akateyeva. Anadhigateti catusaccadhamme anadhigate. Asacchikateti arahattena apaccakkhakate. Ayaṃ vuccati adhimānoti ayaṃ adhigatamāno nāma vuccati.

    অযং পন কস্স উপ্পজ্জতি, কস্স নুপ্পজ্জতীতি? অরিযসাৰকস্স তাৰ নুপ্পজ্জতি। সো হি মগ্গফলনিব্বানপহীনকিলেসাৰসিট্ঠকিলেসপচ্চৰেক্খণেন সঞ্জাতসোমনস্সো অরিযগুণপটিৰেধে নিক্কঙ্খো। তস্মা সোতাপন্নাদীনং ‘অহং সকদাগামী’তিআদিৰসেন মানো নুপ্পজ্জতি; দুস্সীলস্সাপি নুপ্পজ্জতি; সো হি অরিযগুণাধিগমে নিরাসোৰ। সীলৰতোপি পরিচ্চত্তকম্মট্ঠানস্স নিদ্দারামতাদিমনুযুত্তস্স নুপ্পজ্জতি।

    Ayaṃ pana kassa uppajjati, kassa nuppajjatīti? Ariyasāvakassa tāva nuppajjati. So hi maggaphalanibbānapahīnakilesāvasiṭṭhakilesapaccavekkhaṇena sañjātasomanasso ariyaguṇapaṭivedhe nikkaṅkho. Tasmā sotāpannādīnaṃ ‘ahaṃ sakadāgāmī’tiādivasena māno nuppajjati; dussīlassāpi nuppajjati; so hi ariyaguṇādhigame nirāsova. Sīlavatopi pariccattakammaṭṭhānassa niddārāmatādimanuyuttassa nuppajjati.

    পরিসুদ্ধসীলস্স পন কম্মট্ঠানে অপ্পমত্তস্স নামরূপং ৰৰত্থপেত্ৰা পচ্চযপরিগ্গহেন ৰিতিণ্ণকঙ্খস্স তিলক্খণং আরোপেত্ৰা সঙ্খারে সম্মসন্তস্স আরদ্ধৰিপস্সকস্স উপ্পজ্জতি; উপ্পন্নে চ সুদ্ধসমথলাভী ৰা সুদ্ধৰিপস্সনালাভী ৰা অন্তরা ঠপেতি। সো হি দসপি ৰীসম্পি তিংসম্পি ৰস্সানি কিলেসসমুদাচারং অপস্সন্তো ‘অহং সোতাপন্নো’তি ৰা ‘সকদাগামী’তি ৰা ‘অনাগামী’তি ৰা মঞ্ঞতি। সমথৰিপস্সনালাভী পন অরহত্তেযেৰ ঠপেতি। তস্স হি সমাধিবলেন কিলেসা ৰিক্খম্ভিতা, ৰিপস্সনাবলেন সঙ্খারা সুপরিগ্গহিতা। তস্মা সট্ঠিপি ৰস্সানি অসীতিপি ৰস্সানি ৰস্সসতম্পি কিলেসা ন সমুদাচরন্তি; খীণাসৰস্সেৰ চিত্তচারো হোতি। সো এৰং দীঘরত্তং কিলেসসমুদাচারং অপস্সন্তো অন্তরা অট্ঠত্ৰাৰ ‘অরহা অহ’ন্তি মঞ্ঞতি, উচ্চমালঙ্কৰাসী মহানাগত্থেরো ৰিয, হঙ্কনকৰাসী মহাদত্তত্থেরো ৰিয, চিত্তলপব্বতে নিঙ্কপোণ্ণপধানঘরৰাসী চূল়সুমত্থেরো ৰিয চ।

