| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
ஏகுத்தரிகனயோ
Ekuttarikanayo
ஏககவாரவண்ணனா
Ekakavāravaṇṇanā
321. ஆபத்திகரா த⁴ம்மா ஜானிதப்³பா³திஆதி³ம்ஹி ஏகுத்தரிகனயே ஆபத்திகரா த⁴ம்மா நாம ச² ஆபத்திஸமுட்டா²னானி. ஏதேஸஞ்ஹி வஸேன புக்³க³லோ ஆபத்திங் ஆபஜ்ஜதி, தஸ்மா ‘‘ஆபத்திகரா’’தி வுத்தா. அனாபத்திகரா நாம ஸத்த ஸமதா². ஆபத்தி ஜானிதப்³பா³தி தஸ்மிங் தஸ்மிங் ஸிக்கா²பதே³ ச விப⁴ங்கே³ ச வுத்தா ஆபத்தி ஜானிதப்³பா³. அனாபத்தீதி ‘‘அனாபத்தி பி⁴க்கு² அஸாதி³யந்தஸ்ஸா’’திஆதி³னா நயேன அனாபத்தி ஜானிதப்³பா³. லஹுகாதி லஹுகேன வினயகம்மேன விஸுஜ்ஜ²னதோ பஞ்சவிதா⁴ ஆபத்தி. க³ருகாதி க³ருகேன வினயகம்மேன விஸுஜ்ஜ²னதோ ஸங்கா⁴தி³ஸேஸா ஆபத்தி. கேனசி ஆகாரேன அனாபத்திபா⁴வங் உபனேதுங் அஸக்குணெய்யதோ பாராஜிகாபத்தி ச. ஸாவஸேஸாதி ட²பெத்வா பாராஜிகங் ஸேஸா. அனவஸேஸாதி பாராஜிகாபத்தி. த்³வே ஆபத்திக்க²ந்தா⁴ து³ட்டு²ல்லா; அவஸேஸா அது³ட்டு²ல்லா. ஸப்படிகம்மது³கங் ஸாவஸேஸது³கஸதி³ஸங். தே³ஸனாகா³மினிது³கங் லஹுகது³கஸங்க³ஹிதங்.
321.Āpattikarādhammā jānitabbātiādimhi ekuttarikanaye āpattikarā dhammā nāma cha āpattisamuṭṭhānāni. Etesañhi vasena puggalo āpattiṃ āpajjati, tasmā ‘‘āpattikarā’’ti vuttā. Anāpattikarā nāma satta samathā. Āpatti jānitabbāti tasmiṃ tasmiṃ sikkhāpade ca vibhaṅge ca vuttā āpatti jānitabbā. Anāpattīti ‘‘anāpatti bhikkhu asādiyantassā’’tiādinā nayena anāpatti jānitabbā. Lahukāti lahukena vinayakammena visujjhanato pañcavidhā āpatti. Garukāti garukena vinayakammena visujjhanato saṅghādisesā āpatti. Kenaci ākārena anāpattibhāvaṃ upanetuṃ asakkuṇeyyato pārājikāpatti ca. Sāvasesāti ṭhapetvā pārājikaṃ sesā. Anavasesāti pārājikāpatti. Dve āpattikkhandhā duṭṭhullā; avasesā aduṭṭhullā. Sappaṭikammadukaṃ sāvasesadukasadisaṃ. Desanāgāminidukaṃ lahukadukasaṅgahitaṃ.
