| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
18. අට්‌ඨාරසමවග්‌ගො
18. Aṭṭhārasamavaggo
(181) 5. එකමග්‌ගකථා
(181) 5. Ekamaggakathā
810. එකෙන අරියමග්‌ගෙන චත්‌තාරි සාමඤ්‌ඤඵලානි සච්‌ඡිකරොතීති? ආමන්‌තා. චතුන්‌නං ඵස්‌සානං…පෙ.… චතුන්‌නං සඤ්‌ඤානං සමොධානං හොතීති? න හෙවං වත්‌තබ්‌බෙ…පෙ.… එකෙන අරියමග්‌ගෙන චත්‌තාරි සාමඤ්‌ඤඵලානි සච්‌ඡිකරොතීති? ආමන්‌තා. සොතාපත්‌තිමග්‌ගෙනාති ? න හෙවං වත්‌තබ්‌බෙ…පෙ.… සකදාගාමි…පෙ.… අනාගාමිමග්‌ගෙනාති? න හෙවං වත්‌තබ්‌බෙ…පෙ.….
810. Ekena ariyamaggena cattāri sāmaññaphalāni sacchikarotīti? Āmantā. Catunnaṃ phassānaṃ…pe… catunnaṃ saññānaṃ samodhānaṃ hotīti? Na hevaṃ vattabbe…pe… ekena ariyamaggena cattāri sāmaññaphalāni sacchikarotīti? Āmantā. Sotāpattimaggenāti ? Na hevaṃ vattabbe…pe… sakadāgāmi…pe… anāgāmimaggenāti? Na hevaṃ vattabbe…pe….
කතමෙන මග්‌ගෙනාති? අරහත්‌තමග්‌ගෙනාති. අරහත්‌තමග්‌ගෙන සක්‌කායදිට්‌ඨිං විචිකිච්‌ඡං සීලබ්‌බතපරාමාසං ජහතීති? න හෙවං වත්‌තබ්‌බෙ…පෙ.… අරහත්‌තමග්‌ගෙන සක්‌කායදිට්‌ඨිං විචිකිච්‌ඡං සීලබ්‌බතපරාමාසං ජහතීති? ආමන්‌තා. නනු තිණ්‌ණං සංයොජනානං පහානං සොතාපත්‌තිඵලං වුත්‌තං භගවතාති? ආමන්‌තා. හඤ්‌චි තිණ්‌ණං සංයොජනානං පහානං සොතාපත්‌තිඵලං වුත්‌තං භගවතා, නො ච වත රෙ වත්‌තබ්‌බෙ – ‘‘අරහත්‌තමග්‌ගෙන සක්‌කායදිට්‌ඨිං විචිකිච්‌ඡං සීලබ්‌බතපරාමාසං ජහතී’’ති.
Katamena maggenāti? Arahattamaggenāti. Arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatīti? Na hevaṃ vattabbe…pe… arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatīti? Āmantā. Nanu tiṇṇaṃ saṃyojanānaṃ pahānaṃ sotāpattiphalaṃ vuttaṃ bhagavatāti? Āmantā. Hañci tiṇṇaṃ saṃyojanānaṃ pahānaṃ sotāpattiphalaṃ vuttaṃ bhagavatā, no ca vata re vattabbe – ‘‘arahattamaggena sakkāyadiṭṭhiṃ vicikicchaṃ sīlabbataparāmāsaṃ jahatī’’ti.
අරහත්‌තමග්‌ගෙන ඔළාරිකං කාමරාගං ඔළාරිකං බ්‍යාපාදං ජහතීති? න හෙවං වත්‌තබ්‌බෙ…පෙ.… අරහත්‌තමග්‌ගෙන ඔළාරිකං කාමරාගං ඔළාරිකං බ්‍යාපාදං ජහතීති? ආමන්‌තා. නනු කාමරාගබ්‍යාපාදානං තනුභාවං සකදාගාමිඵලං වුත්‌තං භගවතාති? ආමන්‌තා. හඤ්‌චි කාමරාගබ්‍යාපාදානං තනුභාවං සකදාගාමිඵලං වුත්‌තං භගවතා, නො ච වත රෙ වත්‌තබ්‌බෙ – ‘‘අරහත්‌තමග්‌ගෙන ඔළාරිකං කාමරාගං ඔළාරිකං බ්‍යාපාදං ජහතී’’ති.
