| Library / Tipiṭaka / ਤਿਪਿਟਕ • Tipiṭaka / ਪਰਿવਾਰ-ਅਟ੍ਠਕਥਾ • Parivāra-aṭṭhakathā |
ਏਕੁਤ੍ਤਰਿਕਨਯੋ
Ekuttarikanayo
ਏਕਕવਾਰવਣ੍ਣਨਾ
Ekakavāravaṇṇanā
੩੨੧. ਆਪਤ੍ਤਿਕਰਾ ਧਮ੍ਮਾ ਜਾਨਿਤਬ੍ਬਾਤਿਆਦਿਮ੍ਹਿ ਏਕੁਤ੍ਤਰਿਕਨਯੇ ਆਪਤ੍ਤਿਕਰਾ ਧਮ੍ਮਾ ਨਾਮ ਛ ਆਪਤ੍ਤਿਸਮੁਟ੍ਠਾਨਾਨਿ। ਏਤੇਸਞ੍ਹਿ વਸੇਨ ਪੁਗ੍ਗਲੋ ਆਪਤ੍ਤਿਂ ਆਪਜ੍ਜਤਿ, ਤਸ੍ਮਾ ‘‘ਆਪਤ੍ਤਿਕਰਾ’’ਤਿ વੁਤ੍ਤਾ। ਅਨਾਪਤ੍ਤਿਕਰਾ ਨਾਮ ਸਤ੍ਤ ਸਮਥਾ। ਆਪਤ੍ਤਿ ਜਾਨਿਤਬ੍ਬਾਤਿ ਤਸ੍ਮਿਂ ਤਸ੍ਮਿਂ ਸਿਕ੍ਖਾਪਦੇ ਚ વਿਭਙ੍ਗੇ ਚ વੁਤ੍ਤਾ ਆਪਤ੍ਤਿ ਜਾਨਿਤਬ੍ਬਾ। ਅਨਾਪਤ੍ਤੀਤਿ ‘‘ਅਨਾਪਤ੍ਤਿ ਭਿਕ੍ਖੁ ਅਸਾਦਿਯਨ੍ਤਸ੍ਸਾ’’ਤਿਆਦਿਨਾ ਨਯੇਨ ਅਨਾਪਤ੍ਤਿ ਜਾਨਿਤਬ੍ਬਾ। ਲਹੁਕਾਤਿ ਲਹੁਕੇਨ વਿਨਯਕਮ੍ਮੇਨ વਿਸੁਜ੍ਝਨਤੋ ਪਞ੍ਚવਿਧਾ ਆਪਤ੍ਤਿ। ਗਰੁਕਾਤਿ ਗਰੁਕੇਨ વਿਨਯਕਮ੍ਮੇਨ વਿਸੁਜ੍ਝਨਤੋ ਸਙ੍ਘਾਦਿਸੇਸਾ ਆਪਤ੍ਤਿ। ਕੇਨਚਿ ਆਕਾਰੇਨ ਅਨਾਪਤ੍ਤਿਭਾવਂ ਉਪਨੇਤੁਂ ਅਸਕ੍ਕੁਣੇਯ੍ਯਤੋ ਪਾਰਾਜਿਕਾਪਤ੍ਤਿ ਚ। ਸਾવਸੇਸਾਤਿ ਠਪੇਤ੍વਾ ਪਾਰਾਜਿਕਂ ਸੇਸਾ। ਅਨવਸੇਸਾਤਿ ਪਾਰਾਜਿਕਾਪਤ੍ਤਿ। ਦ੍વੇ ਆਪਤ੍ਤਿਕ੍ਖਨ੍ਧਾ ਦੁਟ੍ਠੁਲ੍ਲਾ; ਅવਸੇਸਾ ਅਦੁਟ੍ਠੁਲ੍ਲਾ। ਸਪ੍ਪਟਿਕਮ੍ਮਦੁਕਂ ਸਾવਸੇਸਦੁਕਸਦਿਸਂ। ਦੇਸਨਾਗਾਮਿਨਿਦੁਕਂ ਲਹੁਕਦੁਕਸਙ੍ਗਹਿਤਂ।
321.Āpattikarādhammā jānitabbātiādimhi ekuttarikanaye āpattikarā dhammā nāma cha āpattisamuṭṭhānāni. Etesañhi vasena puggalo āpattiṃ āpajjati, tasmā ‘‘āpattikarā’’ti vuttā. Anāpattikarā nāma satta samathā. Āpatti jānitabbāti tasmiṃ tasmiṃ sikkhāpade ca vibhaṅge ca vuttā āpatti jānitabbā. Anāpattīti ‘‘anāpatti bhikkhu asādiyantassā’’tiādinā nayena anāpatti jānitabbā. Lahukāti