அந்தராயிகாதி ஸத்தபி ஆபத்தியோ ஸஞ்சிச்ச வீதிக்கந்தா ஸக்³க³ந்தராயஞ்சேவ மொக்க²ந்தராயஞ்ச கரொந்தீதி அந்தராயிகா. அஜானந்தேன வீதிக்கந்தா பன பண்ணத்திவஜ்ஜாபத்தி நேவ ஸக்³க³ந்தராயங் ந மொக்க²ந்தராயங் கரோதீதி அனந்தராயிகா. அந்தராயிகங் ஆபன்னஸ்ஸாபி தே³ஸனாகா³மினிங் தே³ஸெத்வா வுட்டா²னகா³மினிதோ வுட்டா²ய ஸுத்³தி⁴பத்தஸ்ஸ ஸாமணேரபூ⁴மியங் டி²தஸ்ஸ ச அவாரிதோ ஸக்³க³மொக்க²மக்³கோ³தி. ஸாவஜ்ஜபஞ்ஞத்தீதி லோகவஜ்ஜா. அனவஜ்ஜபஞ்ஞத்தீதி பண்ணத்திவஜ்ஜா. கிரியதோ ஸமுட்டி²தா நாம யங் கரொந்தோ ஆபஜ்ஜதி பாராஜிகாபத்தி விய. அகிரியதோதி யங் அகரொந்தோ ஆபஜ்ஜதி, சீவரஅனதி⁴ட்டா²னாபத்தி விய. கிரியாகிரியதோதி யங் கரொந்தோ ச அகரொந்தோ ச ஆபஜ்ஜதி, குடிகாராபத்தி விய.
Antarāyikāti sattapi āpattiyo sañcicca vītikkantā saggantarāyañceva mokkhantarāyañca karontīti antarāyikā. Ajānantena vītikkantā pana paṇṇattivajjāpatti neva saggantarāyaṃ na mokkhantarāyaṃ karotīti anantarāyikā. Antarāyikaṃ āpannassāpi desanāgāminiṃ desetvā vuṭṭhānagāminito vuṭṭhāya suddhipattassa sāmaṇerabhūmiyaṃ ṭhitassa ca avārito saggamokkhamaggoti. Sāvajjapaññattīti lokavajjā. Anavajjapaññattīti paṇṇattivajjā. Kiriyato samuṭṭhitā nāma yaṃ karonto āpajjati pārājikāpatti viya. Akiriyatoti yaṃ akaronto āpajjati, cīvaraanadhiṭṭhānāpatti viya. Kiriyākiriyatoti yaṃ karonto ca akaronto ca āpajjati, kuṭikārāpatti viya.
புப்³பா³பத்தீதி பட²மங் ஆபன்னாபத்தி. அபராபத்தீதி பாரிவாஸிகாதீ³ஹி பச்சா² ஆபன்னாபத்தி. புப்³பா³பத்தீனங் அந்தராபத்தி நாம மூலவிஸுத்³தி⁴யா அந்தராபத்தி. அபராபத்தீனங் அந்தராபத்தி நாம அக்³க⁴விஸுத்³தி⁴யா அந்தராபத்தி. குருந்தி³யங் பன ‘‘புப்³பா³பத்தி நாம பட²மங் ஆபன்னா. அபராபத்தி நாம மானத்தாரஹகாலே ஆபன்னா. புப்³பா³பத்தீனங் அந்தராபத்தி நாம பரிவாஸே ஆபன்னா. அபராபத்தீனங் அந்தராபத்தி நாம மானத்தசாரே ஆபன்னா’’தி வுத்தங். இத³ம்பி ஏகேன பரியாயேன யுஜ்ஜதி.
Pubbāpattīti paṭhamaṃ āpannāpatti. Aparāpattīti pārivāsikādīhi pacchā āpannāpatti. Pubbāpattīnaṃ antarāpatti nāma mūlavisuddhiyā antarāpatti. Aparāpattīnaṃ antarāpatti nāma agghavisuddhiyā antarāpatti. Kurundiyaṃ pana ‘‘pubbāpatti nāma paṭhamaṃ āpannā. Aparāpatti nāma mānattārahakāle āpannā. Pubbāpattīnaṃ antarāpatti nāma parivāse āpannā. Aparāpattīnaṃ antarāpatti nāma mānattacāre āpannā’’ti vuttaṃ. Idampi ekena pariyāyena yujjati.
