| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
එකුත්‌තරිකනයං
Ekuttarikanayaṃ
එකකවාරවණ්‌ණනා
Ekakavāravaṇṇanā
321. එකුත්‌තරිකනයෙ පන අජානන්‌තෙන වීතික්‌කන්‌තාති පණ්‌ණත්‌තිං වා වත්‌ථුං වා අජානන්‌තෙන වීතික්‌කන්‌තා පථවීඛණනසහසෙය්‍යාදිකා, සාපි පච්‌ඡා ආපන්‌නභාවං ඤත්‌වා පටිකම්‌මං අකරොන්‌තස්‌ස අන්‌තරායිකාව හොති.
321. Ekuttarikanaye pana ajānantena vītikkantāti paṇṇattiṃ vā vatthuṃ vā ajānantena vītikkantā pathavīkhaṇanasahaseyyādikā, sāpi pacchā āpannabhāvaṃ ñatvā paṭikammaṃ akarontassa antarāyikāva hoti.
පාරිවාසිකාදීහි පච්‌ඡා ආපන්‌නාති වත්‌තභෙදෙසු දුක්‌කටානි සන්‌ධාය වුත්‌තං. තස්‌මිං ඛණෙ ආපජ්‌ජිතබ්‌බඅන්‌තරාපත්‌තියො සන්‌ධායාති කෙචි වදන්‌ති, තස්‌ස පුබ්‌බාපත්‌තීනංඅන්‌තරාපත්‌ති-පදෙනෙව වක්‌ඛමානත්‌තා පුරිමමෙව යුත්‌තතරං. මූලවිසුද්‌ධියා අන්‌තරාපත්‌තීති මූලායපටිකස්‌සනාදීනි අකත්‌වා සබ්‌බපඨමං දින්‌නපරිවාසමානත්‌තවිසුද්‌ධියා චරණකාලෙ ආපන්‌නඅන්‌තරාපත්‌තිසඞ්‌ඛාතසඞ්‌ඝාදිසෙසො. අග්‌ඝවිසුද්‌ධියාති අන්‌තරාපත්‌තිං ආපන්‌නස්‌ස මූලාය පටිකස්‌සිත්‌වා ඔධානසමොධානවසෙන ඔධුනිත්‌වා පුරිමාපත්‌තියා සමොධාය තදග්‌ඝවසෙන පුන දින්‌නපරිවාසාදිසුද්‌ධියා චරණකාලෙ පුන ආපන්‌නා අන්‌තරාපත්‌ති.
Pārivāsikādīhi pacchā āpannāti vattabhedesu dukkaṭāni sandhāya vuttaṃ. Tasmiṃ khaṇe āpajjitabbaantarāpattiyo sandhāyāti keci vadanti, tassa pubbāpattīnaṃantarāpatti-padeneva vakkhamānattā purimameva yuttataraṃ. Mūlavisuddhiyā antarāpattīti mūlāyapaṭikassanādīni akatvā sabbapaṭhamaṃ dinnaparivāsamānattavisuddhiyā caraṇakāle āpannaantarāpattisaṅkhātasaṅghādiseso. Agghavisuddhiyāti antarāpattiṃ āpannassa mūlāya paṭikassitvā odhānasamodhānavasena odhunitvā purimāpattiyā samodhāya tadagghavasena puna dinnaparivāsādisuddhiyā caraṇakāle puna āpannā antarāpatti.