Arahattamaggena oḷārikaṃ kāmarāgaṃ oḷārikaṃ byāpādaṃ jahatīti? Na hevaṃ vattabbe…pe… arahattamaggena oḷārikaṃ kāmarāgaṃ oḷārikaṃ byāpādaṃ jahatīti? Āmantā. Nanu kāmarāgabyāpādānaṃ tanubhāvaṃ sakadāgāmiphalaṃ vuttaṃ bhagavatāti? Āmantā. Hañci kāmarāgabyāpādānaṃ tanubhāvaṃ sakadāgāmiphalaṃ vuttaṃ bhagavatā, no ca vata re vattabbe – ‘‘arahattamaggena oḷārikaṃ kāmarāgaṃ oḷārikaṃ byāpādaṃ jahatī’’ti.
අරහත්‌තමග්‌ගෙන අණුසහගතං කාමරාගං අණුසහගතං බ්‍යාපාදං ජහතීති? න හෙවං වත්‌තබ්‌බෙ…පෙ.… අරහත්‌තමග්‌ගෙන අණුසහගතං කාමරාගං අණුසහගතං බ්‍යාපාදං ජහතීති? ආමන්‌තා . නනු කාමරාගබ්‍යාපාදානං අනවසෙසප්‌පහානං අනාගාමිඵලං වුත්‌තං භගවතාති? ආමන්‌තා. හඤ්‌චි කාමරාගබ්‍යාපාදානං අනවසෙසප්‌පහානං අනාගාමිඵලං වුත්‌තං භගවතා, නො ච වත රෙ වත්‌තබ්‌බෙ – ‘‘අරහත්‌තමග්‌ගෙන අණුසහගතං කාමරාගං අණුසහගතං බ්‍යාපාදං ජහතී’’ති.
Arahattamaggena aṇusahagataṃ kāmarāgaṃ aṇusahagataṃ byāpādaṃ jahatīti? Na hevaṃ vattabbe…pe… arahattamaggena aṇusahagataṃ kāmarāgaṃ aṇusahagataṃ byāpādaṃ jahatīti? Āmantā . Nanu kāmarāgabyāpādānaṃ anavasesappahānaṃ anāgāmiphalaṃ vuttaṃ bhagavatāti? Āmantā. Hañci kāmarāgabyāpādānaṃ anavasesappahānaṃ anāgāmiphalaṃ vuttaṃ bhagavatā, no ca vata re vattabbe – ‘‘arahattamaggena aṇusahagataṃ kāmarāgaṃ aṇusahagataṃ byāpādaṃ jahatī’’ti.
811. න වත්‌තබ්‌බං – ‘‘එකෙන අරියමග්‌ගෙන චත්‌තාරි සාමඤ්‌ඤඵලානි සච්‌ඡිකරොතී’’ති? ආමන්‌තා. භගවතා සොතාපත්‌තිමග්‌ගො භාවිතොති? ආමන්‌තා . භගවා සොතාපන්‌නොති? න හෙවං වත්‌තබ්‌බෙ…පෙ.… භගවතා සකදාගාමි…පෙ.… අනාගාමිමග්‌ගො භාවිතොති? ආමන්‌තා. භගවා අනාගාමීති? න හෙවං වත්‌තබ්‌බෙ…පෙ.….
811. Na vattabbaṃ – ‘‘ekena ariyamaggena cattāri sāmaññaphalāni sacchikarotī’’ti? Āmantā. Bhagavatā sotāpattimaggo bhāvitoti? Āmantā . Bhagavā sotāpannoti? Na hevaṃ vattabbe…pe… bhagavatā sakadāgāmi…pe… anāgāmimaggo bhāvitoti? Āmantā. Bhagavā anāgāmīti? Na hevaṃ vattabbe…pe….
812. භගවා එකෙන අරියමග්‌ගෙන චත්‌තාරි සාමඤ්‌ඤඵලානි සච්‌ඡිකරොති, සාවකා චතූහි අරියමග්‌ගෙහි චත්‌තාරි සාමඤ්‌ඤඵලානි සච්‌ඡිකරොන්‌තීති? ආමන්‌තා. සාවකා බුද්‌ධස්‌ස භගවතො අදිට්‌ඨං දක්‌ඛන්‌ති අනධිගතං අධිගච්‌ඡන්‌ති අසච්‌ඡිකතං සච්‌ඡිකරොන්‌තීති? න හෙවං වත්‌තබ්‌බෙ…පෙ.….
812. Bhagavā ekena ariyamaggena cattāri sāmaññaphalāni sacchikaroti, sāvakā catūhi ariyamaggehi cattāri sāmaññaphalāni sacchikarontīti? Āmantā. Sāvakā buddhassa bhagavato adiṭṭhaṃ dakkhanti anadhigataṃ adhigacchanti asacchikataṃ sacchikarontīti? Na hevaṃ vattabbe…pe….
එකමග්‌ගකථා නිට්‌ඨිතා.
Ekamaggakathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 5. එකමග්‌ගකථාවණ්‌ණනා • 5. Ekamaggakathāvaṇṇanā