    Parisuddhasīlassa pana kammaṭṭhāne appamattassa nāmarūpaṃ vavatthapetvā paccayapariggahena vitiṇṇakaṅkhassa tilakkhaṇaṃ āropetvā saṅkhāre sammasantassa āraddhavipassakassa uppajjati; uppanne ca suddhasamathalābhī vā suddhavipassanālābhī vā antarā ṭhapeti. So hi dasapi vīsampi tiṃsampi vassāni kilesasamudācāraṃ apassanto ‘ahaṃ sotāpanno’ti vā ‘sakadāgāmī’ti vā ‘anāgāmī’ti vā maññati. Samathavipassanālābhī pana arahatteyeva ṭhapeti. Tassa hi samādhibalena kilesā vikkhambhitā, vipassanābalena saṅkhārā supariggahitā. Tasmā saṭṭhipi vassāni asītipi vassāni vassasatampi kilesā na samudācaranti; khīṇāsavasseva cittacāro hoti. So evaṃ dīgharattaṃ kilesasamudācāraṃ apassanto antarā aṭṭhatvāva ‘arahā aha’nti maññati, uccamālaṅkavāsī mahānāgatthero viya, haṅkanakavāsī mahādattatthero viya, cittalapabbate niṅkapoṇṇapadhānagharavāsī cūḷasumatthero viya ca.

    তত্রিদং একৰত্থুপরিদীপনং – তলঙ্গরৰাসী ধম্মদিন্নত্থেরো কির নাম একো পভিন্নপটিসম্ভিদো মহাখীণাসৰো মহতো ভিক্খুসঙ্ঘস্স ওৰাদদাযকো অহোসি। সো একদিৰসং অত্তনো দিৰাট্ঠানে নিসীদিত্ৰা ‘কিন্নু খো অম্হাকং আচরিযস্স উচ্চতলিঙ্কৰাসীমহানাগত্থেরস্স সমণকিচ্চং মত্থকং পত্তো, নো’তি আৰজ্জন্তো পুথুজ্জনভাৰমেৰস্স দিস্ৰা ‘মযি অগচ্ছন্তে পুথুজ্জনকালকিরিযমেৰ করিস্সতী’তি চ ঞত্ৰা ইদ্ধিযা ৰেহাসং উপ্পতিত্ৰা দিৰাট্ঠানে নিসিন্নস্স থেরস্স সমীপে ওরোহিত্ৰা ৰন্দিত্ৰা ৰত্তং দস্সেত্ৰা একমন্তং নিসীদি। ‘কিং, আৰুসো ধম্মদিন্ন, অকালে আগতোসী’তি চ ৰুত্তো ‘পঞ্হং, ভন্তে, পুচ্ছিতুং আগতোম্হী’তি আহ।

    Tatridaṃ ekavatthuparidīpanaṃ – talaṅgaravāsī dhammadinnatthero kira nāma eko pabhinnapaṭisambhido mahākhīṇāsavo mahato bhikkhusaṅghassa ovādadāyako ahosi. So ekadivasaṃ attano divāṭṭhāne nisīditvā ‘kinnu kho amhākaṃ ācariyassa uccataliṅkavāsīmahānāgattherassa samaṇakiccaṃ matthakaṃ patto, no’ti āvajjanto puthujjanabhāvamevassa disvā ‘mayi agacchante puthujjanakālakiriyameva karissatī’ti ca ñatvā iddhiyā vehāsaṃ uppatitvā divāṭṭhāne nisinnassa therassa samīpe orohitvā vanditvā vattaṃ dassetvā ekamantaṃ nisīdi. ‘Kiṃ, āvuso dhammadinna, akāle āgatosī’ti ca vutto ‘pañhaṃ, bhante, pucchituṃ āgatomhī’ti āha.

