| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
ឯកុត្តរិកនយំ
Ekuttarikanayaṃ
ឯកកវារវណ្ណនា
Ekakavāravaṇṇanā
៣២១. ឯកុត្តរិកនយេ បន អជានន្តេន វីតិក្កន្តាតិ បណ្ណត្តិំ វា វត្ថុំ វា អជានន្តេន វីតិក្កន្តា បថវីខណនសហសេយ្យាទិកា, សាបិ បច្ឆា អាបន្នភាវំ ញត្វា បដិកម្មំ អករោន្តស្ស អន្តរាយិកាវ ហោតិ។
321. Ekuttarikanaye pana ajānantena vītikkantāti paṇṇattiṃ vā vatthuṃ vā ajānantena vītikkantā pathavīkhaṇanasahaseyyādikā, sāpi pacchā āpannabhāvaṃ ñatvā paṭikammaṃ akarontassa antarāyikāva hoti.
បារិវាសិកាទីហិ បច្ឆា អាបន្នាតិ វត្តភេទេសុ ទុក្កដានិ សន្ធាយ វុត្តំ។ តស្មិំ ខណេ អាបជ្ជិតព្ពអន្តរាបត្តិយោ សន្ធាយាតិ កេចិ វទន្តិ, តស្ស បុព្ពាបត្តីនំអន្តរាបត្តិ-បទេនេវ វក្ខមានត្តា បុរិមមេវ យុត្តតរំ។ មូលវិសុទ្ធិយា អន្តរាបត្តីតិ មូលាយបដិកស្សនាទីនិ អកត្វា សព្ពបឋមំ ទិន្នបរិវាសមានត្តវិសុទ្ធិយា ចរណកាលេ អាបន្នអន្តរាបត្តិសង្ខាតសង្ឃាទិសេសោ។ អគ្ឃវិសុទ្ធិយាតិ អន្តរាបត្តិំ អាបន្នស្ស មូលាយ បដិកស្សិត្វា ឱធានសមោធានវសេន ឱធុនិត្វា បុរិមាបត្តិយា សមោធាយ តទគ្ឃវសេន បុន ទិន្នបរិវាសាទិសុទ្ធិយា ចរណកាលេ បុន អាបន្នា អន្តរាបត្តិ។
Pārivāsikādīhi pacchā āpannāti vattabhedesu dukkaṭāni sandhāya vuttaṃ. Tasmiṃ khaṇe āpajjitabbaantarāpattiyo sandhāyāti keci vadanti, tassa pubbāpattīnaṃantarāpatti-padeneva vakkhamānattā purimameva yuttataraṃ. Mūlavisuddhiyā antarāpattīti mūlāyapaṭikassanādīni akatvā sabbapaṭhamaṃ dinnaparivāsamānattavisuddhiyā caraṇakāle āpannaantarāpattisaṅkhātasaṅghādiseso. Agghavisuddhiyāti antarāpattiṃ āpannassa mūlāya paṭikassitvā odhānasamodhānavasena odhunitvā purimāpattiyā samodhāya tadagghavasena puna dinnaparivāsādisuddhiyā caraṇakāle puna āpannā antarāpatti.
សឧស្សាហេនេវាតិ បុនបិ តំ អាបត្តិំ អាបជ្ជិតុកាមតាចិត្តេន, ឯវំ ទេសិតាបិ អាបត្តិ ន វុដ្ឋាតីតិ អធិប្បាយោ។ ធុរនិក្ខេបំ អកត្វា អាបជ្ជនេ សិខាប្បត្តទោសំ ទស្សេន្តោ អាហ ‘‘អដ្ឋមេ វត្ថុស្មិំ ភិក្ខុនិយា បារាជិកមេវា’’តិ។ ន កេវលញ្ច ភិក្ខុនិយា ឯវ, ភិក្ខូនម្បិ ធុរនិក្ខេបំ អកត្វា ថោកំ ថោកំ សប្បិអាទិកំ ថេយ្យាយ គណ្ហន្តានំ បាទគ្ឃនកេ បុណ្ណេ បារាជិកមេវ។ កេចិ បន ‘‘អដ្ឋមេ វត្ថុស្មិំ ភិក្ខុនិយា បារាជិកមេវ ហោតីតិ វុត្តត្តា អដ្ឋវត្ថុកមេវេតំ សន្ធាយ វុត្ត’’ន្តិ វទន្តិ។
Saussāhenevāti punapi taṃ āpattiṃ āpajjitukāmatācittena, evaṃ desitāpi āpatti na vuṭṭhātīti adhippāyo. Dhuranikkhepaṃ akatvā āpajjane sikhāppattadosaṃ dassento āha ‘‘aṭṭhame vatthusmiṃ bhikkhuniyā pārājikamevā’’ti. Na kevalañca bhikkhuniyā eva, bhikkhūnampi dhuranikkhepaṃ akatvā thokaṃ thokaṃ sappiādikaṃ theyyāya gaṇhantānaṃ pādagghanake puṇṇe pārājikameva. Keci pana ‘‘aṭṭhame vatthusmiṃ bhikkhuniyā pārājikameva hotīti vuttattā aṭṭhavatthukamevetaṃ sandhāya vutta’’nti vadanti.
ធម្មិកស្ស បដិស្សវស្សាតិ ‘‘ឥធ វស្សំ វសិស្សាមី’’តិអាទិនា គិហីនំ សម្មុខា កតស្ស ធម្មិកស្ស បដិស្សវស្ស, អធម្មិកស្ស បន ‘‘អសុកំ បហរិស្សាមី’’តិអាទិកស្ស បដិស្សវស្ស អសច្ចាបនេន អាបត្តិ នត្ថិ។
Dhammikassa paṭissavassāti ‘‘idha vassaṃ vasissāmī’’tiādinā gihīnaṃ sammukhā katassa dhammikassa paṭissavassa, adhammikassa pana ‘‘asukaṃ paharissāmī’’tiādikassa paṭissavassa asaccāpanena āpatti natthi.
តថា ចោទិតោតិ អធម្មេន ចោទិតោ, សយំ សច្ចេ, អកុប្បេ ច អដ្ឋត្វា បដិច្ឆាទេន្តោបិ អធម្មចុទិតកោ ឯវ។ បញ្ចានន្តរិយនិយតមិច្ឆាទិដ្ឋិយេវ មិច្ឆត្តនិយតា នាម។ ចត្តារោ មគ្គា សម្មត្តនិយតា នាម។
Tathā coditoti adhammena codito, sayaṃ sacce, akuppe ca aṭṭhatvā paṭicchādentopi adhammacuditako eva. Pañcānantariyaniyatamicchādiṭṭhiyeva micchattaniyatā nāma. Cattāro maggā sammattaniyatā nāma.
ឯកកវារវណ្ណនា និដ្ឋិតា។
Ekakavāravaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi / ១. ឯកកវារោ • 1. Ekakavāro
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / ឯកកវារវណ្ណនា • Ekakavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ឯកកវារវណ្ណនា • Ekakavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ឯកកវារវណ្ណនា • Ekakavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ឯកុត្តរិកនយោ ឯកកវារវណ្ណនា • Ekuttarikanayo ekakavāravaṇṇanā