lahukena vinayakammena visujjhanato pañcavidhā āpatti. Garukāti garukena vinayakammena visujjhanato saṅghādisesā āpatti. Kenaci ākārena anāpattibhāvaṃ upanetuṃ asakkuṇeyyato pārājikāpatti ca. Sāvasesāti ṭhapetvā pārājikaṃ sesā. Anavasesāti pārājikāpatti. Dve āpattikkhandhā duṭṭhullā; avasesā aduṭṭhullā. Sappaṭikammadukaṃ sāvasesadukasadisaṃ. Desanāgāminidukaṃ lahukadukasaṅgahitaṃ.
ਅਨ੍ਤਰਾਯਿਕਾਤਿ ਸਤ੍ਤਪਿ ਆਪਤ੍ਤਿਯੋ ਸਞ੍ਚਿਚ੍ਚ વੀਤਿਕ੍ਕਨ੍ਤਾ ਸਗ੍ਗਨ੍ਤਰਾਯਞ੍ਚੇવ ਮੋਕ੍ਖਨ੍ਤਰਾਯਞ੍ਚ ਕਰੋਨ੍ਤੀਤਿ ਅਨ੍ਤਰਾਯਿਕਾ। ਅਜਾਨਨ੍ਤੇਨ વੀਤਿਕ੍ਕਨ੍ਤਾ ਪਨ ਪਣ੍ਣਤ੍ਤਿવਜ੍ਜਾਪਤ੍ਤਿ ਨੇવ ਸਗ੍ਗਨ੍ਤਰਾਯਂ ਨ ਮੋਕ੍ਖਨ੍ਤਰਾਯਂ ਕਰੋਤੀਤਿ ਅਨਨ੍ਤਰਾਯਿਕਾ। ਅਨ੍ਤਰਾਯਿਕਂ ਆਪਨ੍ਨਸ੍ਸਾਪਿ ਦੇਸਨਾਗਾਮਿਨਿਂ ਦੇਸੇਤ੍વਾ વੁਟ੍ਠਾਨਗਾਮਿਨਿਤੋ વੁਟ੍ਠਾਯ ਸੁਦ੍ਧਿਪਤ੍ਤਸ੍ਸ ਸਾਮਣੇਰਭੂਮਿਯਂ ਠਿਤਸ੍ਸ ਚ ਅવਾਰਿਤੋ ਸਗ੍ਗਮੋਕ੍ਖਮਗ੍ਗੋਤਿ। ਸਾવਜ੍ਜਪਞ੍ਞਤ੍ਤੀਤਿ ਲੋਕવਜ੍ਜਾ। ਅਨવਜ੍ਜਪਞ੍ਞਤ੍ਤੀਤਿ ਪਣ੍ਣਤ੍ਤਿવਜ੍ਜਾ। ਕਿਰਿਯਤੋ ਸਮੁਟ੍ਠਿਤਾ ਨਾਮ ਯਂ ਕਰੋਨ੍ਤੋ ਆਪਜ੍ਜਤਿ ਪਾਰਾਜਿਕਾਪਤ੍ਤਿ વਿਯ। ਅਕਿਰਿਯਤੋਤਿ ਯਂ ਅਕਰੋਨ੍ਤੋ ਆਪਜ੍ਜਤਿ, ਚੀવਰਅਨਧਿਟ੍ਠਾਨਾਪਤ੍ਤਿ વਿਯ। ਕਿਰਿਯਾਕਿਰਿਯਤੋਤਿ ਯਂ ਕਰੋਨ੍ਤੋ ਚ ਅਕਰੋਨ੍ਤੋ ਚ ਆਪਜ੍ਜਤਿ, ਕੁਟਿਕਾਰਾਪਤ੍ਤਿ વਿਯ।
Antarāyikāti sattapi āpattiyo sañcicca vītikkantā saggantarāyañceva mokkhantarāyañca karontīti antarāyikā. Ajānantena vītikkantā pana paṇṇattivajjāpatti neva saggantarāyaṃ na mokkhantarāyaṃ karotīti anantarāyikā. Antarāyikaṃ āpannassāpi desanāgāminiṃ desetvā vuṭṭhānagāminito vuṭṭhāya suddhipattassa sāmaṇerabhūmiyaṃ ṭhitassa ca avārito saggamokkhamaggoti. Sāvajjapaññattīti lokavajjā. Anavajjapaññattīti paṇṇattivajjā. Kiriyato samuṭṭhitā nāma yaṃ karonto āpajjati pārājikāpatti viya. Akiriyatoti yaṃ akaronto āpajjati, cīvaraanadhiṭṭhānāpatti viya. Kiriyākiriyatoti yaṃ karonto ca akaronto ca āpajjati, kuṭikārāpatti viya.
ਪੁਬ੍ਬਾਪਤ੍ਤੀਤਿ ਪਠਮਂ ਆਪਨ੍ਨਾਪਤ੍ਤਿ। ਅਪਰਾਪਤ੍ਤੀਤਿ ਪਾਰਿવਾਸਿਕਾਦੀਹਿ ਪਚ੍ਛਾ ਆਪਨ੍ਨਾਪਤ੍ਤਿ। ਪੁਬ੍ਬਾਪਤ੍ਤੀਨਂ ਅਨ੍ਤਰਾਪਤ੍ਤਿ ਨਾਮ ਮੂਲવਿਸੁਦ੍ਧਿਯਾ ਅਨ੍ਤਰਾਪਤ੍ਤਿ। ਅਪਰਾਪਤ੍ਤੀਨਂ ਅਨ੍ਤਰਾਪਤ੍ਤਿ ਨਾਮ ਅਗ੍ਘવਿਸੁਦ੍ਧਿਯਾ ਅਨ੍ਤਰਾਪਤ੍ਤਿ। ਕੁਰੁਨ੍ਦਿਯਂ ਪਨ ‘‘ਪੁਬ੍ਬਾਪਤ੍ਤਿ ਨਾਮ ਪਠਮਂ ਆਪਨ੍ਨਾ। ਅਪਰਾਪਤ੍ਤਿ ਨਾਮ ਮਾਨਤ੍ਤਾਰਹਕਾਲੇ ਆਪਨ੍ਨਾ। ਪੁਬ੍ਬਾਪਤ੍ਤੀਨਂ ਅਨ੍ਤਰਾਪਤ੍ਤਿ ਨਾਮ ਪਰਿવਾਸੇ ਆਪਨ੍ਨਾ। ਅਪਰਾਪਤ੍ਤੀਨਂ ਅਨ੍ਤਰਾਪਤ੍ਤਿ ਨਾਮ ਮਾਨਤ੍ਤਚਾਰੇ ਆਪਨ੍ਨਾ’’ਤਿ વੁਤ੍ਤਂ। ਇਦਮ੍ਪਿ ਏਕੇਨ ਪਰਿਯਾਯੇਨ ਯੁਜ੍ਜਤਿ।
Pubbāpattīti paṭhamaṃ āpannāpatti. Aparāpattīti pārivāsikādīhi pacchā āpannāpatti. Pubbāpattīnaṃ antarāpatti nāma mūlavisuddhiyā antarāpatti. Aparāpattīnaṃ antarāpatti nāma agghavisuddhiyā antarāpatti. Kurundiyaṃ pana ‘‘pubbāpatti nāma paṭhamaṃ āpannā. Aparāpatti nāma mānattārahakāle āpannā. Pubbāpattīnaṃ antarāpatti nāma parivāse āpannā. Aparāpattīnaṃ antarāpatti nāma mānattacāre āpannā’’ti vuttaṃ. Idampi ekena pariyāyena yujjati.