    ততো ‘পুচ্ছাৰুসো, জানমানো কথযিস্সামী’তি ৰুত্তো পঞ্হাসহস্সং পুচ্ছি। থেরো পুচ্ছিতপুচ্ছিতং পঞ্হং অসজ্জমানোৰ কথেসি। ততো ‘অতিতিক্খং তে, ভন্তে, ঞাণং। কদা তুম্হেহি অযং ধম্মো অধিগতো’তি ৰুত্তো ‘ইতো সট্ঠিৰস্সকালে, আৰুসো’তি আহ। ‘সমাধিম্পি, ভন্তে, ৰল়ঞ্জেথা’তি? ‘ন ইদং, আৰুসো, ভারিয’ন্তি। ‘তেন হি, ভন্তে, একং হত্থিং মাপেথা’তি। থেরো সব্বসেতং হত্থিং মাপেসি। ‘ইদানি, ভন্তে, যথা অযং হত্থী অঞ্চিতকণ্ণো পসারিতনঙ্গুট্ঠো সোণ্ডং মুখে পক্খিপিত্ৰা ভেরৰং কোঞ্চনাদং করোন্তো তুম্হাকং অভিমুখো আগচ্ছতি তথা তং করোথা’তি। থেরো তথা কত্ৰা ৰেগেন আগচ্ছতো হত্থিস্স ভেরৰং আকারং দিস্ৰা উট্ঠায পলাযিতুং আরদ্ধো। তমেনং খীণাসৰত্থেরো হত্থং পসারেত্ৰা চীৰরকণ্ণে গহেত্ৰা ‘ভন্তে, খীণাসৰস্স সারজ্জং নাম হোতী’তি আহ। সো তস্মিং কালে অত্তনো পুথুজ্জনভাৰং ঞত্ৰা ‘অৰস্সযো মে, আৰুসো ধম্মদিন্ন, হোহী’তি ৰত্ৰা পাদমূলে উক্কুটিকং নিসীদি। ‘ভন্তে, তুম্হাকং অৰস্সযো ভৰিস্সামিচ্চেৰাহং আগতো, মা চিন্তযিত্থা’তি কম্মট্ঠানং কথেসি। থেরো কম্মট্ঠানং গহেত্ৰা চঙ্কমং আরুয্হ ততিযে পদৰারে অগ্গফলং অরহত্তং পাপুণি। থেরো কির দোসচরিতো অহোসি।

    Tato ‘pucchāvuso, jānamāno kathayissāmī’ti vutto pañhāsahassaṃ pucchi. Thero pucchitapucchitaṃ pañhaṃ asajjamānova kathesi. Tato ‘atitikkhaṃ te, bhante, ñāṇaṃ. Kadā tumhehi ayaṃ dhammo adhigato’ti vutto ‘ito saṭṭhivassakāle, āvuso’ti āha. ‘Samādhimpi, bhante, vaḷañjethā’ti? ‘Na idaṃ, āvuso, bhāriya’nti. ‘Tena hi, bhante, ekaṃ hatthiṃ māpethā’ti. Thero sabbasetaṃ hatthiṃ māpesi. ‘Idāni, bhante, yathā ayaṃ hatthī añcitakaṇṇo pasāritanaṅguṭṭho soṇḍaṃ mukhe pakkhipitvā bheravaṃ koñcanādaṃ karonto tumhākaṃ abhimukho āgacchati tathā taṃ karothā’ti. Thero tathā katvā vegena āgacchato hatthissa bheravaṃ ākāraṃ disvā uṭṭhāya palāyituṃ āraddho. Tamenaṃ khīṇāsavatthero hatthaṃ pasāretvā cīvarakaṇṇe gahetvā ‘bhante, khīṇāsavassa sārajjaṃ nāma hotī’ti āha. So tasmiṃ kāle attano puthujjanabhāvaṃ ñatvā ‘avassayo me, āvuso dhammadinna, hohī’ti vatvā pādamūle ukkuṭikaṃ nisīdi. ‘Bhante, tumhākaṃ avassayo bhavissāmiccevāhaṃ āgato, mā cintayitthā’ti kammaṭṭhānaṃ kathesi. Thero kammaṭṭhānaṃ gahetvā caṅkamaṃ āruyha tatiye padavāre aggaphalaṃ arahattaṃ pāpuṇi. Thero kira dosacarito ahosi.

