| Library / Tipiṭaka / तिपिटक • Tipiṭaka / परिवारपाळि • Parivārapāḷi |
एकुत्तरिकनयो
Ekuttarikanayo
१. एककवारो
1. Ekakavāro
३२१. आपत्तिकरा धम्मा जानितब्बा। अनापत्तिकरा धम्मा जानितब्बा। आपत्ति जानितब्बा। अनापत्ति जानितब्बा। लहुका आपत्ति जानितब्बा। गरुका आपत्ति जानितब्बा। सावसेसा आपत्ति जानितब्बा। अनवसेसा आपत्ति जानितब्बा। दुट्ठुल्ला आपत्ति जानितब्बा। अदुट्ठुल्ला आपत्ति जानितब्बा। सप्पटिकम्मा आपत्ति जानितब्बा। अप्पटिकम्मा आपत्ति जानितब्बा। देसनागामिनी आपत्ति जानितब्बा। अदेसनागामिनी आपत्ति जानितब्बा। अन्तरायिका आपत्ति जानितब्बा। अनन्तरायिका आपत्ति जानितब्बा। सावज्जपञ्ञत्ति आपत्ति जानितब्बा। अनवज्जपञ्ञत्ति आपत्ति जानितब्बा। किरियतो समुट्ठिता आपत्ति जानितब्बा। अकिरियतो समुट्ठिता आपत्ति जानितब्बा। किरियाकिरियतो समुट्ठिता आपत्ति जानितब्बा। पुब्बापत्ति जानितब्बा। अपरापत्ति जानितब्बा। पुब्बापत्तीनं अन्तरापत्ति जानितब्बा। अपरापत्तीनं अन्तरापत्ति जानितब्बा। देसिता गणनूपगा आपत्ति जानितब्बा। देसिता न गणनूपगा आपत्ति जानितब्बा। पञ्ञत्ति जानितब्बा। अनुपञ्ञत्ति जानितब्बा। अनुप्पन्नपञ्ञत्ति जानितब्बा। सब्बत्थपञ्ञत्ति जानितब्बा। पदेसपञ्ञत्ति जानितब्बा। साधारणपञ्ञत्ति जानितब्बा । असाधारणपञ्ञत्ति जानितब्बा। एकतोपञ्ञत्ति जानितब्बा। उभतोपञ्ञत्ति जानितब्बा। थुल्लवज्जा आपत्ति जानितब्बा। अथुल्लवज्जा आपत्ति जानितब्बा। गिहिपटिसंयुत्ता आपत्ति जानितब्बा। न गिहिपटिसंयुत्ता आपत्ति जानितब्बा। नियता आपत्ति जानितब्बा। अनियता आपत्ति जानितब्बा। आदिकरो पुग्गलो जानितब्बो। अनादिकरो पुग्गलो जानितब्बो। अधिच्चापत्तिको पुग्गलो जानितब्बो। अभिण्हापत्तिको पुग्गलो जानितब्बो। चोदको पुग्गलो जानितब्बो। चुदितको पुग्गलो जानितब्बो। अधम्मचोदको पुग्गलो जानितब्बो। अधम्मचुदितको पुग्गलो जानितब्बो। धम्मचोदको पुग्गलो जानितब्बो। धम्मचुदितको पुग्गलो जानितब्बो । नियतो पुग्गलो जानितब्बो। अनियतो पुग्गलो जानितब्बो। अभब्बापत्तिको पुग्गलो जानितब्बो। भब्बापत्तिको पुग्गलो जानितब्बो। उक्खित्तको पुग्गलो जानितब्बो। अनुक्खित्तको पुग्गलो जानितब्बो। नासितको पुग्गलो जानितब्बो। अनासितको पुग्गलो जानितब्बो। समानसंवासको पुग्गलो जानितब्बो। असमानसंवासको पुग्गलो जानितब्बो। ठपनं जानितब्बन्ति।
321. Āpattikarā dhammā jānitabbā. Anāpattikarā dhammā jānitabbā. Āpatti jānitabbā. Anāpatti jānitabbā. Lahukā āpatti jānitabbā. Garukā āpatti jānitabbā. Sāvasesā āpatti jānitabbā. Anavasesā āpatti jānitabbā. Duṭṭhullā āpatti jānitabbā. Aduṭṭhullā āpatti jānitabbā. Sappaṭikammā āpatti jānitabbā. Appaṭikammā āpatti jānitabbā. Desanāgāminī āpatti jānitabbā. Adesanāgāminī āpatti jānitabbā. Antarāyikā āpatti jānitabbā. Anantarāyikā āpatti jānitabbā. Sāvajjapaññatti