| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
ဧကုတ္တရိကနယော
Ekuttarikanayo
၁. ဧကကဝာရော
1. Ekakavāro
၃၂၁. အာပတ္တိကရာ ဓမ္မာ ဇာနိတဗ္ဗာ။ အနာပတ္တိကရာ ဓမ္မာ ဇာနိတဗ္ဗာ။ အာပတ္တိ ဇာနိတဗ္ဗာ။ အနာပတ္တိ ဇာနိတဗ္ဗာ။ လဟုကာ အာပတ္တိ ဇာနိတဗ္ဗာ။ ဂရုကာ အာပတ္တိ ဇာနိတဗ္ဗာ။ သာဝသေသာ အာပတ္တိ ဇာနိတဗ္ဗာ။ အနဝသေသာ အာပတ္တိ ဇာနိတဗ္ဗာ။ ဒုဋ္ဌုလ္လာ အာပတ္တိ ဇာနိတဗ္ဗာ။ အဒုဋ္ဌုလ္လာ အာပတ္တိ ဇာနိတဗ္ဗာ။ သပ္ပဋိကမ္မာ အာပတ္တိ ဇာနိတဗ္ဗာ။ အပ္ပဋိကမ္မာ အာပတ္တိ ဇာနိတဗ္ဗာ။ ဒေသနာဂာမိနီ အာပတ္တိ ဇာနိတဗ္ဗာ။ အဒေသနာဂာမိနီ အာပတ္တိ ဇာနိတဗ္ဗာ။ အန္တရာယိကာ အာပတ္တိ ဇာနိတဗ္ဗာ။ အနန္တရာယိကာ အာပတ္တိ ဇာနိတဗ္ဗာ။ သာဝဇ္ဇပညတ္တိ အာပတ္တိ ဇာနိတဗ္ဗာ။ အနဝဇ္ဇပညတ္တိ အာပတ္တိ ဇာနိတဗ္ဗာ။ ကိရိယတော သမုဋ္ဌိတာ အာပတ္တိ ဇာနိတဗ္ဗာ။ အကိရိယတော သမုဋ္ဌိတာ အာပတ္တိ ဇာနိတဗ္ဗာ။ ကိရိယာကိရိယတော သမုဋ္ဌိတာ အာပတ္တိ ဇာနိတဗ္ဗာ။ ပုဗ္ဗာပတ္တိ ဇာနိတဗ္ဗာ။ အပရာပတ္တိ ဇာနိတဗ္ဗာ။ ပုဗ္ဗာပတ္တီနံ အန္တရာပတ္တိ ဇာနိတဗ္ဗာ။ အပရာပတ္တီနံ အန္တရာပတ္တိ ဇာနိတဗ္ဗာ။ ဒေသိတာ ဂဏနူပဂာ အာပတ္တိ ဇာနိတဗ္ဗာ။ ဒေသိတာ န ဂဏနူပဂာ အာပတ္တိ ဇာနိတဗ္ဗာ။ ပညတ္တိ ဇာနိတဗ္ဗာ။ အနုပညတ္တိ ဇာနိတဗ္ဗာ။ အနုပ္ပန္နပညတ္တိ ဇာနိတဗ္ဗာ။ သဗ္ဗတ္ထပညတ္တိ ဇာနိတဗ္ဗာ။ ပဒေသပညတ္တိ ဇာနိတဗ္ဗာ။ သာဓာရဏပညတ္တိ ဇာနိတဗ္ဗာ ။ အသာဓာရဏပညတ္တိ ဇာနိတဗ္ဗာ။ ဧကတောပညတ္တိ ဇာနိတဗ္ဗာ။ ဥဘတောပညတ္တိ ဇာနိတဗ္ဗာ။ ထုလ္လဝဇ္ဇာ အာပတ္တိ ဇာနိတဗ္ဗာ။ အထုလ္လဝဇ္ဇာ အာပတ္တိ ဇာနိတဗ္ဗာ။ ဂိဟိပဋိသံယုတ္တာ အာပတ္တိ ဇာနိတဗ္ဗာ။ န ဂိဟိပဋိသံယုတ္တာ အာပတ္တိ ဇာနိတဗ္ဗာ။ နိယတာ အာပတ္တိ ဇာနိတဗ္ဗာ။ အနိယတာ အာပတ္တိ ဇာနိတဗ္ဗာ။ အာဒိကရော ပုဂ္ဂလော ဇာနိတဗ္ဗော။ အနာဒိကရော ပုဂ္ဂလော ဇာနိတဗ္ဗော။ အဓိစ္စာပတ္တိကော ပုဂ္ဂလော ဇာနိတဗ္ဗော။ အဘိဏ္ဟာပတ္တိကော ပုဂ္ဂလော ဇာနိတဗ္ဗော။ စောဒကော ပုဂ္ဂလော ဇာနိတဗ္ဗော။ စုဒိတကော ပုဂ္ဂလော ဇာနိတဗ္ဗော။ အဓမ္မစောဒကော ပုဂ္ဂလော ဇာနိတဗ္ဗော။ အဓမ္မစုဒိတကော ပုဂ္ဂလော ဇာနိတဗ္ဗော။ ဓမ္မစောဒကော ပုဂ္ဂလော ဇာနိတဗ္ဗော။ ဓမ္မစုဒိတကော ပုဂ္ဂလော ဇာနိတဗ္ဗော ။ နိယတော ပုဂ္ဂလော ဇာနိတဗ္ဗော။ အနိယတော ပုဂ္ဂလော ဇာနိတဗ္ဗော။ အဘဗ္ဗာပတ္တိကော ပုဂ္ဂလော ဇာနိတဗ္ဗော။ ဘဗ္ဗာပတ္တိကော ပုဂ္ဂလော ဇာနိတဗ္ဗော။ ဥက္ခိတ္တကော ပုဂ္ဂလော ဇာနိတဗ္ဗော။ အနုက္ခိတ္တကော ပုဂ္ဂလော ဇာနိတဗ္ဗော။ နာသိတကော ပုဂ္ဂလော ဇာနိတဗ္ဗော။ အနာသိတကော ပုဂ္ဂလော ဇာနိတဗ္ဗော။ သမာနသံဝာသကော ပုဂ္ဂလော ဇာနိတဗ္ဗော။ အသမာနသံဝာသကော ပုဂ္ဂလော ဇာနိတဗ္ဗော။ ဌပနံ ဇာနိတဗ္ဗန္တိ။
321. Āpattikarā dhammā jānitabbā. Anāpattikarā dhammā jānitabbā. Āpatti jānitabbā. Anāpatti jānitabbā. Lahukā āpatti jānitabbā. Garukā āpatti jānitabbā. Sāvasesā āpatti jānitabbā. Anavasesā āpatti jānitabbā. Duṭṭhullā āpatti jānitabbā. Aduṭṭhullā āpatti jānitabbā. Sappaṭikammā āpatti jānitabbā. Appaṭikammā āpatti jānitabbā. Desanāgāminī āpatti jānitabbā. Adesanāgāminī āpatti jānitabbā. Antarāyikā āpatti jānitabbā. Anantarāyikā