    ৮৮৩. অস্মিমাননিদ্দেসে রূপং অস্মীতি মানোতি ‘অহং রূপ’ন্তি উপ্পন্নমানো। ছন্দোতি মানং অনুগতচ্ছন্দোৰ। তথা অনুসযো। ৰেদনাদীসুপি এসেৰ নযো।

    883. Asmimānaniddese rūpaṃ asmīti mānoti ‘ahaṃ rūpa’nti uppannamāno. Chandoti mānaṃ anugatacchandova. Tathā anusayo. Vedanādīsupi eseva nayo.

    ৮৮৪. মিচ্ছামাননিদ্দেসে পাপকেন ৰা কম্মাযতনেনাতি আদীসু পাপকং কম্মাযতনং নাম কেৰট্টমচ্ছবন্ধনেসাদাদীনং কম্মং। পাপকং সিপ্পাযতনং নাম মচ্ছজালখিপনকুমিনকরণেসু চেৰ পাসওড্ডনসূলারোপনাদীসু চ ছেকতা। পাপকং ৰিজ্জাট্ঠানং নাম যা কাচি পরূপঘাতৰিজ্জা। পাপকং সুতং নাম ভারতযুদ্ধসীতাহরণাদিপটিসংযুত্তং। পাপকং পটিভানং নাম দুব্ভাসিতযুত্তং কপ্পনাটকৰিলপ্পনাদিপটিভানং। পাপকং সীলং নাম অজসীলং গোসীলং। ৰতম্পি অজৰতগোৰতমেৰ। পাপিকা দিট্ঠি পন দ্ৰাসট্ঠিযা দিট্ঠিগতেসু যা কাচি দিট্ঠি।

    884. Micchāmānaniddese pāpakena vā kammāyatanenāti ādīsu pāpakaṃ kammāyatanaṃ nāma kevaṭṭamacchabandhanesādādīnaṃ kammaṃ. Pāpakaṃ sippāyatanaṃ nāma macchajālakhipanakuminakaraṇesu ceva pāsaoḍḍanasūlāropanādīsu ca chekatā. Pāpakaṃ vijjāṭṭhānaṃ nāma yā kāci parūpaghātavijjā. Pāpakaṃ sutaṃ nāma bhāratayuddhasītāharaṇādipaṭisaṃyuttaṃ. Pāpakaṃ paṭibhānaṃ nāma dubbhāsitayuttaṃ kappanāṭakavilappanādipaṭibhānaṃ. Pāpakaṃ sīlaṃ nāma ajasīlaṃ gosīlaṃ. Vatampi ajavatagovatameva. Pāpikā diṭṭhi pana dvāsaṭṭhiyā diṭṭhigatesu yā kāci diṭṭhi.

    ৮৮৫. ঞাতিৰিতক্কনিদ্দেসাদীসু ‘ময্হং ঞাতযো সুখজীৰিনো সম্পত্তিযুত্তা’তি এৰং পঞ্চকামগুণসন্নিস্সিতেন গেহসিতপেমেন ঞাতকে আরব্ভ উপ্পন্নৰিতক্কোৰ ঞাতিৰিতক্কো নাম। ‘খযং গতা ৰযং গতা সদ্ধা পসন্না’তি এৰং পৰত্তো পন ঞাতিৰিতক্কো নাম ন হোতি।

    885. Ñātivitakkaniddesādīsu ‘mayhaṃ ñātayo sukhajīvino sampattiyuttā’ti evaṃ pañcakāmaguṇasannissitena gehasitapemena ñātake ārabbha uppannavitakkova ñātivitakko nāma. ‘Khayaṃ gatā vayaṃ gatā saddhā pasannā’ti evaṃ pavatto pana ñātivitakko nāma na hoti.