සඋස්‌සාහෙනෙවාති පුනපි තං ආපත්‌තිං ආපජ්‌ජිතුකාමතාචිත්‌තෙන, එවං දෙසිතාපි ආපත්‌ති න වුට්‌ඨාතීති අධිප්‌පායො. ධුරනික්‌ඛෙපං අකත්‌වා ආපජ්‌ජනෙ සිඛාප්‌පත්‌තදොසං දස්‌සෙන්‌තො ආහ ‘‘අට්‌ඨමෙ වත්‌ථුස්‌මිං භික්‌ඛුනියා පාරාජිකමෙවා’’ති. න කෙවලඤ්‌ච භික්‌ඛුනියා එව, භික්‌ඛූනම්‌පි ධුරනික්‌ඛෙපං අකත්‌වා ථොකං ථොකං සප්‌පිආදිකං ථෙය්‍යාය ගණ්‌හන්‌තානං පාදග්‌ඝනකෙ පුණ්‌ණෙ පාරාජිකමෙව. කෙචි පන ‘‘අට්‌ඨමෙ වත්‌ථුස්‌මිං භික්‌ඛුනියා පාරාජිකමෙව හොතීති වුත්‌තත්‌තා අට්‌ඨවත්‌ථුකමෙවෙතං සන්‌ධාය වුත්‌ත’’න්‌ති වදන්‌ති.
Saussāhenevāti punapi taṃ āpattiṃ āpajjitukāmatācittena, evaṃ desitāpi āpatti na vuṭṭhātīti adhippāyo. Dhuranikkhepaṃ akatvā āpajjane sikhāppattadosaṃ dassento āha ‘‘aṭṭhame vatthusmiṃ bhikkhuniyā pārājikamevā’’ti. Na kevalañca bhikkhuniyā eva, bhikkhūnampi dhuranikkhepaṃ akatvā thokaṃ thokaṃ sappiādikaṃ theyyāya gaṇhantānaṃ pādagghanake puṇṇe pārājikameva. Keci pana ‘‘aṭṭhame vatthusmiṃ bhikkhuniyā pārājikameva hotīti vuttattā aṭṭhavatthukamevetaṃ sandhāya vutta’’nti vadanti.
ධම්‌මිකස්‌ස පටිස්‌සවස්‌සාති ‘‘ඉධ වස්‌සං වසිස්‌සාමී’’තිආදිනා ගිහීනං සම්‌මුඛා කතස්‌ස ධම්‌මිකස්‌ස පටිස්‌සවස්‌ස, අධම්‌මිකස්‌ස පන ‘‘අසුකං පහරිස්‌සාමී’’තිආදිකස්‌ස පටිස්‌සවස්‌ස අසච්‌චාපනෙන ආපත්‌ති නත්‌ථි.
Dhammikassa paṭissavassāti ‘‘idha vassaṃ vasissāmī’’tiādinā gihīnaṃ sammukhā katassa dhammikassa paṭissavassa, adhammikassa pana ‘‘asukaṃ paharissāmī’’tiādikassa paṭissavassa asaccāpanena āpatti natthi.
තථා චොදිතොති අධම්‌මෙන චොදිතො, සයං සච්‌චෙ, අකුප්‌පෙ ච අට්‌ඨත්‌වා පටිච්‌ඡාදෙන්‌තොපි අධම්‌මචුදිතකො එව. පඤ්‌චානන්‌තරියනියතමිච්‌ඡාදිට්‌ඨියෙව මිච්‌ඡත්‌තනියතා නාම. චත්‌තාරො මග්‌ගා සම්‌මත්‌තනියතා නාම.
Tathā coditoti adhammena codito, sayaṃ sacce, akuppe ca aṭṭhatvā paṭicchādentopi adhammacuditako eva. Pañcānantariyaniyatamicchādiṭṭhiyeva micchattaniyatā nāma. Cattāro maggā sammattaniyatā nāma.
එකකවාරවණ්‌ණනා නිට්‌ඨිතා.
Ekakavāravaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 1. එකකවාරො • 1. Ekakavāro
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / එකකවාරවණ්‌ණනා • Ekakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / එකකවාරවණ්‌ණනා • Ekakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / එකකවාරවණ්‌ණනා • Ekakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / එකුත්‌තරිකනයො එකකවාරවණ්‌ණනා • Ekuttarikanayo ekakavāravaṇṇanā