āpatti jānitabbā. Sāvajjapaññatti āpatti jānitabbā. Anavajjapaññatti āpatti jānitabbā. Kiriyato samuṭṭhitā āpatti jānitabbā. Akiriyato samuṭṭhitā āpatti jānitabbā. Kiriyākiriyato samuṭṭhitā āpatti jānitabbā. Pubbāpatti jānitabbā. Aparāpatti jānitabbā. Pubbāpattīnaṃ antarāpatti jānitabbā. Aparāpattīnaṃ antarāpatti jānitabbā. Desitā gaṇanūpagā āpatti jānitabbā. Desitā na gaṇanūpagā āpatti jānitabbā. Paññatti jānitabbā. Anupaññatti jānitabbā. Anuppannapaññatti jānitabbā. Sabbatthapaññatti jānitabbā. Padesapaññatti jānitabbā. Sādhāraṇapaññatti jānitabbā . Asādhāraṇapaññatti jānitabbā. Ekatopaññatti jānitabbā. Ubhatopaññatti jānitabbā. Thullavajjā āpatti jānitabbā. Athullavajjā āpatti jānitabbā. Gihipaṭisaṃyuttā āpatti jānitabbā. Na gihipaṭisaṃyuttā āpatti jānitabbā. Niyatā āpatti jānitabbā. Aniyatā āpatti jānitabbā. Ādikaro puggalo jānitabbo. Anādikaro puggalo jānitabbo. Adhiccāpattiko puggalo jānitabbo. Abhiṇhāpattiko puggalo jānitabbo. Codako puggalo jānitabbo. Cuditako puggalo jānitabbo. Adhammacodako puggalo jānitabbo. Adhammacuditako puggalo jānitabbo. Dhammacodako puggalo jānitabbo. Dhammacuditako puggalo jānitabbo . Niyato puggalo jānitabbo. Aniyato puggalo jānitabbo. Abhabbāpattiko puggalo jānitabbo. Bhabbāpattiko puggalo jānitabbo. Ukkhittako puggalo jānitabbo. Anukkhittako puggalo jānitabbo. Nāsitako puggalo jānitabbo. Anāsitako puggalo jānitabbo. Samānasaṃvāsako puggalo jānitabbo. Asamānasaṃvāsako puggalo jānitabbo. Ṭhapanaṃ jānitabbanti.
ဧကကံ နိဋ္ဌိတံ။
Ekakaṃ niṭṭhitaṃ.
တသ္သုဒ္ဒာနံ –
Tassuddānaṃ –
ကရာ အာပတ္တိ လဟုကာ၊ သာဝသေသာ စ ဒုဋ္ဌုလ္လာ။
Karā āpatti lahukā, sāvasesā ca duṭṭhullā;
ပဋိကမ္မဒေသနာ စ၊ အန္တရာ ဝဇ္ဇကိရိယံ။
Paṭikammadesanā ca, antarā vajjakiriyaṃ.
ကိရိယာကိရိယံ ပုဗ္ဗာ၊ အန္တရာ ဂဏနူပဂာ။
Kiriyākiriyaṃ pubbā, antarā gaṇanūpagā;
ထုလ္လဂိဟိနိယတာ စ၊ အာဒိ အဓိစ္စစောဒကော။
Thullagihiniyatā ca, ādi adhiccacodako;
အဓမ္မဓမ္မနိယတော၊ အဘဗ္ဗောက္ခိတ္တနာသိတာ။
Adhammadhammaniyato, abhabbokkhittanāsitā;
သမာနံ ဌပနဉ္စေဝ၊ ဥဒ္ဒာနံ ဧကကေ ဣဒန္တိ။
Samānaṃ ṭhapanañceva, uddānaṃ ekake idanti.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / ဧကကဝာရဝဏ္ဏနာ • Ekakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဧကကဝာရဝဏ္ဏနာ • Ekakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဧကကဝာရဝဏ္ဏနာ • Ekakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဧကကဝာရဝဏ္ဏနာ • Ekakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ဧကုတ္တရိကနယော ဧကကဝာရဝဏ္ဏနာ • Ekuttarikanayo ekakavāravaṇṇanā