தே³ஸிதா க³ணனூபகா³ நாம யா து⁴ரனிக்கே²பங் கத்வா புன ந ஆபஜ்ஜிஸ்ஸாமீதி தே³ஸிதா ஹோதி. அக³ணனூபகா³ நாம யா து⁴ரனிக்கே²பங் அகத்வா ஸஉஸ்ஸாஹேனேவ சித்தேன அபரிஸுத்³தே⁴ன தே³ஸிதா ஹோதி. அயஞ்ஹி தே³ஸிதாபி தே³ஸிதக³ணனங் ந உபேதி. அட்ட²மே வத்து²ஸ்மிங் பி⁴க்கு²னியா பாராஜிகமேவ ஹோதி. பஞ்ஞத்தி ஜானிதப்³பா³திஆதீ³ஸு நவஸு பதே³ஸு பட²மபாராஜிகபுச்சா²ய வுத்தனயேனேவ வினிச்ச²யோ வேதி³தப்³போ³.
Desitā gaṇanūpagā nāma yā dhuranikkhepaṃ katvā puna na āpajjissāmīti desitā hoti. Agaṇanūpagā nāma yā dhuranikkhepaṃ akatvā saussāheneva cittena aparisuddhena desitā hoti. Ayañhi desitāpi desitagaṇanaṃ na upeti. Aṭṭhame vatthusmiṃ bhikkhuniyā pārājikameva hoti. Paññatti jānitabbātiādīsu navasu padesu paṭhamapārājikapucchāya vuttanayeneva vinicchayo veditabbo.
து²ல்லவஜ்ஜாதி து²ல்லதோ³ஸே பஞ்ஞத்தா க³ருகாபத்தி. அது²ல்லவஜ்ஜாதி லஹுகாபத்தி. கி³ஹிபடிஸங்யுத்தாதி ஸுத⁴ம்மத்தே²ரஸ்ஸ ஆபத்தி, யா ச த⁴ம்மிகஸ்ஸ படிஸ்ஸவஸ்ஸ அஸச்சாபனே ஆபத்தி, அவஸேஸா ந கி³ஹிபடிஸங்யுத்தா. பஞ்சானந்தரியகம்மாபத்தி நியதா, ஸேஸா அனியதா. ஆதி³கரோதி ஸுதி³ன்னத்தே²ராதி³ ஆதி³கம்மிகோ. அனாதி³கரோதி மக்கடிஸமணாதி³ அனுபஞ்ஞத்திகாரகோ. அதி⁴ச்சாபத்திகோ நாம யோ கதா³சி கரஹசி ஆபத்திங் ஆபஜ்ஜதி. அபி⁴ண்ஹாபத்திகோ நாம யோ நிச்சங் ஆபஜ்ஜதி.
Thullavajjāti thulladose paññattā garukāpatti. Athullavajjāti lahukāpatti. Gihipaṭisaṃyuttāti sudhammattherassa āpatti, yā ca dhammikassa paṭissavassa asaccāpane āpatti, avasesā na gihipaṭisaṃyuttā. Pañcānantariyakammāpatti niyatā, sesā aniyatā. Ādikaroti sudinnattherādi ādikammiko. Anādikaroti makkaṭisamaṇādi anupaññattikārako. Adhiccāpattiko nāma yo kadāci karahaci āpattiṃ āpajjati. Abhiṇhāpattiko nāma yo niccaṃ āpajjati.
சோத³கோ நாம யோ வத்து²னா வா ஆபத்தியா வா பரங் சோதே³தி. யோ பன ஏவங் சோதி³தோ அயங் சுதி³தகோ நாம. பஞ்சத³ஸஸு த⁴ம்மேஸு அப்பதிட்ட²ஹித்வா அபூ⁴தேன வத்து²னா சோதெ³ந்தோ அத⁴ம்மசோத³கோ நாம, தேன ததா² சோதி³தோ அத⁴ம்மசுதி³தகோ நாம. விபரியாயேன த⁴ம்மசோத³கசுதி³தகா வேதி³தப்³பா³. மிச்ச²த்தனியதேஹி வா ஸம்மத்தனியதேஹி வா த⁴ம்மேஹி ஸமன்னாக³தோ நியதோ, விபரீதோ அனியதோ.
Codako nāma yo vatthunā vā āpattiyā vā paraṃ codeti. Yo pana evaṃ codito ayaṃ cuditako nāma. Pañcadasasu dhammesu appatiṭṭhahitvā abhūtena vatthunā codento adhammacodako nāma, tena tathā codito adhammacuditako nāma. Vipariyāyena dhammacodakacuditakā veditabbā. Micchattaniyatehi vā sammattaniyatehi vā dhammehi samannāgato niyato, viparīto aniyato.
ஸாவகா ப⁴ப்³பா³பத்திகா நாம, பு³த்³தா⁴ ச பச்சேகபு³த்³தா⁴ ச அப⁴ப்³பா³பத்திகா நாம. உக்கே²பனீயகம்மகதோ உக்கி²த்தகோ நாம, அவஸேஸசதுப்³பி³த⁴தஜ்ஜனீயாதி³கம்மகதோ அனுக்கி²த்தகோ நாம. அயஞ்ஹி உபோஸத²ங் வா பவாரணங் வா த⁴ம்மபரிபோ⁴க³ங் வா ஆமிஸபரிபோ⁴க³ங் வா ந கோபேதி. ‘‘மெத்தியங் பி⁴க்கு²னிங் நாஸேத², தூ³ஸகோ நாஸேதப்³போ³, கண்டகோ ஸமணுத்³தே³ஸோ நாஸேதப்³போ³’’தி ஏவங் லிங்க³த³ண்ட³கம்ம-ஸங்வாஸனாஸனாஹி நாஸிதப்³போ³ நாஸிதகோ நாம. ஸேஸா ஸப்³பே³ அனாஸிதகா. யேன ஸத்³தி⁴ங் உபோஸதா²தி³கோ ஸங்வாஸோ அத்தி², அயங் ஸமானஸங்வாஸகோ, இதரோ நானாஸங்வாஸகோ . ஸோ கம்மனானாஸங்வாஸகோ லத்³தி⁴னானாஸங்வாஸகோதி து³விதோ⁴ ஹோதி. ட²பனங் ஜானிதப்³ப³ந்தி ‘‘ஏகங் பி⁴க்க²வே அத⁴ம்மிகங் பாதிமொக்க²ட்ட²பன’’ந்திஆதி³னா நயேன வுத்தங் பாதிமொக்க²ட்ட²பனங் ஜானிதப்³ப³ந்தி அத்தோ².
Sāvakā bhabbāpattikā nāma, buddhā ca paccekabuddhā ca abhabbāpattikā nāma. Ukkhepanīyakammakato ukkhittako nāma, avasesacatubbidhatajjanīyādikammakato anukkhittako nāma. Ayañhi uposathaṃ vā pavāraṇaṃ vā dhammaparibhogaṃ vā āmisaparibhogaṃ vā na kopeti. ‘‘Mettiyaṃ bhikkhuniṃ nāsetha, dūsako nāsetabbo, kaṇṭako samaṇuddeso nāsetabbo’’ti evaṃ liṅgadaṇḍakamma-saṃvāsanāsanāhi nāsitabbo nāsitako nāma. Sesā sabbe anāsitakā. Yena saddhiṃ uposathādiko saṃvāso atthi, ayaṃ samānasaṃvāsako, itaro nānāsaṃvāsako. So kammanānāsaṃvāsako laddhinānāsaṃvāsakoti duvidho hoti. Ṭhapanaṃ jānitabbanti ‘‘ekaṃ bhikkhave adhammikaṃ pātimokkhaṭṭhapana’’ntiādinā nayena vuttaṃ pātimokkhaṭṭhapanaṃ jānitabbanti attho.
ஏககவாரவண்ணனா நிட்டி²தா.
Ekakavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 1. ஏககவாரோ • 1. Ekakavāro
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஏககவாரவண்ணனா • Ekakavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஏககவாரவண்ணனா • Ekakavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஏககவாரவண்ணனா • Ekakavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஏகுத்தரிகனயோ ஏககவாரவண்ணனா • Ekuttarikanayo ekakavāravaṇṇanā