    ৮৮৬. ‘অম্হাকং জনপদো সুভিক্খো সম্পন্নসস্সো’তি তুট্ঠমানস্স গেহসিতপেমৰসেনেৰ উপ্পন্নৰিতক্কো জনপদৰিতক্কো নাম। ‘অম্হাকং জনপদে মনুস্সা সদ্ধা পসন্না খযং গতা ৰযং গতা’তি এৰং পৰত্তো পন জনপদৰিতক্কো নাম ন হোতি।

    886. ‘Amhākaṃ janapado subhikkho sampannasasso’ti tuṭṭhamānassa gehasitapemavaseneva uppannavitakko janapadavitakko nāma. ‘Amhākaṃ janapade manussā saddhā pasannā khayaṃ gatā vayaṃ gatā’ti evaṃ pavatto pana janapadavitakko nāma na hoti.

    ৮৮৭. অমরত্থায ৰিতক্কো, অমরো ৰা ৰিতক্কোতি অমরৰিতক্কো। তত্থ ‘উক্কুটিকপ্পধানাদীহি দুক্খে নিজ্জিণ্ণে সম্পরাযে অত্তা সুখী হোতি অমরো’তি দুক্করকারিকং করোন্তস্স তায দুক্করকারিকায পটিসংযুত্তো ৰিতক্কো অমরত্থায ৰিতক্কো নাম। দিট্ঠিগতিকো পন ‘সস্সতং ৰদেসী’তিআদীনি পুট্ঠো ‘এৰন্তিপি মে নো, তথাতিপি মে নো’ অঞ্ঞথাতিপি মে নো, নোতিপি মে নো, নো নোতিপি মে নো’তি (দী॰ নি॰ ১.৬২) ৰিক্খেপং আপজ্জতি, তস্স সো দিট্ঠিগতপটিসংযুত্তো ৰিতক্কো। যথা অমরো নাম মচ্ছো উদকে গহেত্ৰা মারেতুং ন সক্কা, ইতো চিতো চ ধাৰতি, গাহং ন গচ্ছতি; এৰমেৰ একস্মিং পক্খে অসণ্ঠহনতো ন মরতীতি অমরো নাম হোতি। তং দুৰিধম্পি একতো কত্ৰা অযং ৰুচ্চতি অমরৰিতক্কোতি ৰুত্তং।

    887. Amaratthāya vitakko, amaro vā vitakkoti amaravitakko. Tattha ‘ukkuṭikappadhānādīhi dukkhe nijjiṇṇe samparāye attā sukhī hoti amaro’ti dukkarakārikaṃ karontassa tāya dukkarakārikāya paṭisaṃyutto vitakko amaratthāya vitakko nāma. Diṭṭhigatiko pana ‘sassataṃ vadesī’tiādīni puṭṭho ‘evantipi me no, tathātipi me no’ aññathātipi me no, notipi me no, no notipi me no’ti (dī. ni. 1.62) vikkhepaṃ āpajjati, tassa so diṭṭhigatapaṭisaṃyutto vitakko. Yathā amaro nāma maccho udake gahetvā māretuṃ na sakkā, ito cito ca dhāvati, gāhaṃ na gacchati; evameva ekasmiṃ pakkhe asaṇṭhahanato na maratīti amaro nāma hoti. Taṃ duvidhampi ekato katvā ayaṃ vuccati amaravitakkoti vuttaṃ.

    ৮৮৮. পরানুদ্দযতাপটিসংযুত্তোতি অনুদ্দযতাপতিরূপকেন গেহসিতপেমেন পটিসংযুত্তো। সহনন্দীতিআদীসু উপট্ঠাকেসু নন্দন্তেসু সোচন্তেসু চ তেহি সদ্ধিং দিগুণং নন্দতি, দিগুণং সোচতি; তেসু সুখিতেসু দিগুণং সুখিতো হোতি, দুক্খিতেসু দিগুণং দুক্খিতো হোতি। উপ্পন্নেসু কিচ্চকরণীযেসূতি তেসু মহন্তেসু ৰা খুদ্দকেসু ৰা কম্মেসু উপ্পন্নেসু। অত্তনা ৰা যোগং আপজ্জতীতি তানি তানি কিচ্চানি সাধেন্তো পঞ্ঞত্তিং ৰীতিক্কমতি, সল্লেখং কোপেতি। যো তত্থাতি যো তস্মিং সংসট্ঠৰিহারে, তস্মিং ৰা যোগাপজ্জনে গেহসিতো ৰিতক্কো – অযং পরানুদ্দযতাপটিসংযুত্তো ৰিতক্কো নাম।