āpatti jānitabbā. Anavajjapaññatti āpatti jānitabbā. Kiriyato samuṭṭhitā āpatti jānitabbā. Akiriyato samuṭṭhitā āpatti jānitabbā. Kiriyākiriyato samuṭṭhitā āpatti jānitabbā. Pubbāpatti jānitabbā. Aparāpatti jānitabbā. Pubbāpattīnaṃ antarāpatti jānitabbā. Aparāpattīnaṃ antarāpatti jānitabbā. Desitā gaṇanūpagā āpatti jānitabbā. Desitā na gaṇanūpagā āpatti jānitabbā. Paññatti jānitabbā. Anupaññatti jānitabbā. Anuppannapaññatti jānitabbā. Sabbatthapaññatti jānitabbā. Padesapaññatti jānitabbā. Sādhāraṇapaññatti jānitabbā . Asādhāraṇapaññatti jānitabbā. Ekatopaññatti jānitabbā. Ubhatopaññatti jānitabbā. Thullavajjā āpatti jānitabbā. Athullavajjā āpatti jānitabbā. Gihipaṭisaṃyuttā āpatti jānitabbā. Na gihipaṭisaṃyuttā āpatti jānitabbā. Niyatā āpatti jānitabbā. Aniyatā āpatti jānitabbā. Ādikaro puggalo jānitabbo. Anādikaro puggalo jānitabbo. Adhiccāpattiko puggalo jānitabbo. Abhiṇhāpattiko puggalo jānitabbo. Codako puggalo jānitabbo. Cuditako puggalo jānitabbo. Adhammacodako puggalo jānitabbo. Adhammacuditako puggalo jānitabbo. Dhammacodako puggalo jānitabbo. Dhammacuditako puggalo jānitabbo . Niyato puggalo jānitabbo. Aniyato puggalo jānitabbo. Abhabbāpattiko puggalo jānitabbo. Bhabbāpattiko puggalo jānitabbo. Ukkhittako puggalo jānitabbo. Anukkhittako puggalo jānitabbo. Nāsitako puggalo jānitabbo. Anāsitako puggalo jānitabbo. Samānasaṃvāsako puggalo jānitabbo. Asamānasaṃvāsako puggalo jānitabbo. Ṭhapanaṃ jānitabbanti.
एककं निट्ठितं।
Ekakaṃ niṭṭhitaṃ.
तस्सुद्दानं –
Tassuddānaṃ –
करा आपत्ति लहुका, सावसेसा च दुट्ठुल्ला।
Karā āpatti lahukā, sāvasesā ca duṭṭhullā;
पटिकम्मदेसना च, अन्तरा वज्जकिरियं॥
Paṭikammadesanā ca, antarā vajjakiriyaṃ.
किरियाकिरियं पुब्बा, अन्तरा गणनूपगा।
Kiriyākiriyaṃ pubbā, antarā gaṇanūpagā;
थुल्लगिहिनियता च, आदि अधिच्चचोदको।
Thullagihiniyatā ca, ādi adhiccacodako;
अधम्मधम्मनियतो, अभब्बोक्खित्तनासिता।
Adhammadhammaniyato, abhabbokkhittanāsitā;
समानं ठपनञ्चेव, उद्दानं एकके इदन्ति॥
Samānaṃ ṭhapanañceva, uddānaṃ ekake idanti.
Footnotes:
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / एककवारवण्णना • Ekakavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / एककवारवण्णना • Ekakavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / एककवारवण्णना • Ekakavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / एककवारवण्णना • Ekakavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / एकुत्तरिकनयो एककवारवण्णना • Ekuttarikanayo ekakavāravaṇṇanā
