| Library / Tipiṭaka / ติปิฎก • Tipiṭaka / วิมติวิโนทนี-ฎีกา • Vimativinodanī-ṭīkā |
เอกุตฺตริกนยํ
Ekuttarikanayaṃ
เอกกวารวณฺณนา
Ekakavāravaṇṇanā
๓๒๑. เอกุตฺตริกนเย ปน อชานเนฺตน วีติกฺกนฺตาติ ปณฺณตฺติํ วา วตฺถุํ วา อชานเนฺตน วีติกฺกนฺตา ปถวีขณนสหเสยฺยาทิกา, สาปิ ปจฺฉา อาปนฺนภาวํ ญตฺวา ปฎิกมฺมํ อกโรนฺตสฺส อนฺตรายิกาว โหติฯ
321. Ekuttarikanaye pana ajānantena vītikkantāti paṇṇattiṃ vā vatthuṃ vā ajānantena vītikkantā pathavīkhaṇanasahaseyyādikā, sāpi pacchā āpannabhāvaṃ ñatvā paṭikammaṃ akarontassa antarāyikāva hoti.
ปาริวาสิกาทีหิ ปจฺฉา อาปนฺนาติ วตฺตเภเทสุ ทุกฺกฎานิ สนฺธาย วุตฺตํฯ ตสฺมิํ ขเณ อาปชฺชิตพฺพอนฺตราปตฺติโย สนฺธายาติ เกจิ วทนฺติ, ตสฺส ปุพฺพาปตฺตีนํอนฺตราปตฺติ-ปเทเนว วกฺขมานตฺตา ปุริมเมว ยุตฺตตรํฯ มูลวิสุทฺธิยา อนฺตราปตฺตีติ มูลายปฎิกสฺสนาทีนิ อกตฺวา สพฺพปฐมํ ทินฺนปริวาสมานตฺตวิสุทฺธิยา จรณกาเล อาปนฺนอนฺตราปตฺติสงฺขาตสงฺฆาทิเสโสฯ อคฺฆวิสุทฺธิยาติ อนฺตราปตฺติํ อาปนฺนสฺส มูลาย ปฎิกสฺสิตฺวา โอธานสโมธานวเสน โอธุนิตฺวา ปุริมาปตฺติยา สโมธาย ตทคฺฆวเสน ปุน ทินฺนปริวาสาทิสุทฺธิยา จรณกาเล ปุน อาปนฺนา อนฺตราปตฺติฯ
Pārivāsikādīhi pacchā āpannāti vattabhedesu dukkaṭāni sandhāya vuttaṃ. Tasmiṃ khaṇe āpajjitabbaantarāpattiyo sandhāyāti keci vadanti, tassa pubbāpattīnaṃantarāpatti-padeneva vakkhamānattā purimameva yuttataraṃ. Mūlavisuddhiyā antarāpattīti mūlāyapaṭikassanādīni akatvā sabbapaṭhamaṃ dinnaparivāsamānattavisuddhiyā caraṇakāle āpannaantarāpattisaṅkhātasaṅghādiseso. Agghavisuddhiyāti antarāpattiṃ āpannassa mūlāya paṭikassitvā odhānasamodhānavasena odhunitvā purimāpattiyā samodhāya tadagghavasena puna dinnaparivāsādisuddhiyā caraṇakāle puna āpannā antarāpatti.
สอุสฺสาเหเนวาติ ปุนปิ ตํ อาปตฺติํ อาปชฺชิตุกามตาจิเตฺตน, เอวํ เทสิตาปิ อาปตฺติ น วุฎฺฐาตีติ อธิปฺปาโยฯ ธุรนิเกฺขปํ อกตฺวา อาปชฺชเน สิขาปฺปตฺตโทสํ ทเสฺสโนฺต อาห ‘‘อฎฺฐเม วตฺถุสฺมิํ ภิกฺขุนิยา ปาราชิกเมวา’’ติฯ น เกวลญฺจ ภิกฺขุนิยา เอว, ภิกฺขูนมฺปิ ธุรนิเกฺขปํ อกตฺวา โถกํ โถกํ สปฺปิอาทิกํ เถยฺยาย คณฺหนฺตานํ ปาทคฺฆนเก ปุเณฺณ ปาราชิกเมวฯ เกจิ ปน ‘‘อฎฺฐเม วตฺถุสฺมิํ ภิกฺขุนิยา ปาราชิกเมว โหตีติ วุตฺตตฺตา อฎฺฐวตฺถุกเมเวตํ สนฺธาย วุตฺต’’นฺติ วทนฺติฯ
Saussāhenevāti punapi taṃ āpattiṃ āpajjitukāmatācittena, evaṃ desitāpi āpatti na vuṭṭhātīti adhippāyo. Dhuranikkhepaṃ akatvā āpajjane sikhāppattadosaṃ dassento āha ‘‘aṭṭhame vatthusmiṃ bhikkhuniyā pārājikamevā’’ti. Na kevalañca bhikkhuniyā eva, bhikkhūnampi dhuranikkhepaṃ akatvā thokaṃ thokaṃ sappiādikaṃ theyyāya gaṇhantānaṃ pādagghanake puṇṇe pārājikameva. Keci pana ‘‘aṭṭhame vatthusmiṃ bhikkhuniyā pārājikameva hotīti vuttattā aṭṭhavatthukamevetaṃ sandhāya vutta’’nti vadanti.
ธมฺมิกสฺส ปฎิสฺสวสฺสาติ ‘‘อิธ วสฺสํ วสิสฺสามี’’ติอาทินา คิหีนํ สมฺมุขา กตสฺส ธมฺมิกสฺส ปฎิสฺสวสฺส, อธมฺมิกสฺส ปน ‘‘อสุกํ ปหริสฺสามี’’ติอาทิกสฺส ปฎิสฺสวสฺส อสจฺจาปเนน อาปตฺติ นตฺถิฯ
Dhammikassa paṭissavassāti ‘‘idha vassaṃ vasissāmī’’tiādinā gihīnaṃ sammukhā katassa dhammikassa paṭissavassa, adhammikassa pana ‘‘asukaṃ paharissāmī’’tiādikassa paṭissavassa asaccāpanena āpatti natthi.
ตถา โจทิโตติ อธเมฺมน โจทิโต, สยํ สเจฺจ, อกุเปฺป จ อฎฺฐตฺวา ปฎิจฺฉาเทโนฺตปิ อธมฺมจุทิตโก เอวฯ ปญฺจานนฺตริยนิยตมิจฺฉาทิฎฺฐิเยว มิจฺฉตฺตนิยตา นามฯ จตฺตาโร มคฺคา สมฺมตฺตนิยตา นามฯ
Tathā coditoti adhammena codito, sayaṃ sacce, akuppe ca aṭṭhatvā paṭicchādentopi adhammacuditako eva. Pañcānantariyaniyatamicchādiṭṭhiyeva micchattaniyatā nāma. Cattāro maggā sammattaniyatā nāma.
เอกกวารวณฺณนา นิฎฺฐิตาฯ
Ekakavāravaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / ปริวารปาฬิ • Parivārapāḷi / ๑. เอกกวาโร • 1. Ekakavāro
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / ปริวาร-อฎฺฐกถา • Parivāra-aṭṭhakathā / เอกกวารวณฺณนา • Ekakavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / เอกกวารวณฺณนา • Ekakavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / เอกกวารวณฺณนา • Ekakavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / เอกุตฺตริกนโย เอกกวารวณฺณนา • Ekuttarikanayo ekakavāravaṇṇanā