    888. Parānuddayatāpaṭisaṃyuttoti anuddayatāpatirūpakena gehasitapemena paṭisaṃyutto. Sahanandītiādīsu upaṭṭhākesu nandantesu socantesu ca tehi saddhiṃ diguṇaṃ nandati, diguṇaṃ socati; tesu sukhitesu diguṇaṃ sukhito hoti, dukkhitesu diguṇaṃ dukkhito hoti. Uppannesu kiccakaraṇīyesūti tesu mahantesu vā khuddakesu vā kammesu uppannesu. Attanā vā yogaṃ āpajjatīti tāni tāni kiccāni sādhento paññattiṃ vītikkamati, sallekhaṃ kopeti. Yo tatthāti yo tasmiṃ saṃsaṭṭhavihāre, tasmiṃ vā yogāpajjane gehasito vitakko – ayaṃ parānuddayatāpaṭisaṃyutto vitakko nāma.

    ৮৮৯. লাভসক্কারসিলোকপটিসংযুত্তোতি চীৰরাদিলাভেন চেৰ সক্কারেন চ কিত্তিসদ্দেন চ সদ্ধিং আরম্মণকরণৰসেন পটিসংযুত্তো।

    889. Lābhasakkārasilokapaṭisaṃyuttoti cīvarādilābhena ceva sakkārena ca kittisaddena ca saddhiṃ ārammaṇakaraṇavasena paṭisaṃyutto.

    ৮৯০. অনৰঞ্ঞত্তিপটিসংযুত্তোতি ‘অহো ৰত মং পরে ন অৰজানেয্যুং, ন পোথেত্ৰা ৰিহেঠেত্ৰা কথেয্যু’ন্তি এৰং অনৰঞ্ঞাতভাৰপত্থনায সদ্ধিং উপ্পজ্জনৰিতক্কো। যো তত্থ গেহসিতোতি যো তস্মিং ‘মা মং পরে অৰজানিংসূ’তি উপ্পন্নে চিত্তে পঞ্চকামগুণসঙ্খাতগেহনিস্সিতো হুত্ৰা উপ্পন্নৰিতক্কো। সেসং সব্বত্থ পাকটমেৰাতি।

    890. Anavaññattipaṭisaṃyuttoti ‘aho vata maṃ pare na avajāneyyuṃ, na pothetvā viheṭhetvā katheyyu’nti evaṃ anavaññātabhāvapatthanāya saddhiṃ uppajjanavitakko. Yo tattha gehasitoti yo tasmiṃ ‘mā maṃ pare avajāniṃsū’ti uppanne citte pañcakāmaguṇasaṅkhātagehanissito hutvā uppannavitakko. Sesaṃ sabbattha pākaṭamevāti.

    এককনিদ্দেসৰণ্ণনা।

    Ekakaniddesavaṇṇanā.




    Next: (২.) দুকনিদ্দেসৰণ্ণনা • (2.) Dukaniddesavaṇṇanā




    Related texts:



    তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১৭. খুদ্দকৰত্থুৰিভঙ্গো • 17. Khuddakavatthuvibhaṅgo

    টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ১৭. খুদ্দকৰত্থুৰিভঙ্গো • 17. Khuddakavatthuvibhaṅgo

    টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ১৭. খুদ্দকৰত্থুৰিভঙ্গো • 17. Khuddakavatthuvibhaṅgo


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact