| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
एकुत्तरिकनयं
Ekuttarikanayaṃ
एककवारवण्णना
Ekakavāravaṇṇanā
३२१. एकुत्तरिकनये पन अजानन्तेन वीतिक्कन्ताति पण्णत्तिं वा वत्थुं वा अजानन्तेन वीतिक्कन्ता पथवीखणनसहसेय्यादिका, सापि पच्छा आपन्नभावं ञत्वा पटिकम्मं अकरोन्तस्स अन्तरायिकाव होति।
321. Ekuttarikanaye pana ajānantena vītikkantāti paṇṇattiṃ vā vatthuṃ vā ajānantena vītikkantā pathavīkhaṇanasahaseyyādikā, sāpi pacchā āpannabhāvaṃ ñatvā paṭikammaṃ akarontassa antarāyikāva hoti.
पारिवासिकादीहि पच्छा आपन्नाति वत्तभेदेसु दुक्कटानि सन्धाय वुत्तं। तस्मिं खणे आपज्जितब्बअन्तरापत्तियो सन्धायाति केचि वदन्ति, तस्स पुब्बापत्तीनंअन्तरापत्ति-पदेनेव वक्खमानत्ता पुरिममेव युत्ततरं। मूलविसुद्धिया अन्तरापत्तीति मूलायपटिकस्सनादीनि अकत्वा सब्बपठमं दिन्नपरिवासमानत्तविसुद्धिया चरणकाले आपन्नअन्तरापत्तिसङ्खातसङ्घादिसेसो। अग्घविसुद्धियाति अन्तरापत्तिं आपन्नस्स मूलाय पटिकस्सित्वा ओधानसमोधानवसेन ओधुनित्वा पुरिमापत्तिया समोधाय तदग्घवसेन पुन दिन्नपरिवासादिसुद्धिया चरणकाले पुन आपन्ना अन्तरापत्ति।
Pārivāsikādīhi pacchā āpannāti vattabhedesu dukkaṭāni sandhāya vuttaṃ. Tasmiṃ khaṇe āpajjitabbaantarāpattiyo sandhāyāti keci vadanti, tassa pubbāpattīnaṃantarāpatti-padeneva vakkhamānattā purimameva yuttataraṃ. Mūlavisuddhiyā antarāpattīti mūlāyapaṭikassanādīni akatvā sabbapaṭhamaṃ dinnaparivāsamānattavisuddhiyā caraṇakāle āpannaantarāpattisaṅkhātasaṅghādiseso. Agghavisuddhiyāti antarāpattiṃ āpannassa mūlāya paṭikassitvā odhānasamodhānavasena odhunitvā purimāpattiyā samodhāya tadagghavasena puna dinnaparivāsādisuddhiyā caraṇakāle puna āpannā antarāpatti.
सउस्साहेनेवाति पुनपि तं आपत्तिं आपज्जितुकामताचित्तेन, एवं देसितापि आपत्ति न वुट्ठातीति अधिप्पायो। धुरनिक्खेपं अकत्वा आपज्जने सिखाप्पत्तदोसं दस्सेन्तो आह ‘‘अट्ठमे वत्थुस्मिं भिक्खुनिया पाराजिकमेवा’’ति। न केवलञ्च भिक्खुनिया एव, भिक्खूनम्पि धुरनिक्खेपं अकत्वा थोकं थोकं सप्पिआदिकं थेय्याय गण्हन्तानं पादग्घनके पुण्णे पाराजिकमेव। केचि पन ‘‘अट्ठमे वत्थुस्मिं भिक्खुनिया पाराजिकमेव होतीति वुत्तत्ता अट्ठवत्थुकमेवेतं सन्धाय वुत्त’’न्ति वदन्ति।
Saussāhenevāti punapi taṃ āpattiṃ āpajjitukāmatācittena, evaṃ desitāpi āpatti na vuṭṭhātīti adhippāyo. Dhuranikkhepaṃ akatvā āpajjane sikhāppattadosaṃ dassento āha ‘‘aṭṭhame vatthusmiṃ bhikkhuniyā pārājikamevā’’ti. Na kevalañca bhikkhuniyā eva, bhikkhūnampi dhuranikkhepaṃ akatvā thokaṃ thokaṃ sappiādikaṃ theyyāya gaṇhantānaṃ pādagghanake puṇṇe pārājikameva. Keci pana ‘‘aṭṭhame vatthusmiṃ bhikkhuniyā pārājikameva hotīti vuttattā aṭṭhavatthukamevetaṃ sandhāya vutta’’nti vadanti.
धम्मिकस्स पटिस्सवस्साति ‘‘इध वस्सं वसिस्सामी’’तिआदिना गिहीनं सम्मुखा कतस्स धम्मिकस्स पटिस्सवस्स, अधम्मिकस्स पन ‘‘असुकं पहरिस्सामी’’तिआदिकस्स पटिस्सवस्स असच्चापनेन आपत्ति नत्थि।
Dhammikassa paṭissavassāti ‘‘idha vassaṃ vasissāmī’’tiādinā gihīnaṃ sammukhā katassa dhammikassa paṭissavassa, adhammikassa pana ‘‘asukaṃ paharissāmī’’tiādikassa paṭissavassa asaccāpanena āpatti natthi.
तथा चोदितोति अधम्मेन चोदितो, सयं सच्चे, अकुप्पे च अट्ठत्वा पटिच्छादेन्तोपि अधम्मचुदितको एव। पञ्चानन्तरियनियतमिच्छादिट्ठियेव मिच्छत्तनियता नाम। चत्तारो मग्गा सम्मत्तनियता नाम।
Tathā coditoti adhammena codito, sayaṃ sacce, akuppe ca aṭṭhatvā paṭicchādentopi adhammacuditako eva. Pañcānantariyaniyatamicchādiṭṭhiyeva micchattaniyatā nāma. Cattāro maggā sammattaniyatā nāma.
एककवारवण्णना निट्ठिता।
Ekakavāravaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi / १. एककवारो • 1. Ekakavāro
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / एककवारवण्णना • Ekakavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / एककवारवण्णना • Ekakavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / एककवारवण्णना • Ekakavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / एकुत्तरिकनयो एककवारवण्णना • Ekuttarikanayo ekakavāravaṇṇanā