ਦੇਸਿਤਾ ਗਣਨੂਪਗਾ ਨਾਮ ਯਾ ਧੁਰਨਿਕ੍ਖੇਪਂ ਕਤ੍વਾ ਪੁਨ ਨ ਆਪਜ੍ਜਿਸ੍ਸਾਮੀਤਿ ਦੇਸਿਤਾ ਹੋਤਿ। ਅਗਣਨੂਪਗਾ ਨਾਮ ਯਾ ਧੁਰਨਿਕ੍ਖੇਪਂ ਅਕਤ੍વਾ ਸਉਸ੍ਸਾਹੇਨੇવ ਚਿਤ੍ਤੇਨ ਅਪਰਿਸੁਦ੍ਧੇਨ ਦੇਸਿਤਾ ਹੋਤਿ। ਅਯਞ੍ਹਿ ਦੇਸਿਤਾਪਿ ਦੇਸਿਤਗਣਨਂ ਨ ਉਪੇਤਿ। ਅਟ੍ਠਮੇ વਤ੍ਥੁਸ੍ਮਿਂ ਭਿਕ੍ਖੁਨਿਯਾ ਪਾਰਾਜਿਕਮੇવ ਹੋਤਿ। ਪਞ੍ਞਤ੍ਤਿ ਜਾਨਿਤਬ੍ਬਾਤਿਆਦੀਸੁ ਨવਸੁ ਪਦੇਸੁ ਪਠਮਪਾਰਾਜਿਕਪੁਚ੍ਛਾਯ વੁਤ੍ਤਨਯੇਨੇવ વਿਨਿਚ੍ਛਯੋ વੇਦਿਤਬ੍ਬੋ।
Desitā gaṇanūpagā nāma yā dhuranikkhepaṃ katvā puna na āpajjissāmīti desitā hoti. Agaṇanūpagā nāma yā dhuranikkhepaṃ akatvā saussāheneva cittena aparisuddhena desitā hoti. Ayañhi desitāpi desitagaṇanaṃ na upeti. Aṭṭhame vatthusmiṃ bhikkhuniyā pārājikameva hoti. Paññatti jānitabbātiādīsu navasu padesu paṭhamapārājikapucchāya vuttanayeneva vinicchayo veditabbo.
ਥੁਲ੍ਲવਜ੍ਜਾਤਿ ਥੁਲ੍ਲਦੋਸੇ ਪਞ੍ਞਤ੍ਤਾ ਗਰੁਕਾਪਤ੍ਤਿ। ਅਥੁਲ੍ਲવਜ੍ਜਾਤਿ ਲਹੁਕਾਪਤ੍ਤਿ। ਗਿਹਿਪਟਿਸਂਯੁਤ੍ਤਾਤਿ ਸੁਧਮ੍ਮਤ੍ਥੇਰਸ੍ਸ ਆਪਤ੍ਤਿ, ਯਾ ਚ ਧਮ੍ਮਿਕਸ੍ਸ ਪਟਿਸ੍ਸવਸ੍ਸ ਅਸਚ੍ਚਾਪਨੇ ਆਪਤ੍ਤਿ, ਅવਸੇਸਾ ਨ ਗਿਹਿਪਟਿਸਂਯੁਤ੍ਤਾ। ਪਞ੍ਚਾਨਨ੍ਤਰਿਯਕਮ੍ਮਾਪਤ੍ਤਿ ਨਿਯਤਾ, ਸੇਸਾ ਅਨਿਯਤਾ। ਆਦਿਕਰੋਤਿ ਸੁਦਿਨ੍ਨਤ੍ਥੇਰਾਦਿ ਆਦਿਕਮ੍ਮਿਕੋ। ਅਨਾਦਿਕਰੋਤਿ ਮਕ੍ਕਟਿਸਮਣਾਦਿ ਅਨੁਪਞ੍ਞਤ੍ਤਿਕਾਰਕੋ। ਅਧਿਚ੍ਚਾਪਤ੍ਤਿਕੋ ਨਾਮ ਯੋ ਕਦਾਚਿ ਕਰਹਚਿ ਆਪਤ੍ਤਿਂ ਆਪਜ੍ਜਤਿ। ਅਭਿਣ੍ਹਾਪਤ੍ਤਿਕੋ ਨਾਮ ਯੋ ਨਿਚ੍ਚਂ ਆਪਜ੍ਜਤਿ।
Thullavajjāti thulladose paññattā garukāpatti. Athullavajjāti lahukāpatti. Gihipaṭisaṃyuttāti sudhammattherassa āpatti, yā ca dhammikassa paṭissavassa asaccāpane āpatti, avasesā na gihipaṭisaṃyuttā. Pañcānantariyakammāpatti niyatā, sesā aniyatā. Ādikaroti sudinnattherādi ādikammiko. Anādikaroti makkaṭisamaṇādi anupaññattikārako. Adhiccāpattiko nāma yo kadāci karahaci āpattiṃ āpajjati. Abhiṇhāpattiko nāma yo niccaṃ āpajjati.
ਚੋਦਕੋ ਨਾਮ ਯੋ વਤ੍ਥੁਨਾ વਾ ਆਪਤ੍ਤਿਯਾ વਾ ਪਰਂ ਚੋਦੇਤਿ। ਯੋ ਪਨ ਏવਂ ਚੋਦਿਤੋ ਅਯਂ ਚੁਦਿਤਕੋ ਨਾਮ। ਪਞ੍ਚਦਸਸੁ ਧਮ੍ਮੇਸੁ ਅਪ੍ਪਤਿਟ੍ਠਹਿਤ੍વਾ ਅਭੂਤੇਨ વਤ੍ਥੁਨਾ ਚੋਦੇਨ੍ਤੋ ਅਧਮ੍ਮਚੋਦਕੋ ਨਾਮ, ਤੇਨ ਤਥਾ ਚੋਦਿਤੋ ਅਧਮ੍ਮਚੁਦਿਤਕੋ ਨਾਮ। વਿਪਰਿਯਾਯੇਨ ਧਮ੍ਮਚੋਦਕਚੁਦਿਤਕਾ વੇਦਿਤਬ੍ਬਾ। ਮਿਚ੍ਛਤ੍ਤਨਿਯਤੇਹਿ વਾ ਸਮ੍ਮਤ੍ਤਨਿਯਤੇਹਿ વਾ ਧਮ੍ਮੇਹਿ ਸਮਨ੍ਨਾਗਤੋ ਨਿਯਤੋ, વਿਪਰੀਤੋ ਅਨਿਯਤੋ।
Codako nāma yo vatthunā vā āpattiyā vā paraṃ codeti. Yo pana evaṃ codito ayaṃ cuditako nāma. Pañcadasasu dhammesu appatiṭṭhahitvā abhūtena vatthunā codento adhammacodako nāma, tena tathā codito adhammacuditako nāma. Vipariyāyena dhammacodakacuditakā veditabbā. Micchattaniyatehi vā sammattaniyatehi vā dhammehi samannāgato niyato, viparīto aniyato.
ਸਾવਕਾ ਭਬ੍ਬਾਪਤ੍ਤਿਕਾ ਨਾਮ, ਬੁਦ੍ਧਾ ਚ ਪਚ੍ਚੇਕਬੁਦ੍ਧਾ ਚ ਅਭਬ੍ਬਾਪਤ੍ਤਿਕਾ ਨਾਮ। ਉਕ੍ਖੇਪਨੀਯਕਮ੍ਮਕਤੋ ਉਕ੍ਖਿਤ੍ਤਕੋ ਨਾਮ, ਅવਸੇਸਚਤੁਬ੍ਬਿਧਤਜ੍ਜਨੀਯਾਦਿਕਮ੍ਮਕਤੋ ਅਨੁਕ੍ਖਿਤ੍ਤਕੋ ਨਾਮ। ਅਯਞ੍ਹਿ ਉਪੋਸਥਂ વਾ ਪવਾਰਣਂ વਾ ਧਮ੍ਮਪਰਿਭੋਗਂ વਾ ਆਮਿਸਪਰਿਭੋਗਂ વਾ ਨ ਕੋਪੇਤਿ। ‘‘ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥ, ਦੂਸਕੋ ਨਾਸੇਤਬ੍ਬੋ, ਕਣ੍ਟਕੋ ਸਮਣੁਦ੍ਦੇਸੋ ਨਾਸੇਤਬ੍ਬੋ’’ਤਿ ਏવਂ ਲਿਙ੍ਗਦਣ੍ਡਕਮ੍ਮ-ਸਂવਾਸਨਾਸਨਾਹਿ ਨਾਸਿਤਬ੍ਬੋ ਨਾਸਿਤਕੋ ਨਾਮ। ਸੇਸਾ ਸਬ੍ਬੇ ਅਨਾਸਿਤਕਾ। ਯੇਨ ਸਦ੍ਧਿਂ ਉਪੋਸਥਾਦਿਕੋ ਸਂવਾਸੋ ਅਤ੍ਥਿ, ਅਯਂ ਸਮਾਨਸਂવਾਸਕੋ, ਇਤਰੋ ਨਾਨਾਸਂવਾਸਕੋ । ਸੋ ਕਮ੍ਮਨਾਨਾਸਂવਾਸਕੋ ਲਦ੍ਧਿਨਾਨਾਸਂવਾਸਕੋਤਿ ਦੁવਿਧੋ ਹੋਤਿ। ਠਪਨਂ ਜਾਨਿਤਬ੍ਬਨ੍ਤਿ ‘‘ਏਕਂ ਭਿਕ੍ਖવੇ ਅਧਮ੍ਮਿਕਂ ਪਾਤਿਮੋਕ੍ਖਟ੍ਠਪਨ’’ਨ੍ਤਿਆਦਿਨਾ ਨਯੇਨ વੁਤ੍ਤਂ ਪਾਤਿਮੋਕ੍ਖਟ੍ਠਪਨਂ ਜਾਨਿਤਬ੍ਬਨ੍ਤਿ ਅਤ੍ਥੋ।
Sāvakā bhabbāpattikā nāma, buddhā ca paccekabuddhā ca abhabbāpattikā nāma. Ukkhepanīyakammakato ukkhittako nāma, avasesacatubbidhatajjanīyādikammakato anukkhittako nāma. Ayañhi uposathaṃ vā pavāraṇaṃ vā dhammaparibhogaṃ vā āmisaparibhogaṃ vā na kopeti. ‘‘Mettiyaṃ bhikkhuniṃ nāsetha, dūsako nāsetabbo, kaṇṭako samaṇuddeso nāsetabbo’’ti evaṃ liṅgadaṇḍakamma-saṃvāsanāsanāhi nāsitabbo nāsitako nāma. Sesā sabbe anāsitakā. Yena saddhiṃ uposathādiko saṃvāso atthi, ayaṃ samānasaṃvāsako, itaro nānāsaṃvāsako. So kammanānāsaṃvāsako laddhinānāsaṃvāsakoti duvidho hoti. Ṭhapanaṃ jānitabbanti ‘‘ekaṃ bhikkhave adhammikaṃ pātimokkhaṭṭhapana’’ntiādinā nayena vuttaṃ pātimokkhaṭṭhapanaṃ jānitabbanti attho.
ਏਕਕવਾਰવਣ੍ਣਨਾ ਨਿਟ੍ਠਿਤਾ।
Ekakavāravaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਪਰਿવਾਰਪਾਲ਼ਿ • Parivārapāḷi / ੧. ਏਕਕવਾਰੋ • 1. Ekakavāro
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਏਕਕવਾਰવਣ੍ਣਨਾ • Ekakavāravaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਏਕਕવਾਰવਣ੍ਣਨਾ • Ekakavāravaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਏਕਕવਾਰવਣ੍ਣਨਾ • Ekakavāravaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ਏਕੁਤ੍ਤਰਿਕਨਯੋ ਏਕਕવਾਰવਣ੍ਣਨਾ • Ekuttarikanayo ekakavāravaṇṇanā
